1. E kua akaue akaou mai te Atua iaku, ko Alama, kia rave au ia Amuleka ma te aere atu e ako akaou atu i teia iti tangata, koia oki te au tangata i roto i te oire ko Amoniha, e i toku akamataanga i te ako atu ia ratou, kua akamata ratou i te taumaro mai kiaku ma te na ko mai e,

2. Koai koe? E manako koe e ka irinaki matou i te kite o te tangata okotai, no atu e ka ako katoa mai kia matou e, ka ngaro ke atu te ao nei?

3. E kare oki ratou i marama i te tuatua ta ratou i tuatua ra, e kare oki ratou i kite e, ka riro atu rai te ao nei.

4. E kua tuatua katoa ratou e, kare matou e irinaki i taau tuatua me totou mai koe e, ka uritumuia teia oire maata i roto i te rā okotai.

5. E kare oki ratou i kite e, ka rauka i te Atua i te rave i tetai angaanga umere, no te mea e aronga marokiakia oki ratou e te ngakau parau.

6. Kua na ko akera ratou e, koai te Atua, tei kore rava i oronga mai i te au kite e maata atu i te tangata okotai ki rotopu i teianei iti tangata kia akakite atu i te tika o teia au mea maata e te umere?

7. Kua tu maira ratou ma te inangaro i te ta mai iaku, ina ra, kare ratou i pera. E kua tu ua atu au ma te mataku kore i te akakite anga atu kia ratou, ma te akapapu tikai atu kia ratou i te na ko anga e;

8. E i na, e kotou e teia uki rave kino e, i akapeea i ngaropoinaʼi ia kotou te akonoanga o to kotou ai tupuna, e i akapeea i ngaropoinaʼi ia kotou te au akaueanga a te Atua.

9. Kare ainei i maara ia kotou e, na te rima o te Atua i apai mai i to tatou metua ko Lihai mei Ierusalema mai? Kare ainei i maara ia kotou e, nana i arataki mai ia kotou na roto mai te metepara?

10. E kua ngaropoina ainei ia kotou i te maata o te taime i akaora ana aia i to tatou ai metua mei roto i te rima o to ratou au enemi, ma te paruru kia kore ratou e takinga kinoia e to ratou uaorai ai taeake?

11. E naringa oki e kare tona mana maata e te aroa, e tona akakoromaki anga roa kia tatou, kua tipu takereia tatou mei te ao nei e penei ake kua uriia ki te ngai openga kore e te mamae, e te aue.

12. E i na, te karanga atu nei au kia kotou e, te akaue mai nei aia ia kotou kia tataraara, e me kore oki kotou e tataraara kare kotou e ō ki te basileia o te Atua. E i na, kare oki e ko teia ua, kua akaue mai aia ia kotou kia tataraara, me kore oki ka takore takiri aia ia kotou i te ao nei, e ka tae mai aia kia kotou ma tona riri, e ma tona riri otooto, kare aia e uri ke.

13. E i na, kare ainei e maara ana ia kotou te tuatua tana i tuatua atu kia Lihai i te na ko anga e, me ka akono kotou i taku au akaueanga, ka manuia kotou i te enua? E kua tuatua katoa aia e, mei te mea e kare kotou e akono i te au akaueanga, ka tipuia kotou ki vao mei te aroaro o te Atu.

14. No reira te anoano nei au kia akamaara kotou e, no te mea oki e kare te ngati Lamana i akono i te au akaueanga a te Atua, kua tipu keia ratou mei mua atu i te aroaro o te Atu. No reira te kite nei tatou e, kua tupu te tuatua a te Atua i roto i teia au mea nei, e kua tipu keia te ngati Lamana mei mua atu i tona aroaro mei to ratou akamataanga i te rave i te ara ki runga i te enua nei.

15. E no reira te karanga atu nei au kia kotou, ka maata atu te meitaki no ratou i te rā akavaanga i to kotou, e me noo ua rai kotou ki roto i te ara, e te maata o to ratou meitaki i teia oraanga nei kia kotou, mari ra, kia tataraara rava ra kotou.

16. E manganui oki te au taputou anga tei orongaia ki te ngati Lamana, e no te mea oki e no te akonoanga a to ratou ai tupuna i noo uaʼi ratou ki roto i te kite kore, e no reira ka aroa mai te Atua ia ratou ma te akaroa atu i to ratou noo anga ki runga i te enua.

17. E te vai ra te taime ka irinaki ei ratou ki tana tuatua, e ma te kite i te tarevake o te akonoanga a to ratou ai tupuna, e e manganui oki ratou ka akaoraia, ka aroa mai oki te Atua ia ratou tei kapiki i tona ra ingoa.

18. E i na, te karanga atu nei au kia kotou e, me noo tamou ua rai kotou ki roto i te kino, kare to kotou au puke rā e akaroaia atu ki runga i te enua, no te mea ka akaungaia mai te ngati Lamana kia kotou, e me kore kotou e tataraara, ka tae mai ratou i te ora manako koreia, e ka rokoia kotou e te mate maata kia tau oki ki te riri otooto o te Atu.

19. E kare oki aia e inangaro ia kotou kia noo ua rai ki roto i te kino e te ara, e ma te takinga kino i tona iti tangata. Te karanga atu nei au kia kotou e, kare, ka tika iaia kia takinga kino mai i te ngati Lamana e tona iti tangata katoatoa ko tei karangaia e, ko te ngati Niphai, e pou takiri mei te mea e ka rave tamou ua atu rai ratou i te ara, e te kino, i muri ake i te marama e te kite maata, tei orongaia mai kia ratou e to ratou Atua.

20. E i muri ake i te riro anga ratou ei aronga ngateitei no te Atua, e ma te akangateitei katoaia ki runga i te au basileia e te au iti tangata, e te au kopu, e te au reo, e ope pouroa atura ia ratou i te akakiteia i teia au mea, tei tupu ana, e te tupu nei, e te ka tupu a muri ake, kia tau ki to ratou inangaro, e te akarongo e te pure.

21. E kua atoroia ana ratou e te Vaerua o te Atua, kua atoro katoaia e te angela, e mei tei tuatua katoa ia e te reo o te Atu, e te vaerua o te totou, te eeuanga, e te vaerua o te apinga aroa e manganui, te oronga anga o te au reo ke ke, e te ako anga, e te orongaanga o te vaerua tapu, e te oronga anga o te akaurianga;

22. E i muri ake i te akaoraanga te Atua ia ratou mei te enua mai ko Ierusalema ki tona uaorai rima, e kua akaoraia mei te onge e te maki, e te au tu maki ravarai, kua maroiroi tikai ratou i te tamakianga, kia kore ratou e pou i te mate, e ma te akaoraia mai mei roto i te ngai i tuikaaʼi ra, i tera tuatau e i tera tuatau, e kua akonoia e e paruruia e tae rava mai ki teia taime, e kua akamanuia oki ratou e apinga nui rava akera ratou.

23. E i na, te karanga atu nei au kia kotou, e mei te mea e ko teia iti tangata tei rauka te au akameitakianga mei ko mai i te Atua, ka apa ratou i te kite e te marama tei rauka ia ratou, e te karanga atu nei au kia kotou, mei te mea e ko teia, e ka topa ratou ki roto i te ara, ka meitaki roa atu te ngati Lamana ia ratou.

24. E i na, ko te au taputouanga a te Atua, kua orongaia mai te reira ki te ngati Lamana, ina ra kare e no kotou mei te mea ka ara kotou, kare ainei te Atua i taputou pakari mai ma te tuatua papu mai e, me akaruke kotou iaku nei, ka takoreia kotou i te enua nei?

25. E no teia tumu nei, e kore ei ratou e uritumuia, kua unga mai oki te Atu i tana au angela kia aravei atu i tona iti tangata e manganui ma te akakite atu kia ratou ma te reo maata i te na ko anga e, e tataraara kotou, te vaitata mai nei oki te basileia o te Ao.

26. E kare e mamao atu ana te au rā, ka tae mai ei te tamaiti a te tangata nei ma tona kaka, e ko tona kaka, koia te kaka o te Tamaiti Anau Tai a te Metua, kua ki oki i te mana, te aroa ua, e te tuatua mou, e kua ki katoa i te maru, e te aroa, e te akakoromakianga roa, e viviki i te akarongo i te aue a tona iti tangata, ma te pau atu i ta ratou au pure.

27. E i na, kua aere mai oki aia ei akaora i te aronga tei bapetizoia ma te tataraara, na roto i te akarongo ki tona ra ingoa.

28. E no reira, e akateateamamao i te ara o te Atu, te vaitata mai nei oki te taime e kokoti ei te au tangata i te tutaki no ta ratou au angaanga kia tau ki ta ratou i rave, e mei te mea e kua tika ratou, ka kokoti ratou i te akaoraanga no to ratou au vaerua, kia tau ki te mana e te akaoraanga o Iesu Mesia, e mei te mea e e aronga kino ratou, ka kokoti ratou i te akaapaanga e te kino no to ratou au vaerua kia tau ki te tuikaaanga a te tiaporo.

29. E teianei, ko te reo teia o te angela, i te ako anga atu ki te au tangata.

30. E teianei, e aku au taeake akaperepere. ko kotou oki toku au taeake e kua tau oki kia akaperepereia, e e mea tau oki ia kotou kia apai mai i te au angaanga tei tau no te tataraara, i na, e marokiakia tikai to kotou ngakau ki te tuatua a te Atua, e e aronga ngaro kotou e te inga i te timataanga.

31. E i na, i muri ake i toku, to Alama, tuatuaanga i teia au tuatua nei, i na, kua riri te tangata iaku no te mea, kua karanga atu au kia ratou e, e aronga ngakau ketaketa ratou e te marokiakia.

32. E no te mea kua karanga katoa atu au kia ratou e, e aronga ngaro ratou e te inga i te timataanga, no reira kua riri ratou iaku, ma te inangaro kia amiri to ratou rima iaku, e kia rauka oki ia ratou i te titiri iaku ki roto i te are auri.

33. Ina ra, kare oki te Atua i akatika ia ratou kia titiri ratou iaku i taua taime ra ki roto i te are auri.

34. E i na, kua aere atura a Amuleka e tu ua iora ki mua ia ratou ma te akamata atu i te ako atu kia ratou. Ina ra, kare te katoatoa o te tuatua a Amuleka i tataia, ko tetai pae ua ra o tana tuatua tei tataia ki roto i teia puka nei.