1. E teianei e aku au taeake e akara ki muri ki te taime i oronga mai ei te Atu to tatou Atua i teia nga akaueanga nei ki tana au tamariki, e te anoano nei au kia akamaara kotou e, kua akamana te Atu ko te Atua i te au taunga ki tana akaaereanga tapu, koia oki te akaaereanga o tana Tamaiti, kia apii atu i teia au mea ki te tangata nei.

2. E kua akamanaia taua au taunga ra, ki te akaaereanga a te Tamaiti, kia rauka oki i te tangata nei te kite i te ravenga, e akara atu ei ki tana Tamaiti e oraʼi.

3. E ko teia oki te tu i akatainuiaʼi ratou, kua ikiia, e kua akateateamamaoia mei te akatumuangaia mai o te ao nei, kia tau ki ta te Atua i akakite mai, no to ratou akarongo e te angaanga meitaki. Kua vaoo uaia kia iki i te meitaki e te kino, e no te mea, kua iki ratou i te meitaki ma te taangaanga i to ratou akarongo ki te maata, kua ikiia ki te kapikianga tapu, i na, ki taua kapikianga tapu ra tei akateateamamaoia kia tau ki te akaoraanga i akateateamamaoia no ratou.

4. E kua kapikiia oki ratou, ki teia kapikianga tapu no to ratou akarongo, kua patoi ra tetai pae i te Vaerua o te Atua no te marokiakia o to ratou ngakau, e te poiri o to ratou manako, e naringa oki e kare, kua rauka ia ratou tetai tikaanga maata mei to ratou taeake rai.

5. I na, i muatangana, kua aiteite ratou ki to ratou au taeake, kua akapapa takereia oki teia kapikianga tapu mei te akatumuanga mai rai o teia nei ao, no te aronga tei kore i akaketaketa i to ratou ngakau, e na roto oki ïa i te tapokianga ara a te Tamaiti Anau Tai tei akapapaia.

6. Kua kapikiia ki teia kapikianga tapu e kua akatainuia ki te mana kautaunga teitei o te akaaereanga tapu a te Atua, ei apii i tana au akaueanga ki te tamariki a te tangata nei, e kia ō oki ratou ki tona akangaroianga.

7. Ko te mana kautaunga teitei ko te tu rai ia i te akaaereanga a te Atua, i vai ana mei te taime mai i akatumuiaʼi te ao nei, me kore ra, kare e akamata anga i tona au ra, e kare e openga o tona au mataiti, e mea mutu kore oki ia, e ka vai rai e tuatau ua atu, kia tau oki ki tana i kite i te au mea ravarai.

8. Kua akatainuia ratou mei teia te tu, kua kapikiia ki te kapikianga tapu, e ma te akatainuia ki te angaanga oroa tapu ma te tuku katoa ki rungao ia ratou i te mana kautaunga teitei o te akaaereanga tapu, e kare e akamataanga, e kare e openga o taua kapikianga ra, e te angaanga oroa, e te kautaunga teitei.

9. Kua riro mai ratou ei au taunga teitei e tuatau ua atu, i te akaaereanga a te Tamaiti Anau Tai a te Metua, e kare oki e akamataanga o tona au ra, e kare oki e openga o te mataiti, kua ki oki i te kaka, te aroa, e te tuatua mou. E kua pera oki. Amene.

10. E mei taku rai i tuatua atu no te akaaereanga tapu o teia mana kautaunga teitei, e manganui tei akatainuia e kua riro mai ei au taunga teitei na te Atua, e na roto oki i to ratou akarongo maata e te tataraara, e to ratou tu tika ki mua i te Atua. Kua inangaro oki ratou i te tataraara ma te rave i te au angaanga tika ki mua i te Atua, eiaa ra e mate atu.

11. E no reira, kua ikiia ratou ki teia akaaereanga tapu, e kua akatapuia, e kua tamaia to ratou kakau kia teatea na roto i te toto o te Punua Mamoe.

12. I muri ake i to ratou akatapuangaia e te Vaerua Tapu, e ma te akateateaia to ratou kakau, ma te tiama e te topata kore ki mua i te Atua, kare rava e rauka ia ratou i te akara akaou atu ki te ara mari ra, ma te rikarika, e e manganui tikai oki tei ma, e kua ō ki roto i te akangaroianga o to ratou Atua.

13. E teianei e aku au taeake te anoano nei au kia akaaka kotou ki mua i te Atua, ma te oronga mai i te au ua o te tataraara, kia o katoa kotou ki roto i tona akangaroianga.

14. E taakaaka ia kotou mei te au tangata i te tuatau o Melekizedeka, koia oki te taunga teitei ki teia akaaereanga mei taku i tuatua atu ana, ko tei mou katoa ana i te kautaunga teitei e tuatau ua atu.

15. E ko taua Melekizedeka ra, koia ta Aberahama i tutaki atu ki te ngauruanga e kua tutaki rai to tatou metua ko Aberahama i te tuanga ngauru o te au mea tei rauka iaia.

16. I na, kua orongaia mai teia au angaanga oroa nei mei teia te tu, kia akara oki te au tangata ki te tamaiti a te Atua, ko te tu rai ïa o tana akaaereanga, me kore, ko tana akatereanga rai ïa. E ko teia oki kia akara atu ratou kiaia no te akakoreanga i ta ratou au ara, kia ō oki ratou ki roto i te akangaroianga o te Atu.

17. I na, ko Melekizedeka, e ariki aia no te enua ko Salema, e kua rave maro tikai taua iti tangata ra i te ara, e kua aere ke anake ratou ma te ki oki i te au tu kino e manganui.

18. Ina ra, no te akarongo maata o Melekizedeka e ma te taoonga o te kautaunga teitei kia tau ki te akaaereanga tapu a te Atua, kua ako atu ratou i te au tangata kia tataraara. E kua tataraara ratou, e i reira kua akatinamou a Melekizedeka i te au ki runga i te enua i roto i tona au ra, e no reira kua kapikiia aia e ko te ariki o te au, no te mea koia te ariki o Salema, e kua tutara aia ki raro ake i te akatereanga a tona metua tane.

19. I na, e manganui oki to mua ake iaia, e e manganui katoa to muri iaia, ina ra, kare tetai i maata ake iaia, e no reira, kua akakite mai ratou no runga iaia.

20. I na, kare au e tuatua atu i teia au mea nei, kua rava taku tuatua. I na, tei mua ia kotou te au irava, me ka akatarevake kotou i te reira, ka riro ïa ei mate no kotou.

21. I te oti anga a Alama i te akakite atu i teia au tuatua nei, kia ratou, kua oora atu aia i tona rima kia ratou ma te kapiki atu kia ratou ma te reo maata i te na ko anga e, ko te taime teia no te tataraara, te vaitata mai nei oki te rā o te akaoraanga.

22. E te reo o te Atu, na roto mai ïa i te vaa o te au angela a te Atua i te akakiteangaia atu ki te au iti tangata kia rauka ia ratou te tuatua mataora e kua akakite katoa aia i teia tuatua mataora ki tona iti tangata, e ki te aronga katoa tei totoa atu ki te au ngai ravarai o te ao nei, e kua aere katoa mai ratou kia tatou.

23. E kua akakiteia mai te reira kia tatou i te tuatua marama ua kia marama oki tatou, kia kore oki tatou e tarevake, e teia, no te mea, e au tuitarere tatou i te enua ke; e iti tangata akaperepereia oki tatou no te mea, kua akakiteia teia tuatua mataora ki te ngai katoatoa o te kainga vine.

24. E i na, te akakite nei oki te au angela e manganui ki te au tangata i roto i to tatou enua, i te akakoroanga oki, no te akateateamamao anga i te ngakau o te tamariki a te tangata no te arikianga atu i te tuatua a te Atua me tae ki tona aereanga mai ma tona kaka.

25. I na, te tiaki nei tatou kia akarongo i te tuatua mataora te ka akakiteia mai kia tatou mei roto mai i te vaa o te au angela no tona aereanga mai, ka tae mai te taime kare ra tatou i kite e aea. Me ka tika i te Atua, i toku nei au ra; ina ra, me ka vaitata mai, me ka roa atu, ka rekareka tikai au i te reira.

26. E ka akakiteia mai ki te au tangata tapu e te tika, na roto mai i te vaa o te au angela me tae ki tona aereanga mai, e ka tupu oki te tuatua a to tatou au metua mei ta ratou i tuatua mai nona, mei ta te vaerua o te totou i vai ki roto ia ratou.

27. E teianei, e aku au taeake, te inangaro tikai nei toku ngakau kia akarongo mai oki kotou ki taku tuatua ma te akakore i ta kotou au ara, e auraka e tavarevare i te ra no te tataraara.

28. Kia akaaka ra kotou ki mua i te Atua, ma te kapiki atu i tona ra ingoa tapu, e kia ara e pure putuputu kia kore oki kotou e timataia mai i te timataanga tei kore e rauka ia kotou i te akakoromaki, e kia aratakiia ra e te Vaerua Tapu ma te maru, akamoeau, kauraro, akaaka, ki i te aroa ua, e te akakoromakianga roa katoa.

29. Ma te akarongo ki te Atu, ma te manakonako e ka rauka ia kotou te ora mutu kore, ma te aroa o te Atua i roto i to kotou ngakau kia akateiteiia mai ei kotou i te rā openga ka noo ei ki tona ra akangaroianga.

30. E kia oronga mai te Atua kia kotou te ngakau tataraara, kia kore oki kotou e akatae mai i tona riri ki rungao ia kotou, e kia kore oki kotou e tapekaia ki te vivi o ade, e kia kore oki e rauka ia kotou te rua o te mate.

31. E kua tuatua akaou atu a Alama i tetai au tuatua ki te tangata, tei kore i tataia ki roto i te puka.