1. I na, e rekareka maata tikai to te ngati Niphai no te mea, kua akaora te Atua ia ratou mei te rima o to ratou au enemi, e no reira oki ratou i akameitaki atu ei i te Atu to ratou Atua, e maata oki to ratou akakoreanga i te kai, e ta ratou pure, e kua akamori oki ratou i te Atua ma te rekareka mata.

2. E tae akera ki te tai ngauru ma iva o te mataiti i te tutaraanga o te au akava ki rungao i te au tangata o Niphai, kua aere maira a Alama ki tana tamaiti ra kia Hilamana, e kua na ko maira kiaia, kua irinaki ainei koe ki te tuatua taku i tuatua atu kia koe na no runga i tera au papa tuatua i akonoia ra?

3. E kua tuatua atura a Hilamana, ae, kua irinaki au.

4. E kua tuatua akaou maira a Alama, kua irinaki ainei koe ia Iesu Mesia te ka tae mai?

5. E kua na ko atura aia e, kua irinaki au i te au tuatua katoa taau i tuatua maira.

6. E kua tuatua akaou maira a Alama kiaia e, ka akono ainei koe i taku au akaueanga?

7. Kua karanga atura aia e, koia ïa, ka akono oki au i taau au akaueanga ma toku ngakau katoa.

8. Kua na ko atura a Alama kiaia e, e ao toou, na te Atua e akameitaki mai ia koe i te enua nei.

9. I na, e tuatua totou taku kia koe, e ko taku ka totou atu, auraka rava koe e akakite ua atu, I na, ko taku ka totou atu kia koe auraka rava kia akakiteia atu, e kia tupu roa taua totou nei, e no reira e tata koe i te au tuatua taku ka tuatua atu.

10. E ko teia oki taua tuatua ra, i na, te kite nei au na roto i te vaerua o te eeuanga i roto iaku e, e ope akera te a anere o te mataiti i muri ake i te tuatau e akakite mai ei a Iesu Mesia iaia uaorai kia ratou ra, e mate oki ratou ki roto i te irinaki kore.

11. Ei reira oki ratou e kite ei i te au tamaki, e te maki, e te onge, e te akamaringianga toto, e pou roa atu te ngati Niphai i te mate.

12. E ka tupu oki teia no te mea, e paruparu ratou i te irinaki, e kua rave ratou i te angaanga i roto i te poiri, e te viivii, e te au tu ara ravarai, e te karanga atu nei au kia koe e, no te mea, ka ara i te marama maata e te kite, e te karanga atu nei au kia koe, e, mei taua rā ra, kare oki e pou te a o te uki e tae mai ei taua ara maata ra.

13. E me tae mai taua rā ra, i na, kua vaitata mai te tuatau, e kore ei teia aronga, koia oki te uanga a teia nei aronga ko tei karangaia e, ko te ngati Niphai, e kare e tarē akaouia e, e ngati Niphai.

14. Ko te ka toe ra e kare e mate i taua rā mataku maata ra, ka tarēia ratou ki roto i te ngati Lamana, e ka riro mai mei ia ratou rai te tu, mari ra ko tetai pae ko te ka kapikiia e, ko te au pipi a te Atu, e ka kimi mai oki te ngati Lamana ia ratou, e mate roa atu ratou. E teianei, no te ara oki i tupu ei teia au totouanga nei.

15. E oti akera a Alama i te tuatua atu i teia au tuatua kia Hilamana, kua akameitaki atura aia iaia, e pera katoa ki tana au tamaroa, e kua akameitaki katoa aia i te enua, ei meitaki no te aronga tuatua tika ra.

16. E kua na ko maira aia, te na ko maira te Atu ko te Atua e, ka tau maaia te enua nei, koia oki teia nei enua, e te au enua katoa, te au reo katoa, e te au kopu katoa e rave ra i te kino, e me maata roa ta ratou ara ka mateia ratou, mei taku rai i tuatua ake nei, ka akaperaia rai, e ko teia oki te taumaa, e te akameitaki anga a te Atua ki runga i te enua nei, e kare oki e tika i te Atu kia akara atu i te ara, ma te akatika i tetai mea meangiti ake.

17. E teianei, kia tuatua maira a Alama i taua tuatua ra, kua akameitaki iora aia i te akonoanga, e te katoatoa te ka tamou marie i te akarongo mei reira e tuatua ua atu.

18. E oti akera teia ia Alama, kua akaruke iora aia i te enua ko Zarahemela, mei te mea ra e, ka aere aia ki te enua ra ko Mireki, e kare atura aia i kitea akaouia, e kare katoa matou i kite i tona mateanga, e tona tanumiaanga.

19. I na, teia ta matou i kite, e tangata tuatua tika aia, e kua pararauare te tuatua ki roto i te akonoanga, e kua apainaia, e te vaerua ki runga, me kore ra, kua tanumia e te rima o te Atu, mei ia Mose rai. Ina ra, te na ko maira te tuatua i tataia e, kua rave mai te Atu ia Mose kiaia uaorai, e te manako nei matou e, kua rave katoaia a Alama e te vaerua kiaia uaorai, no reira, i kore ei matou i kite i tona mateanga e tona tanumiaanga.

20. E tae akera ki te akamataanga o te tai ngauru ma iva o te mataiti i te tutaraanga o te au akava ki rungao i te tangata o Niphai ra, kua aere atura a Hilamana ki rotopu i te au tangata ra i te akakite atu i taua tuatua ra.

21. E i na, no ta ratou au tamaki ki te ngati Lamana ra, e ta ratou tuatua maro, e te orureau oki tei tupu ki rotopu ia ratou ra, i riro ei, ei mea tau kia akoia atu te tuatua a te Atua kia ratou e kia akonoia tetai akatikatikaanga ki roto i te akonoanga katoatoa.

22. Kua aere atura a Hilamana e tona au taeake ki te akatinamou akaou i te akonoanga ki roto i te au enua katoatoa, e ki roto i te au oire e pini ua ake te enua tei nooia e te ngati Niphai ra. E kua iki oki ratou i tetai au taunga e te puapii ki roto i te enua katoatoa i roto i te akonoanga.

23. E oti akera ia Hilamana e tona au taeake i te iki i te au tangata ei taunga, e te au puapii, ki rungao i te akonoanga, kua tupu mai te taumaro ki rotopu ia ratou, e kare oki ratou i akarongo atu ki te tuatua a Hilamana e tona au taeake.

24. Kua ngakau parau akera ratou, ma te akateitei i to ratou ngakau, no to ratou au apinga i apinga nui ei, e kua apinga nui ratou i roto i to ratou mata, ma te kore roa e akarongo atu ki ta ratou tuatua kia aere tiratiratu ki mua i te aroaro o te Atua.