1. E oti akera taua tuatua ra i te tuatuaia e Alama, kua noo iora aia ki runga i te one, e kua tu iora a Amuleka ki runga e kua apii atura ia ratou na ko atura e.

2. E aku au taeake, te manako nei au e, kare e rauka ia kotou kia kore kotou e kite i te au mea tei tuatuaia no te aereanga mai o te Mesia ko tei apiiia kia tatou e, ko te tamaiti aia a te Atua, e kua kite au e, kua apiiia ana teia au mea kia kotou i mua ake ka taka ke ei kotou mei rotopu ia matou.

3. E no to kotou inangaro i toku taeake akaperepere, kia akakite atu aia kia kotou e, eaa ta kotou ka rave no to kotou au tumatetenga e kua tuatua atu aia kia kotou kia akapapa i to kotou manako, e kua akamaroiroi atu aia ia kotou kia akarongo e kia akakoromaki.

4. I na, kia rauka ia kotou te akarongo e tanu ei kotou i te tuatua ki roto i to kotou ngakau, e kia tamata kotou i tona meitaki.

5. E kua kite matou e, ko te uianga maata i roto i to kotou ngakau koia oki, tei roto ainei te tuatua i te tamaiti a te Atua, e me kare ainei e Mesia tetai?

6. Kua kite katoa kotou e, kua akakite toku nei taeake kia kotou i te au ngai e manganui, e tei roto te tuatua i te Mesia, e tae atu ei ki te ora.

7. Kua tuatua oki toku nei taeake no runga i te tuatua a Zenosa e, ko te akaoraanga, ka na roto mai te reira i te tamaiti a te Atua, e pera katoa te tuatua a Zenoka, e kua tuatua katoa aia kia Mose ei akapapu e, kua tika teia au mea nei.

8. E teianei, ka akapapu atu au kia kotou e, kua tika teia au mea nei. I na, te karanga atu nei au kia kotou e, kua kite au e, ka aere mai te Mesia ki te tamariki a te tangata nei kia apai ki runga iaia i te ara a te tangata nei, e ka riro oki aia ei tarangaara no te ara a to teianei ao, i na, ko te Atu ko te Atua tei tuatua mai i te reira.

9. E mea tau oki te reira, kia akonoia tetai tarangaara, kia tau oki ki te ravenga maata a te Atua mutu kore, e kia akonoia tetai tarangaara e tikai, e me kore, ka mate ua te tangata nei e tikai, koia oki, kua ketaketa, kua inga, e kua ngaro ratou, e ka mate ratou e tikai, mari ra, na roto i te tarangaara ko tei akonoia kia tau ki te tuatua tika ra.

10. E mea tika oki te atinga maata e te openga e auraka ra te atinga tangata, eiaa katoa te atinga puaka, eiaa katoa i te atinga o te manu reva, no te mea, kare ïa e riro ei atinga tangata, ina ra, kia riro ïa ei atinga aite kore, e te mutu kore e tikai.

11. Kare oki e tika i tetai tangata i te akaatinga i tona uaorai toto ei akakore i te ara a tetai ke. E teianei, me ta tetai tangata i tetai tangata, ka akakore ainei ta tatou ture tika i te ora o tona taeake? Te karanga atu nei au kia kotou e, kare.

12. Ina ra, te inangaro nei te ture i te ora o taua tangata tei ta i te tangata ra, no reira, kare rava tetai mea i meangiti ake i te tarangaara aite kore e rauka i te apai ke i te ara a to teianei ao.

13. E tenana, e mea meitaki kia akonoia tetai atinga maata e te openga, ei reira e meitaki ei, e ka akamutu i te akamaringi toto, e ka tupu i reira te ture a Mose e ka akakikiia te katoatoa e kare rava tetai iota e tetai vaʼi iti poepoe, e ngaro.

14. E i na, ko te aiteanga tikai teia o te ture, e na te reira katoa e akakite atea mai i taua atinga maata e te openga ra, ko te tamaiti ïa a te Atua, e mea aite kore ïa e te mutu kore katoa.

15. E na reira oki aia i te akatupu anga i te ora ki te aronga tei irinaki ki tona ra ingoa, ko te akakoroanga oki teia i taua atinga openga ra kia akatupu i te aroa, tei akakauraro i te tuatua o te akautungaanga, e tei akatupu katoa i te ravenga ki te tangata nei kia rauka ia ratou te akarongo e te tataraara.

16. E no reira, ka tika i te aroa i te akakore i te au tuatua o te akautungaanga, e ma te takako mai ia ratou ki te rima o te ora, e vaioia oki tei kore i rauka te akarongo e tae rava atu ki te tataraara, ki te katoaanga o te ture o te akautunga anga, e no reira, ko tei rauka ua te akarongo e tae roa atu ki te tataraara ka rauka iaia te ravenga maata e te mutu kore o te akaoraanga.

17. E no reira, kia oronga mai te Atua kia kotou e taku au taeake, te akarongo e te tataraara, e kia akamata i te kapiki atu i tona ra ingoa tapu, e kia aroa mai aia ia kotou.

18. Koia ia, e kapiki atu kotou kiaia kia aroa mai, e maroiroi oki aia kia akaora.

19. Koia ia, kia taakaaka ia kotou, e ma te pure tamou atu kiaia.

20. E kapiki atu kiaia, ia kotou i roto i to kotou aua kia tiaki mai i ta kotou anana.

21. E kapiki atu iaia i roto i to kotou au are no to kotou ngutuare tangata, mei te popongi, avatea e te aiai.

22. Koia ia, kia kapiki atu kiaia kia patoi atu i te mana o to kotou au enemi.

23. Koia ia, e kapiki atu kiaia, kia patoi atu i te tiaporo, ko tei riro ei enemi ki te aronga tuatua tika katoatoa.

24. Kia kapiki atu kotou kiaia, kia tiaki mai i ta kotou au apinga tanu i roto i te aua, kia manuia oki kotou.

25. Kia kapiki atu kotou no ta kotou au anana i roto i te aua, kia maata atu ratou.

26. Ina ra, kare ko teia anake ua, kia oronga atu ra kotou i to kotou vaerua katoa ki roto i toou pia, e toou ra ngai muna, e ki roto i te metepara.

27. E me kare koe e kapiki atu ki te Atu, kia ki tikai toou ngakau, i te pure putuputu atu kiaia, ei meitaki no kotou, e pera katoa no te aronga e pini uake ia kotou.

28. E teianei, e aku taeake akaperepere, te karanga atu nei au kia kotou, auraka e manako e, ko teia ua, i muri ake i to kotou rave anga i teia au mea nei e me uri ke kotou mei tei ngere, e tei vai taaka ua, e ma te kore e atoro atu i tei maki e tei tumatetenga e kare koe e oronga atu i tetai o taau au apinga tei rauka ia kotou ki tei ngere, te karanga atu nei au kia kotou e, mei te mea e kare kotou e rave i tetai o teia au mea nei, i na, kua riro ta kotou au pure ei mea neneva e te puapinga kore, e kua riro kotou ei au tangata pikikaa, tei uuna i te akarongo.

29. E no reira, me kore kotou e akamaara i te aroa atu, kua riro ia kotou mei te ota ko tei akarukeia e te aronga tāmā auro, (e mea puapinga kore oki ïa) e e takatakaiia e te vaevae tangata.

30. E teianei e aku au taeake, te inangaro nei au kia aere mai kotou kia apai mai i te ua o te tataraara mei ta kotou i kite e tei akapapuia mai e te au tataanga tapu ra.

31. E te inangaro nei au kia aere mai kotou ma te ngakau ketaketa kore, i na oki, ko te taime teia, e te ra no to kotou akaoraangaia, e no reira me tataraara kotou ma te kore e akaketaketa i to kotou ngakau ka akatupuia te ravenga maata o te ora no kotou.

32. I na oki, tei teia oraanga nei te taime no te tangata kia akateateamamao i te aravei atu i te Atua i na, te rā o teia oraanga nei ko te rā ïa kia rave te tangata nei i ta ratou angaanga.

33. E teianei, mei taku i tuatua atu kia kotou e, e manganui oki to kotou kite, e no reira te ako atu nei au ia kotou e, auraka kotou e tavarevare i te rā o to kotou tataraara anga e tae rava atu ki te openga, e i muri ake i teia rā o teia oraanga nei, ko tei orongaia mai ki te tangata kia teateamamao no te ao mutu kore, i na, me kore kotou e rave meitaki i te angaanga i teia oraanga nei, me tae mai te poiri kare e angaanga e rauka i te rave.

34. Kare e tika ia kotou kia karanga e, ka aratakiia kotou ki taua openga rikarika ra e ka tataraara au, e ka uri au ki toku Atua. Kare, kare e tika ia kotou kia tuatua i teia, no te mea ko te vaerua tei noo ki roto i to kotou kopapa i te taime e mate ei kotou, e mana to taua vaerua rai kia noo ki roto i to kotou kopapa i te ao mutu kore.

35. I na, me taroaroa kotou i te rā e tataraaraʼi kotou, e me tae mai te mate, kua riro kotou ei tavini no te vaerua o te tiaporo, e kua rave aia ia kotou nona, no reira oki te Vaerua o te Atua i akaruke ei ia kotou e kare atura ona e noo anga i roto ia kotou, e ko te tiaporo tei mana ki rungao ia kotou, e ko te openga ïa o te aronga rave i te au mea kikino.

36. E kua kite au i te reira, no te mea kua karanga mai te Atua e, kare aia e noo ki roto i te nao viivii, ka noo ra aia ki roto i te ngakau o te aronga tuatua tika, e te karanga katoa maira aia e, ka noo te aronga tuatua tika ki roto i tona ra basileia, e kare e aere akaou ki vao, ina ra, ka akateateaia to ratou kakau ki te toto o te mamoe.

37. E teianei, e aku au taeake akaperepere, te inangaro nei au kia akamaara kotou i teia au mea nei, e kia angaanga kotou i to kotou uaorai akaoraanga ma te mataku ki mua i te Atua, e kia kore oki kotou e pikikaa akaou i te aereanga mai o te Mesia.

38. E kia kore oki kotou e patoi akaou i te Vaerua Tapu, ina ra, kia ariki kotou iaia, e kia tuku ki rungao ia kotou i te ingoa o te Mesia, e kia taakaaka kotou ia kotou ki raro i te one no atu e, eaa te ngai, ma te akamori i te Atua i te vaerua, e i te tuatua mou e te ngai katoa e noo ei kotou, e kia noo kotou ma te akameitaki iaia i te au rā katoatoa, no te aroa e te au akameitakianga tana i oronga mai kia kotou ra.

39. E te akamaroiroi atu nei au ia kotou e aku au taeake kia tiaki kotou ma te pure tukumoe kore, kia kore kotou e arataki keia e te timataanga a te tiaporo, e kia kore kotou e vi iaia e kia kore kotou e riro mai ei tavini nona i te rā openga, e i na, e kare aia e tutaki ia kotou ki te mea meitaki.

40. E teianei e aku au taeake akaperepere, te akamaroiroi atu nei au ia kotou kia akakoromaki kotou i te au tu takinga kino ravarai e auraka ïa kotou e akakino atu ia ratou tei tuaru mai ia kotou ki vao no to kotou veve maata, ko te riro aea mai kotou ei au tangata ara mei ia ratou rai.

41. Kia maru ra kotou e kia akakoromaki i teia au tumatetenga ma te irinakinga ngaueue kore e penei ake a tetai rā ka akangaroi kotou mei to kotou au tumatetenga.