1. I na, kia oti tona tuatua anga atu ki te au tangata, e manganui tikai tei irinaki i tana tuatua, e kua tataraara ma te kimi i te au tuatua tapu.

2. Ina ra, ko te maataanga o ratou, kua inangaro ratou i te takinga kino atu ia Alama raua ko Amuleka, kua riri ratou ia Alama no te marama o tana tuatua kia Zezorama, e kua karanga katoa ratou e, kua pikikaa a Amuleka ia ratou, e kua akaapa i ta ratou ture e to ratou au apii ture e to ratou au akava.

3. E kua riri katoa ratou ia Alama raua ko Amuleka, e no te mea, kua rauka tikai ia raua i te akakite atu i to ratou kino, no reira kua manako ratou i te uuna ia raua.

4. Ina ra, kare ratou i pera, kua rave ra ratou ia raua e kua tapekapeka atu ki te taura pakari, ma te apai atu ia raua ki te akavanui o taua enua ra.

5. E kua aere atura te au tangata i te akaapa atu ia raua, ma te akapapu atu e kua akaapa raua i te ture, e to ratou au apii ture, e pera katoa ki te au akava o te enua, e pera katoa ki te au tangata katoatoa i roto i taua enua ra, ma te akapapu atu e, e tai rai Atua e ka akaunga mai oki aia i tana tamaiti ki te tangata ina ra kare aia e akaora ia ratou, e manganui oki te au mea ta te au tangata i tuatua atu no runga ia Alama raua ko Amuleka. E kua raveia oki teia ki mua i te akavanui o te enua.

6. Kua poitirere a Zezorama i te tuatua tei tuatuaia mai, e kua kite katoa aia i te tu poiri o te manako tana i oronga atu ki te au tangata no tana tuatua pikikaa, e kua akamata tona kopapa i te ru no tana au ara i rave, e mei te mea ra e kua takapiniia aia e te mamae o ade.

7. I na, kua akamata aia i te akakite atu ki te tangata e, kua ara au, e nga tangata apa kore teia ki mua i te Atua. I reira kua akamata aia i te pati kia ratou mei taua taime mai e tae ua mai ki teia nei, ina ra, kua patoi ratou iaia i te na ko anga e, e tiaporo katoa ainei toou? Kua akakino atu ratou iaia, ma te tuaru atu iaia ki vao mei roto ia ratou, e pera katoa ki te aronga tei irinaki i te tuatua a Alama raua ko Amuleka, e kua tuaruia atu ratou ki vao, ma te akaunga atu i tetai au tangata kia pei atu ia ratou ki te toka

8. E kua akaputuputuia mai ta ratou au vaine e te tamariki ki te ngai okotai, e ko tei irinaki, me kore ra, ko tei apiiia ana kia akarongo ki te tuatua a te Atua ka tiriaia ratou e ta ratou au papaanga, tei reira te au tuatua tapu, e kua titiri ratou i te reira ki roto i te ai, kia ka oki e kia akakoreia e te ai.

9. E i na, kua apai atu ratou ia Alama e Amuleka ki te ngai o te tamateanga kia akarakara oki raua i te mate o te aronga tei ka i te ai.

10. E i to Amuleka kite anga i te mamae o te au vaine e te tamariki tei tiriaia ki roto i te ai, kua mamae katoa aia, e kua na ko atu kia Alama e, ka akapeea taua i te akara anga i teia au mea rikarika nei? E no reira kia akatika atu ana taua i to taua rima ma te tangaanga i te mana o te Atua tei vai ki roto ia taua, e kia ora mai oki ratou mei roto i teia mate nei.

11. Ina ra, kua karanga atura a Alama kiaia, kua akaue mai te vaerua kiaku, e auraka au e akatika atu i toku rima, e i na, kua akatika oki te Atua ia ratou kia oki atu kiaia ki roto i tona kaka e kua inangaro aia ia ratou kia pera, me kare, kia rave te tangata nei i teia kia ratou, kia tau ki te marokiakia o to ratou ngakau, e ko te akaapaanga teia tana ka tuku mai ki rungao ia ratou no tona riri, kia tika oki, e ka vai rai te toto o te aronga ara kore ei kite no ratou e ma te kapiki maata atu ia ratou kia tae ki te rā openga.

12. I na, kua karanga atura a Amuleka kia Alama, ka tutungi katoa mai paa ratou ia taua.

13. Kua karanga atura a Alama, kia tau oki ki te anoano o te Atu. Ina ra, kare ta taua angaanga i oti, no reira kare taua e tungiaia e ratou.

14. E i na, kia pou te au kopapa o te aronga tei tiriaia ki roto i te ai i te ka, e pera katoa te au papa tuatua tei tiriaia atu, e ratou katoa, i na, kua aere mai te akavanui o te enua e kua tu mai ki mua ia Alama raua ko Amuleka e kua tapekaia raua, e kua papaki atu aia i to raua paparinga ki tona rima ma te na ko atu kia raua e, Kua kite korua i tei tupu, ka apai akaou ainei korua ki teia aronga e kia tiria akaouia ratou ki roto i te roto ai e te teio?

15. E kia kite oki korua e, kare o korua mana i te akaora i te aronga tei tiriaia ki roto i te ai, e kare katoa te Atua e akaora ia ratou no tei piri oki ratou ki ta korua akarongo. E kua papaki akaou te akavanui i to raua paparinga, ma te ui atu e, Eaa ta korua ka tuatua mai?

16. I na, ko teia akava nei, mei te tu rai aia ia Nihora, tei ta ia Kitiona.

17. I na, kare rava a Alama raua ko Amuleka i pau atu na i tetai mea, e kua papaki akaou atu aia ia raua, ma te oronga atu ia raua ki te aronga taoonga kia titiri atu ki roto i te are auri.

18. E i to raua noo anga ki roto i te are auri i nga rā e toru ra, kua aere mai te au apii ture, e te au akava, e te au taunga, e te au puapii, no roto mai oki ratou i te apii anga a Nihora, e kua aere mai ratou ki roto i te are auri i te akara ia raua, e kua uiui atu ratou i tetai au tuatua kia raua, ina ra, kare rava raua i pau ua atu ana.

19. E i na, kua tu maira te akava ki mua ia raua ma te na ko atu e, Eaa i kore ei korua e pau mai i te tuatua a teia aronga? E kare ainei korua i kite e, e mana toku i te titiri ia korua ki roto i te ai? E kua akaue atu aia ia raua kia tuatua, ina ra kare raua i pau atu i tetai mea.

20. Kua akaruke atura ratou e kua aere atu ki to ratou aereanga, ina ra, kua oki akaou mai i terao mai ra, e kua papaki akaou te akava i to raua paparinga. E kua aere katoa mai tetai pae, e kua papaki mai ia raua ma te na ko mai e, ka tu akaou ainei korua e ka akava i teia aronga, ma te akaapa i ta matou ture? E naringa e mana maata to korua, eaa i kore ei e rauka ia korua i te akaora ia korua uaorai.

21. E e manganui atu rai te au mea ta ratou i tuatua atu kia raua, ma te katikati atu i to ratou nio kia raua, ma te tutua atu ia raua ki te uavare ma te na ko atu e, ka akapeea ra matou i te akaraanga atu kia akaapaia matou.

22. E tetai au mea e manganui, e te au tu mea ravarai ta ratou i tuatua atu kia raua, e kua akakino tikai ratou ia raua i te au rā e manganui. E kua tāpū oki ratou i te kai kia mate raua i te pongi, e pera katoa ki te vai kia kaki vai raua, e kua rave katoa ratou i to raua kakau kia vai taaka ua raua, e kua tapekaia oki raua ki te taura pakari e kua noo ki roto i te are auri.

23. I na, kua roa tikai te au rā i to raua akakoromaki anga, (e i te tai ngauru ma rua o te rā, i roto i te ngauru o te marama, i roto i te ngauru o te mataiti i te tutaraanga te au akava ki rungao i te iti tangata Niphai) i aere atu ei te akavanui o te enua ko Amoniha e tona au puapii, te au apii ture, ki te are auri ki te ngai i tapekaiaʼi a Alama raua ko Amuleka ki te taura.

24. Kua tu ua atura te akavanui ki mua ia raua ma te moto akaou atura ia raua, ma te na ko atu kia raua e, mei te mea e tei ia korua te mana o te Atua, e akaora korua ia korua i teia au tapeka nei, e i reira ka irinaki matou e, ka tamate te Atua i teia aronga kia tau ki taau tuatua.

25. E i na, kua aere atu ratou ki mua ia raua e kua moto akaou atu ia raua ma te na ko atu e, mei tei mua ana, e i te taime openga, kua to mai te mana o te Atua ki rungao ia Alama raua ko Amuleka, kua tu iora raua ki runga i to raua vaevae.

26. Kua kapiki atu a Alama na ko akera e: Eaa te roa i to maua akakoromaki anga i teia kino maata, e te Atu? E te Atu, e oronga mai i te maroiroi kia maua, kia tau oki ki to maua akarongo i roto i te Mesia, kia akaoraia mai. E kua motumotu te taura i tapekaiaʼi raua, e i te kite anga te au tangata i teia, kua oro ratou no te mea, kua tae mai te mataku ko te akapouia aea ratou.

27. Kua mataku tikai ratou, e kua topa atura ratou ki runga i te one e kare i taenaia te ngutupa i vao o te are auri, kua akamata te enua i te ngaueue maata, e kua ngaa te patu o te are auri, e kua pururu mai ki raro, e ko te au akava, te au apii ture, te au taunga, e te au puapii tei moto atu ia Alama raua ko Amuleka kua mate pouroa ratou i te patu tei pururu mai.

28. I reira, kua aere mai a Alama raua ko Amuleka ki vao, e kare rava raua i pakia, no te mea kua oronga mai te Atua i te mana kia raua kia tau ki to raua akarongo i roto i te Mesia. E kua aere tika mai raua mei roto mai i te are auri, kua matara to raua au tapeka, e kua inga te are auri ki raro, e kua mate te au tangata pouroa i roto i te reira, mari ua ra ko Alama raua ko Amuleka tei kore i mate, aere tika maira raua ki roto i te oire.

29. I na, i te rongo anga te au tangata i teia maniania maata, kua oro mai ratou e te urupu maata kia kite e, eaa teia i tupu. E i to ratou kite anga atu ia Alama e Amuleka e aere mai nei mei roto mai i te are auri, e kua inga katoa te patu ki raro, kua ki tikai ratou i te mataku maata ma te oro ke atu mei mua ia Alama raua ko Amuleka, mei te puakanio e oro ra e tana nga punupunua mei tetai nga Liona, e kua oro rai ratou mei mua atu ia Alama raua ko Amuleka.