1. E oti akera Alama i te tuatua i teia au tuatua nei, kua ui atura ratou kiaia kia kite e, me te irinaki ra i te Atua okotai kia rauka mai oki ia ratou te ua tana i tuatua ake nei, me kore ra, ka akapeea oki ratou kia tanu i taua ua nei, me kore ra, i te tuatua tana i tuatua ake nei, e mei tana oki i tuatua e, ka tanuia ki roto i to ratou ngakau, me kore ka akapeea ratou i te taangaanga anga i to ratou akarongo.

2. Kua karanga atura a Alama kia ratou, i na, kua karanga mai kotou e, kare e rauka ia kotou i te akamori i to kotou Atua no te mea, kua tuaruia kotou ki vao i to kotou au sunago. Ina ra, te karanga atu nei au kia kotou, mei te mea kua manako kotou e kare e rauka ia kotou i te akamori i te Atua, e tarevake maata to kotou i reira, e e mea tika oki ia kotou kia kimi i te au tuatua i tataia ra, e mei te mea e kua manako kotou e kua apii mai te reira ia kotou i teia, kare rava kotou i marama i te reira.

3. Te akamaara ainei kotou i te tatau i ta Zenosa, te peroveta taito i tuatua mai no runga i te pure e te akamori?

4. Kua na ko oki aia e, e aroa oki toou e te Atua, kua akarongo mai oki koe i taku pure ka noo ei au ki roto i te metepara ra, kua aroa mai koe iaku i toku pure anga atu no toku au enemi e kua akaariu mai oki koe ia ratou kiaku ra.

5. Ae, e te Atua, kua aroa mai oki koe iaku i toku kapiki anga atu kia koe i roto i toku aua, e i toku kapiki anga atu ia koe na roto i taku pure, e kua akarongo mai koe iaku.

6. E teianei, e te Atua, me oki au ki toku are, ka akarongo mai rai koe iaku i roto i taku pure.

7. E kia tomo au ki roto i toku ra pia, e kia pure atu kia koe ra, e te Atu, kua akarongo mai koe iaku.

8. E ka aroa mai koe i to au tamariki me kapiki atu ratou ia koe kia akarongoia e koe, auraka ra e te tangata nei, e ka akarongo mai oki koe ia ratou.

9. E te Atua e, kua aroa mai tikai koe iaku, e kua akarongo mai i taku ra au kapikianga i rotopu i taau ra au uipaanga.

10. E kua akarongo katoa mai koe iaku i toku tiria angaia ki vao, e ma te takinga kinoia e toku ra au enemi, e kua akarongo katoa mai koe i toku kapikianga e kua atoro oki ia ratou na roto i toou riri, e kua akapou vivikiia ratou.

11. E kua akarongo mai oki koe iaku no toku ra au tumatetenga, e toku ra ngakau pikikaa kore i peraʼi, e no taau ra tamaiti koe i aroa mai ei iaku, no reira, ka kapiki ua atu rai au ia koe i roto i toku au tumatetenga, e tei roto ia koe toku rekarekaanga, e kua akataka ke koe i to au akautunga anga iaku nei no taau tamaiti.

12. E kua tuatua atura a Alama kia ratou e, kua irinaki ainei kotou ki te au tuatua i tataia ra e te aronga taito?

13. I na, me ka akapera oki kotou, me ka irinaki kotou i ta Zenosa i tuatua maira, e i na, kua na ko mai aia e, kua akataka ke koe i taau ra akautungaanga no taau ra tamaiti.

14. I na, e aku au taeake, ka ui atu au e, me kua tatau ainei kotou i te au tuatua i tataia? Mei te mea e kua tatau kotou, eaa i kore ei i reira e rauka ia kotou i te irinaki ki te Tamaiti a te Atua.

15. Kare oki i tataia e, ko Zenosa anake tei tuatua no taua au mea ra, kareka ra, kua tuatua katoa a Zenoka i taua au mea ra.

16. E i na, kua na ko mai aia e, kua riri koe e te Atu i teia aronga nei, no te mea, kare i rauka ia ratou kia kite i toou ra aroa, taau i tuku mai kia ratou ra no taau tamaiti.

17. E teianei e aku au taeake, kua kite kotou e, ko te rua o te peroveta tei akakite mai i te tamaiti a te Atua, e no tei kore te tangata i marama i tana tuatua, kua peiia aia ki te toka kia mate

18. E i na, kare e ko teia ua tei tuatua ana no te tamaiti a te Atua.

19. I na, kua tuatua katoa ana a Mose iaia, e i na, kua akateiteiia tetai akairo i te metepara, e ko te ka akara i taua akairo ra, ka ora ïa. E manganui tei akara e kua ora.

20. Ina ra, e toko iti ua tei kite i te aiteanga o taua au mea ra no te marokiakia o to ratou ngakau. E manganui oki tei kore i akara no te marokiakia o to ratou ngakau, e no reira kua mate ratou, e ko te tumu i kore ei ratou i akara, koia oki, kare ratou i irinaki e, ka akaoraia ratou.

21. E aku au taeake e, mei te mea e ka ora kotou na roto i te akara ua anga, kare ainei kotou e akara viviki, me ka marokiakia ua atu rai to kotou ngakau i te irinaki kore, e te kope, kia kore to kotou mata e akara, e kia mate kotou.

22. Me ka akapera kotou, ka tae mai te mii kia kotou, me kore ra kotou e na reira, e akarakara to kotou mata, e ma te akamata i te irinaki ki te tamaiti a te Atua, e ka aere mai oki aia ka akaora i tona iti tangata, e ka mamae oki aia, e ka mate kia ta ratou au ara, e ka tuakaou mai aia mei te mate mai e raukaʼi i te tangata nei te tuakaouanga, kia tu oki te tangata nei ki mua iaia, kia akavaia i te rā openga kia tau ki ta ratou au angaanga.

23. E teianei, e aku au taeake e, te inangaro nei au kia tanu kotou i teia ua ki roto i to kotou ngakau, e me akamata i te tupu, e akapuapinga kotou iaia ki to kotou akarongo. E i na, ka riro mai ei pu rakau, ka nionio mai e tae rava atu ki te ora mutu kore. E kia akamama mai te Atua i taau au angaanga na roto i te rekareka o tana ra tamaiti. E ka tupu teia me inangaro kotou. Amene.