Scriptures
Alama 5


Te tuatua ta Alama, te Taunga Teitei i te akaaereanga tapu a te Atua, i akakite ki te au tangata i roto i to ratou oire e i roto i to ratou enua ra.

Akara Pene 5.

Pene 5

Kua akakite aia i te tu o te akonoanga. Kua akakite i te ara. Te kapiki anga atu i te au tangata kia tataraara.

1. E kua akamata a Alama i te akakite atu i te tuatua a te Atua ki te tangata i te enua ko Zarahemela, e mei reira atu, ki roto i te au enua ravarai.

2. E ko teia oki te au tuatua tana i tuatua atu ki te au tangata o te akonoanga tei akamouia ki te enua ko Zarahemela, kia tau oki ki tana i tata i te na ko anga e;

3. Ko au ko Alama, tei akatakaia e toku metua ko Alama, kia riro ei taunga teitei ki rungao i te akonoanga a te Atua, e mana oki tona e e tikaanga mei ko mai i te Atua kia rave aia i teia au mea nei, i na, te karanga atu nei au kia kotou, kua akamata aia i te akamou i tetai akonoanga ki te enua ko Niphai, te enua tei karangaia e, ko te enua o Momoni, e kua bapetizo iora i tona au taeake ki te vai i Momoni.

4. E i na, te karanga atu nei au kia kotou, kua akaoraia mai ratou mei roto mai i te rima o te au tangata o Noa na roto i te mana e te aroa o te Atua.

5. E i muri ake i te reira, kua apaina tuikaaia ratou ki roto i te metepara, e te au tangata o te ngati Lamana, e te karanga atu nei au kia kotou, kua riro ratou ei tuikaa, e kua akaora akaou te Atu ia ratou mei te tuikaaanga ra na roto i te mana o tana tuatua, e kua apainaia mai matou ki teia enua, e i konei oki matou i akatupu akaou ei i te akonoanga a te Atua ki teia enua nei.

6. E teianei, te karanga atu nei au kia kotou, e aku au taeake, ko kotou tei o ki roto i teia akonoanga, kua akamaara ainei kotou i te tuikaanga to kotou ai metua? E te maara katoa ainei ia kotou tona aroa maata e te akakoromaki anga roa ia ratou? E pera katoa, te akamaara ainei kotou e kua akaora mai aia i to ratou au vaerua mei ia ade?

7. I na, kua taui aia i to ratou ngakau, e kua akaara mai aia ia ratou mei te moe anga roa, e kua ara mai ratou ki te Atua. E i na, tei roto oki i te mareva o te poiri, e kua turamaia to ratou ngakau e te marama o te tuatua mutu kore, e kua takapiniia ratou e te tapeka o te mate, e te vivi o ade, e ma te takinga kino mutu kore i te tiakianga mai ia ratou.

8. E i teianei te pati atu nei au kia kotou, e aku au taeake, kua akakoreia ainei ratou? I na, te karanga atu nei au kia kotou e, kare ratou i peraia.

9. E kua ui akaou atu au, kua matara ainei te au tapeka o te mate, e te vivi o ade tei takapini ia ratou, kua matara ainei? Te karanga atu nei au kia kotou e, ae, kua matara te reira, e kua mataora to ratou au vaerua ma te rekareka maata, e kua imene ratou ma te aroa. Te karanga atu nei au kia kotou e kua ora ratou.

10. E teianei te ui atu nei au kia kotou, ka akapeea ratou e akaoraiaʼi? E eaa te mea ka tatari ei ratou no te akaoraanga? E eaa te tumu ka mataraʼi ia ratou te au tapekaanga o te mate, e te vivi o ade?

11. E i na, ka akakite atu au kia kotou, kare ainei toku metua ko Alama i irinaki i te au tuatua tei tuatuaia mai e te vaa o Abinadaia? E kare ainei aia i te peroveta tapu? Kare ainei aia i tuatua i te au tuatua a te Atua, e kua irinaki oki toku metua ko Alama?

12. E no tona akarongo maata kua tupu tetai taui maata i roto i tona ngakau, i na te karanga atu nei au kia kotou, e kua tika pouroa te reira.

13. E i na, kua akakite katoa atu ana aia ki to kotou ai metua e kua tupu tikai tetai tauianga maata i roto i to ratou ngakau, kua taakaaka ratou i to ratou irinaki ki te Atua tika e te ora. E i na, e akarongo tumu tikai to ratou e tae rava atu ki te openga, e no reira kua ora ratou.

14. E teianei te ui atu nei au kia kotou e aku au taeake o te akonoanga e, kua anau vaeruaia mai ainei kotou e te Atua? Kua rauka ainei ia kotou tona tu ki to kotou mata? Kua kitea ainei kotou e tona tuke maata i roto i to kotou ngakau?

15. Te taangaanga ainei kotou i te akarongo i te akaoraanga a Tei Anga ia kotou? Te akara ainei koe ki mua ma te mata akarongo, kia kite atu i teia kopapa pe ua i te akatu angaia ei mea pe kore, e ka riro teia ei mea pe ua, ei mea viivii kore i te tu anga ki mua i te Atua kia akavaia kia tau ki te au angaanga tei raveia i roto i te kopapa nei?

16. Te karanga atu nei au kia kotou, ka rauka ainei ia kotou i te akamanako kia kotou uaorai e, te rongo ra kotou i te reo o te Atua i te na ko anga mai kia kotou i taua ra ra e, Aere mai kotou, e ao to kotou, no te mea, ko ta kotou angaanga e angaanga tika tikai ïa ki runga i teia nei ao.

17. Te akamanako ainei kotou uaorai e, ka pikikaa kotou i te Atua me tae ki taua rā ra, ma te na ko atu e, E te Atu, e angaanga tika ta matou ki mua i te mata o te ao nei, e ka akaora mai aia ia kotou?

18. Me kore ra, ka rauka ainei ia kotou i te akamanako i to kotou apainaia anga mai ki mua i te akavaanga a te Atua ma toou vaerua kï i te ara e te mii i te akamaaraara anga i taau au ara, ei akamaara anga tika tikai toou i toou au kino, ma te akamaara katoa e, kua patoi kotou i te au akaueanga a te Atua?

19. Te karanga atu nei au kia kotou e, ka rauka ainei ia kotou i te akara atu ki te Atua i taua rā ra, ma te ngakau tika, e te rima ma? Te karanga atu nei au kia kotou, ka rauka ainei ia kotou i te akara atu ma te tu o te Atua i kotikotiia ki rungao i to kotou mata?

20. Te karanga atu nei au kia kotou, i to kotou manako, ka ora ainei kotou mei te mea e kua tuku atu kotou ia kotou uaorai kia riro ei au tavini no te tiaporo?

21. Te karanga atu nei au e, ka kite kotou a taua rā ra e, kare kotou e akaoraia, no te mea, kare rava e tangata e ora, mari ra, kia tāmāia tona kakau kia ma, kia tāmā ravaia tona ngakau e ma rava atura te tou na roto i te toto o tei tuatuaia e to tatou ai metua, te ka aere mai kia akaora i tona iti tangata mei ta ratou au ara.

22. Te ui atu nei au kia kotou, e aku au taeake, ka akapeea ra kotou nei i to kotou manakoanga, me tu kotou ki mua i te aroaro o te Atua, ma to kotou kakau toutou i te toto e te au mea viivii ravarai, e i na, eaa ra ta teia au mea ka akaapa mai kia kotou?

23. I na, kare ainei te reira e karangaia e, e aronga ta tangata kotou, e kua ara kotou i te au mea kikino ravarai?

24. E teianei e aku au taeake, te manako ainei kotou e, e ngai to tetai kia noo i te basileia o te Atua? Kia noo kia Aberahama, Isaaka, e Iakoba, e pera katoa ki te au peroveta tapu ko tei ma to ratou kakau e ma te topata koreia, te ma e te teatea?

25. Te karanga atu nei ra au e, kare, mari ra, kia akariro kotou i Tei Anga ia tatou ei pikikaa mei muatangana maira, kare kotou e manako e, e ngai tona i te basileia o te Ao ra, ka tiriaia ra ratou ki vao, no te mea e tamariki oki ratou na te tiaporo.

26. Te karanga atu nei au kia kotou e aku au taeake, mei te mea e kua marama kotou i te tauianga o te ngakau, kua inangaro kotou i te imene ma te reo akameitaki atu e te aroa, te ui atu nei au e, ka rauka ia kotou i te reira i teianei?

27. Kua aere ainei koe ma te apakore ki mua i te Atua? Mei te mea, e kapikiia koe kia mate i teia taime, ka rauka ainei ia kotou i te tuatua kia kotou uaorai e, Kua teatea ainei toou kakau na roto i te toto o te Mesia, te ka aere mai kia akaora i tona iti tangata mei ta ratou au ara.

28. I na, kua kiritiia ainei te ngakau parau ia kotou? Te karanga atu nei ra au kia kotou e, me kore, kare oki kotou e papa no te aravei atu i te Atua. E no reira e akapapa viviki kotou, no te mea, te vaitata mai nei oki te basileia o te ao ra, e kare e rauka i tetai mei te reira te tu, te ora mutu kore.

29. E i na te karanga atu nei au e, te vai nei tetai i rotopu ia kotou na tei kore i tatara i tona tu vareae? Te karanga nei au e, kare rai i papa, e te inangaro nei au kia teateamamao viviki aia, te vaitata mai nei oki te ora, e kare oki aia e kite i te ora e tae mai ei, kare oki tetai mei te reira e apakore.

30. E te karanga akaou atu nei au kia kotou, e tangata ainei tetai i rotopu ia kotou na tei aviri atu i tona taeake, ma te akaputuputu i tetai takinga kinoanga ki runga iaia?

31. Aue ra te tangata mei te reira, no te mea, kare oki i teateamamao, te vaitata mai nei oki te taime, kia kore kotou e tataraara, kare kotou e akaoraia.

32. Aue katoa kotou e te aronga rave ara e, e tataraara, e tataraara te tuatua maira te Atu.

33. I na oki, kua unga mai aia i tetai karere ki te au tangata katoatoa no te mea, te oora nei te rima o te aroa kia ratou, ma te na ko katoa atu e, e tataraara e ka ariki atu au ia kotou.

34. E aere mai kotou kiaku nei, e ka kai kotou i te ua rakau o te pu rakau ora, e ka kai kotou e ka inu i te varaoa e te vai ma te au.

35. E no reira, e aere mai kiaku nei ma te apai mai i te au angaanga tika ravarai, e kare ia kotou e tipu keia e tiria atu ki roto i te ai.

36. E i na, te vaitata mai nei te taime, ko tei apai mai i te ua kino, e me kore ra, ko te tangata tei kore i rave i te au mea tika, koia rai te ka mii e ka eva.

37. Aue kotou e te aronga rave ara e, e kotou tei rave i te au peu kino o te ao nei, e ko kotou tei patoi i te kite i te au mataara tika, e tei aere ke, mei te mamoe kare ona tiaki, ina ra, te kapiki nei te tiaki ia kotou, e te kapiki atu nei rai, e kare kotou e akarongo mai ki tona reo.

38. E i na, te karanga atu nei au kia kotou e, te kapiki atu nei rai te tiaki mamoe meitaki ia kotou, e na roto oki i tona uaorai ingoa i kapiki atu ei aia ia kotou koia oki te ingoa o te Mesia, e me kare oki kotou e akarongo mai ki te reo o te tiaki mamoe meitaki, ki te ingoa i kapikiiaʼi kotou, kare kotou i te mamoe na te tiaki mamoe meitaki.

39. E i teianei me kare kotou i te mamoe na te tiaki mamoe meitaki, no teea koro ia koe? I na te karanga atu nei au kia kotou e, ko te tiaporo to kotou tiaki, e no tana koro oki kotou, e teianei koai te ka patoi mai i teia? Ko te tangata ka akakino mai i teia e tangata pikikaa e, e tamaiti na te tiaporo.

40. E te karanga atu nei au kia kotou e, ko te au mea memeitaki anake no ko mai ïa i te Atua e ko te mea kikino anake no ko mai ïa i te tiaporo.

41. E no reira, me rauka mai i te tangata nei te au angaanga memeitaki, kua akarongo aia ki te reo o te tiaki mamoe meitaki, e kua aru katoa iaia, ina ra, ko tei apai mai i te au angaanga kino, ka riro oki aia ei tamaiti na te tiaporo, kua akarongo oki aia i tona reo, ma te aru katoa iaia.

42. E, ko te tangata ua atu te ka rave i teia, e tutaki rai tona no ko mai iaia, e ko tona tutaki koia oki ko te mate i te au mea tika, e kua mate i te au angaanga meitaki katoatoa.

43. E i teianei, e aku au taeake te inangaro nei au kia akarongo mai kotou kiaku, no te mea ka tuatua atu au ma te ririnui o toku ra vaerua, e i na, kua tuatua maramarama ua atu au kia kotou kia kore kotou e tarevake, e kua tuatua kia tau ki te au akaueanga a te Atua.

44. Kua ikiia oki au kia tuatua atu mei teia, kia tau ki te akaaereanga tapu a te Atua, tei roto ia Iesu Mesia, e kua akaue katoaia atu kia tu, e kia akapapu atu ki teia au tangata nei i te au mea tei tuatuaia mai e to tatou ai metua no te au mea te ka tupu.

45. E kare oki ko teia anake. Kare ainei kotou i manako e, kua kite au i teia au mea? I na, te akapapu atu nei au kia kotou e kua kite au e kua tika teia au mea nei taku i tuatua atu. I to kotou manako, i akapeea ra au i kite papu ei i te reira?

46. I na, te karanga atu nei au kia kotou e, e mea akakiteia mai, kiaku e te Vaerua Tapu o te Atua. Kua akakore oki au i te kai ma te pure i te au rā e manganui kia kite papu tikai au i teia au mea nei. I teia nei kua kite papu au e, e tika, e no te mea, kua akakite papu mai te Atua kiaku na roto i te Vaerua Tapu, e ko te vaerua teia o te eeuanga tei vai ki roto iaku.

47. E te karanga katoa atu nei au e, e mea eeuia mai kiaku, e ko te au tuatua tei tuatuaia e to tatou ai metua e mea tika anake ïa, kia tau oki ki te vaerua o te totou tei vai ki roto iaku, e na roto katoa ïa i te akakiteanga o te vaerua o te Atua.

48. Te karanga atu nei au kia kotou, kua kite oki au e, ko taku ka tuatua atu kia kotou no te au mea te ka tupu, e mea tika anake ïa, e te akakite atu nei au kia kotou e, ka tae mai a Iesu Mesia, koia te tamaiti Anau Tai a te Metua, tei ki i te meitaki, e te aroa, e te tuatua mou, e koia oki te ka aere mai ka rave ke atu i te ara a to teianei ao, te ara a te au tangata tei irinaki tamou ki tona ra ingoa.

49. E teianei te akakite atu nei au kia kotou e, ko teia te akaaereanga i kapikiiaʼi au, kia ako atu ki toku au taeake akaperepere, e te au tangata katoatoa i roto i te enua ra, ma te ako katoa atu ki te aronga pakari e te mapu katoa, tei tuikaa e tei kore, e tei ruaine e tei kore i ruaine e te uki ou te tupu ua mai nei, i na, ka kapiki atu kia ratou kia tataraara e kia anau akaouia.

50. Kua na ko maira te Vaerua e, e tataraara, e te au ope o te ao nei, te vaitata mai nei te basileia o te Ao ra, e e aere mai ei te Tamaiti a te Atua ma tona kaka, e te ririnui, te ngateitei, te mana, e te au. E no reira e aku au taeake, te karanga atu nei au kia kotou e, kua tuatua mai te Vaerua e, E i na, te kaka o te Ariki o teia nei ao katoatoa; e te Ariki katoa o to te rangi, ka mama mai aia ki te au tamariki katoatoa a te tangata nei.

51. Kua tuatua katoa mai te Vaerua kiaku e ma te kapiki mai kiaku i te reo ririnui i te na ko anga e, aere atu ma te akakite ki te au tangata e, e tataraara, kia kore ra kotou e tataraara kare rai kotou e ō ki roto i te basileia o te Ao.

52. Te karanga akaou atu nei au kia kotou e, te tuatua mai nei te Vaerua e, i na, te tukuia nei te toki ki te aka o te pu rakau, e ko te pu rakau tei kore e ua mai i te ua meitaki, ka tipuia e ka taunaia ki te ai, ki te ai mate kore, e no reira, e akamaara e, na Tei Tapu i tuatua mai.

53. E no reira e aku au taeake akaperepere, te karanga atu nei au kia kotou e, ka rauka ainei ia kotou i te patoi i teia au tuatua nei? E ka kopae ainei kotou i teia au mea nei? Ka takatakai ainei kotou i Tei Tapu ki raro i to kotou tapuae? Ka akateitei ainei kotou i roto i to kotou ngakau parau, e ka noo tamou ainei kotou ma te aao i te kakau oko maata e i te tamou ua atu rai i to kotou inangaro ki te au mea kino o te ao nei, ki te au mea e apinga nui ei?

54. Ka manako ainei kotou e, e meitaki ake tetai i tetai, e ka tamou ua atu ainei kotou i te takinga kinoanga i to kotou au taeake tei rauka te tu maru, ma te aru i te akaaereanga tapu a te Atua, i apainaia mai ei ratou ki roto i te Akonoanga, ma te akatapuia e te Vaerua Tapu, e kua apai mai ratou i te angaanga tei tau i te tataraara.

55. Ka aere ua atu rai ainei kotou ma te taanga atu i to kotou mokotua ki tei putaua, e tei ngere, e i te tāpū anga i ta kotou au apinga mei ia ratou ra?

56. E no reira, ko te aronga te ka aere ua atu rai ma te rave tamou i te kino, te karanga atu nei au kia kotou e, ko ratou tikai oki te ka tipuia ki raro, e ka tiriaia ki roto i te ai, mari ra, kia tataraara viviki ratou.

57. E teianei te karanga atu nei au kia kotou e, ko kotou tei inangaro i te aru i te reo o te tiaki mamoe meitaki, e akaruke i te rave i te kino kia taka ke oki kotou, e auraka e amiri atu i ta ratou au mea viivii, e ka tipu keia to ratou au ingoa, e kare oki te ingoa o te aronga kino e tarēia ki to te aronga tuatua tika, kia tupu oki te tuatua a te Atua ko tei na ko mai e, kare te ingoa o te aronga kino e kapitiia ki te ingoa o toku nei iti tangata.

58. E ka tataia oki te ingoa o te aronga tuatua tika ki roto i te puka ora, e ka oronga oki au i tetai ipukarea no ratou ki toku rima katau. E teianei e aku au taeake, eaa ta kotou ka tuatua mai i teia? Te karanga atu nei au e, me ka patoi kotou, kare e manamanata, ka tupu oki te tuatua a te Atua.

59. E tiaki mamoe ainei tetai i roto ia kotou, e maata tana mamoe e kare aia e tiaki ana i tana mamoe, kia kore te luko e tomo ki roto e ta i tana anana mamoe, e me tomo mai tetai luko, kare ainei aia e tuaru iaia ki vao? E i te openga iora me ka rauka iaia, ka ta aia.

60. E teianei te karanga atu nei au kia kotou, e te kapiki atu nei te tiaki mamoe meitaki ia kotou, e me ka akarongo mai kotou i tona reo ka arataki mai aia ia kotou ki roto i tana anana, e e mamoe oki kotou nana. E te akaue atu nei aia kia kore oki e luko e tae akaou mai kia kotou kia kore kotou e takinga kinoia.

61. E te akaue atu nei au, ko Alama ki te reo o tei akaue mai iaku, kia rave oki kotou i te au tuatua taku i tuatua atu kia kotou.

62. Te tuatua nei au ma te akaue ia kotou tei ō ki roto i te akonoanga, e ki te aronga katoa tei kore i ō ki roto i te akonoanga, e te tuatua nei au ma te pati atu, i te na ko anga e, Aere mai e kia bapetizoia ma te tataraara, kia riro oki kotou ei aronga kai i te ua o te rakau ora ra.