Scriptures
Alama 19


Pene 19

Tetai ariuanga umere tikai. Ko Abiti e vaine ngati Lamana. Kua piri te ariki e te ariki vaine ki te akonoanga. Kua akatinamou a Amona i te akonoanga ki roto ia Isemaela.

1. E i na, e rua rā i muri mai e e rua po kua vaitata tikai ratou i te tuku i tona kopapa ki roto i te vaarua, ta ratou i akono ei ngai tanuanga i to ratou i mate.

2. I te rongo anga te ariki vaine ia Amona, kua akaue atu aia kia aere mai aia kiaia.

3. Kua rave oki a Amona mei tei akaueia mai kiaia, e kua aere atu ki te ariki vaine, ma te ui atu e, eaa tana ka inangaro kia rave aia.

4. Kua karanga atura aia kiaia, kua akakite mai te tavini o taku tane kiaku e, e peroveta tapu koe na tetai Atua tapu, e e mana toou i te rave i te au angaanga maata na roto i tona ra ingoa.

5. E no reira, mei te mea e e tika, te anoano nei au kia aere koe ki roto e akara i taku tane, no te mea e rua po, e rua ao, i tona takoto ua anga ki runga i tona roi, e kua karanga mai tetai pae e kare aia i mate, ina ra, tetai pae kua karanga mai ratou e, kua mate aia e kua aunga kino, e e mea tau kia tauruia aia ki roto i te menema, ina ra kiaku, kare aia i aunga.

6. I na, ko teia ta Amona i inangaro, no te mea kua kite aia e, tei raro ake te ariki ko Lamoni i te mana o te Atua, e kua kite aia e, ko te poiri e te irinaki kore kua akataka keia mei tona manako, e ko te marama tei turama i tona manako koia oki te kaka o te Atua, e marama umere oki ïa e te meitaki e ko teia marama kua riro ïa ei rekareka maata ki tona kopapa. Kua ngaro ke te tumurangi poiri, e ko te marama o te ora mutu kore kua turamaia ïa ki roto iaia, e kua kite aia e na teia i tapoki i tona tu tikai, e kua apainaia atu aia ki te Atua.

7. E no reira, ko ta te ariki vaine i anoano, ko tana rai ïa i anoano. No reira kua aere atu aia ki roto kia akara i te ariki kia tau ki ta te ariki vaine i anoano iaia, e kua kite atu aia i te ariki, e kua kite aia e, kare aia i mate.

8. Kua karanga atura aia ki te ariki vaine e, kare aia i mate, ina ra, na te Atu aia i akamoe, e apopo ka tu akaou mai aia, e no reira auraka e tanu iaia.

9. Kua karanga atura a Amona kiaia, kua irinaki ainei koe i teia? Kua na ko atura aia kiaia e, kare oku kite mari ra ko taau tuatua, e to tuatua a to tatou au tavini, ina ra, te irinaki nei au e, ka tupu mei taau rai i tuatua mai.

10. E kua na ko akera a Amona kiaia e, Kia akameitakiia koe no toou akarongo maata, te karanga atu nei au kia koe e maine, kare rava e akarongo maata mei teia i roto i te au tangata katoatoa o Niphai.

11. E kua tiaki atura aia i te roi o tana tane, mei te reira taime e tae rava mai ki te taime i terao mai rā i akakite ei a Amona e ka tu mai aia.

12. E i na, kua tu mai aia, kia tau ki te tuatua a Amona, e i tona tu anga, kua oora aia i tona rima ki te vaine, ma te na ko e, kia akameitakiia te ingoa o te Atua, e kia akameitaki katoa ia toou.

13. E mei ia koe e ora nei, kua kite ana au i toku Akaora, e ka aere mai aia e ka anauia mai e tetai vaine, e ka akaora aia i te au tangata ravarai tei irinaki i tona ra ingoa. I na, i te oti anga aia i te tuatua i teia au tuatua nei, kua ki tikai tona ngakau i te rekareka e kua topa aia ki raro e kua pera katoa te ariki vaine, e kua ki rava oki i te Vaerua.

14. I to Amona kiteanga i te Vaerua o te Atua i te riringiia anga mai ki rungao i te ngati Lamana kia tau ki tana au pure, ko ratou tei akatupu i te eva maata ki te ngati Niphai me kore ra, ki te iti tangata o te Atua no ta ratou au ara e to ratou akonoanga, e no reira, kua tuturi iora aia ki raro ma te pure e te akameitaki atu i te Atua no tana i rave ki tona au taeake, e kua ki katoa aia i te rekareka, e kua topa pouroa ratou toko toru ki runga i te one.

15. I te kiteanga te tavini o te ariki e, kua topa ratou, kua akamata ratou i te kapiki atu ki te Atua, no te mea, kua mataku katoa ratou i te Atua, e ko ratou oki tei ana ki mua i te ariki ma te akakite atu i te mana maata o Amona.

16. E kua kapiki rai ratou i te ingoa o te Atu ma to ratou maroiroi, e topa atura ratou ki raro, mari ua ra, ko tetai vaine o te ngati Lamana, ko Abiti tona ingoa, kua akaariuia oki aia ki te Atua no tetai au mataiti, no tetai orama umere a tona metua tane.

17. Kua ariu ra aia ki te Atu ra, kare rava aia i akakite ua atu ana, e i tona kiteanga e kua topa pouroa te au tavini o te ariki ko Lamana ki raro, e pera katoa tona pu vaine, ko te ariki vaine e te ariki, e kua takoto ua a Amona ki runga i te one, e kua kite aia e ko te mana ïa o te Atua. Kua manako aia e, ko te tikaanga teia kia akakite atu ki te au tangata i tei tupu kia ratou, e me ka kite ratou i te reira, ka irinaki i te mana o te Atua, e no reira kua oro atu aia mei tetai are ki tetai i te akakite anga atu i te reira ki te au tangata.

18. Kua akamata iora ratou i te akaputuputu mai ki te are o te ariki. E kua aere mai tetai urupu tangata, e kua poitirere tikai ratou, e ko te ariki vaine, e te ariki, e tona au tavini kua topa anake ki runga i te one, e kua takoto rai ratou ki reira mei te mea ra e, kua mate ratou, e kua kite katoa ratou ia Amona, e i na, e tangata Niphai oki aia.

19. I na, kua akamata iora te tangata i te koumuumu kia ratou uaorai, kua na ko tetai pae e, e kino maata tei tae mai kia ratou, me kore ra ki te ariki e tona ngutuare, no te mea kua akatika aia kia noo rai tetai tangata Niphai ki taua enua ra.

20. Ina ra, kua patoi tetai pae ia ratou i te na ko anga e, Na te ariki i apai mai i teia kino ki runga i tona ngutuare, no te mea kua tamate aia i tona au tavini, na ratou te mamoe i akapueurikirikiia i te pae vai i Sepeta.

21. E kua patoi katoaia oki ratou e taua au tangata ra tei tu ana ki te pae vai o Sepeta i te akapueuanga i te mamoe a te ariki, no te mea kua riri ratou ia Amona no te maata o te tangata tana i tamate, e kua tamate oki aia i to ratou au taeake i te pae vai i Sepeta, i te tiaki anga i te mamoe a te ariki.

22. I na, ko tetai o ratou, kua tamateia tona tuakana e te koke a amona, no tona riri ia amona, kua kiriti mai aia i tana koke ma te inangaro e, kia iri ki runga ia amona kia mate aia, e i tona tākianga i te koke kia ta atu iaia, i na, kua topa aia ki raro e kua mate.

23. I na, kua kite tatou i reira e, kare a Amona e mate, no te mea, kua tuatua oki te Atua kia Mosaia, tona metua tane e, ka akaora au iaia, e ka rauka iaia kia tau ki toou akarongo; e no reira, kua tuku atu iaia ki te Atua.

24. E i na, i te kiteanga teia urupu tangata e, ko te tangata i topa i te mate, kua tāki mai aia i tana koke kia tamate atu ia Amona, kua mataku tikai ratou, e kare rava ratou i inangaro i te akatika atu i to ratou rima i te amiri atu iaia, me kore ko tetai ua atu o ratou tei topa, kua akamata iora ratou i te va e te umere ia ratou uaorai e i akapeea teia mana maata i te tupu anga, me kore, eaa ra te aiteanga o teia au mea nei.

25. E i na, e manganui oki to ratou tei karanga e, ko te Vaerua Maata oki a Amona, kua karanga katoa tetai pae e, e mea akaungaia mai aia e te Vaerua Maata.

26. Ina ra, kua patoi tetai pae ia ratou katoatoa ma te karanga e, e tuputupuā aia, tei akaungaia mai mei ko mai i te ngati Niphai kia takinga kino ia ratou.

27. Kua karanga iora tetai pae e, e mea ungaia mai aia e te Vaerua Maata kia tamanamanta ia ratou no ta ratou au ara, e ko taua Vaerua Maata ra oki tei aere ua ana ki te ngati Niphai e tei akaora ia ratou mei to ratou rima, kua na ko akera ratou e, ko taua Vaerua Maata ra teia tei takinga kino ana i to ratou au taeake ko te ngati Lamana.

28. Kua pakari akera te tauetono anga i rotopu ia ratou. E ia ratou e tauetono ra, kua aere maira te tavini vaine tei akaue i te urupu tangata kia akaputuputu mai, e i tona kiteanga i teia tauetono anga i rotopu i teia iti tangata kua taitaia tikai aia ma te aue.

29. E i na, kua aere iora aia e kua mou mai i te rima o te ariki vaine, penei ake e ka akatu mai aia iaia mei te one mai, e i tona arapaki anga atu i tona rima, kua tu maira aia ki runga i ona nga vaevae ma te kapiki atu ma te reo maata, i te na ko anga e, e Iesu e, tei akaora mai iaku mei te ade rikarika, e te Atua meitaki e, e aroa mai i teia au tangata.

30. E oti akera aia i te tuatua, kua pokarakara aia i tona rima ma te ki i te rekareka, ma te tuatua mai i tetai au tuatua ke ke tei kore i maramaia, e i te oti anga i teia, kua mou mai aia i te rima o te ariki ko Lamoni, e i na, kua tu mai aia ki runga i ona nga vaevae.

31. E kite viviki akera aia i te tauetono i rotopu i tona iti tangata kua aere atura i te ako ia ratou, ma te apii atu kia ratou i te au tuatua tana i akarongo mei roto mai i te vaa o Amona, e manganui oki tei akarongo i tana tuatua e kua irinaki, e kua akaariu katoaia ki te Atu.

32. Ina ra, e manganui to ratou tei kore i akarongo i tana tuatua, e no reira, kua aere atu rai ratou i to ratou uaorai mataara.

33. I to Amona tu anga mai, kua tauturu aia ia ratou, e kua tauturu katoa te au tavini o Lamoni e kua akakite katoa ratou ki te tangata katoatoa i taua mea okotai nei. Kua tauiia oki to ratou ngakau, e kia kore oki ratou e inangaro akaou i te rave i te kino.

34. E i na, e manganui oki tei akakite atu ki te au tangata e, i kite ana ratou i te angela, e kua tuatua mai kia ratou, e kua akakite katoa mai kia ratou i te au mea a te Atua e tana ra tuatua tika.

35. E manganui oki tei irinaki i ta ratou tuatua, e ko te aronga tei irinaki kua bapetizoia, e kua riro mai ratou ei aronga tika, e kua akatinamouia tetai akonoanga ki ko ia ratou

36. E kua akamata i reira te angaanga a te Atu ki rotopu i te ngati Lamana, e kua akamata te Atua i te riringi mai i tona au akameitakianga ki rungao ia ratou, e te kite nei tatou i reira e, te akatoro nei aia i tona rima ki te au tangata katoatoa te ka tataraara e te ka irinaki ki tona ra ingoa.