Scriptures
Alama 21


Te tuatua no te akoanga a Aarona, e Muloki e to raua au taeake, ki te ngati Lamana.

Pene 21 ki te 26.

Pene 21

Kua patoiia mai e te ngati Amaleki kua aere atura a Aarona e Muloki ki Mitioni. Kua mou auria rua. To raua ora anga mai e te angaanga tutu evangelia. Kua manuia akaou a Amona. Kua akatuia tetai au sunago.

1. E kia akataka ke akera a Amona e tona ai taeake ia ratou uaorai ki te kena o te enua o te ngati Lamana, i na, kua aere atu a Aarona ki te enua tei tuatuaia e te ngati Lamana, e ko Ierusalema, kua taikuia ïa ki te ingoa o te enua o to ratou ai metua, tei te atea ke taua enua ra i te ope o te enua ra ko Momoni.

2. I na, kua akatu oki te ngati Lamana, e te ngati Amaleki, e te au tangata o Amulona i tetai oire maata ko tei karangaia e ko Ierusalema.

3. E ngakau ketaketa to te ngati Lamana, kareka ra te ngati Amaleki e te ngati Amulona, pakari roa to ratou ketaketa. Kua akaketaketa atu rai ratou i te ngakau o te ngati Lamana, kia riro katoa ratou ei au tangata maroiroi i te rave i te kino e te au mea rikarika.

4. Aere atura a Aarona ki te oire ra ko Ierusalema e kua akamata aia i te ako atu i te ngati Amaleki, E kua ako atura ia ratou i roto i to ratou au sunago, kua akatu oki ratou i te sunago mei tei tau ki te akaaereanga a Nihora. E manganui oki to te ngati Amaleki e te ngati Amulona tei aru i te akaaereanga a Nihora.

5. Tomo atura Aarona ki roto i tetai o to ratou au sunago ra i te ako atu i te au tangata, e iaia e tuatua atura ki te au tangata, e te ako atura oki aia ia ratou, i na, kua tu mai tetai tangata Amaleki, e kua akamata i te taumaro mai kia ratou, i te na ko anga e, Eaa taau e akakite ra? Kua kite ainei koe i te angela? Eaa i kore ei te angela e tae mai kia matou? I na, kare ainei teia au tangata e tau mei toou au tangata i te meitaki.

6. Te tuatua katoa mai nei koe e, me kore matou e tataraara ka tamateia matou. I akapeea koe i kite ei i te manako e te inangaro o roto i to matou nei ngakau? I akapeea koe i kite ei e, e mea tau ia matou kia tataraara? I akapeea koe i kite ei e, kare matou i te aronga tuatua tika. I na, kua akatu oki matou i tetai are tapu e ka uipa matou ki reira no te akamori atu i te Atua. Kua irinaki katoa matou e, ka akaora te Atua i te au tangata katoatoa.

7. Kua na ko maira a Aarona kiaia, Te irinaki ainei koe, e ka tae mai te tamaiti a te Atua e akaora i te tamariki a te tangata nei mei ta ratou au ara?

8. E kua karanga atura taua tangata ra kiaia e, kare matou e irinaki ana e, kua kitea te reira e koe, kare matou e irinaki i tena au tuatua neneva ra. Kare matou e irinaki e, kua kite koe i te au mea te ka tupu, e kare katoa matou e irinaki e, kua kite toou au metua, e pera katoa to matou ai metua i te au mea ta ratou i tuatua ana i te au mea te ka tae mai.

9. Kua akamata iora a Aarona i te akakite atu i te au tuatua tapu kia ratou no te oki anga mai o te Mesia, e pera katoa ki te tuakaouanga o tei mate, e kare atura e ora o te tangata nei, mari ua ra, na roto i te mateanga e te mamae o te Mesia, e te tarangaara o tona ra toto.

10. E te akamata ra aia i te akataka atu i teia au mea kia ratou, kua riri iora ratou iaia, ma te taitoito mai iaia, e kare atura ratou i akarongo i tana i tuatua maira.

11. E kite akera aia e, kare ratou i akarongo mai i tana tuatua, kua akaruke iora aia i to ratou sunago, e aere atura ki tetai oire tei karangaia e, ko Ani-Aniti, i reira oki aia i kite ei ia Muloki, e ia Ama, e tona au taeake, ka ako atu ratou i te tuatua kia ratou ra, e te ako ra ratou ki te au tangata e manganui i te tuatua.

12. E kite akera ratou e, kua ketaketa te ngakau o te au tangata, kua akaruke atura ratou, e kua aere atura ki te enua ra ko Mitioni, e kua ako atura ratou i te tuatua ki te au tangata e manganui, e toko iti ua oki tei irinaki i te tuatua ta ratou i apii atu.

13. Kua apainaia a Aarona e tetai pae o tona au taeake e kua tiriaia ratou ki roto i te are auri, e ko te toenga o ratou, kua oro ke atu ratou mei roto i te enua o Mitioni, e aere atura ki te au ngai e pini ua ake.

14. E ko te aronga tei tiriaia ki roto i te are auri, e maata tikai te au mea ta ratou i akakoromaki ana, e na Lamoni raua ko Amona i akaora ia ratou, e kua oronga i te kai kia ratou ma te akakakau.

15. Kua aere akaou atura ratou i te akakite atu i te tuatua, e kua akaoraia ratou no te taime mua mei roto mai i te are auri, ko te tu ia o to ratou au mate.

16. Aere atura ratou ki te ngai ta te vaerua o te Atu i arataki ia ratou, i te ako anga atu i te tuatua a te Atua ki roto i te au sunago o te ngati Amaleki, me kore ra, i roto i te au uipaanga o te ngati Lamana tei akatika ia ratou kia tomo.

17. E i na, kua akameitaki te Atua ia ratou, e e manganui oki tei ariu mai, e tei rauka te kite i te tuatua mou, kua kite papu ratou i reira i ta ratou au ara, e te papaanga o to ratou ai metua tei kore rava i tika

18. Kua oki atura a Amona e Lamoni mei te enua mai ko Mitioni ki te enua ko Isemaela, koia oki te enua o to ratou ipukarea.

19. E kare atura te ariki ra ko Lamoni e akatika ia Amona kia tavini iaia, e kare katoa aia i akatika iaia kia riro ei tavini nona.

20. Kua akaue atura aia kia akatuia tetai au sunago ki te enua ko Isemaela, e kua akaue aia i tona iti tangata, me kore, te iti tangata i raro ake i tona akatereanga, kia akaputuputu mai ki te ngai okotai.

21. E kua rekareka aia ia ratou, e ma te apii atu i tetai au mea e manganui kia ratou. Kua akakite katoa aia kia ratou e, e au tangata ratou tei raro ake iaia, e e aronga tiama oki ratou e kua rangatira ratou mei te angaanga kino a te ariki, tona metua, kua tuku mai oki tona metua iaia kia tutara aia ki rungao i te au tangata i runga i te enua ko Isemaela, e ki te au enua e pini ua ake.

22. E kua akakite katoa atura aia kia ratou, ka tika ia ratou kia akamori atu i te Atu to ratou Atua, mei tei tau i to ratou inangaro, e no atu eaa te ngai ta ratou ka noo, me tei roto i te enua i raro ake i te tutaraanga a te ariki ko Lamoni.

23. E kua ako atu a Amona ki te iti tangata o te ariki ko Lamoni, e kua apii atu aia ia ratou i te au mea katoatoa, e te tuatua tika ra. E kua ako atu aia ia ratou i te au rā katoatoa ma te maroiroi, e kua akarongo ratou i tana tuatua, e kua maroiroi oki ratou i te akono anga i te au akaueanga a te Atua.