Scriptures
Alama 61


Pene 61

Te tuatua maroiroi tikai a Pahorana. Kua apa kore aia e te au tangata inangaro au. Kua ngaueue te tuanga o te basileia o te ngati Niphai. Kua pati mai te kavana i tetai nuku ei tauturu i tei patoi mai.

1. I na, i muri ake i to Moronai tuku anga atu i tana episetole ki te kavana maata, kua tae mai tetai episetole kiaia mei ia Pahorana mai koia te kavana maata. E ko teia oki te au tuatua tei tae mai kiaia.

2. Ko au oki ko Pahorana te kavana maata o teia enua nei, te tuku atu nei au i teia tuatua kia Moronai, koia te rangatira maata o te nuku. I na, te karanga atu nei au kia koe e Moronai e, kare au e mataora ana i to kotou tumatetenga maata, e kua mamae tikai oki toku ngakau.

3. Ina ra, te vai ra te aronga tei mataora i to kotou au tumatetenga e kua tu oki ratou ki runga ma te mārō mai iaku nei, e i te au tangata inangaro au oki o toku ra au tangata, e e manganui oki ratou tei tu mai ki runga ra.

4. E ko ratou oki tei titau i te rave ke atu i te nooanga akava mei iaku nei, e ko ratou oki tei akatupu i teia ara maata nei, e kua tuatua oki ratou i te au tuatua taparu e manganui, ma te arataki ke i te ngakau o te au tangata e manganui ra, e na te reira oki i akatupu i te tumatetenga maata ki rotopu ia matou, e kua tāpū oki ratou i ta matou kai, e kua akamataku oki ratou i to matou au tangata inangaro au, i kore ei ratou e tauturu atu ia kotou.

5. I na, kua tuaru mai oki ratou iaku mei mua mai ia ratou, e kua oro atu au ki te enua ko Kitiona, e te au tangata katoa e manganui tei rauka mai iaku ra.

6. E i na, kua tuku atu au i tetai tuatua akakite ki roto i taua tuanga enua ra, e i na, te takiruru maira ratou ia matou i te au ra ravarai ma ta ratou au apinga tamaki, ei paruru i to ratou enua, e to ratou au, e ma te akaoko oki i to matou tarevake.

7. E kua aere mai ratou kia matou nei, e ko ratou tei orureau ia matou nei, e kua mataku ratou ia matou, e kare oki ratou i aere mai i te tamaki mai ia matou.

8. E kua rauka ia ratou te enua, me kore ra, te oire ko Zarahemela, kua iki oki ratou i tetai ariki ki rungao ia ratou, e kua tata atu aia ki te ariki o te ngati Lamana, e kua piri aia ki tetai taokotaianga ma ïa katoa, e i taua taokotaianga kua akatika aia kia mou i te oire ko Zarahemela, e na roto i tona mouanga ra, i manako ei aia e, ka rauka i te ngati Lamana i te toenga o te enua, e ka riro oki aia ei ariki ki rungao i teia au tangata nei me riro ake ratou ki raro i te akatereanga a te ngati Lamana.

9. E teianei, i roto i taau episetole, kua ako mai koe iaku, ina ra, kare te reira e manamanata rava, kare oki au e riri ana, te rekareka nei ra au ia koe. Kare oki au, Pahorana, e kimi ana i te mana noku ua, mari ra, kia noo ki toku nooanga akava, e kia rauka iaku i te akatika i te tikaanga e te tu rangatira ua o toku au tangata. Te tu papu ra toku ngakau ki taua au ra ta te Atua i akarangatira ia tatou ra.

10. E teianei, i na, ka patoi atu matou i te kino e tae rava atu ki te akamaringianga toto. Kare oki matou e akamaringi i te toto o te ngati Lamana me noo ua ratou ki to ratou enua.

11. Kare matou e akamaringi i te toto o to matou au taeake, naringa kare ratou e mārō mai ma te rave i ta ratou koke e tamaki mai ei ia matou.

12. Ka akakauraro matou ia matou uaorai ki te tuikaaanga me kua tau ki te tuatua tika a te Atua, me kore ra, kia akaue mai aia ia tatou kia pera.

13. Ina ra, kare aia i akaue mai ia tatou kia kauraro atu tatou ki to tatou au enemi, mari ra kia irinaki tatou kiaia, e ka akaora mai aia ia tatou.

14. E no reira, e taku taeake akaperepere e Moronai, kia patoi atu tatou i te kino, e me e kino tetai kare e rauka ia tatou i te patoi atu ki ta taua tuatua, mei te orureau e te tamaki, ka patoi atu tatou ki ta tatou koke, kia vai rai to tatou au, e kia rekareka maata tatou i ta tatou akonoanga, e te angaanga a to tatou Okaora to tatou Atu.

15. E no reira, e aere viviki mai kiaku ma tetai o toou au tangata, e ma te akaruke atu i te toenga, na Lihai e Teanekuma e akaaere, e e oronga katoa atu i te mana kia akaaere raua i te tamaki i tera pae o te enua, kia tau ki ta te vaerua o te Atua, e pera katoa ki te vaerua o te au i roto ia ratou.

16. I na, kua tuku atu au i tetai manga kai na kotou, kia kore oki ratou e mate e tae rava mai kotou kiaku.

17. E akaputuputu mai koe i te au tangata ka rauka mai ia koe ka aere mai ei koe kiaku nei, e ka aere atu ei taua ma te ririnui o to taua Atua ra e tamaki atu i taua au tangata ra tei patoi mai, kia tau ki te akarongo i roto ia taua.

18. E ka rave mai taua i te oire ra ko Zarahemela e kia rauka mai oki te kai no te tuku atu kia Lihai e Teanekuma, e ka aere atu rai tatou kia ratou ma te maroiroi o te Atu, e ka akaoti taua i teia nei au kino maata.

19. E teianei, e Moronai, te rekareka nei au i te ariki anga i taau episetole, no te mea kua manamanata au no ta matou ka rave, me ka aere ua atu matou kia tamaki atu i to tatou au taeake.

20. Ina ra, kua tuatua mai koe e, kia kore ratou e tataraara, kua akaue mai oki te Atua kia aere atu kotou e tamaki ia ratou.

21. E tenana, kia akamaroiroi atu koe ia Lihai raua ko Teanekuma i te Atu ra, e akakite atu kia raua e auraka e mataku, ka akaora oki te Atua ia raua, e pera katoa te au tangata katoatoa tei tāpū marie ki taua au ra ta te Atua i akarangatira ia ratou ra. E teianei, te akaoti nei au i taku episetole ki taku taeake akaperepere ko Moronai.