1. E teianei, teia te tuatua a Amona ki tona au taeake, ko tei na ko maira e, e aku au taeake e, i na, te karanga atu nei au kia kotou e, e tumu maata tetai i rekarekaʼi tatou, e tika ainei ia tatou kia manako e, i to tatou aereanga mai mei te enua ko Zarahemela, e ka oronga mai te Atua i te au akameitakianga mamaata no tatou?

2. E te ui nei au kia kotou e, eaa te akameitakianga mamaata tana i oronga mai kia tatou nei? Ka rauka ainei ia kotou i te akakite mai?

3. I na, naku e akakite atu kia kotou, no te mea tei roto to tatou au taeake ko te ngati Lamana i te poiri, koia oki, i te poiri tangotango, ina ra, e maata ratou tei akariuia mai kia kite i te marama vavaria o te Atua. E ko teia oki te akameitakianga tei orongaia mai kia tatou e kua riro oki tatou ei raverave na te Atua kia akatupu i teia angaanga maata nei.

4. I na, kua tausani o ratou tei rekareka, e kua akaariuia mai ki te koro o te Atua.

5. I na, kua manga te one kai, e ao oki to kotou, kua tuku oki kotou i te matipi e kua kokoti ma to kotou ririnui, e kua kokoti oki kotou e po ua ake i taua rā ra, e i na oki, te maata o ta kotou ruru sitona, e ka akaputuia ïa ki roto i te are vairanga kai kia kore e pou.

6. E kare oki e inga ki raro i te uriia me tae ki te ra openga, e e kare katoa e mauti i te puaioio, ina ra, me tae mai te uriia ka akaputuputuia mai ïa ki te ngai okotai, kia kore te uriia e takino atu ia ratou e kare katoa ratou e puia e te matangi ki te ngai ta te enemi e inangaro kia apai ke ia ratou.

7. Ina ra, tei roto ratou i te rima o te Atu o te mou, e nana oki ïa, e ka akatu mai aia ia ratou ki runga me tae ki te rā openga.

8. Kia akameitakiia te ingoa o te Atua, kia imene akapaapaa tatou iaia, e akameitaki atu tatou i tona ra ingoa tapu, e angaanga tika tana e rave nei e tuatau ua atu.

9. E naringa kare tatou i aere mai mei te enua maira mei Zarahemela, ko teia au taeake akaperepere, tei akaperepere maata ia tatou, kua riri ua atu rai ratou kia tatou i teianei, e kare rai ratou i kite i te Atua.

10. E oti akera a Amona i te tuatua i teia au tuatua nei, kua patoi mai tona teina iaia na ko maira, e Amona te mataku nei au e ko te riro aea te rekareka ei apai ke ia koe kia ngakau parau.

11. Ina ra, kua karanga atura a Amona kiaia, kare au e ngakau parau ana i roto i toku uaorai maroiroi, e i toku uaorai pakari, ina ra, kua ki au i te rekareka, e kua ki katoa toku ngakau i te rekareka, e ka rekareka au i toku Atua.

12. Kua kite oki au e, e mea puapinga kore au, e ko toku nei maroiroi kua apikepike ia e no reira, kare au e ngakau parau iaku uaorai, ina ra, ka akapaapaa atu au i toku Atua, e i tona maroiroi ka rauka iaku i te rave i te au mea ravarai, e i na, e manganui oki te au semeio maata ta tatou i rave i roto i teia enua nei, e ka akameitaki tatou i tona ingoa e tuatau ua atu.

13. I na, eia tausani o to tatou au taeake tana i tatara mai mei te mamae o ade, e kua aratakiia mai ratou kia imene i te aroa akaora, no te mea tei roto ia tatou nei te mana o tana ra tuatua e no reira kare ainei e tika ia tatou kia rekareka maata?

14. E tumu tetai kia akapaapaa tatou iaia e tuatau ua atu, no te mea, koia oki te Atua Teitei Rava Atu, e kua tatara mai i to tatou au taeake mei te au tapekaanga o ade ra.

15. Kua takapiniia oki ratou e te poiri mutu kore e te mate, ina ra, kua akaoki mai aia ia ratou ki te marama mutu kore, e ki te oraanga mutu kore e kua takapiniia ratou e tona ra aroa maata, e kua riro oki tatou ei rima rave i roto i tona ra rima i te rave anga i teia angaanga maata e te vavaria.

16. E tenana, e akakaka tatou, e ka akakaka tatou i roto i te Atu, no te mea kua maata roa to tatou rekareka, e ka akameitaki tatou i to tatou Atua e tuatau ua atu. I na, koai te tangata ka rauka iaia kia maata rava i tona akakaka anga i te Atu? E koai katoa te ka maata rava i te tuatua i tona ra mana maata, e tona aroa e tona ra akakoromakianga roa ki te tamariki a te tangata nei? I na, te karanga atu nei au kia kotou e, kare e rauka iaku i te akakite atu i te tuanga meangiti o toku nei inangaro iaia ra.

17. Koai ïa te tangata i manako ana e, ka aroa te Atua ia tatou kia raveia mai tatou mei ta tatou au ara viivii e to tatou tu rikarikia e te viivii.

18. I na, kua aere katoa atu matou ma te riri, e ma te ririnui kia takinga kino i tana akonoanga.

19. E teianei, eaa oki i kore ei aia e tuku ia tatou ki te mate rikarika ra? I na, eaa i kore ei aia e tuku mai i te koke tuatua tika nana ra kia topa mai ki rungao ia tatou, kia takoreia tatou ki te tumatetenga mutu kore.

20. Ka mataku toku vaerua ma te rere ke i taua manako nei. I na, kare aia i taangaanga i tana ra tuatua tika ki rungao ia tatou, ina ra, no tona aroa maata kua arataki mai aia ia tatou na rungao i taua va mutu kore o te mamae e te mate, ki te ora no to tatou vaerua.

21. E teianei e aku au taeake, koai oki to te tangata nei tei kite i teia au mea nei? Te karanga atu nei au kia kotou na e, kare ïa e tangata i kite i taua au mea ra, mari ra ko te ngakau tataraara.

22. Ko tei tataraara, e tei tamou i te akarongo, e tei akatupu i te angaanga tuatua tika e ma te pure tukumoe kore, tei taua au tu tangata ra te kite i te au tuatua ngaro a te Atua ra, e ka orongaia kiaia kia eeu mai i te mea eeu koreia ra, e tei iaia te akaariu mai i te tausani anga o te tangata tei tataraara, mei tei orongaia mai kia tatou kia akaariu mai i teia nei au tangata, koia oki to tatou au taeake tei tataraara.

23. Te akamaara ainei kotou, e, aku au taeake e, kua karanga atu tatou ki to tatou au taeake i te enua ko Zarahemela e, te aere atu nei tatou ki te enua ra ko Niphai kia ako atu i to tatou au taeake ko te ngati Lamana, e kua aviri mai ratou ia tatou.

24. Kua karanga mai oki ratou kia tatou e, te manako ainei kotou e, ka akaariu mai kotou i te ngati Lamana kia kite i te tuatua mou? Te manako ainei kotou e, ka rauka ia kotou i te akaariu mai i te ngati Lamana no te tarevake i te tuatua a to ratou ai metua, e te aronga marokiakia, e kua ki oki to ratou ngakau i te akamaringianga toto, e kua akapou ratou i to ratou au ra i te ara, e ko to ratou mataara, ko te mataara ïa o te aronga rave ara mei mua mai? E teianei e aku au taeake e akamaara kotou e, ko teia ta ratou tuatua.

25. E kua karanga katoa maira ratou e, e rave tatou i te au apinga tamaki e tamaki atu ia ratou, kia akakore tatou ia ratou e ta ratou au ara katoa i te enua nei, ko te tae aea mai ratou ki rungao ia tatou e ko te tamateia aea tatou.

26. Ina ra, e aku au taeake, kare tatou i aere mai ki te metepara nei ma te inangaro i te ta atu i to tatou au taeake, mari ra, ma te manako e, penei ake ka akaora tatou i tetai pae o to ratou au tangata.

27. Kia tupu te maromaroa ki to tatou ngakau, e kia vaitata tatou i te oki, i na, kua akapumaana maira te Atu ia tatou, e kua na ko maira e, E aere kotou ki rotopu i to kotou au taeake ko te ngati Lamana e akakoromaki atu ma te maru i to kotou au tumatetenga, e naku kotou e akamanuia atu.

28. E teianei, kua aere mai tatou, e kua aere katoa oki tatou ki rotopu ia ratou ra, e kua akakoromaki oki tatou i to tatou au tumatetenga, e te au angaanga mate katoa, e kua aere oki tatou mei tera are ki tera are i te irinaki anga atu i te aroa o teianei ao, e kare i te aroa o teianei ao ua, mari ra, ko te aroa katoa o te Atua.

29. E tae rava atura oki tatou ki roto i to ratou au ngutuare i te apii ia ratou e kua apii oki tatou ia ratou ki runga i to ratou au mataara, e kua apii katoa tatou ia ratou ki runga i to ratou au tuaivi, e kua tomo katoa tatou ki roto i to ratou au iero, e to ratou au sunago ma te apii atu ia ratou, e kua tuaruia tatou ki vao, e kua akakinoia, e kua tutuaia ki te uavare, ma te papaki i to tatou paparinga, e kua peia mai tatou ki te toka ma te tapekapekaia ki te taura, e ma te tiriaia atu ki roto i te are auri, e na roto i te mana e te pakari o te Atua kua akaora akaouia tatou nei.

30. E kua akakoromaki tatou i te au tu tumatetenga katoa, penei ake, ko te riro mai tatou ei mataara no te akaora anga i te au tangata, e kua manako iora tatou e, ka ki tatou i te rekareka mei te mea e, ko tatou te mataara no te akaora anga atu i tetai puke tangata.

31. E i na oki, ka tika ia tatou i te akara atea atu i te ua o ta tatou angaanga, e toko iti ainei ratou? Te karanga atu nei au kia kotou, kare, e manganui tikai ratou, e kua kite oki tatou i to ratou pikikaa kore, e to ratou inangaro i to ratou au taeake, e kia tatou katoa oki.

32. I na oki, kua tika ia ratou i te oronga atu i to ratou uaorai ora, e i te ta atu i to ratou au enemi, e kua tanu oki ratou i ta ratou au apinga tamaki ki raro i te one, no to ratou inangaro i to ratou au taeake.

33. E i na, te karanga atu nei au kia kotou e, te vai ainei te aroa i roto i te enua katoatoa? I na, te karanga atu nei au kia kotou e, kare, kare oki i rotopu i te ngati Niphai ra.

34. I na, ka rave ra ratou i ta ratou au apinga tamaki ma te māro atu i to ratou au taeake, kare ra ratou e tuku ia ratou uaorai kia taiaia. E i na, eia o ratou tei tuku i to ratou ora, e kua kite tatou e, kua oki ratou ki to ratou Atua no to ratou aroa e te rekareka kore i te ara.

35. E kare ainei e tika ia tatou kia rekareka? I na, te karanga atu nei au kia kotou e, kare rava e tika i te tangata mei muatangana mai kia rekareka mei ia tatou e rekareka nei, i teianei te tupu ra toku rekareka e tae rava atu ki te akapaapaa anga i toku ra Atua, tei iaia oki te mana, e te pakari, e te au tu marama, e kua marama aia i te au mea katoatoa, e Atua aroa aia, e tae rava atu ki te akaoraanga i te aronga ka tataraara, e ka irinaki ki tona ra ingoa.

36. E mei te mea e, e ngakau parau te reira ka akapera rai au i te ngakau parau, ko toku ora oki teia e toku marama, toku rekareka e toku akaora, e toku akaoraanga mei mua i te mate mutu kore. Kia akameitakiia te ingoa o toku Atua, ko tei tiaki meitaki mai i teia iti tangata, koia oki e atava oki ratou no te pu ko Iseraela, e kua ngaro oki mei tona tumu ki tetai enua ke, e te karanga atu nei au e, kia akameitakiia te ingoa o toku Atua, tei tiaki meitaki mai ia tatou, te au manuiri i te enua ke ra.

37. E teianei, e aku au taeake, te kite nei tatou e, te tiaki meitaki nei te Atua i te au tangata katoatoa, i roto i te au enua ravarai; i na, kua tare aia i tona au tangata, e ko tona ra ngakau aroa tei te ao katoa nei ïa, i na, ko toku rekareka teia, e toku akameitakianga maata, e ka akameitaki atu rai au i toku Atua e tuatau ua atu. Amene.