1. E to Amaleki, e to Amulona, e te ngati Lamana tei te enua ra i Amulona, e te enua katoa i Hilama, e tei te enua i Ierusalema, i na, tei te au enua e pini ua ake, tei kore i akaariuia mai, e tei kore i apai i te ingoa ko Anitai-Aniti-Niphai-Lihai, kua akatupuia to ratou riri ki to ratou au taeake e to Amaleki, e to Amulona.

2. Kua maata atura to ratou riri ia ratou, e kua akamata atura ratou i te patoi to ratou ariki, e kare ratou i inangaro akaou iaia kia riro ei ariki no ratou, no reira kua akatupu ratou i tetai tamaki ei tamaki atu i te tangata o Aniti-Niphai-Lihai.

3. Kua oronga atura te ariki i te basileia ki tana tamaiti e kua topa aia iaia ki te ingoa ko Aniti-Niphai-Lihai.

4. E kua mate te ariki i taua mataiti rai i akamataʼi te ngati Lamana i te akapapa ia ratou no te tamaki atu i te iti tangata o te Atua.

5. E kia kite a Amona, e tona au taeake e tei aru mai iaia i te teateamamao anga o te ngati Lamana kia takinga kino atu i tona au taeake, kua aere atura ratou ki te enua ra ko Midiani, e i reira oki a Amona i aravei ei i tona au taeake, e mei reira kua aere atura ratou ki te enua ra ko Isemaela kia rave i tetai uipaanga ia Lamoni, e tona taeake katoa, ko Aniti-Niphai-Lihai, kia kite e, eaa ta ratou ka rave ei paruru ia ratou uaorai mei te ngati Lamana.

6. E teianei, kare rava e tangata i roto i teia au tangata nei tei akaariuia mai ki te Atu, e inangaro i te rave i tetai apinga tamaki ka tamaki atu ei ki to ratou au taeake, e kare oki ratou i teateamamao, no te tamaki, e kua akaue katoa to ratou ariki ia ratou e, auraka.

7. E teia oki te tuatua tana i tuatua atu ki tona ra au tangata no taua mea ra, Te akameitaki nei au i toku Atua, e toku iti tangata akaperepere, no tei tono mai oki te Atua maata, na roto i tona meitaki, i to tatou au taeake no te ngati Niphai nei, kia apii mai ia tatou, e kia akakite mai kia tatou i te papaanga o to tatou ai metua tuatua kino ra.

8. E i na, te akameitaki katoa nei au i toku Atua, no te mea, kua oronga mai aia kia tatou i tetai tuanga o tona vaerua kia akamaru i to tatou ngakau, kia kite oki tatou i to tatou au taeake ko te ngati Niphai.

9. E i na, te akameitaki katoa nei au i toku Atua, no te mea, na roto i taua akakiteanga ra, kua kite tatou i reira i ta tatou au ara, e te au ta tangata ta tatou i rave.

10. E te akameitaki katoa nei au i toku Atua, koia oki, toku Atua teitei, koia i akatika mai kia tatou kia tataraara i teia au mea nei e kua akakore mai aia i ta tatou au ara e manganui, e te ta tangata ta tatou i rave ana, e kua kiriti ke aia i te ara mei roto i to tatou ngakau na roto i te meitaki o tana ra Tamaiti.

11. E teianei, e aku au taeake, i te mea, e ko ta tatou ua ia ka rave, (no te mea kua kino rava tatou i te au tangata katoatoa) kia tataraara no ta tatou au ara, e te ta tangata ta tatou i rave, e kia apai ke atu oki te Atua mei roto i to tatou ngakau, ko ta tatou ia ka tataraara tikai ki mua i te Atua kia akakore mai aia i ta tatou ara;

12. E toku au taeake akaperepere maata, no te mea, kua rave ke atu te Atua i ta tatou ara, kua kanapanapa mai ta tatou koke, e auraka rava tatou e akatou akaou i ta tatou koke ki te toto o to tatou au taeake.

13. I na, te karanga atu nei au kia kotou e, auraka ta tatou koke kia viivii akaou i te toto o to tatou au taeake, penei ake, me akaviivii akaou tatou i ta tatou koke, kare rava e tama akaouia e te toto o te Tamaiti a to tatou Atua teitei te ka maringiia mai no te akakoreanga i ta tatou au ara.

14. E e aroa maata to te Atua ia tatou, e kua akakite mai i teia au mea kia tatou nei kia kore tatou e mate, i na, e kua akakite mai i teia au mea kia tatou i mua ana, no te mea, e aroa tikai tona i to tatou au vaerua, mei tana i aroa mai i ta tatou au tamariki, e no reira, na roto i tona aroa kua atoro mai aia ia tatou na roto i tana au angela, kia akakite mai i te ravenga o te akaoraanga kia tatou, e ki te au uki a muri atu.

15. Aue, te aroa maata o to tatou Atua e, e teianei, i na, no te mea kua rave keia atu ta tatou au ara mei ia tatou, e kua akakanapanapaia ta tatou au koke, ka uuna tatou i te reira kia vai kanapanapa ua, ei kite ki to tatou Atua me tae ki te ra openga, me kore ra, ki te ra e aratakiia mai ei tatou ki mua iaia no te akavaanga, e kare oki tatou i akaviivii i ta tatou koke ki te toto o to tatou au taeake, mei te taime mai i akakite mai ei aia i tana tuatua kia tatou, e kua ma oki tatou.

16. E teianei e aku au taeake, me ka kimi mai to tatou au taeake ia tatou e ta, i na, ka uuna tatou i ta tatou koke, e ka tanu tatou i te reira ki raro i te one kia vai kanapanapa ua te reira, ei kite i te ra openga e kare rava tatou i taangaanga ana i te reira, e me tamate mai to tatou au taeake ia tatou, ka aere atu tatou ki to tatou Atua e ka akaora mai aia ia tatou.

17. E akaoti akera te ariki i teia au tuatua, kua uipa mai te tangata katoatoa ki te ngai okotai, e kua rave mai ratou i ta ratou au koke, e ta ratou au apinga tamaki katoatoa no te akamaringi atu i te toto o te tangata nei, e kua tanu oki ratou i te reira au mea ki raro i te one.

18. Kua na reira ratou ma te manako e, ka riro ïa ei kite ki te Atua e ki te tangata nei e, kare rava ratou e rave akaou i te au apinga tamaki ei akamaringi i te toto o te tangata nei, kua rave ratou i teia ma te taputou e te koreromutu atu ki te Atua i te na ko anga atu e, e ngari ake ia ratou i te oronga atu i to ratou ora e te akamaringi i te toto o to ratou au taeake; e e meitaki ake ia ratou i te oronga atu i te rave mai; e kare ratou i kaimoumou i to ratou au ra, ka angaanga ra ratou i to ratou uaorai rima.

19. Kua kite tatou i reira e, kua aratakiia mai te ngati Lamana kia akarongo e kia kite i te tuatua mou, kua ngakau toa ratou, e kua tika oki ia ratou kia akakoromaki e tae rava atu ki to ratou mateanga, i te rave i te ara, e kua kite tatou e, kua uuna ratou i ta ratou au apinga tamaki kia akatupu i te au.

20. E kua akapapa oki to ratou au taeake ko te ngati Lamana no te tamaki, e kua aere mai ki te enua ko Niphai kia ta atu i te ariki, e kia mono i tetai ki tona ngai, e kia tamate katoa i te tangata o Aniti-Niphai-Lihai mei runga i te enua.

21. I te kite anga teia aronga e, te aere mai nei ratou, kua aere atura i te aravei ia ratou, e kua topa iora ratou ki runga i te one i mua ia ratou ma te kapiki atu i te ingoa o te Atu, e kua akapera oki ratou kia akamata te ngati Lamana i te ta mai ia ratou, ma te ta mai ia ratou ki te koke.

22. Kua ta atu oki ratou ma te kore e tangata e arai, e kua ta ratou e tai tauasani e rima o ratou, e kua kite tatou e, kua akameitakiia ratou, kua aere oki ratou e kua noo ma to ratou Atu ra.

23. E kite akera te ngati Lamana e, kare to ratou au taeake e oro ke atu mei te koke e kare ratou e uri ki te rima katau e te rima kaui, ka tipapa ra ratou ki raro kia mate, e ka akameitaki atu i te Atua ka mate atu ei ratou i te koke ra.

24. E kite akera te ngati Lamana i te reira, kua akamutu atura ratou i te ta atu ia ratou, e maata tikai tei aue i te ngakau no to ratou au taeake tei mate i te koke ra, no te mea, kua tataraara oki ratou no te au mea ta ratou i rave ra.

25. E i akaruke ana ratou i ta ratou au apinga tamaki, e kare rava ratou e rave akaou, kua puta oki ratou no te au ta tangata ta ratou i rave, e kua topa rai ratou ki raro mei to ratou au taeake rai, ma te irinaki atu ki te aroa o ratou tei akateiteiia to ratou rima kia ta ia ratou.

26. Kua piri mai ki te au tangata o te Atua i taua rā ra, e maata atu i te aronga tei taiaia, e aronga tuatua tika oki ratou tei taiaia ra, e no reira kare e tumu kia ekoko tatou e, kua akaoraia ratou.

27. E kare oki e tangata kino i roto ia ratou tei taiaia, ina ra, e tai tauasani te rauka te kite o te tuatua mou, e kua kite tatou e te angaanga nei te Atua na roto i te ravenga e manganui i te akaora anga i tona iti tangata.

28. E teianei te maata anga o te ngati Lamana tei ta i to ratou au taeake, ko te ngati Amaleki ïa, e te ngati Amulona, e ko te maataanga no te akaaereanga a Nihora.

29. I roto i teia aronga tei piri atu ki te au tangata o te Atua, kare rava e ngati Amaleki, me kore ngati Amulona me kore, e tetai no te akaaereanga a Nihora e uanga ra ratou no Lamana e Lemuela.

30. E no reira te kite papu nei tatou e, kia akamaramaramaia tetai tangata e te Vaerua o te Atua, e kia rauka te kite maata no te tuatua tika, e i reira kua topa atura ki roto i te ara e te au angaanga kikino, kua riro ratou i reira ei tangata ketaketa tikai, e kua riro atura to ratou turanga ei mea kino atu i te aronga tei kore i kite i taua au mea ra.