1. E tae akera ki te openga o te tuatuaanga o Alama ki te au tangata o te akonoanga tei akatinamouia ki te enua ko Zarahemela, kua akamanaia tetai au taunga, e te ereta na roto i te tukuanga rima kia tau ki te akaaereanga a te Atua, ei akaaere i tana akonoanga.

2. E ko te aronga tei kore i piri mai ki te akonoanga, e tei tataraara i ta ratou au ara, kua bapetizoia no tei tataraara, e kua o ki roto i te Akonoanga.

3. E ko te aronga tei kore i piri mai ki te akonoanga, e tei kore i tataraara i ta ratou au kino ma te taakaaka ki mua i te Atua, koia oki ko tei ngakau parau kua patoiia ïa e ko to ratou au ingoa kua tipuia ïa ki vao, e kare katoa to ratou au ingoa e tarēia ki te ingoa o te aronga tuatua tika.

4. E kua akamata ratou i te akatinamou i te akaaereanga o te akonoanga ki te oire ko Zarehemela.

5. Te anoano nei au kia marama kotou e, kua orongaia atu te tuatua a te Atua ki te au tangata katoatoa e kare e araiia tetai ki te tikaanga kia uipa mai ma te akarongo i te tuatua a te Atua.

6. E no reira kua akaueia te au tamariki a te Atua kia uipa mai ki te ngai okotai ma te kapiti mai oki ia ratou ki te akakoreanga kai e te pure no te aronga tei kore i kite i te Atua.

7. I te oti anga i to Alama tuatuaanga, kua akaruke atu aia ia ratou, koia oki te akonoanga i roto i te enua ko Zarahemela, e kua aere atu ki te tuanga itinga o te kauvai ko Sidona ki te ō o Kitiona i roto oki i te ō tei karangaia e ko Kitiona, ko te tangata oki tei taiaia e Nihora ki te koke.

8. Kua aere atura Alama i te akakite atu i te tuatua a te Atua ki te akonoanga tei akatinamouia ki te ō o Kitiona, kia tau oki ki te eeuanga o te tuatua mou o te tuatua a te Atua tei tuatuaia mai e tona au metua, e pera katoa ki te totou a te vaerua tei vai ki roto iaia, e ki te kite o Iesu Mesia te Tamaiti a te Atua te ka aere mai ei akaora i tona iti tangata mei ta ratou au ara, e te akaaereanga tapu mei tana i kapikiia ana mei tei tataia. Amene.