1. E tae akera ki te ngauru ma tai o te marama i roto i te ngauru ma iva o te mataiti e i te ngauru o te ra, i kiteaiaʼi te nuku o te ngati Lamana i te aere anga mai ki te enua ra ko Amoniha.

2. E i na, kua akatu akaouia te oire, e kua akanoo a Moronai i tetai nuku ki te itinga o te oire ra, e kua akaputu ratou i te one e pini ua ake ei paruru ia ratou mei te ana e te au toka a te ngati Lamana, e i na, kua ta ratou ma te ana e te toka.

3. I na, te karanga nei au e, kua akatu akaouia te oire ko Amoniha, E karanga atu au kia kotou, i na, kua akatuia tetai pae e no te mea oki kua takoreia ana e te ngati Lamana no te ara a teia aronga nei, i manako ei ratou e, e mea ngoie kia rave akaouia e ratou.

4. Ina ra, kua poitirere roa ratou, i na, kua akatu te ngati Niphai i te one e pini ua ake ia ratou, e no te teitei i kore ei i rauka i te ngati Lamana i te pei mai ia ratou ki te toka, e kia ana mai i ta ratou au kakao ma te ririnui e putaʼi, e kare oki e tika ia ratou kia aere vaitata mai ratou kia matou mari ua ra, na to ratou ngai tomoanga rai.

5. Kua umere tikai te au rangatira mamaata o te ngati Lamana no te pakari o te ngati Niphai i te akateateamamao anga i to ratou ngai akapuanga.

6. I na, kua manako te au rangatira o te ngati Lamana e no to ratou maata e ka rauka ia ratou i te aere atu kia ratou mei tei mua ana, e kua maani oki ratou tetai au paruru, e te paruru umauma, e kua akapapa katoa ratou i te kakau pakiri, e pakiri petetue oki ei tapoki i to ratou kopapa taaka ua.

7. E no ta ratou akateateamamao i manako ei ratou e, ka rauka ngoie ua ia ratou i te akavi atu ma te arataki tuikaa atu i to ratou au taeake, me kore ra, e ta atu ia ratou kia tau ki to ratou inangaro.

8. Ina ra, kua umere roa ratou no te mea, kua akateateamamao ratou ma te au ravenga tei kore roa i kiteaia ana e te tamariki a Lihai. E teianei, kua papa ratou no te tamaki atu i te ngati Lamana, kia tau ki ta Moronai i apii mai ia ratou ra.

9. Kua umere tikai te ngati Lamana, koia oki te ngati Amalikaia i te tu o ta ratou ra au ravenga no te tamaki.

10. E teianei, naringa te ariki ra ko Amalikaia i aere mai mei te enua ra ko Niphai ei upoko no tona ra nuku, penei paa ka akaue aia i te ngati Lamana kia tamaki mai i te ngati Niphai i te oire ra ko Amoniha, i na, kare aia i akaperepere i te toto o tona iti tangata.

11. Ina ra, kare a Amalikaia i aere mai ki te tamaki. E i na, no te mataku i kore ei tona au rangatira mamaata i tamaki mai i te ngati Niphai i te oire ra ko Amoniha, e kua akatuke oki a Moronai i te ravenga i rotopu i te ngati Niphai ra, e kua ngere te ngati Lamana i to ratou ngai akapuanga, e kare oki e tika ia ratou kia aere mai kia ratou ra.

12. Kua oki atura ratou ki roto i te metepara, e kua apai atura i to ratou au puakapa, e aere atura ki te enua ra ko Noa, te manako ra ratou e, ko te rua o te ngai, ko te ngai meitaki rava atu ïa no te tamaki atu i te ngati Niphai.

13. Kare oki ratou i kite e, kua maani a Moronai, me kore ra, kua akatu i tetai paruru no te au oire e pini ua ake taua enua ra, kua aere tika mai ratou ki te enua ra ko Noa ma te akakoroanga papu tikai, e kua aere tika mai to ratou rangatira maata ma te taputou mai e, ka akapou ratou i te tangata o te reira oire.

14. Ina ra, kua poitirere tikai ratou no te mea na roto i te ravenga a Moronai i akariroiaʼi te oire ra ko Noa, ko tei paruparu ana i muatangana ei oire ketaketa, e kua aite tona maroiroi ki te oire ra ko Amoniha

15. E i na, e mea pakari te reira kia Moronai, e kua manako oki aia e, ka mataku ratou i te oire ra ko Amoniha, e no te mea ko te oire ra ko Noa ko te oire paruparu rava atu ïa o te enua, e ka aere ratou ki reira ka tamaki, e kua pera ratou kia tau ki tana i inangaro.

16. E i na, kua iki a Moronai ia Lihai ei rangatira maata ki rungao i te au tangata i taua oire ra, E ko taua Lihai rai tei tamaki ana ma te ngati Lamana i roto i te ō i te itinga o te kauvai ko Sidona.

17. E kite akera te ngati Lamana e ko Lihai te rangatira maata o taua oire ra, kua umere akera ratou, e e mataku maata tikai to ratou ia Lihai, e kua tuatua oki to ratou rangatira maata ma te taputou e, ka tamaki ratou ki taua oire ra, e no reira, kua arataki mai ratou i to ratou nuku.

18. I na, kare e rauka i te ngati Lamana i te tomo ki roto i to ratou au punanga paruru na tetai au ngai ke mari ra, na roto i te ngutupa, no te mea e teitei oki te nia i te maaniangaia e pera katoa no te oonu o te vaarua tei koia ia, mari ua ra ko te ngutupa.

19. E te noo teateamamao ua ra te ngati Niphai no te takore atu i te aronga te ka kake mai ma te tomo ki roto i te punanga na tetai mataara ke, ma te pepei i te toka e te ana kia ratou.

20. E kua na reira oki tetai pae o to ratou au tangata toa i te noo teateamamao anga, ma ta ratou au koke, e te maka no te ta atu i te au tangata katoa te ka tamata i te tomo ki roto i to ratou punanga na te ngutupa ra, e kua papa oki ratou i te paruru atu ia ratou uaorai mei te ngati Lamana.

21. E kua arataki maira te au rangatira mamaata o te ngati Lamana i to ratou au nuku vaeau ki te ngai o te ngutupa ra, e kua akamata i te tamaki atu i te ngati Niphai, kia rauka ia ratou te ngai ka tomo ei ki to ratou au ngai maroiroi, ina ra, kua akaokiia atu e kua taiaia ratou ma te mate maata.

22. E kite akera ratou e, kare e rauka ia ratou i te akavi i te ngati Niphai i te ngai o te ngutupa ra, kua akamata iora ratou i te ko i te aua one kia rauka tetai ngai tomoanga no to ratou nuku, e kia rauka to ratou ravenga, ina ra, no ta ratou i rave, kua akaatea keia ratou ki vao e te toka e te ana tei pepeiia mai kia ratou, kare ratou i akaki i te vaarua ki te one ina ra, kua akakiia e ratou ki to ratou au kopapa mate e te putaputa.

23. E kua rauka katoa te mana i te ngati Niphai ki rungao i to ratou au enemi, e kua inangaro tikai te ngati Lamana i te takore atu i te ngati Niphai e tae roa atu ki te matemateanga o to ratou au rangatira mamaata ra, e kua tere atu i te okotai tausani tangata o te ngati Lamana i taiaia, kareka ra ki te ngati Niphai, kare rava tetai o ratou i mate.

24. E mei te rima ngauru tangata i putaputa i te ana a te ngati Lamana i te ngutupa ra, kua paruruia ra ratou e to ratou au paruru, te paruru umauma, e te tapoki upoko, e no reira i puta uaʼi to ratou au vaevae anake, e kua kino roa tetai pae puta.

25. E kite akera te ngati Lamana e kua taiaia to ratou au ranagtira mamaata, kua oro atura ratou ki roto i te metepara. Kua oki atura ratou ki te enua ra ko Niphai i te akakite ki te ariki ra ko Amalikaia, e e tangata Niphai oki aia, kua akakite atu kiaia no runga i to ratou mate maata.

26. Kua riri tikai aia i tona au tangata, no te mea, kare i rauka mai tana i inangaro i te ngati Niphai, e kare oki aia i akatuikaa ia ratou ki te sugo o te tuikaaanga ra.

27. Kua riri otooto tikai aia, e kua akakino aia i te Atua, e Moronai katoa, e kua tuatua akera aia ma te taputou e, ka inu aia i tona uaorai toto, e no te mea oki e, kua akono a Moronai i te au akaueanga a te Atua i te akateateamamao kia akaora i tona ra au tangata.

28. Kareka i tetai tua, kua akameitaki atura te au tangata Niphai i te Atu to ratou Atua, no tona mana aite kore i te akaora anga ia ratou mei te rima o to ratou au enemi.

29. E ope akera te ngauru ma iva o te mataiti i te tutaraanga o te au akava ki rungao i te au tangata o Niphai ra.

30. E te vai ra oki te au i rotopu ia ratou e kua tupu meitaki oki te akonoanga no to ratou maroiroi e te akono katoa oki i te tuatua a te Atua tei akakiteia mai kia ratou ra e Hilamana, e pera katoa kia Sibiloni, e ko Korianetana, e ko Amona, e tona ra au taeake e te au tangata katoa tei akatainuia i te akaaereanga tapu a te Atua, e kua bapetizoia ma te tataraara, e kua tonokia atu kia ako atu ki te tangata nei.