1. E teianei e taku tamaiti, ko teia tetai mea tuatua iti taku i inangaro i te akakite atu kia koe, kua kite oki au e kua ekoko toou manako no te tuakaouanga o tei mate ra.

2. I na, te karanga atu nei au kia koe kare e tuakaouanga, me kore ra, te karanga atu nei au e, kare teia kopapa pe ua e riro ei kopapa pe kore mari ra, i muri ake i te taeanga mai o te Mesia.

3. I na, kua akatupu aia i te tuakaouanga o tei mate ra, ina ra, e taku tamaiti kare te tuakaouanga i tae mai ake. I na, ka akakite atu au kia koe i tetai tuatua ngaro, te vai rai te au tuatua ngaro e manganui, e kare rava e tangata i kite i te reira mari ra ko te Atua anake. Ina ra, ka akaari atu au i tetai mea kia koe i tetai mea taku i pati tamou ana ki te Atua kia kite au, koia oki no runga i te tuakaouanga.

4. I na, te vai nei tetai taime tei akatakaia e tuakaou mai ei te katoatoa mei te mate maira, kare oki e tangata i kite i te tuatau e tupu ei taua mea ra, kua kite ra te Atua i taua taime ra tei akatakaia.

5. E teianei, me ko tai ainei taime, me e rua, me e toru taime ka tuakaou mai ei te tangata nei mei te mate maira, kare e manamanata no te reira, no te mea kua kite te Atua i te au mea katoatoa. Kua rauka iaku kia kite e, e te vai rai te taime i akatakaia e tuakaou ei te tangata nei mei te mate mai.

6. E teianei, kia vai tetai tuatau i rotopu i te mateanga e te tuakaouanga e tikai.

7. E teianei, ka ui atu au e, ka aere te au vaerua tangata kiea i rotopu i te taime e mate ei, e i te taime i akatakaia no te tuakaouanga?

8. I na, me kua tere atu i te okotai taime tei akatakaia no te tuakaouanga o te tangata, kare e manamanata, kare oki te katoatoa e mate i te taime okotai, e kare te reira e manamanata, ka riro ïa e tai ra ki te Atua, e kua vaitoia te taime no te tangata anake.

9. E no reira, kua akatakaia tetai taime ki te tangata nei, kia tuakaou ratou mei te mate mai, e te vai ra tetai tuatau i rotopu i te mate, e te tuakaouanga. E teianei, no runga i taua tuatau ra, eaa te ka tupu ki te au vaerua tangata i reira, ko taku ia i ui atu ki te Atu kia kite au, e ko teia te mea taku i kite.

10. Me tae mai te tuatau, e tuakaou ei te katoatoa, ei reira ratou e kite ei e, kua kite te Atua i te au taime ravarai tei akatakaia no te tangata nei.

11. E teianei, no runga i te ngai o te au vaerua tangata i rotopu i te mateanga e te tuakaouanga, i na, kua akakiteia mai kiaku e te angela, e ko te vaerua o te au tangata me akaruke ake ratou i teia kopapa pe ua nei, e ko te vaerua o te au tangata katoatoa, no atu e meitaki ratou e me e kino, ka apainaia atu ratou ki taua Atua ra ko tei oronga mai i te ora no ratou ra.

12. Ei reira e arikiiaʼi te au vaerua o te aronga tuatua tika ki te ngai rekareka, ko tei karangaia e ko paradaiso, e ngai akangaroianga e te au, ko te ngai ïa ka akangaroi ei ratou mei to ratou au manamanata, e te taitaia, e te mii.

13. Ei reira te vaerua o te aronga kino, e te viivii e kore ei e rauka ia rotou tetai tuanga o te vaerua o te Atu, e i na, kua iki oki ratou i te au angaanga kikino, e kare i te mea meitaki, e no reira, kua tomo te vaerua o te tiaporo ki roto ia ratou, e kua rave i te tika o to ratou au ngutuare, e ka uriia ratou ki vao ki te poiri, te reira oki te aue e te mii, e te pakatianga nio, e ka tupu teia no ta ratou au ara, e to ratou arataki tuikaaangaia e te inangaro o te tiaporo.

14. I na, ko te tu teia o te au vaerua kino, ko tei vaooia ki te ngai poiri e te ngai rikarika, e te mataku, e te vai rai te riri otooto o te Atua ki rungao ia ratou, e ka noo ua rai ratou ki roto i teia ngai, e te aronga tuatua tika ki paradaiso, e tae roa atu ki to ratou tuakaouanga.

15. I na, te vai nei tetai aronga tei marama e, ko teia noo anga mataora, e teia noo anga mamae o te vaerua, i mua ake i te tuakaouanga, e ko te tuakaouanga mua ïa. I na, kua tika iaku kia tuatuaia te reira e ko te tuakaouanga mua, te akatuanga o te vaerua e te tuku anga i te reira ki te ngai rekareka, e me kore ra, ki te ngai mamae mei tei tau ki te tuatua i tuatuaia ra.

16. E i na, kua tuatuaia ana e, te vai rai tetai tuakaouanga mua, a tuakaouanga no tei vai ana, e te vai nei, e te ka vai a muri atu, e tae rava atu ki te tuakaouanga o te Mesia mei te mate maira.

17. Kare oki tatou e manako e, ko taua tuakaouanga mua ra i tuatuaia mei teia, e ko te tuakaouanga ïa o te au vaerua, e to ratou tuku angaia atu ki te ngai rekareka, me kore ki te ngai kino. E auraka kotou e manako e ko te aiteanga ïa.

18. I na, te karanga atu nei au kia koe e, kare, ko te aiteanga ra, ko te kapitianga te vaerua e te kopapa, o te au tangata mei te au ra mai o Adamu ki te tuakaouanga o te Mesia.

19. E teianei, me ka akaokiia mai te au vaerua o ratou tei tuatuaia ra ki te taime okotai, te aronga kino e te aronga tuatua tika, kare au e tuatua i te reira, te karanga atu nei ra au e, ka tuakaou ratou katoatoa, ka na mua ratou i te tuakaou i te aronga tei mate i muri ake i te tuakaouanga o te Mesia.

20. E teianei, e taku tamaiti, kare au i karanga atu e, ka tuakaou mai ratou me tae ki te tuakaouanga o te Mesia, ina ra, kua manako au e, ka kapiti akaou te vaerua e te kopapa o te aronga tuatua tika, me tae ki te tuakaouanga o te Mesia, e tona kake anga atu ki te rangi.

21. Kare ra au i karanga e ka tupu te reira i tona tuakaouanga me i muri ake, te karanga atu nei ra au e, te vai nei te tuatau i rotopu i te mateanga e te tuakaouanga o te kopapa, e te ngai vairanga o te vaerua ma te rekareka, e me kore ra, ma te mamae, e tae roa atu ki te tuatau i akonoia e te Atua no te tuakaouanga o tei mate ra, e te kapiti akaou anga o te vaerua e te kopapa, e ka apainaia mai ki mua i te Atua e ka akavaia no ta ratou au angaanga i rave.

22. E na teia e akatupu i te akaokianga mai o te au mea katoa tei tuatuaia e te vaa o te au peroveta.

23. Ka kapiti akaou te vaerua ki te kopapa, e te kopapa ki te vaerua, e te au paupauanga katoatoa, ka kapiti akaouia ïa ki tona kopapa, e kare oki tetai kata rauru e ngaro, ka akaokiia ra te au mea katoatoa ki to ratou ngai tikai.

24. E teianei, e taku tamaiti, ko te akaoki anga mai teia o te mea tei tuatuaia mai e te vaa o te au peroveta.

25. Ei reira te aronga tuatua tika e kaka mai ei ki roto i te basileia o te Atua.

26. E i na, ka tae te mate rikarika ki te aronga kino, ka mate oki ratou i te tuatua tika, no te mea, e aronga viivii ratou, e kare oki e rauka i te mea viivii kia ō ki te basileia o te Atua, ka tuaruia ra ratou ki vao, e ka akarukenaia ratou kia kai i te ua o ta ratou au angaanga, ko te kino, e ka inu ratou i te ota o roto i te kapu kavangu ra.