1. E tae akera ki te akamataanga o te rua ngauru ma rima o te mataiti i te tutaraanga o te au akava ki rungao i te au tangata o Niphai, e kua akatinamou oki ratou i te au ki rotopu i te au tangata o Lihai, e te au tangata o Morianetona no runga i to ratou au enua, kua akamata te rua ngauru ma rima o te mataiti ma te au.

2. Kareka ra, kare ratou i tamou tikai i te au ki roto i te enua, e kua akamata te tauetonoanga ki rotopu i te tangata no te akavanui ko Pahorana, e i na, te vai ra tetai pae tangata tei inangaro kia akatukeia tetai au ngai i te ture.

3. Ina ra, kare atura a Pahorana i akatuke, e kare oki e akatikaia kia akatukeia te ture, e kare oki aia i akarongo atu ki te aronga tei akakite mai i ta ratou tuatua akakite i te akatuke anga i te ture.

4. E no reira, kua riri akera ratou iaia ko tei inangaro kia akatukeia te ture, e kare rava ratou i inangaro akaou iaia kia riro ei akava maata ki rungao i te enua, e no reira, kua tupu akera te mārō e te tauetono, kare ra i te akamaringianga toto.

5. E ko ratou tei inangaro kia akataka keia a Pahorana mei te nooanga akava, kua karangaia ratou e, ko te au tangata inangaro ariki, e kua inangaro oki ratou kia akatukeia te ture, e kia tika oki ia ratou kia akakore i te au, e kia akatinamou i tetai ariki ki rungao i te enua.

6. E ko ratou oki tei akatika e kia noo rai a Pahorana ei akavanui ki rungao i te enua, kua kapikiia to ratou ingoa e, ko te au tangata inangaro au, e mei te reira oki te akataka ke anga i rotopu ia ratou, e kua akapapau oki te au tangata inangaro au kia vai rai ta ratou tika, e te au tikaanga o ta ratou akonoanga na roto i te akatereanga au.

7. Kua akakoreia te maro e te reo o te tangata. E na te reo o te tangata i akatinamou i te au tangata inangaro au ra e kua noo a Pahorana ki te nooanga akava ra, e kua tupu te rekareka maata ki te au taeake o Pahorana e pera katoa ki te au tangata inangaro au, ko tei akakore oki i te mārō a te au tangata inangaro ariki ra, ina ra, kare ratou i patoi mai, kua akatika ra ratou kia vai rai te akatereanga au.

8. E ko te aronga tei inangaro kia ikiia tetai au ariki, koia oki ko te au tangata nunui ïa, e kua inangaro ratou kia riro ratou ei au ariki, e kua turuia oki ratou e te au tangata tei inangaro i te mana e te tikaanga ki rungao i te au tangata.

9. E i na, e taime kino teia kia vai rai te reira tu mārō ki rotopu i te au tangata o Niphai, e i na, kua akakeu akaou a Amalikaia i te ngakau o te au tangata Lamana kia patoi ia Niphai, e te akaputuputu maira aia i te au vaeau no te au ngai ravarai o tona enua, ma te akapapa ia ratou, e ma te teateamamao ia ratou no te tamaki atu ma te maroiroi maata, e kua taputou oki aia kia inu i te toto o Moronai.

10. E i na, ka kite tatou e, ko te taputou tana i maani e mea puapinga kore ua ïa, e kua teateamamao oki aia i tona au nuku kia tamaki atu i te ngati Niphai.

11. Kua meangiti mai tona nuku i teianei i to mua ana, no te mea e manganui tikai te tauasani tei taiaia e te rima o te ngati Niphai ra, e manganui atura to ratou i mate, e kua akaputuputu maira a Amalikai i tetai pupu vaeau maata e kare rava oki aia i mataku i te aere atu ki raro ki Zarahemela.

12. E kua aere katoa rai a Amalikaia, e koia oki te arataki o te ngati Lamana. E tei te rua ngauru ma rima o te mataiti i te tutaraanga o te au akava, e ei taua taime rai i akamataʼi ratou i te akaau i ta ratou au tauetonoanga no runga i te akavanui ko Pahorana.

13. E kite akera te au tangata tei tuatuaia ra e ko te au tangata inangaro ariki, e te aere mai ra te ngati Lamana kia tamaki mai ia ratou, rekareka akera to ratou ngakau, e kare atura ratou i rave mai i ta ratou au apinga tamaki no to ratou riri oki i te akavanui, e pera katoa ki te au tangata inangaro au ra, e kare oki ratou i rave i te au apinga tamaki ei paruru i to ratou enua.

14. E kite akera a Moronai i te reira, e kite akera oki aia e, te aere maira te ngati Lamana i te kotinga o te enua ra, riri akera aia no te marokiakia i taua aronga tangata ra tana i angaanga ma te maroiroi tikai kia tiaki, e kua riri tikai aia ia ratou, e kua ki tikai tona ngakau i te makitakita ia ratou.

15. E kua unga atura aia i te tuatua akakite ma te reo akatika o te tangata ra ki te tutara o te enua, ma te pati atu kia tatau aia, e ma te oronga mai i te mana kiaia (Moronai) kia akaue atu aia ia ratou kia paruru i to rataou enua, e me kore ra, ka tamateia ratou.

16. Ko te mea mua ïa tana i rave kia akakore i te orureauanga i rotopu ia ratou e i na, na te reira i akatupu i to ratou au tumatetenga. E kua akatikaia mai te reira e te reo o te au tangata.

17. E kua akaue atura a Moronai i tona ra nuku kia aere ua atu ratou ki taua au tangata inangaro ariki ra, kia takore i to ratou tu ngakau parau, e to ratou tu ngateitei, e kia taakaaka ia ratou ki te one ra, me kore ra, kia rave ratou i te au apinga tamaki kia tauturu i te angaanga o te akarangatira anga.

18. Kua aere tika atura te au nuku kia ratou ra, e kua takore i to ratou tu ngakau parau, e to ratou tu ngateitei, e i to ratou rave anga i ta ratou au apinga tamaki kia tamaki atu i te au tangata o Moronai, i na, kua taiaia ratou e topa atura ki te one.

19. E i na, e ā oki tauasani tangata tei tamateia ki te koke, e ko tetai au arataki o ratou tei kore i mate i roto i te tamaki ra, kua tiriaia atu ïa ki roto i te are auri, e kare atura oki e taime kia akavaia ratou i taua taime ra.

20. E ko te toenga o taua au tangata orureau ra, kua tamateia ratou ki te koke, i na, kua inangaro ratou kia tukunaia te akairo o te au ki rungao ia ratou, e ki roto i to ratou au oire, e kia rave i te au apinga tamaki e kia paruru i to ratou enua ra.

21. E kua na reira oki a Moronai i te akaopenga anga i taua au tangata inangaro ariki ra, e kare rava tetai i kitea ki te ingoa o te au tangata inangaro ariki, e kua na reira oki aia i te akakore anga i te marokiakia e te tu ngakau parau o taua au tangata ra, ko tei karanga oki ratou e, no te uanga ariki mai ratou, ina ra, kua akaueia ratou kia taakaaka ia ratou ki raro mei to ratou au taeake, e kia tamaki pakari ratou no to ratou ora mei te tuikaaanga ra.

22. I na, te na reira oki a Moronai i te akakoreanga i te tamaki e te tauetonoanga i rotopu i tona ra au tangata ma te akaue ia ratou kia akatupu i te au e te au mea memeitaki ma te akateateamamao ia ratou no te tamaki atu ki te ngati Lamana, e i na, kua aere mai oki te ngati Lamana ki te enua ko Moronai ki te kotinga o te tai ra.

23. E kare atura i rava meitaki te ririnui o te ngati Niphai i roto i te oire ko Moronai, e kua tuaru ke atu a Amalikaia ia ratou, e ta atura i te au tangata e manganui. E kua rave iora a Amalikaia i te oire, e pera katoa to ratou au patu teitei.

24. E ko te aronga tei oro atu mei roto i te oire ko Moronai, kua aere atu ratou ki te oire ko Niphaiha, e pera katoa ki te au tangata o te oire ko Lihai, kua akaputuputu katoa mai ratou e kua akateateamamao no te tamaki atu i te ngati Lamana.

25. Ina ra, kare a Amalikaia i akatika i te ngati Lamana kia aere atu ki te oire ko Niphaiha kia tamaki, kua akaue atura aia kia noo ratou ki te pae tai. E kua vaioia oki tetai pae tangata ki roto i te au oire kia tiaki e kia paruru i te reira.

26. E kua na reira oki aia i te rave anga i te au oire e manganui, te oire ko Niphaiha, e te oire ko Lihai, e te oire ko Morianetona, e te oire ko Omena, e te oire ko Kiti, e te oire ko Muleka, tei te pae i te itinga o te ra ra taua au oire i te pae tai.

27. I na reira oki te ngati Lamana i te rauka anga mai i te au oire e manganui na roto i te au ravenga pakari a Amalikaia, e na to ratou au nuku oki tei kore e rauka kia tarēia, e kua aua ketaketaia oki taua au oire ra, mei te tu ketaketa o Moronai ra, e ko te akapuanga ketaketa rava atu ïa o te ngati Lamana.

28. Aere tika atura ratou ki te kotinga o te enua ko Bounetifula ma te au tangata Niphai ki mua ia ratou, e manganui oki tei taiaia.

29. Kua araveiia maira ratou e Teanekuma tei ta ia Morianetona, e tei arataki i tona ra au tangata i to ratou oro anga.

30. E kua akaaere katoa oki aia ia Amalikaia i tona aereanga atu ma tona nuku maata kia rauka mai ia ratou te enua ko Bounetifula, e pera katoa ki te enua i apatokerau ra.

31. Ina ra, kare atura aia i manuia no te mea, kua aravei aia ia Teanekuma e tona au tangata, e e au toa uritumu oki ratou, e pouroa oki te au tangata o Teanekuma, e au tangata ririnui oki ratou i te au tamakianga ravarai, i raukaʼi ia ratou te mana ki rungao i te ngati Lamana ra.

32. E te akapekapeka ra ratou kia ratou, e te ta ia ratou e po ua ake. E kua patia iora a Teanekuma e tona au tangata i to ratou puakapa ki te kotinga o te enua ra ko Bounetifula, e kua patia a Amalikaia i tona puakapa ki te kotinga i te pae taatai i te tai maata ra, e i na reira oki ratou i te tuaruangaia.

33. E po akera, kua aere ngaro atura a Teanekuma e tona au tangata ki vao, e kua aere atura ki te puakapa o Amalikaia, e i na, kua varea iora ratou e te moe no to ratou roiroi i te angaanga e te vera o te ra ra.

34. Aere ngaro atura a Teanekuma ki roto i te puakapa o te ariki ra, e patia atura i tona pukuatu, e kua ta viviki atura i te ariki, ma te kore rava i akaaraara i ona nga tavini.

35. E kua oki pipini atura aia ki tona uaorai puakapa, e i na, te moe rai tona au tangata, e kua akaaraara atura aia ia ratou ma te akakitekite atu i te angaanga tana i rave ra.

36. E kua karanga atura aia ki tona nuku kia teateamamao meitaki ratou ko te aru mai te ngati Lamana, e ko te aere aea mai e tamaki ia ratou.

37. E ope akera te rua ngauru ma rima o te mataiti i te tutaraanga o te au akava ra ki rungao i te au tangata o Niphai, e ope katoa akera te au ra o Amalikaia.