1. E kite akera a Alama e, kua muteki a Zezorama i te tuatua a Amuleka e kua mou tana ravenga pikikaa e te avare e mate aia iaia, e kite katoa aia e, kua akamata aia i te ruketekete ma te mataku no tona apa, kua tuatua tona vaa ma te akatinamou i te tuatua a Amuleka e te akamarama i te au mea tei runga atu i ta Amuleka i tuatua ana.

2. I na, ko te au tuatua ta Alama i tuatua atu kia Zezorama, kua rongoia te reira e te au tangata katoatoa, e urupu tangata maata oki, e kua tuatua aia ma te na ko atu e:

3. E Zezorama, kua kiteaia taau au tuatua pikikaa e te akavare, kare mei te mea, ko te tangata ua taau i pikikaa ana, kare, kua pikikaa katoa koe i te Atua, e i na, kua kite aia i toou au manako katoatoa, e kua kite katoa koe e, na tona vaerua i akakite mai i toou au manako kia maua.

4. E kua kite oki koe e, kua kite maua e ravenga pakari taau, mei ta te tiaporo rai, kia pikikaa e kia vavare i teia iti tangata kia ariu mai oki ratou kia patoi ia maua, kia tuaruia maua ki vao.

5. Ko te ravenga oki teia a toou enemi ra, e kua rave akenei oki aia i tona mana na roto ia koe na. I na, te inangaro nei au kia akamaara koe e, ko taku i tuatua atu kia koe, ko taku ïa e tuatua ki te katoatoa.

6. E i na, te karanga atu nei au kia kotou pouroa e, ko teia e puereere ïa na te enemi ko tana i tuku ei opu i teia au tangata, kia riro mai oki kotou ei tavini nona, e kia takapini oki aia ia kotou ki tana vivi, e kia rauka oki iaia i te tapeka ia kotou ki te mate mutu kore, kia tau ki ta tona mana i te akatuikaaanga.

7. I na, i muri ake i to Alama tuatua anga i teia au tuatua, kua mataku rikarika a Zezorama, no te mea kua irinaki aia ki te mana o te Atua e kua irinaki katoa aia e, e kite to Alama e Amuleka iaia, e kua irinaki katoa aia e kua kite raua i te au manako e te akakoroanga o tona ngakau, no te mea e mana oki tei orongaia mai kia raua kia kite oki raua i teia au mea nei kia tau ki te vaerua o te totou.

8. E kua akamata tikai a Zezorama i te uiui tika tikai kia raua, kia kite aia no runga i te basileia o te Atua. E kua karanga atura aia kia Alama, Eaa te aiteanga to teia tuatua ta Amuleka i tuatua ake nei no runga i te tuakaouanga o tei mate, e ka tu akaou mai te katoatoa mei te mate mai ra, te aronga tuatua tika, e te aronga tuatua tika kore katoa, e ka tu oki ki mua i te Atua, e ka akavaia kia tau ki ta ratou au angaanga i rave.

9. E no reira, kua akamata a Alama i te akamarama atu i teia au mea kiaia i te na ko anga e, kua orongaia mai ki te au tangata e manganui kia kite i te au mea ngaro a te Atua, ina ra, tei raro ake ratou i tetai ture pakari, auraka ratou e akakite atu, mari ra kia tau ki tana ka oronga atu ki te tamariki a te tangata nei, mei tei tau ki to ratou maroiroi e to ratou akarongo kiaia.

10. E no reira ko tei akaketaketa i tona ngakau ka tu aia i te tuanga meangiti o te tuatua, e ko tei kore i akaketaketa i tona ngakau, ka orongaia kiaia te tuanga maata o te tuatua, e ka orongaia te kite i te au mea ngaro a te Atua. E tae ua atu ki te kite i te au mea katoatoa.

11. E ko ratou te ka akaketaketa i to ratou ngakau, e orongaia atu te tuanga iti o te tuatua, e kore ua atu rai ratou e kite i te au mea ngaro o tona basileia, e ka riro oki ratou ei tuikaa na te tiaporo, e ka arataki aia ia ratou ki roto i te kino. I na, ko te aiteanga teia o te vivi o ade.

12. E kua tuatua marama ua oki a Amuleka no te mate, e te tuakaou anga o teia kopapa mate nei, ei kopapa mate kore, e ka apainaia mai ki mua i te aroaro o te Atua, e ka akavaia ki ta tatou uaorai angaanga.

13. E mei te mea, kua marokiakia to tatou ngakau, i na, me kua ketaketa to tatou ngakau ki te tuatua kia kore e kiteaia i roto ia tatou, e ka kino tikai to tatou noo anga, e ka akaapaia tatou.

14. Ka akaapa oki ta tatou tuatua ia tatou, e pera katoa ta tatou au angaanga kare i reira tatou e apa kore, e ka akaapa katoa to tatou ia tatou, e pera katoa to tatou au manako ia tatou, e i roto i teia ngai kino kare tatou e akara atu ki to tatou Atua, e ka rekareka maata tatou naringa ka rauka kia akaue atu tatou i te toka e te maunga kia topa mai ki rungao ia tatou kia uuna ia tatou mei mua mai i tona aroaro.

15. Kare ra e rauka i te reira, ka aere rai tatou ka tu ki mua i tona aroaro e ki tona kaka, e te mana, o tona ririnui, te ngateitei e te tika ma te akamanako i to tatou akama mutu kore, e e tika oki tana akavaanga, e e tika oki aia i roto i tana au angaanga, e e aroa maata oki tona ki te tamariki a te tangata nei, e e mana oki tona i te akaora i te au tangata katoatoa tei irinaki ki tona ra ingoa, e tei apai mai i te ua e tau ki te tataraara.

16. E i na, te karanga atu nei au kia kotou, e ka tae mai tetai mate, koia te rua o te mate, koia te mate vaerua, e ko te taime ïa, ko te tangata tei mate i roto i tana ara, i te mate kopapa nei, ka mate rai aia i te mate vaerua, e ka mate aia i te au mea tei tau ki te tuatua tika ra.

17. E ko te taime ïa e riro ei ta ratou angaanga mei te roto ai e te teio, e ka vai oki tona mura e tuatau atu, e ko te taime ïa e tapekaiaʼi ratou ki raro i te mamae mutu kore, ki te mana ririnui o Satani i te tuikaaanga, ka akaue oki aia ia ratou kia tau ki tona inangaro.

18. Te karanga atu nei au kia kotou, kua riro ia ratou mei te mea ra e, kare e akaoraanga i akonoia, e kare oki e rauka ia ratou kia akaoraia mei tei tau i ta te Atua tuatua tika, e kare oki ratou e mate no te mea kare oki e pe akaou.

19. E kia oti te tuatua a Alama, kua poitirere tikai te tangata.

20. Te vai ra tetai tangata Anitinona, e akaaere maata no ratou, kua aere mai aia ma te na ko mai kiaia e, Eaa taau i tuatua ake nei e ka tu akaou te tangata mei te mate mai e ka akariroia mei teia kopapa mate ua ki te kopapa mate kore, kia kore oki te vaerua e mate akaou?

21. Eaa te aiteanga o te irava tei na ko mai e, kua tuku iora te Atua i te kerubi ma te koke mura, ki te tuanga itinga o te kainga i Edene, ko te aere mai aea to tatou nga metua ko te kai aea raua i te ua o te pu rakau o te ora, e ka ora e tuatau ua atu? No reira kua kite oki tatou e, kare e rauka ia raua kia ora e tuatau ua atu.

22. Kua karanga atura a Alama kiaia, ko teia oki te mea taku ka akamarama atu. I na, kua kite oki tatou e, kua inga a Adamu na roto i te kai anga i te ua rakau raui kia tau ki te tuatua a te Atua, e no reira te kite nei tatou e, na roto i tona inga anga, kua riro te tangata katoatoa ei aronga ngaro e te inga.

23. E i na, te karanga atu nei au kia kotou, e naringa i rauka ia Adamu i te kai i te ua rakau o te ora i taua taime ra, kare i reira e mate, e ka riro te tuatua ei kare, ma te akariro i te Atua ei pikikaa, no te mea, kua karanga mai aia e, me kai koe ka mate koe.

24. Kua kite tatou i reira e kua tae te mate ki te tangata nei, ko te mate oki tei tuatuaia mai e Amuleka, koia oki te mate kopapa, e e ngai tetai tei orongaia mai ki te tangata nei kia rauka iaia te tataraara, e no reira kua riro teia oraanga nei ei ngai timata anga, e ngai no te akateateamamao i te aravei atu i te Atua, e ngai no te akateateamamao no te ngai openga kore ta maua i tuatua ana, koia oki i muri ake i te tuakaouanga o tei mate ra.

25. I na, e naringa e kare te ravenga o te akaoraanga i akamouia mei te akatumuanga mai o te ao nei, kare i reira e tuakaouanga o tei mate, ina ra, e ravenga tetai no te akaoraanga tei tukuia mai te ka akatupu i te tuakaouanga o tei mate, mei tei tuatuaia ana.

26. E i na, naringa kua rauka i to tatou nga metua mua i te kai i te ua rakau tei rauiia o te pu rakau o te ora, kua riro ia raua ki te ngai o te kino, ma te kore e ngai teateamamaoanga no raua, e kua riro te ravenga o te akaoraanga ei mea puapinga kore e ka akakoreia te tuatua a te Atua e kua puapinga kore ïa.

27. Kare ra, kua akonoia rai kia mate te tangata nei, e i muri ake i te mate, ka raveia te akavaanga, taua akavaanga rai ta tatou i tuatua ana, koia te openga.

28. E i muri ake i to te Atua akaue anga i teia au mea kia tupu ki te tangata nei, i na, kua kite aia e, e mea tau i te tangata kia kite i te au mea tana i akaue atu kia ratou.

29. E no reira, kua unga atu aia i tetai au angela kia tuatua atu kia ratou, e akakite ki te tangata nei i tona kaka.

30. Kua akamata ratou i reira mei taua taime maira i te kapiki i tona ingoa, e no reira kua tuatua mai te Atua ki te tangata nei ma te akaari mai kia ratou i te ravenga o te akaoraanga tei akapapaia mei te akatumuia anga mai te ao nei, e kua akaari mai aia i teia kia ratou kia tau ki to ratou akarongo e te tataraara e ta ratou angaanga tapu.

31. Kua oronga mai oki aia i te au akaueanga ki te tangata nei, e kua apa oki ratou i te akaueanga mua i te au mea o te kopapa nei, e kua riro mei te au Atua rai, i te kiteanga i te kino e te meitaki, e tikaanga to ratou kia ratou uaorai, e kua tukuia te tika kia ratou kia rave ua atu rai i to ratou inangaro, me e kino me e meitaki.

32. Kia oti akera iaia i te akakite anga kia ratou i te ravenga o te akaoraanga, kua oronga mai te Atua kia ratou i te au akaueanga, kia kore oki ratou e rave i te kino, ko te utunga no te reira, ko te rua o te mate, koia oki te mate mutu kore i te au mea tika, e kare o te ravenga o te akaoraanga mana ki runga i tetai mei te reira, no te mea, kare te tuatua tika e akakoreia kia tau ki te meitaki maata o te Atua teitei.

33. Ina ra, kua kapiki mai rai te Atua ki te tangata nei na roto i te ingoa o tana tamaiti (ko te ravenga teia o te akaoraanga tei akanooia) i te na ko anga e, me tataraara kotou, e ma te akaparuparu i to kotou ngakau, ka aroa atu au ia kotou na roto i taku Tamaiti Anau Tai.

34. E no reira, ko tei tataraara e tei ariu mai i tona ngakau, ka rauka iaia te aroa na roto i taku Tamaiti Anau Tai na roto i te akakore anga i ta ratou ara, ka noo i reira aia ki toku ra akangaroianga.

35. E ko te ka akaketaketa i tona ngakau ma te rave atu i te kino, koia rai te ka kore e noo ki toku ra ngai akangaroianga.

36. E teianei e aku au taeake, te karanga atu nei au kia kotou, e me ka marokiakia ua atu rai to kotou ngakau, kare kotou e ō ki te akangaroianga o te Atu, e ka riro ta kotou ara ei akariri iaia, e kia tuku mai oki aia i tona riri kia kotou mei te akaririanga mua kia tau ki tana tuatua i tona riri openga e pera katoa ki te mea mua, i te mate anga mutu kore o to kotou au vaerua, e no reira, kia tau ki tana tuatua no te mate openga, e pera katoa ki te mea mua.

37. E teianei, e aku au taeake, no te mea, kua kite pouroa tatou i teia au mea nei, e e tika katoa oki, e tataraara tatou, auraka e akaketaketa akaou i to tatou ngakau kia kore oki tatou e akariri atu ki te Atu to tatou Atua kia akatae mai i tona riri ki rungao ia tatou i roto i teia akaueanga rua tana i oronga mai kia tatou, mari ra, kia tomo tatou ki roto i te akangaroianga o to tatou Atua kia tau ki tana ra tuatua.