Scriptures
Alama 31


Pene 31

Kua aere a Alama i te akaoki mai i te ngati Zoroma ki te toka. Rameumutomo koia oki te ngai tapu.

1. E mate akera a Korihora, kua kite a Alama e, te uri ke ra te ngati Zoroma mei te au apiianga a te Atu e te arataki atura a Zoroma, to ratou arataki i te ngakau o te tangata kia tupou ratou ki raro i te au idolo murare ra, kua mamae akaou akera tona ngakau no te angaanga kino a teia aronga nei.

2. Kua tupu oki te tumatetenga maata kia Alama i tona kite anga i te ara a tona iti tangata, e kua mamae tikai tona ngakau no tei taka ke te ngati Zoroma e te ngati Niphai.

3. E teianei, kua akaputuputu te ngati Zoroma ia ratou ki te ngai okotai ki roto i te enua ko Anitionamu, ki te itinga o te enua ra ko Zarahemela i vaitatao ki te pae tai, e te pae apatonga i te enua ra ko Ieresona, e tei piri atu ki te metepara i te pae apatonga, e kua ki rava oki te metepara i te ngati Lamana.

4. Kua mataku rava akera te ngati Niphai ko te taokotai mai aea te ngati Zoroma e te ngati Lamana, e ko te riro aea te reira ei tumatetenga maata no te ngati Niphai.

5. E teianei, no te mea e ririnui maata to te akoanga i te tuatua tika i te arataki anga i te tangata kia rave i te au angaanga tika, e kua maata atu te reira i te ririnui ki rungao i te ngakau tangata nei i to te koke, e tetai atu au mea tei tupu kia ratou, e no reira, kua manako a Alama e, e mea meitaki oki kia tamata i te mana o te tuatua a te Atua.

6. No reira, kua rave aia ia Amona, e ia Aarona, e ia Omena, e ko Emenai ko tana i akaruke ki rungao i te ekalesia i Zarahemela. Ina ra, ko taua toko toru ra, kua rave aia ia ratou, e ia Amuleka raua ko Zezoroma tei noo ki Mireki, e nga tamariki tamaroa nana ra.

7. E ko tana tamaiti mataiapo, kare aia i aru iaia, e ko tona ingoa oki ko Hilamana, i na, ko te ingoa o tei aru iaia, ko Sibiloni e Korianetana, e ko te ingoa oki teia o te aronga tei aru iaia ki te ngati Zoroma i te ako atu i te tuatua kia ratou.

8. E teianei, kua akaruke te ngati Zoroma, i te ngati Niphai, e no reira, kua akoia atu te tuatua a te Atua kia ratou.

9. Kua topa ra ratou ki roto i te ara maata no te mea, kare oki ratou i akono i te au akaueanga a te Atua e tana ra au ture katoa kia tau ki te ture a Mose ra.

10. Kare katoa e tau ia ratou kia akono i te au peu o te akonoanga ma te pure atu rai ki te Atua i te au rā ravarai kia kore ratou e rokoia e te au timataanga.

11. E kua akatarevake ratou i te au aerenga o te Atu i te au mea e manganui, e no reira, i aere atu ei a Alama e tona au taeake ki taua enua ra kia ako atu i te tuatua a te Atua kia ratou.

12. E tae atura ratou ki taua enua ra, i na, kua umere tikai ratou e, kua akatu te ngati Zoroma i tetai au sunago, e kua uipa mai ratou ki te ngai okotai i tetai rā o te epetoma, ta ratou i karanga e, ko te rā o te Atu, e kua akamori i tetai akamorianga tei kore roa a Alama e tona au taeake i kite ana.

13. E kua patu oki ratou i tetai ngai i rotopu i to ratou sunago, e ngai teitei ake i te au upoko tangata, e ka ō ua e tai tangata.

14. E no reira, ko te tangata, tei inangaro i te akamori, ka aere ki runga i reira tu ei, ma te oora atu i ona nga rima ki te rangi, ka kapiki atu ei aia ma te reo maata i te na ko anga e,

15. E tapu e tapu te Atua, te irinaki nei matou e, e Atua koe, e te irinaki nei matou e, e tapu koe, e i vai vaerua ana koe e e vaerua koe, e ka vai koe e vaerua e tuatau ua atu.

16. E te Atua tapu, te irinaki nei matou e, naau i akataka ke ia matou mei to matou au taeake, e kare matou e irinaki ana ki te au peu a to matou au taeake, ko tei orongaia mai kia ratou na roto i te au ravenga neneva a to ratou ai tupuna, ina ra, te irinaki nei matou e naau matou i iki ei au tamariki tapu naau, e naau katoa i akakite mai kia matou e, kare e Mesia.

17. Ina ra, ko taua tu rai koe i nanai, i teia rā, e tuatau ua atu, e kua iki oki koe ia matou, e ka akaoraia oki matou e kua ikiia oki te au tangata i te pae ia matou kia tiriaia ki raro ia ade, e no te reira angaanga tapu, naau e te Atua, te akameitaki atu nei matou ia koe, e te akameitaki katoa atu nei matou ia koe, ko koe i iki mai ia matou, kia kore oki matou e aru i te au peu neneva a to matou au taeake tei tapekaia ratou ma te irinaki e, e Mesia tetai, ko tei arataki i to ratou ngakau kia aere ke atu mei ia koe e to matou Atua.

18. E te akameitaki akaou atu nei matou ia koe e te Atua, i te mea e, e aronga ikiia matou, e te tapu, Amene.

19. E kia akarongo a Alama e tona au taeake e tana au tamaroa i teia, kua umere tikai ratou.

20. I na, kua aere atu te tangata katoatoa e kua pure atu i te reira pureanga.

21. Kua tuatuaia taua ngai e ratou e ko Rameumutomo, ko tei akauriia e, ko te ngai tapu.

22. E i runga oki i teia ngai nei, ka pure atu te au tangata katoatoa i taua tu pure rai ki te Atua ma te akameitaki atu i te Atua, no tei iki mai ia ratou, e no tei kore oki aia i arataki ke ia ratou ki te au peu a to ratou au taeake, e kare oki to ratou au ngakau i ariu atu, ma te irinaki atu ki te au mea te ka tupu, tei kore rava ratou i kite.

23. E oti akera teia aronga i te akameitaki atu i te Atua ki teia tu akameitakianga, kua oki atura ratou ki to ratou au ngutuare, e kare oki ratou i tuatua akaou atu ki to ratou Atua, e kia putuputu akaou ratou ki te ngai tapu, kia akameitaki atu i te Atua ki taua tu akameitakianga ra.

24. E kite akera Alama i te reira, tumatetenga iora tona ngakau, kua kite oki aia e, e aronga kino e te ngakau ketaketa ratou e kua kite oki aia e, kua akamouia to ratou ngakau ki te auro, e te ario, e ki te au tu apinga memeitaki katoatoa.

25. E kua kite katoa aia e, kua akateiteiia to ratou ngakau ki te akapaapaanga maata, ma te ngakau parau.

26. E kua akateitei iora aia i tona reo ki te rangi, e kua kapiki atu i te na ko anga e, eaa te roa, e te Atu, ka akakoromaki ei to au tavini i te noo anga i te kopapa nei kia kite i te au tu kino o te tamariki a te tangata nei?

27. I na, e te Atua, te kapiki atura ratou kia koe, e kua apukuia to ratou ngakau e to ratou tu ngakau parau, e i na, e te Atua, te kapiki atura ratou kia koe ma to ratou vaa, ma te akamaata ia ratou ki te au mea kikino o te ao nei.

28. I na, e toku Atua, to ratou au kakau oko maata, e to ratou au tapea, e to ratou au tapeka rima, e ta ratou au apinga auro, e ta ratou au apinga memeitaki katoa i maneaʼi ratou, e i na, kua mou to ratou ngakau ki taua au mea ra, te kapiki atu nei ra ratou kia koe, ka na ko atu ei e, te akameitaki atu nei matou ia koe, e te Atua e, e aronga ikiia oki matou e koe, e ka mate oki te au tangata ke ra.

29. E kua karanga oki ratou e, kua akakite mai koe kia ratou e, kare e Mesia.

30. E te Atu, te Atua, eaa te roa i toou akakoromaki anga i te kino e te ara tei vai ki roto i teia aronga nei? E te Atu, ka oronga mai ana i te maroiroi kiaku, kia akakoromaki oki au i te au tumatetenga te ka tae ki runga iaku no te kino o teia iti tangata.

31. E te Atu, kua taitaia tikai toku ngakau, e akapumaana mai koe i toku vaerua i te Mesia nei. E te Atu, ka oronga mai ana koe kiaku te maroiroi, kia rauka iaku te akakoromaki i teia au kino nei te ka tae mai kiaku ma te maru no te ara a teia aronga nei.

32. E te Atu, kia akapumaana mai koe i toku vaerua, e akamanuia mai koe iaku e toku au taeake nei, e ko Amona, e Aarona, e Omena e pera katoa a Amuleka, e Zezoroma, e pera katoa ki taku nga tamariki tamaroa, e kia akameitaki mai ia ratou katoatoa e te Atu, e kia akapumaana katoa mai i to ratou au vaerua i roto i te Mesia nei.

33. Kia akamaroiroi mai koe ia ratou, i te akakoromaki i to ratou au tumatetenga te ka tae mai kia ratou no te au angaanga kikino a teia aronga nei.

34. E te Atu, kia akamanuia rai koe ia matou, kia arataki akaou mai matou ia ratou kia koe na, i roto i te Mesia.

35. I na, e te Atu, e mea puapinga maata to ratou au vaerua, e e manganui oki ratou e au taeake no matou, no reira, e oronga mai kia matou te mana e te pakari, kia rauka oki ia matou i te arataki mai i to matou au taeake kia koe.

36. E oti akera Alama i te tuatua atu i teia au tuatua nei, kua pokara akera aia i ona nga rima ki rungao i te aronga i ona ra, i na, i tona pokara anga i tona rima ki rungao ia ratou, kua ki akera ratou i te Vaerua Tapu.

37. E i muri ake i te reira, kua akataka ke iora ratou ia ratou tetai mei tetai, ma te kore roa o ratou manako e, eaa ta ratou ka kai, me kore, eaa ta ratou ka inu, e eaa katoa ta ratou ka aao.

38. E kua tauturu mai oki te Atua ia ratou kia kore ratou e pongi, kia kore katoa e kaki vai, e kua oronga mai aia kia ratou i te maroiroi, kia kore ratou e rokoia e te kino, mari ra, kia apukuia oki e te rekareka o te Mesia, e kua tau oki teia ki te pure a Alama, e no te mea oki e, kua pure aia ma te akarongo.