1. Kua riri akera a Moronai i te tae anga teia episetole kiaia, no te mea kua kite aia e, e kite papu tikai to Amorona i te tarevake i tana ra au tuatua e kua kite oki aia e, kua kite a Amorona e, kare i te mea tau kia tamaki atu ki te au tangata o Niphai.

2. E kua karanga atura aia e, i na, kare au e taui mou auri kia Amorona, kia akakore roa aia i tana ra au akakoroanga mei taku i akakite atu i roto i taku ra episetole, e kare oki au e akatika kia rauka iaia te mana, mari ua ra ko tei rauka iaia i teianei.

3. I na, kua kite au i te ngai e tiaki nei te ngati Lamana i toku ra au tangata ta ratou i rave ei tuikaa, e no te mea e kare a Amorona i akatika mai i taku i tata atu i roto i taku episetole, i na, ka oronga atu au kiaia mei tei tau ki taku ra tuatua. E ka ta au ia ratou, e kia pati rava mai ratou i te au.

4. E oti akera a Moronai i te tuatua i teia au tuatua nei, kua akaue atura aia kia kimiia i rotopu i tona au tangata e penei ake ka kiteaia mai tetai tangata e uanga aia no Lamana i rotopu ia ratou.

5. E kua kitea akera e ratou tetai tangata ko Lamana tona ingoa, e koia oki tetai o te au tavini o te ariki tei taiaia e Amalikaia.

6. E kua akaue atura a Moronai ia Lamana e tetai pupu tangata meangiti ona kia aere atu ki te au tiaki o te ngati Niphai ra.

7. I na, kua tiakiia te ngati Niphai i roto i te oire ko Kiti, no reira, kua iki a Moronai ia Lamana ma te akaue i tetai pupu tangata meangiti kia aere ma ratou katoa.

8. E aiai iora, kua aere atura a Lamana ki te au tiaki o te ngati Niphai, i na, kua kite maira ratou iaia i tona aereanga mai, e kua tuatua maira ratou kiaia e kua tuatua atu aia kia ratou, auraka e mataku, i na e tangata Lamana au. I na, kua oro mai matou mei ko mai i te ngati Niphai, e kua moe ratou, e i na, kua rave mai matou i ta ratou wina, e kua apai mai matou.

9. E teianei, i te akarongo anga te ngati Lamana i taua tuatua ra, kua ariki rekareka ratou iaia, e kua tuatua maira ratou kiaia, ka oronga mai ana i taau wina na matou, kia inu matou, e kua rekareka oki matou no tei apai mai kotou i te wina, kua roiroi oki matou.

10. Kua karanga atura a Lamana kia ratou, e vaio tatou i ta tatou wina kia aere roa tatou e tamaki atu i te ngati Niphai. Kua akamaata ra taua tuatua ra i to ratou inangaro kia inu i te wina.

11. Kua karanga atura ratou e, e roiroi oki matou e no reira, omai kia inu matou i te wina, e kare e roa ka rauka akaou mai te wina no to tatou kaikai anga, e na te reira e akamaroiroi ia tatou kia tamaki atu i te ngati Niphai.

12. E kua karanga atura a Lamana kia ratou, ka rave kia tau ki to kotou inangaro.

13. E kua inu oki ratou i te wina, e kua reka oki ratou i te inu anga, e kua inu akaou atu ratou, e mea pakari oki, e kua akapapaia ki tona pakarianga.

14. Kua inu iora ratou, e kua merengo, e kare i roaia ana kua kona ratou katoatoa.

15. E kite akera a Lamana e tona ra au taeake e, kua kona ratou katoatoa, e kua varea e te moe maata, kua oki atu ratou kia Moronai ma te akakite atu kiaia i tei tupu ra.

16. E teianei, kua tau te reira ki te inangaro o Moronai, e kua teateamamao a Moronai i tona au tangata ma te au apinga tamaki, e kua tono atura aia ia ratou ki te oire ra ko Kiti, koi vareaʼi te ngati Lamana e te moe, e te kona katoa, e kua oronga katoaia atu te au apinga tamaki kia ratou ki te au tangata i tapekaia ra, e kua akarakei tamakiia ratou katoatoa ra.

17. I na, ko ta ratou au vaine katoa e te tamariki oki, te aronga te ka rauka i te rave i te au apinga tamaki ra, e na Moronai i akarakei i taua au tuikaa ra, e kua raveia te reira au mea ma te maniania kore.

18. Naringa ratou i akaara i te ngati Lamana, i na, kua kona ratou e kua rauka i te ngati Niphai i reira i te ta ia ratou.

19. Ina ra, kare oki e ko to Moronai ïa inangaro, e kare oki aia e mareka i te ta i te tangata e te akamaringianga toto, kua rekareka ra aia i te akaora anga i tona ra au tangata mei te mate, e kare oki aia i rave i te au tuatua tika kore ra, e kare oki aia i aere ua atu ki runga i te ngati Lamana e ta atu ia ratou i to ratou konaanga ra.

20. Ina ra, kua rauka iaia tona ra au inangaro, kua akarakei oki aia i te au tangata o te ngati Niphai ra tei tapekaia ki roto i te aua o te oire, e kua oronga mai aia i te mana kia ratou, i raukaʼi ia ratou te au ngai i roto i te aua ra.

21. I reira, kua akaue atura aia i tona au tangata kia akaatea mei ia ratou ma te koropini i te au nuku o te ngati Lamana.

22. E i na, kua raveia teia i te po, e kia ara mai te ngati Lamana i te popongi anga ake, kua kite ratou i reira e kua koropiniia rotou e te ngati Niphai e kua akarakeiia ta ratou au mou auri i roto ra.

23. E kua kite iora ratou e, e mana to te ngati Niphai ki rungao ia ratou ra, e i roto i taua turanga ra, kua manako iora ratou e, e mea puapinga kore kia tamaki atu ratou ki te ngati Niphai, e no reira i akaue atu ei to ratou au rangatira mamaata, kia tukuia mai ta ratou au apinga tamaki, e kua apai mai e kua tuku mai oki ki te pae vaevae o te ngati Niphai, ma te pati atu kia aroa mai.

24. I na, ko te inangaro ïa o Moronai. Kua rave iora aia ia ratou ei tuikaa, e kua rave katoa oki i taua oire ra, e kua akarangatira iora i te au tuikaa o te ngati Niphai ra, e kua piri mai ratou ki roto i te nuku o Moronai, e kua riro oki ratou ei tauturu maata ki tona ra nuku.

25. Kua akaue atura aia i te ngati Lamana tana i tapeka ra ei tuikaa, kia akamata ratou i te angaanga i te akaketaketa anga i te au aua e pini ua ake te oire ra ko Kiti.

26. E oti akera te akaketaketa anga o te oire ra ko Kiti, kia tau ki tona inangaro, kua akaue atura aia kia apainaia tana au mou auri ki te oire ra ko Bounetifula, e kua paruru katoa aia i taua oire ra ma te nuku ririnui tikai.

27. E no atu rai te au ravenga muna a te ngati Lamana, kua mou rai ratou i te au mou auri ta ratou i apai atu, e te au enua e te au mea katoa oki i rauka ia ratou ra.

28. E kua akamata akaou te ngati Niphai i te autu, e kia rauka akaou ia ratou te au mea tika, e to ratou au tikaanga katoa.

29. E manganui te au taime i umuumu ana te ngati Lamana kia koropini ia ratou i te po, ina ra, kua ngarongaro tetai au pae mou auri o ratou.

30. E kua tamata pakari oki ratou kia akainu i ta ratou wina ki te ngati Niphai, e kia tamate ia ratou ki te wina kona e te poitini.

31. Ina ra, kare te ngati Niphai i marie i te akamaara i te Atu to ratou Atua i roto i to ratou au taime tumatetenga. E kare oki ratou e mou i ta ratou au puereere, e kare oki ratou e rave i ta ratou wina, mari ua ra kia oronga na muaia atu te reira ki tetai o te au mou auri Lamana.

32. E kua na reira ratou kia kore e mea poitini e orongaia atu kia ratou e me ka tamate ta ratou poitini i tetai tangata Lamana ka poitini katoa ïa i tetai tangata Niphai, e kua tamata ratou i ta ratou au tu wina katoa ra.

33. E i reira i tikaʼi ia Moronai kia akapapa no te tamaki atu i te oire ko Morianetona, e i na, kua na roto oki te ngati Lamana i ta ratou angaanga i te akaketaketa anga i te oire ra ko Morianetona e kua riro te reira ei akapuanga ketaketa roa.

34. E te rave maira oki ratou i te au aronga ou ki roto i te oire e pera katoa ki te apai anga mai i te kai ki roto i te oire ra ma te kore e akamutu.

35. E ope akera te rua ngauru ma iva o te mataiti i te tutaraanga o te au akava ki rungao i te au tangata o Niphai.