1 Cutin, ñuca, Alma, Diospaj mandashca caimanda Amulekta japishpa, richun yachachingapapash cutin cai llactapuracunata, nacashpa llactapuracunata picuna Ammoníah llactapi causajcunata, yalishca jipa paicunata yachachi callarircani, paicuna ñucahuan fiñai callarirca, nishpa:

2 Pita cangui? Ñucanchi cringa yanguichu shuj runapaj testimoniota, masqui ñucanchiman cai alpa tucurigrin nishpa yachachijpipash?

3 Cutin paicuna shimicunata na yuyaipi chasquirca imata paicuna parlashcata; imashpa paicuna na yacharcachu cai alpa tucurinata.

4 Paicuna nircapash: Ñucanchi na crishunllu quiquinba shimicunata quiquin achil villachijpipash cai jatun llacta shuj punllapi tucuchishca canata.

5 Cunan paicuna na yacharca Dios cashna juyaillapacha ruraicunata rurai ushajta, paicuna shuj shinlli shinlliyashcacuna carca shuj na cazuj llactapuracunapash.

6 Paicuna nirca: Pita Dios can, ashtahuan autoridadta na cachamungapa cai llactapuracunamanda shuj runamanlla, paicunaman cashna jatun juyaillapash cuzascunapaj ciertota villachun?

7 Paicuna ñaupaman rirca paicunapaj maquicunata ñuca jahuapi churangapa; ashtahuangari riqui, na rurarcachu. Ñuca paicunaman villangapa manllai illa carcani, ari, paicunaman manllai illa testificarcani, nishpa:

8 Riqui, Oh can na ali, huagli mirai, imashna cungashcanguichi cangunapaj punda taitacunapaj ruraicunata; ari, imashna ñapash cungashcanguichi Diospaj rurachunbacha saquishcacunata.

9 Nachu yaringui ñucanchi taita, Lehi, Jerusalénmanda Diospaj maquihuan pushamushca carca? Nachu yaringuichi pai aparca tucuita jichushca pambata?

10 Cungashcanguichu ñapash mashna viaje pai cacharichirca ñucanchi taitacunata paicunapaj na ricunayachijcunapaj maquicunamanda, tucuchinacunamandapash alchishpa charirca, paicunapaj propio huauquicunapaj maquicunamandapash?

11 Ari, paipaj pihuanbash na pactai ushaimanda, paipaj alicaimandapash, ñucanchipaman paipaj longanimidadtapash na cajpica, ñucanchi maimanda alpa jahuamanda huañuchishca canchiman carca pundallata nara cai punlla cajllapita, shuj na tucurina charij canata cushca canchiman carca llaquinayai manllanayaipash.

12 Riqui, cunan cangunaman nini pai cangunata arrepentirichun mandan; na arrepentirijpica, nimamanda Diospaj reinota na chasqui ushanguichichu. Ashtahuangari riqui, cai na tucuillachu—pai mandashca can canguna arrepentirichun, nacashpaca tucuillapacha tucurishca canguichiman cai alpa jahuallamanda; ari, pai ricuj shamunga cangunata paipaj fiñaipi, paipaj ninan fiñaita na shujman tigrachingachu.

13 Riqui, nachu yaringuichi shimicunata imata pai parlarca Lehiman, nishpa: Imashna canguna ñuca rurachunbacha saquishcacunata alichishpaca, cangunacai pambapi ali miranguichi? Cutin nishca can: Imashna canguna ñuca rurachunbacha saquishcacunata na alichishpaca canguna Apunchijpaj ñaupamanda anchuchi tucushca canguichi.

14 Cunan ñuca munani canguna yarichun, imashna Lamanitacunashna Diospaj rurachunbacha saquishcacunata na alichishca caimanda, Apunchijpaj ñaupamanda anchuchi tucushcacuna can. Cunan ñucanchi ricunchi Apunchijpaj shimi cai cuzaspi pactashca can, Lamanitacunapash paipaj ñaupamanda anchuchi tucushcacuna can, cai alpapi paicunapaj na alita rurashcacunapaj callarimanda.

15 Shina cajpipash cangunaman nini, paicunaman ashtahuan tolerable canga cangunata yali ricushpa chasquichina punllapi, canguna cangunapaj juchacunapilla cajpica, ari, cangunata yali paicunata ashtahuanbash tolerable cai causaipi, canguna arrepentirishpalla, na.

16 Tauca nishcapachacuna tian imata Lamanitacunaman cusha nishca; paicunapaj punda taitacunapaj yachachishcacunamanda paicunapaj na yachai canapi cashca; chaimanda Apunchij paicunata llaquij canga paicunapaj cai alpapi causaita mirachingapash.

17 Shuj punlla paicuna apamushca canga paipaj achil shimita crichun, paicunapaj punda taitacunapaj yachachishcacuna huagli cajta yachachun; paicunamanda taucacuna quishpiringa, Apunchijca llaquij canga tucui picunata paipaj shutipi mañajpica.

18 Ashtahuangari riqui, cangunata nini cangunapaj na ali ruraicunapi catijpica cangunapaj punllacuna cai alpapi na mirashca cangachu, Lamanitacuna cangunahuan macanajungapa shamunga; canguna na arrepentirijpica imaura na yachashca punllapi shamunga, ricuj shamushca canguichi tucui tucuchinahuan; cai canga imashna Apunchijpaj ninan fiñaihuan.

19 Paica na saquingachu cangunapa na ali ruraicunapi causachun, paipaj llactapuracunata tucuchingapa. Cangunata nini, Na; pai ashtahuangari saquinga Lamanitacuna tucuchichun tucui paipaj llactapuracunata picuna Nefipaj llactapuracuna shutichishcacuna can, imashpapash paicunapaj juchacunapi urmajpica na alita ruraicunapipash, ashtaca michata chasquishca jipa shina ashtaca yachajuita Apunchij paicunapaj Dios paicunaman cushca cajpi;

20 Ari, Apunchijpaj ninanda alicachishca llactapuracuna cashca jipa; ari, ashtahuan yalishpa alicachishca tucui shuj jatun llactacunamanda, reinocunamanda, shimirimaicunamanda, llactapuracunamandapash; paicunaman tucui cuzascunata yachaj chayachishca jipa, paicunapaj munaicunamanda, paicunapaj femanda, achil mañaicunamanda, ima cashca, ima can, ima shamunamandapash;

21 Diospaj Espíritu ricuj shamushca cajpipash; ángelcunahuan parlashca cashpapash, Apunchijpaj shimirimaihuan parlashca cashpapash; achil villachinapaj espírituta charishpapash, achil ricuchinapaj espíritutapash, tauca dongunatapash, shimirimaihuan parlana don, yachachingapaj don, Espíritu Santopaj don, shuj shimirimaiman tigrachina donpash;

22 Ari, Jerusalénpaj alpamanda Dios llujchimushca jipa, Apunchijpaj maquihuan; ninan yarjaimanda huacaichishca jipa, unguicunamanda, tucui laya paipura tandachishca nanaicunamanda; macanajuicunapi shinllicunaman tigrashca jipa, ama tucuchi tucushca cachun; cutin cutin huatai tucushcashnamanda cacharichishca jipa, alichishca alchishpa charishcapash cunangaman; ali mirashpa charijyangacaman tucui laya cuzascunapi—

23 Cunan riqui cangunaman nini, cai llactapuracuna, maijanguna chasquishca cashpa tauca achil yachishcacunata Apunchijpaj maquimanda, na ali rurajpica michapa yachajuitapash contra imata paicuna charin, cangunaman nini cai cashna cajpica, paicuna na ali ruraipi urmajpica, Lamanitacunapa ashtahuan tolerable canga paicunata yali.

24 Riqui, Apunchijpaj nishcapachacunata Lamanitacunaman cushca canga, ashtahuangari caicuna na cangunapa cangachu na ali rurajpica; nachu Apunchijca nishcapacha, shinllipacha mandashcapash, paita na cazujpica tucuillapacha tucuchishca canguichi cai alpa jahuamanda?

25 Cunan cai cashna cajpi, canguna na tucuchishca cachun, Apunchij cachamushca can paipaj ángelta tauca llactapuracunanata ricuj shamuchun, paicuna llujshishpa paicunaman ninandapacha yachachichun cai llactapuracunata, nishpa: Arrepentirichi, jahua pachapaj reino ñalla caipi can;

26 Cunanmanda na tauca punllacunapi Diospaj Churi paipaj punchapambapi shamunga; paipaj punchapamba Taitapaj Shujlla Churipaj punchapamba canga, ninan juyai junda, pacta, ciertopachapash, paciencia junda, llaquina, longanimidad, paipaj llactapuracunapaj caparicunata ñapash uyangapa paicunapaj achil mañaicunata tigrachingapa.

27 Riqui, pai shamun jatun causachingapa maijangunata bautizarishca cajpi arrepentimientopa, paipaj shutipi femanda.

28 Chaimanda, Apunchijpaj ñanda alichichi, punlla ñalla caipi can imaura tucui runacuna chasquinga paicunapaj carashcata imashna paicunapaj ruraicunamanda, imashna caicuna cashca cajpi—ali cashcajpica paicunapaj almacuna quishpirinata chasquinga, Jesucristopaj ushaihuan cacharinamandapash; paicuna na alicuna cashca cashpaca paicunapaj almacunapaj condenaciónda chasquinga, ayapaj ushaihuan huatai tucushcashnahuanbash.

29 Cunan riqui, ángelpaj shimi cai can, caparijun llactapuracunata.

30 Cunan, ñuca juyashca huauquicuna, ñuca huauquicuna caimanda, juyai tucushca cana canguichi, ali ruraicunata cuna carcanguichi imacuna ali can arrepentimientopa, cangunapaj shungucuna Diospaj shimipaj contra ninanda shinlliyashca caimanda, canguna shuj chingashca shuj urmashca llactapuracuna caimanda.

31 Cunan yalishca jipa imaura ñuca, Alma, cai shimicunata parlashca cashpa, riqui, llactapuracuna ñucata fiñashca carca paicunata ñuca nimanda paicuna shuj shinlli shinlliyashcacuna cajta shuj na cazuj llactapuracunapash.

32 Paicunata nishcamandapash chingashcacuna cajta urmashca llactapuracunapash ñucata fiñashca carca, paicunapaj maquicunata ñuca jahuapi churangapa munarca, cárcelman shitangapa.

33 Ashtahuangari yalishca jipa cai viaje Apunchijca na saquircachu ñucata japishpa cárcelman shitahuachun.

34 Yalishca jipa Amulek ñaupaman rishpa, paicunaman yachachi callarircapash. Cunan Amulekpaj shimicuna na tucuilla quilcashcachu, shina cashpapash paipaj huaquin shimicuna cai quilcashcapi quilcashca can.