1 Ñuca churi, uyai ñuca shimicunata, canman nini, imashna Helamánman nircani, shinapacha imashna can alichingui Diospaj rurachunbacha saquishcacunata cai pambapi ali mirangui; shinapachapash imashna can na alichingui Diospaj rurachunbacha saquishcacunata paipaj ñaupamanda anchuchi tucushca cangui.

2 Cunan, ñuca churi, ñuca confiani jatun cushijuita canbi charisha, Dios-huan shinlli caimanda, fiel caimandapash; imashna callarishcangui canba viñaj huambra canapi Apunchij canba Diosta confiashpa, shina ñuca shuyani can catichun paipaj rurachunbacha saquishcacunata alichishpa; imashpa achilyachishca can pimi tucurinacaman catirian.

3 Ñuca nini, ñuca churi, ña quiquinbi charishcani jatun cushijuita, quiquin fiel caimanda, utsialla caimandapash, quiquinba pacienciamandapash, quiquinba longanimidadmandapash Zoramitacunapaj llactapuracunahuan.

4 Ñuca yachani huatashca carcangui; ari, ñuca yachanipashmi achil shimimanda rumihuan pigai tucushca carcangui; tucui cai cuzascunata aparcangui pacienciahuan Apunchij quiquinhuan carca; cunan quiquin yachangui Apunchij quiquinda cacharichirca.

5 Cunan ñuca churi, Shiblón, ñuca munani yarichun, imashna ashtacata confianzata churangui Diospi shina ashtacata cacharichinga canba shinlli llaquicunapi, canba jatun llaquicunapi, canba llaquicunapipash, chai tucuri punllapi vichai alsashcapash cangui.

6 Cunan, ñuca churi, na munanichu can yachun cai cuzascunata ñucamandallata yachanita, ashtahuangari cai can Diospaj Espíritu imami ñucapi can imami cai cuzascunata ñucaman yachaj chayachihuashca; Diospaj na nacirishca cajpica ñuca na yachaiman carcani cai cuzascunata.

7 Ashtahuangari riqui, Apunchijca paipaj jatun shungumanda llaquinapi paipaj ángelta villahuachun cachamurca, ñuca tucuchingapaj ruraicunata saquichun paipaj llactapuracunapi; ari, ñuca shuj ángelta ricurcanipash ñavi ñavi, pai ñucahuan parlarca, paipaj shimi culun nij laya carca, tucui cai pachata chujchuchirca.

8 Yalishca jipa ñuca quimsa punllacuna quimsa tutacuna ninan jaya nanaipi carcani, almapaj llaquipipash; na carca, imaura Apunchij Jesucristota mañangacaman shungumanda llaquinata, ñuca juchacunata anchuchihuarca. Ashtahuangari riqui, ñuca paita mañarcani sumaj causaitapash tarircani ñuca almapa.

9 Cunan, ñuca churi, canman caita parlashcani jatun yachaita yachajuchun, ñucapamanda yachajuchun na tiajta cutishuj ñan nacashpa imashapash cana imamanda runacuna quishpirishca cana, Cristopi, paimandalla. Riqui, pai can causai, cai pachapaj michapash. Riqui, pai can ciertopachapaj shimi, ali ruraipapash.

10 Cunan, imashna achil shimita yachachi callarircangui shina ñuca munani yachachishpa catichun; ñuca munani utsialla, moderadopash cangui tucui cuzascunapi.

11 Ricui ama jariyaiman vichai alsarishca cangui; ari, ricui ama ninanda jariyangui canba propio yachaipi, nacashpa canba ashtaca shinllicaipi.

12 Manllai illa cai, ashtahuangari ama atirishca caichu; ricuipash tucui canba jatun munaicunata jarcari, juyaihuan junda cangui; ricui ama quilla cangui.

13 Ama achil mañai Zoramitacuna ruran laya, ricushcangui paicunaca achil mañan runacunahuan uyashca cangapa alabai tucushca cangapa paicunapaj yachaimanda.

14 Ama nichu: Oh Dios, pagui ñucanchipaj huauquicunata yali alicuna caimanda; ashtahuangari ni: Oh Apunchij, perdonai ñuca na ali caita, yaripai ñuca huauquicunata shungumanda llaquinapi—ari, canba na ali caita rijsi Diospaj ñaupapi punllan punllan.

15 Canba almata Apunchij achilyachichun, chai tucuri punllapi paipaj reinopipash chasquichun, sumaj causaipi tiaringui. Cunan ri, ñuca churi, cai llactapurata achil shimita yachachi. Serio cai. Ñuca churi, cayacaman.