1 Cutin, ñuca huauquicuna, ñuca munani cangunapa yuyaicunata tigrachichun chai punllaman imaura Apunchij Dios cai rurachunbacha saquishcacunata paipaj huahuacunaman curca; ñuca munani canguna yarichun Apunchij Dios ordenarca sacerdotecunata, paipaj achil ordenhuan, ima carca paipaj Churipaj layata catishpa, llactapuracunaman cai cuzascunata yachachingapa.

2 Cai sacerdotecuna ordenashca carca paipaj Churipaj layata catishpa, cai layapi imashna llactapuracuna rijsi ushachun ima layapi paipaj Churita ninanda shuyanata jatun causachinapa.

3 Cai layapi paicuna ordenashca carca—cayai tucushca cashpa alichishcapash cashpa cai pachata rurashcamanda Diospaj ñaupashpa yachaimanda, paicunapaj ninan femanda ali ruraicunamandapash; callari pushtupi saquishca carca ajllachun alita na alita; chaimanda paicuna alita ajllashca cashpa, ninan jatun feta churashpa, cayai tucushca can shuj achil cayaihuan, ari, achil cayaihuan imata alichishca carca, shuj alichishca jatun causachinahuan caicunapa.

4 Shina paicuna cayai tucushca cashpa cai achil cayaiman paicunapaj femanda, imaura cutishujcuna Diospaj Espírituta na cazujpi paicunapaj shungucunapaj shinlliyaimanda paicunapaj yuyaicuna ñausayaimanda, imaura, cashna na cashcajpica paicuna charinman carca jatun privilegiota paicunapaj huauquicuna laya.

5 Nacashpa tucuripi, cai callari pushtupi paicuna paicunapaj huauquicunahuan chai canallapita carca; shina cai achil cayai alichishca cashca cai pacha rurashcamanda maijan paicunapaj shungucunata na shinlliyachijcunapa, Shujlla Churi shujpa juchamanda huañushcamanda, shujpa juchacunamanda huañushcapipash, pimi alichishca carca—

6 Shina cayashca cashpa cai achil cayachinahuan, ordenashcapash sumo sacerdocioman Diospaj achil ordenhuan, yachachingapa paipaj rurachunbacha saquishcacunata runacunapaj huahuacunaman, paicunapash yaicui ushachun paipaj samanapi—

7 Cai sumo sacerdocio cashpa paipaj Churipaj layata catishpa, maijan orden carca cai pacha rurashcamanda; nacashpa shuj shimicunapi, cashpa punllacunapaj callari illa nacashpa huatacunapaj tucuri illa, alichishca cashpa mana tucurinamanda tucui mana tucurinacaman, tucui cuzascunapaj paipaj ñaupashpa yachaimanda—

8 Cunan paicuna cashna laya ordenashca carca—cayashca cashpa achil cayaihuan, ordenashcapash achil ordenanzahuan, paicunapi chasquishpa achil ordenpaj sumo sacerdociota, cai cayai, ordenanzapash, sumo sacerdociopash, callaripash illa nacashpa tucuripash illa—

9 Shina paicuna sumo sacerdotecunaman tigran na tucurinacaman, Churipaj ordenhuan jipa, Taitapaj Shujlla Churi, pimi can punllacunapaj callari illa nacashpa huatacunapaj tucuri illa, pimi ninan juyai junda, pacta, ciertopachapash. Shina can. Shinacapashcachun.

10 Cunan, imashna nircani cai achil ordenmanda, nacashpa cai sumo sacerdociomanda, taucacuna tiarca picuna ordenashca carca Diospaj sumo sacerdoteman tigrarcapash; cai carca paicunapaj ninan femanda arrepentimientomandapash, paicunapaj ali ruraimanda Diospaj ñaupapi, paicuna ajllashca arrepentimientota ali ruraicunata tucurinapa randi;

11 Chaimanda paicuna cayashca carca cai achil ordenhuan, achilyachishcapash carca, paicunapaj churajunacunapash tajshashca yurayachishca carca Llamagupaj yahuarhuan.

12 Cunan paicuna, achilyachishca cashpa Espíritu Santohuan, paicunapaj churajunacuna yurajyachishca cashpa, jucha illacuna cashpa mapa illapash Diospaj ñaupapi, juchata na ricui usharca ashtahuangari millanayaihuan; taucacuna tiarca, ninan taucapacha, picuna jucha illacuna carca Apunchij Diospaj samanapi yaicurcapash.

13 Cunan, ñuca huauquicuna, ñuca munani canguna humillarichun cangunamandallata Diospaj ñaupapi, apamuipash arrepentiringapa munai ruranacunata, cangunapash chai samanapi yaicui ushanguichi.

14 Ari, cangunamandallata humillarichi Melquisedecpaj punllacunapi llactapuracuna laya, pimi sumo sacerdote carcapash cai ordenhuan imamanda ñuca parlashcani, paimi paipaj jahuapi chasquirca sumo sacerdociota na tucurinacaman.

15 Chai Melquisedecllata carca piman Abraham diezmota pagarca; ari, ñucanchi taita Abraham diezmota pagarca chungamanda shujta tucui pai charishcamanda.

16 Cunan cai ordenanzacuna cashna layapi cushca carca, cai layapi llactapuracuna Diospaj Churita ninanda shuyachun, cai paipaj ordenpaj ricuchina cashca, nacashpa cai paipaj orden cashca, caita paicuna paita ninanda shuyachun paicunapaj juchacunata anchuchichun, paicunapash Apunchijpaj samanapi yaicui ushachun.

17 Cunan cai Melquisedec carca shuj jatun mandaj Salem alpapi; paipaj llactapuracuna shinllicuman tigrashca carca na ali ruraicunapi millanayaicunapipash; ari, paicuna tucuilla chingashca carca; tucui laya na ali ruraicunapi carca;

18 Ashtahuangari Melquisedec paipaj ninan feta churashpa, sumo sacerdociopaj oficiota chasquirca Diospaj achil ordenmanda, yachachirca paipaj llactapuracunata arrepentimientota. Riqui, paicuna arrepentirirca Melquisedec sumaj causaita alpapi paipaj punllacunapi churarca; chaimanda pai shutichishca carca sumaj causaipaj príncipe, Salempaj jatun mandaj carca; paipaj taitapaj munaiman curishpa reinarca.

19 Cunan, paipaj ñaupa taucacuna tiarca, paipaj jipapash taucacuna tiarca, ashtahuangari pipash pai yali jatun na tiarca; chaimanda, paimanda ashtahuan villaita rurashca.

20 Cunan na minishtinichu caimanda ashtahuan villanata; imata ñuca nircani ali can. Riqui, achil quilcashcacuna cangunapa ñaupapi can; canguna pandachijpica cangunapaj tucuchinapallata canga.

21 Cunan yalishca jipa imaura Alma cai shimicunata nishpa, paipaj maquita chutarca paicunapaman yachachirca shinlli shimihuan, nishpa: Cunan can arrepentirina punlla, quishpirina punlla ña chayamun;

22 Ari, Apunchijpaj shimi, ángelcunapaj shimihuan, tucui jatun llactacunaman villashca; ari, caita villashca, paicuna chari ushachun mushuj cushijunacunata jatun cushijuipaj, mushuj cushijunacunata tucui paipaj llactapuracunaman, ari, maijanguna alpa jahuallapi maimanbash chajchurishcacunamanbash; chaimanda paicuna ñucanchipaman chayamushca.

23 Caicuna ñucanchiman yachaj chayachishca can punchalla nishcacunapi ñucanchi yuyaipi japichun, ama pandanajungapa; cai na rijsi alpapi yanga purijcuna cashcanchi; chaimanda ñucanchi ninanda alichishca canchi, imashpa cai mushuj cushijunacunata villashca ñucanchita tucui ñucanchi uvas chagra pushtucunapi.

24 Riqui, ángelcuna villanajushca taucacunaman cai punlla ñucanchi alpapi; cai can imamanda alichina runacunapaj huahuacunapaj shungucunata paipaj shimita chasquichun paipaj punchapambapi shamuna punllapi.

25 Cunan ñucanchi shuyanchilla uyangapa cushijuipacha mushujcunata villachun ángelcunpaj shimicunahuan, paipaj shamunamanda; punlla shamun, ñucanchi na yachanchi mashna ñapash canata. Munaiman Dios ñuca punllacunapi cachun; ashtahuangari ñapash cajpipash jipaman cajpipash, caipi cushijushami.

26 Caita yachaj chayachishca canga alicunaman achil runacunamanbash, ángelcunapaj shimihuan, paipaj shamuna punllapi, ñucanchi taitacunapaj shimicuna pactashca canga, paimanda paicuna imata parlashcamanda, cai carca achil villachinapaj espírituhuan imami paicunapi carca.

27 Cunan, ñuca huauquicuna, ñuca munani ñuca shungu ucumanda, ari, jatun llaquiyaihuan, nanaicamanbash, ñuca shimicunata uyaichi, cangunapaj juchacunata llujchishpa cachaichi, cangunapaj arrepentirina punllata ama cayapa saquichichu;

28 Ashtahuangari cangunallata humillarichi Apunchijpaj ñaupapi, paipaj achil shutipi mañaichi, velaichi punllan punllan mañaichipash, ama tentai tucushca cangui na ushangacaman, shina pushai tucushca cangui Espíritu Santohuan, humildeman tigrashpa, manso, sumiso, paciente, juyai junda, tucui longanimidadhuan;

29 Apunchijpi feta charishpa; shuyaita charishpa na tucurina causaita chasquingapa; Diospaj juyaita cangunapa shungucunapi punllan punllan charishpa, chai tucuri punllapi vichai alsashca canguichi paipaj samanapi yaicunguichipash.

30 Apunchij arrepentimientota cupachun, paipaj fiñaita cangunapaman ama apamunguichi, canguna ama pillui tucushca canguichi ucu pachapaj huatashcacunahuan, cati huañuita ama llaquita yalinguichi.

31 Alma llactapuracunaman taucapacha shimicunata parlarca, caicuna cai quilcashcapi na quilcashca canllu.