Achil quilcashcacuna
Alma 32


32 Capítulo

Alma huajchacunaman yachachin, paicunapaj llaquicuna humildeyachirca—Fe shuj shuyai can imapash na ricushcapi imami ciertopacha can—Alma testifican ángelcunaca achil yachachin runacunata, huarmicunata, huahuacunatapash—Alma achil shimita shuj muyuhuan parijashpa ricuchin—Cai tarpushca cana micuchishcapash cana—Shina cai viñan shuj yura tucungacaman maimanda mana tucurinapaj fucushcata tandachishca can. Nara 74 C.Ñ.

1 Yalishca jipa llujshishpa, yachachi callarirca Diospaj achil shimita llactapuracunaman, paicunapaj tandanajuna huasicunaman yaicushpa, paicunapaj huasicunamanbash; ari, yachachircapash achil shimita paicunapaj ñangunapi.

2 Yalishca jipa paicunahuan ashtacata trabajashca jipa, paicuna éxitota chari callarirca llactapuracunapaj huajchacunahuan; riqui, paicuna shitashca carca tandanajuna huasicunamanda paicunapaj mana valishca churajunacunamanda—

3 Chaimanda paicunata na yaicuchun saquirca tandanajuna huasicunaman Diosta adorangapa, mapacunatashna ricui tucushca caimanda; chaimanda paicuna huajchacuna carca; ari, imapapash na valijcunatashna ricui tucushca carca paicunapaj huauquicunahuan; chaimanda paicuna huajchacuna carca cai pachapaj cuzascunapi; shungucunapi huajchacunapash carca.

4 Cunan, imashna Alma yachachijujpi, parlajujpipash llactapuracunaman Onida uchilla urcupi, chaiman shamurca shuj jatun ashtacapacha tandanajushcacuna, pimanda ñucanchi parlanajushcanchi, paicuna shungucunapi huajchacuna carca, huajcha caimanda cai pachapaj cuzascunapi.

5 Paicuna Almapaman shamurca; paicunamanda tucuita yalishca runa nirca: Riqui, cai ñuca huauquicuna imatashi ruranga, tucui runacunata millanayachin huajchacuna caimanda, ari, ashtahuanbacha ñucanchi sacerdotecuna; paicuna ñucanchi tandanajuna huasicunamanda calpachirca imata ñucanchi ashtacatapacha trabajarcanchi ñucanchi propio maquicunahuan shayachingapa; paicuna ñucanchita calpachishca ñucanchipaj ninan huajchacunamanda; ñucanchi na charinchi shuj pushtuta ñucanchi Diosta adorangapa; riqui, ñucanchi imatata rurashun?

6 Cunan imaura Alma caita uyashpa, paipaman muyushpa tigrarirca, paipaman ñapash ñavita tigrachirca, pai ricurca jatun cushijuihuan; imashpa pai ricurca paicunapaj llaquicuna ciertopacha paicunata humillachishcata, paicuna prepararishca cajtapash achil shimita uyangapa.

7 Chaimanda pai ashtahuan na nirca chaishu ashtacapacha tandanajushcacunata; ashtahuangari paipaj maquita chutarca, caparircapash maijangunata ricui usharca, picuna ciertopacha arrepentiringapa munanajujcuna carca, paicunaman nirca:

8 Ñuca ricuni canguna shungupi mansocuna canguichi; shina cashpaca, achilyachishca canguichi.

9 Riqui quiquinba huauqui nishca, Ñucanchi imatashi rurashun?—ñucanchi llujchishpa cachashca canchi ñucanchi tandanajuna huasicunamanda, ñucanchi Diosta na adorai ushanchi.

10 Riqui, cangunaman nini, canguna yuyanguichichu Diosta adoraita na ushanguichita quiquingunapaj tandanajuna huasicunallapi?

11 Ashtahuanbash, ñuca tapungapa munani, yuyanguichichu Diosta adoranaca semanapi shuj viajella can?

12 Cangunaman nini, cai ali can cangunapaj tandanajuna huasicunamanda shitashca cai, caimanda humilde cai ushanguichi, yachajui ushanguichi jatun yachaita; cai can minishtirishca jatun yachaita yachajuna; caimanda shitashca canguichi, millanayai tucushca cangunapaj huauquicunahuan canguna ninan huajchacuna caimanda, apai tucushca canguichi shungumanda humilde canaman; humilde cachun apashcapacha minishtirishca can.

13 Cunan, humilde cachun munai namunai churashca caimanda canguna achilyachishca canguichi; shuj runa huaquinbi, humilde cachun munai na munai churashca cashpaca, arrepentimientota mascan; cunan ciertopacha, pipash arrepentirijpica alicaita taringa; pai alicaita tarishpa tucurinacaman catiriashpaca quishpirishca canga.

14 Cunan, ñuca cangunaman nishcashna, canguna munai na munai churashca caimanda humilde cachun, achilyachishcacuna canguichi, nachu yuyanguichi paicuna ashtahuan achilyachishca can picuna ciertopacha humillarin paicunamandallata achil shimimanda?

15 Ari, pi ciertopacha paimandallata humillarin, paipaj juchacunamanda arrepentirin, tucurinacaman catiriashpa, achilyachishca canga—ari, ashtahuan achilyachishca pipash munai na munai churashca can humilde cachun paicunapaj ninan huajcha caimanda.

16 Chaimanda, achilyachishca can pimi humilde can paimandallata na humilde cachun munai na munai churashca cashpa; shinapacha, shuj shimicunapi, achilyachishca can pimi Diospaj achil shimipi crin, bautizarin shungupaj na shinlliyaihuan, ari, achil shimita yachachun na apashca cashpa, nacashpa munai na munai yachachun, nara crishpallata.

17 Ari, taucacuna tian picuna nin: Shuj señalta jahua pachamanda ricuchijpi, shina ñucanchi ciertopacha yachashun; shina ñucanchi crishun.

18 Cunan ñuca tapuni, caichu fe? Riqui, cangunaman nini, Na; shuj runa imatapash yachajpi, na minishtinllu crinata, pai caita yachaimanda.

19 Cunan, mashna ashtahuanbacha yali llaquichishca can pimi Diospaj munaita yachashpata na rurajpi, maijan critalla crin, nacashpa imatapash critalla charin, na ali ruraipi urman?

20 Cunan caimanda canguna ricushpa chasquichina canguichi. Riqui, ñuca cangunaman nini, shuj partemanda cashna can shinallata chaishu partepash can; cai canga tucui runacunata paipaj rurashcamanda.

21 Cunan imashna nishcani femanda—fe na canllu cuzascunamanda shuj alipacha yachaita charina; chaimanda quiquin feta charishpa, shuyaitapash charingui na ricushca cuzascunapi, imacuna ciertopacha can.

22 Cunan, riqui, cangunaman nini, ñuca munaiman canguna yarichun, Dios alicashcata tucui picuna paipaj shutipi crijcunahuan; chaimanda pai munan, callaripi, canguna crichun, ari, paipaj shimipipash.

23 Cunan, paipaj shimita runacunaman yachaj chayachin ángelcunahuan, ari, na runacunamanlla ashtahuangari huarmicunamanbash. Cunan cai na tucuillachu; viñaj huahuacunamanbash shimicunata cushca paicunaman tauca viaje, caicuna pandachin yachajta, yachashca cajcunatapash.

24 Cunan, ñuca juyashca huauquicuna, ñucamanda yachangapa munashcanguichi imata ruranata imashpa canguna llaquichishca canguichi shitashcapash—cunan ñuca na munanichu canguna yachun ñuca munai cajta cangunata ricushpa chasquichingapa ashtahuangari ima ciertopachahuanlla—

25 Ñuca na ningapa munanichu cangunamanda tucuilla munai na munai humilde cachun; ñuca ciertopacha crini tian tauca cangunamanda maijan paicunamandallata humillaringa, imacunapi cashpapash.

26 Cunan, femanda imashna nishcani—cai na carca shuj alipacha yachai—shinami ñuca shimicunahuambash. Callaripillata na alipacha yachai ushanguichichu ciertopacha cajta, imashna fepash shuj na alipacha yachai can.

27 Ashtahuangari riqui, canguna rijcharinguichi, canguna tucui cashcacunata rijchachipash, ñuca shimicunata ali na ali ricungacaman, ashalla feta churaichi, ari, na cashpapash ashalla cringapa munaitalla, saqui cai munai trabajachun quiquinbi, canguna cringacaman shuj pushtuta asha ñuca shimicunaman cungacaman.

28 Cunan, ñucanchi achil shimita shuj muyuhuan parijashpa ricuchishun. Cunan, canguna pushtuta cushpaca, shuj muyuta tarpushca cachun canba shungupi, riqui, ciertopacha muyu cashpaca, nacashpa shuj ali muyu cashpa, caita ama llujchichichu cangunapaj na crimanda, Apunchijpaj Espírituta ama jarcaichichu, riqui, cai viñai callaringa cangunapaj pechopi; imaura cai viñajujta sentishpa, ni callaringuichi cangunapillata—Cai ciertopacha yarin, cai ali muyu can, nacashpa achil shimi ali can, imashpa cai callarin ñuca almata mirachishpa; ari, cai callarin punchalla yuyaipi chasquichita ñuca yuyaita, ari, cai ñucapi mishqui cai callarin.

29 Cunan riqui, nacha cai cangunapaj feta mirachinga? Cangunaman nini, Ari; shinapash cai na shuj alipacha yachaiman chayashcachu.

30 Ashtahuangari riqui, imashna muyu punguin, llujshinbash, viñai callarimbash, shina ciertopacha yarin ningui, ali muyu can; riqui cai punguin, llujshinbash, viñai callarimbash. Cunan, riqui, cangunapaj feta nachu shinlliyachinga? Ari, riqui cai cangunapaj feta shinlliyachinga: cangunaman nini ñuca yachani cai shuj ali muyu can; riqui cai llujshin, viñai callarinbash.

31 Cunan, riqui, segurochu canguichi cai shuj ali muyu cajta? Cangunaman nini, Ari; tucui muyucuna fucuchin paipuralla.

32 Chaimanda, shuj muyu viñashpaca cai ali can, ashtahuangari cai na viñashpaca, riqui cai na ali can, chaimanda cai shitashca can.

33 Cunan, riqui, canguna ali na ali cajta yachangapa munashpaca, muyuta tarpuichi, cai punguin, llujshin, viñai callarijpi, yachanguichipacha cai muyu ali cajta.

34 Cunan, riqui, cangunapaj alipachachu yachaica? Ari, cangunapaj yachai alipacha cajpica chai cuzaspi, cangunapaj fe na cuyurijuj can; cai canguna yachaimanda, canguna yachashpa shimita cangunapa almata punguichirca, canguna yachanguichipash cai vichai llujshirca, cangunapaj yachai punchalla yuyaipi chasquichi callarirca, cangunapaj yuyaicunapash mirai callarin.

35 Shina, nachu cai real can? Cangunaman nini, ari, cai micha caimanda; ima michapash, ali can, cai yachanalla caimanda, chaimanda yachana cangui cai ali cajta; cunan riqui, malishca jipa cai micha ali cajta canguna yachai alipachachu?

36 Riqui ñuca cangunaman nini, Na; cangunapaj fetapash na ladoman jichuna canguichi, cangunapaj feta churashcalla canguichi muyuta tarpungapa, canguna ali na ali cajta ricushpa yachanguichi muyu ali cashcata.

37 Riqui, imashna yura viñai callarin, canguna ninguichi: Micuchishunchi jatun cuidadohuan, cai sapita charichun, cai viñai ushachun, ñucanchiman fucushcata carachun. Cunan riqui, ashtacata cuidashpa micuchijpica cai sapiyanga, vichai viñanga, fucushcatapash caranga.

38 Ashtahuangari yurata na ricuriajpica, na yarishpa caiman na micuchijpica, riqui cai na sapiyangachu; imaura indi rupai shamujpi caita anguyachingapash, cai sapi illa caimanda chaquinga, caita pilanguichi, canllaman shitanguichipash.

39 Cunan, cai na canllu muyu na ali caimanda, napash cai canllu fucushca na munanayai caimanda; ashtahuangari cangunapaj tarpuj alpa nimata na fucuchij caimandami, canguna yurata na micuchinguichi, chaimanda fucushcata na chari ushanguichi.

40 Shina, achil shimita na tarpushpaca, ñaupaman ricushpa fepaj ñavihuan chai fucushcata, canguna nimaura na japinguichichu causana quirumanda fucushcata.

41 Ashtahuangari achil shimita tarpushcapa, ari, yurata micuchishpa imashna viñai callarijpi, cangunapaj fehuan jatun utsialla ricuihuan, pacienciahuan, fucushcaman ñaupaman ricushpa, cai sapiyanga; riqui cai shuj yura canga viñanga mana tucurina causaiman.

42 Cangunapaj utsialla ricuimanda cangunapaj femandapash, canguna pacienciamanda achil shimihuan caita micuchimanda, cangunapi sapiyanga, riqui, ashatacashpa cai fucushcata japinguichi, caica ninan juyaillapacha can, caica tucui mishquicunamanda yali mishqui can, tucui yurajllamanda yali yurapacha can, ari, tucui puromanda yali puro can; cai fucushcata ninan munanayai jahuapi chasquichi jundashca cangacaman, na yarjachinguichichu, na yacunayachinguichipashchu.

43 Shina, ñuca huauquicuna, chasquinguichi cangunapaj femanda randi chasquinacunata, cangunapaj utsialla ricushcacunatapash, pacienciatapash, longanimidadtapash, shuyashpa yura fucushcata cangunaman cunata.