1 Yalishca jipa ricuj runacunata churarca Lamanitacunapaj prezucunapaj jahuapi, munai na munai richun paicunapaj huañushcacunata pambachun, ari, Nefitacunapaj huañushcacunatapash; Moroni ricuj runacunata churarca ricuchun paicunapaj trabajocunata ruranajujpi.

2 Moroni Lehihuan Mulek llactaman rirca, llactapaj mandaita japirca Lehiman curca. Cunan riqui, Lehi carca shuj runa pimi Moronihuan carca paipaj tucuimanda yalishca macanajuicunapi; pai carca Moroni laya, paicuna cushijurca ishcandi ladopi seguro canamanda; ari, ishcandimanda juyarirca, tucui Nefipaj llactapuracunatapash juyarca.

3 Yalishca jipa Lamanitacuna paicunapaj huañushcacunata pambaita tucuchishca jipa Nefitacunapaj huañushcacunatapash, tigrashpa rirca Ashtacapacha Tiaj alpaman; Teáncum, Moronipaj mandaipi, trabajachi callarirca allaipi muyundi alpata utujuta, nacashpa Ashtacapacha Tiaj llactata.

4 Paicunata caspi pecho ñaupacunata rurachirca utuju ucu manñacunapi; utuju alpata vigas pecho ñaupacunapi jicharca; shina Lamanitacunata trabajachirca imaura Ashtacapacha Tiaj llacta muyungacaman shinlli vigas, alpa pircahuan, ninan jatunbacha.

5 Chaimanda jipa cai llacta ninan shinlli jarcashcacunaman tigrarca; cai llactapi Lamanita prezucunata alichirca; ari, pirca ucupi paicunapaj propio maquicunahuanllata rurashcapi. Cunan Moroni munai na munai Lamanitacunata trabajachirca, ricunalla carca paicunata trabajanajujpi; pai munarcapash tucui paipaj macanajujcunata imaura Lamanitacuna macanajungapa mascamujpi.

6 Yalishca jipa Moroni shina macanajuita misharca Lamanitacunapaj ashtacapacha macanajuj runacunapaj jahuapi, Mulek llactata mishashpa chasquishca carca, cai Lamanitacunapaj ali seguro pushtu carca Nefipaj alpapi; shina shayachishcapash carca shinlli jarcashcacunata paipaj prezucunata jarcangapa.

7 Yalishca jipa ñana ashtahuan munarca Lamanitacunahuan macanajungapa chai huatapi, ashtahuangari paipaj runacunata macanajungapa ruraicunata rurachirca; ari, shinlliyachinacunata rurachishpa Lamanitacuna contra huacaichiringapa, ari, cacharichishpapash paicunapaj huarmicunata, paicunapaj huahuacunata ninan yarjaimanda, llaquimandapash, micunata carashpa paicunapaj macanajuj runacunaman.

8 Cunan yalishca jipa Lamanitacunapaj macanajuj runacuna, jatun mama cocha indi huashajuj ladoman, uraiman, Moroni illaimanda Nefitacunapi huaquin upalla ruraicuna tiarca, caicuna paicunamanda ninanda fiñarishpa rimachirca, mishashca carca huaquin pambacunata Nefitacunapaj jahuapi, ari, shinashpa paicuna mishashpa chasquishca carca tauca llactacunata chai alpa pushtupi.

9 Shina paipuracunapi na ali ruraicunamanda, ari, ninanda fiñarishpa rimarinacunamanda, paipuracunapi upalla ruraicunamanda churarishca carca jatun llaquicunapi.

10 Cunan riqui, ñuca imatachari ninata charini Ammónpaj llactapuracunamanda, picuna, callaripi, Lamanitacuna carca; ashtahuangari Ammónhuan, paipaj huauquicunahuan, nacashpa ushaihuan, Diospaj achil shimihuan, paicuna Apunchijta crijman tigrarirca; urai pushamui tucushca carca Zarahemla alpaman, chaimandapacha Nefitacunahuan huacaichi tucushca carca.

11 Paicunapaj juramentomanda jarcai tucushca carca macanajunacunata japinamanda paicunapaj huauquicunapaj contra; shuj juramentota rurashca carca nimaura ashtahuan yahuarta ama jichangapa; paicunapaj juramentomanda huañuna carca; ari, paicunallata saquinman carca paicunapaj huauquicunapaj maquicunapi urmangapa, cai shina canman carca paicunata Ammón, paipaj huauquicunapash mana llaquijpiman, ninanda na juyajpimanbash.

12 Caimanda paicuna urai pushamushca carca Zarahemla alpaman; chaimandapacha Nefitacuna huacaichishca carca.

13 Yalishca jipa imaura paicuna llaquita ricushpa, tauca llaquirinacunata, ninan llaqui yalinacunata Nefitacuna paicunamanda yalinajurca, paicuna llaquinayachirca, munarcapash macanajunacunata japishpa paicunapaj llactata huacaichinapi.

14 Ashtahuangari riqui, paicuna macanajunacunata ña japigrinajujpi, paicuna convenci tucurca Helamánpaj, paipaj huauquicunapajpash ama ruraichu nishcacunahuan, ña faquigrinajurca juramentota imata paicuna rurashca carca.

15 Helamán manllarca shina rurashpa paicunapaj almacunata chingachinata; chaimanda tucui maijanguna cai pactachinapi yaicushcacuna munai na munai ricuna carca paicunapaj huauquicuna llaquicunapi purijta, llaquipi yaicunacunapi cai punllacunapi.

16 Ashtahuangari riqui, yalishca jipa paicuna tauca churicunata charirca, picuna shuj convenioman na yaicushcacuna carca macanajunacunata na japingapa paicunapaj napacha ricunayachijcunapamanda huacaichiringapa; chaimanda paipura tandanajurca cai punllacunapi, macanajunacunata japi ushajcuna, paicuna shutichirirca Nefitacuna.

17 Paicuna shuj convenioman yaicurca macanajungapa Nefitacunapaj libertadmanda, ari, huacaichingapa alpata paicunapaj causaicunata cungacaman; ari, paicuna conveniota rurarca nimaurapash na saquingapa paicunapaj libertadta, ashtahuangari macanajungapa tucui canacunapi Nefitacunata huacaichingapa, paicunamandallata huatai tucushcashnamanda.

18 Cunan riqui, ishcai huaranga chai viñaj huambracuna tiarca, picuna cai pactachinata rurarca japingapa macanajunacunata paicunapaj llactata huacaichingapa.

19 Cunan riqui, chai horascaman nimaura na desventaja cashca carca Nefitacunapa, paicuna tigrarca cai punllacunapi jatun shinllichijcuna; paicunapaj macanajunacunata japimanda, paicuna munarca Helamán paicunapaj pushaj cachun.

20 Paicuna carca tucuilla viñaj runacuna, ninan millaicuna nimata na manllaimanda, shinlli caimanda, ruranacunamandapash; ashtahuangari riqui, cai na tucui carca—paicuna carca runacuna picuna fielcuna carca tucui punllacunapi ima cuzasta paicunaman mingashcapi.

21 Ari, paicuna ciertopachapaj runacuna carca, seriocuna, paicunata yachachishca carca Diospaj rurachunbacha saquishcacunata alichinata, paipaj ñaupapi derecho purinatapash.

22 Cunan yalishca jipa Helamán rirca paipaj ishcai huaranga viñaj huambra soldadocunapaj ñaupapi, shinllichingapa llactapuracunata alpapaj manñacunapi urai ladoman, jatun mama cocha indi huashajuj ladoman.

23 Shina tucurin ricushpa chasquichijcunapaj reinado ishcai chunga pusaj huata Nefipaj llactapuracunapaj jahuapi.