Achil quilcashcacuna
Alma 17


Mosíahpaj churicunapaj shuj tandachishpa quilcashca, paicuna reinopaj derechocunata na chasquirca Diospaj shimimanda, Nefipaj alpacunaman vichai rirca Lamanitacunaman yachachingapa; paicunapaj llaquiricuna cacharirinapash—Almapaj tandachishca quilcashcamanda.

17 capítulomanda 27 capítulocaman charin.

17 Capítulo

Mosíahpaj churicuna achil villachinapaj achil ricuchinapapash espírituta charin—Paicuna rin shuj shujlla shican ñangunata Lamanitacunaman achil shimita villashpa—Ammón Ismaelpaj alpaman rin, Jatun Mandaj Lamonipaj sirvij runaman tigran—Ammón jatun mandajpaj ataju llamacunata huacaichin paipaj na ricunayachishpa catijcunatapash Sebús yacu ladopi huañuchin. 1–3 versículocunapi, nara 77 C.Ñ.; 4 versículopi, nara 91–77 C.Ñ.; 5–39 versículocunapi, nara 91 C.Ñ.

1 Cunan yalishca jipa imashna Alma Gedeónpaj alpa uraiman, Manti alpaman rijushpa, riqui, paipaj ninan manllaripa, Mosíahpaj churicunahuan tuparirca Zarahemla alpaman rinajujta.

2 Cunan cai Mosíahpaj churicuna Almahuan carca imaura ángel paicunaman callari ricurijpi; chaimanda Alma ninandapacha cushijurca paipaj huauquicunata ricushpa; paipaj cushijuita ashtahuan imami mirachirca, paipaj huauquicuna Apunchijpaj huauquicunara carca; ari, paicuna shinllicunaman tigrashca carca ciertopachapaj yachaicunapi; ali yuyaipi chasquij runacuna carca paicuna achil quilcashcacunata utsia mascashca carca, Diospaj shimita yachai ushangapa.

3 Ashtahuangari cai na tucui can; paicunamandallata curishca carca ashtaca achil mañaiman, ayunaimanbash; chaimanda paicuna achil villachinapaj espírituta charirca, achil ricuchinapaj espíritutapash, paicuna yachachishpa, Diospaj ushaihuan autoridadhuanbash yachachirca.

4 Paicuna Lamanitacunaman Diospaj shimita chunga chuscu huatacunata yachachishca carca, ashtaca éxitota charishpa ciertopachapaj yachajuiman taucacunata apamushpa; ari, paicunapaj achil shimicunapaj ushaihuan Diospaj altar ñaupaman apamushca carca, paipaj shutipi mañachun paicunapaj juchacunata paipaj ñaupapi villachun.

5 Cunan cashna caicunapi can imacuna paicuna puricunapi cumbarca, paicuna tauca ninan llaquicunata charirca; ashtaca llaquicunata yalirca, cuerpopi yuyaipipash, caicunashna yarjai, yacunayai shaijuipash, ashtaca shinlli atirirca espíritupipash.

6 Cunan caicuna carca paicunapaj puricuna: Paicunapaj taitata, Mosíah, saquishpa rirca, ricushpa chasquichijcunapaj callari huatapi; reinota na chasquishpa imata paicunapaj taita munashca carca paicunaman cungapa, llactapuracunapaj munashcapash cai carca;

7 Shina cajpipash Zarahemla alpamanda llujshishpa rirca, paicunapaj espadacunata japirca, paicunapaj lanzacunata, paicunapaj arcocunata, paicunapaj flechacunata, paicunapaj huaracacunata; caita rurarca paicuna micunata chari ushangapa jichushca pambapi cashcauras.

8 Shina paicuna jichushca pambaman rirca paicunapaj ajllashca tandanajushcacunahuan, Nefipaj alpaman vichai rirca, Lamanitacunaman Diospaj shimita yachachingapa.

9 Yalishca jipa paicuna tauca punllacunapi jichushca pambapi purirca, ashtacata ayunarca ashtacata achil mañarcapash Apunchij paicunaman carachun paipaj Espíritumanda ashata paicunahuan richun, paicunahuancachunbash, paicuna Diospaj maquicunapi shuj imatalla rurana cangapa, ushashpaca, paicunapaj huauquicuna, Lamanitacunata, ciertopachapaj yachajuiman apamungapa, yachajuiman napacha ali paicunapaj punda taitacunapaj yachachishcacunata, caicuna na ali carca.

10 Yalishca jipa Apunchij paicunata ricuj shamurca paipaj Espírituhuan, nircapash: Alilla caichi. Paicuna alilla carca.

11 Apunchij paicunata nircapash: Richi Lamanitacunapaman, quiquinba huauquicuna, ñuca achil shimita churaichi; shina cashpapash paciente canguichi jatun llaquicunapi, llaquicunapipash, paicunaman ali ricuchita ñucapi cunguichi, ñuca rurasha shuj imatalla ruranata ñuca maquicunapi tauca almacunapaj quishpirinapa.

12 Yalishca jipa Mosíahpaj churicunapaj shungucuna, maijan paicunahuan cajcunapash, cushijuita japirca ringapa Lamanitacunapaman villangapa Diospaj shimita.

13 Yalishca jipa imaura paicuna chayashca cashpa Lamanitacunapaj alpapaj manñacunapi, paicuna shicanyarirca caishumanda chaishumanda, Apunchijpi confiashpa paicuna cutin tuparingapa paicunapaj fucushcata tandachi tucuripi; paicuna crirca ruraita, imata paicuna rurangapa japishca cashca jatun carca.

14 Ciertopacha cai jatun carca, paicuna rurangapa japishca can Diospaj shimita yachachingapa shuj sacha runacunata, shinlli, imamandapash millayaj llactapuracunata; shuj llactapuracuna pimi Nefitacunata huañuchipi cushijujcuna, paicunata shuhuashpa, macanajuipi shuhuashpapash; paicunapaj shungucuna charijyanacunapi churashca carca, nacashpaca curipi culquipipash, juyailla rumicunapi; shina cashpapash paicuna munarca charingapa cai cuzascunata huañuchishpa, macanajuipi shuhuashpapash, paicuna ama trabajangapa paicunapaj propio maquicunahuan.

15 Shina paicuna shuj ninan quilla llactapuracuna carca, paicunamanda taucacuna yanga dioscunata adorarca, Diospaj llaquichina paicunapaj urmashca carca paicunapaj taitacunapaj punda yachachishcacunamanda; masqui Apunchijpaj nishcapachacuna paicunaman cushami nishca carca arrepentimientopaj minishtirishcacunapi.

16 Chaimanda, cai carca imamanda Mosíahpaj churicuna rurangapa japirca ruraita, paicuna imashpapash apamuipapash paicunata arrepentimientoman; imashpapash apamuipapash paicuna yachachun jatun causachinapaj plan.

17 Chaimanda paicuna shicanyarca caishumanda chaishumanda, paicunapaman rirca, shuj shujlla, Diospaj achil shimimanda ushaimandapash imami paiman cushca carca.

18 Cunan Ammón paicunamanda yalishca mandaj cashpa, na cashpa pai paicunapaj minishtishcacunapi ayudarca, paicunamanda rirca, paicunata achilyachishca jipa paicunapaj shuj shuj cayashcacunapi, paicunaman Diospaj shimita yachachishca cashpa, na cashpa pai nara rishpallata paicunapaj minishtishcacunapi ayudarca; shina paicuna shuj shuj llactacunaman rirca.

19 Ammón Ismaelpaj alpaman rirca, cai alpa shina shuti carca Ismaelpaj churicunamanda, paicunapash Lamanitacunaman tigrarca.

20 Imashna Ammón Ismaelpaj alpaman yaicujpi, Lamanitacuna japirca huatarcapash, imashna paicunapaj rurai carca tucui Nefitacunata huatana maijan paicunapaj maquicunapi urmajpi, jatun mandajpaj ñaupaman paicunata apangapa; shina saquishca carca jatun mandajpaj munashcata rurachun huañuchichun, nacashpa huatai tucushcashnapi charichun, nacashpa cárcelman shitachun, nacashpa paipaj alpamanda calpachichun, paipaj munashcahuan munashcauraspash.

21 Shina Ammón apai tucurca Ismaelpaj alpata mandajpa jatun mandaj ñaupaman; paipaj shuti Lamoni carca; pai Ismaelpaj shuj cati aillu carca.

22 Jatun mandajca Ammónda tapuchirca paipaj munai Lamanitacunahuan cai alpapi causanachu can nishpa, nacashpa jatun mandajpaj llactapuracunahuan.

23 Ammón nirca: Ari, ñuca munani cai llactapuracunahuan causangapa huaquin punllacunata; ari, imashpapash ñuca huañuna punllacaman.

24 Yalishca jipa jatun mandaj Lamoni ashtaca cushijushca carca Ammónhuan, caimanda paipaj huatashcacunata cacharichirca; pai munarca Ammón jatun mandajpa shuj ushita paipaj huarmi cachun japichun.

25 Ashtahuangari Ammón nirca: Na, ashtahuangari ñuca quiquinba sirvij runa casha. Chaimanda Ammón jatun mandaj Lamonita sirvij runaman tigrarca. Yalishca jipa pai shuj sirvij runacunahuan Lamonipaj ataju llamacunata cuidachun churashca carca, Lamanitacunapaj ruraihuan.

26 Quimsa punllacunata jatun mandajpaj ruraicunapi cashca jipa, Lamanita sirvij runacunahuan rijujpi paicunapaj ataju llamacunahuan yacu ufiana pushtuman, Sebúspaj yacu shutichishca carca, tucui Lamanitacuna chaiman paicunapaj ataju llamacunata apan, yacuta ufiachun—

27 Chaimanda, imashna Ammón jatun mandajpaj sirvij runacunapash paicunapaj ataju llamacunata apanajujpi yacu ufiana pushtuman, riqui, huaquin Lamanitacuna picuna paicunapaj ataju llamacunahuan yacuta ufiachingapa cashca cashpa, jatarirca caiman chaiman calpachirca Ammónpaj jatun mandajpaj sirvij runacunapaj ataju llamacunata, caicunata paicuna caiman chaiman calpachirca shina cashpaca maitapash calparca.

28 Cunan jatun mandajpaj sirvij runacuna huasharimai callarirca nishpa: Cunan jatun mandaj ñucanchita huañuchinga, ñucanchi huauquicunata laya paicunapaj ataju llamacuna cai runacunapaj na ali caimanda caiman chaiman calpachishca carca. Paicuna ninanda huacai callarirca, nishpa: Riqui, ñucanchi ataju llamacuna ña calpashca can.

29 Cunan paicuna huacarca huañuchishca canata manllaimanda. Cunan Ammón imaura caita ricushpa paipaj shungu cushijushca carca paipaj ucupilla cushijuihuan; pai nirca, ñuca ricuchisha ñuca ushaita cai ñucapura sirvij runacunaman, nacashpa ushaita imami ñucapi can, cutin apamushpa cai ataju llamacunata jatun mandajpaman, ñuca mishasha cai ñucapura sirvij runacunapaj shungucunata, paicunata pushai ushangapa ñuca achil shimicunapi crichun.

30 Cunan, caicuna carca Ammónpaj yuyaicuna, pai imaura ricushpa ninan llaquicunata maijanguna pai shutichishca carca paipaj huauquicuna.

31 Yalishca jipa paicunata shinlliyachirca paipaj achil shimicunahuan, nishpa: Ñuca huauquicuna, ali cushijushca caichi jacuchi ataju llamacunata mascangapa, ñucanchi paicunata tandachishun tigrachimushunchi yacu ufiana pushtuman; shina ñucanchi ataju llamacunata alchishpa charishunchi jatun mandajman pai ñucanchita na huañuchingachu.

32 Yalishca jipa paicuna rirca ataju llamacunata mascangapa, paicuna Ammónda catirca, ñapash calpashpa carcurca jatun mandajpaj ataju llamacunata, cutin tandachirca yacu ufiana pushtupi.

33 Cai runacuna paicunapaj ataju llamacunata cutin calpachingapa shayarirca; ashtahuangari Ammón paipaj huauquicunata nirca: Ataju llamacunata muyushpa shayarichi ama calpachun; ñuca rini macanajugrini cai runacunahuan picuna ñucanchi ataju llamacunata calpachijcunahuan.

34 Chaimanda, paicuna rurarca Ammón mandashcata, pai rirca shayarirca macanajungapa maijan Sebúspaj yacu ladopi shayanajujcunahuan; paicuna na huaquinlla carcachu.

35 Chaimanda paicuna Ammónda na manllarca, paicuna yarca paicunapamanda shujlla runa paita huañuchi ushanga paicunapaj munaimanda, paicuna na yacharca Apunchij Mosíahman nishcapacha carca paipaj churicunata paicunapaj maquicunamanda cacharichisha; nimata na yacharcapashchu Apunchijmanda; chaimanda paicuna cushijurca paicunapaj huauquicunata tucuchinapi; caimanda paicuna jatun mandajpaj ataju llamacunata calpachingapa shayarirca.

36 Ashtahuangari Ammón ñaupaman rishpa paicunata rumicunahuan shitai callarirca paipaj huaracahuan; ari, paicunata ninan usharishcahuan rumicunata shitarca; shina pai huañuchirca taucallata paicunamanda shina cashpaca paicuna ninanda manllari callarirca paipaj ushaimanda; ashtahuanbash paicuna fiñashca carca paicunapaj huauquicunata huañuchishcamanda, paicuna yashcapacha carca paita urmachingapa; chaimanda, ricushpa paicuna paita na chayachi ushashpa paicunapaj rumicunahuan, paicuna ñaupaman shamurca llasha caspicunahuan paita huañuchingapa.

37 Ashtahuangari riqui, Ammón huajtarca shujllangaman runacunata pimi llasha caspita vichai alsajta, pai fitirca paicunapaj rigracunata paipaj espadahuan; pai aguantarca paicunapaj huajtashcacunata paicunapaj rigracunata chugrichishpa paipaj espada filohuan, shina cashpaca paicuna ninanda manllari callarirca, paipaj ñaupamanda calpai callarirca; ari, paicuna na ashalla carcachu; paicunata calpachirca paipaj rigrapaj shinllicaihuan.

38 Cunan paicunamanda sujta urmashca carca huaracahuan, ashtahuangari pai shujllata paicunapaj yali mandajtalla huañuchirca paipaj espadahuan; pai fitirca tauca rigracunata paipaj contra alsajpi, paicuna na ashalla carcachu.

39 Imaura paicunata carutapacha calpachishpa, pai tigrarca paicunapaj ataju llamacunata yacuta ufiachirca, jatun mandajpaj jihualla pambaman tigrachirca, shina jatun mandajpa ñaupaman ricurigrirca, rigracuna apashpa imacunata fitishca carca Ammónpaj espadahuan, maijanguna paita huañuchingapa munashcacunapaj carca; jatun mandajpaman aparca cuzascunapaj rurashcamanda shuj testimonio cachun.