1 Cunan, ñuca churi, ashtahuan imatachari ninata charini canman imata ñuca nircani canba huauquiman; riqui, nachu ricushcangui canba huauquipaj shinllicaita, paipaj fidelidadta, paipaj utsialla caita Diospaj rurachunbacha saquishcacunata alichingapa? Riqui, nachu pai alita ricuchishca canman?

2 Ñuca shimicunata na ashta uyashcangui imashna canba huauquicunashna, Zoramitacunapaj llactapuracunapi. Cunan cai can imata charini canba contra; jariyashpa catircangui quiquinba shinlli caipi, canba yachaipi.

3 Cai na tucui canllu, ñuca churi. Quiquin rurarcangui imami ñucapa llaquinayai carca; imashpa achil yachachinata saquircangui, Sirón alpaman ringapa Lamanitacunapaj manñaman, ramera Isabelta catishpa.

4 Ari, paica taucacunapaj shungucunata misharca; ashtahuangari cai na cana carca juchachingapa, ñuca churi. Ricuna carcangui achil yachachinata canman confiashcata.

5 Nachu yachangui, ñuca churi, cai cuzascuna can shuj millanayai Apunchijpaj ñavipi; ari, tucui juchacunamanda yali ashtahuan millanayai, imashpapash na yachajpaj yahuarta jichana na cashpaca Espíritu Santota na nina?

6 Riqui, Espíritu Santota negashpa imaura canbi shuj viaje causajujpi, yachashpa caita negashpaca, riqui, na perdonana jucha cai can; ari, pipash na alita ruran Diospaj michapa, yachaipapash contra, cai na ushanalla can perdónda chasquina; ari, canman nini, ñuca churi, cai paipa na ushanalla can perdónda chasquina.

7 Cunan, ñuca churi, ñuca munani Dios ama shina jatun juchapaj culpable cashcanguiman. Ñuca na parlashpa catimanllu canba na ali ruraicunamanda, canba almata llaquichingapa, canba na ali cana cajpica.

8 Ashtahuangari riqui, na ushanguichu pacaita canba na ali ruraicunata Diospaj ñaupapi; imashpapash arrepentirishpalla chaicuna canga shuj testimonio laya canba contra chai tucuri punllapi.

9 Cunan ñuca churi, ñuca munani can arrepentirichun canba juchacunata saquipash, ama ashtahuan catichun canbaj ñavi munashcata, ashtahuangari canmandallata tucui cai cuzascunamanda jarcari; caita na rurashpaca nimamanda Diospaj reinota na chasqui ushangui. Oh, yari, canba jahuapi caita japi, canmandallata cai cuzascunamanda jarcari.

10 Ñuca mandani canba jahuapi caita chari canba rucu huauquicunata canbaj ruranacunapi tapui; riqui, can viñaj huambra canapi cangui, minishtiguipashmi canba huauquicunahuan shinllichishca cangapa. Uyaipash paicunapaj nishcacunata.

11 Ama saquichu canmandallata apai tucushca canata nimaijan yanga nacashpa juizu illa cuzascunahuan; ama saquichu canba shunguta aya pandachichun na ali rameracunata cutin mascachun. Riqui, Oh ñuca churi, imashna jatun na ali ruraicunata Zoramitacunapaj jahuaman apamurcangui; paicuna imaura can imashna cajta ricuimanda ñuca shimita na cringapa munarca.

12 Cunan Apunchijpaj Espíritu ñucata nihuarca: Mandai canba huahuacuanata alita rurachun, tauca llactapuracunapaj shungucunata pandachinman tucuchingapa; chaimanda ñuca canda mandani, ñuca churi Diosta manllaimanda, canba na ali ruraicunamanda jarcari;

13 Apunchijpaman tigrai tucui canba yuyaihuan, ushaihuan, shinlli caihuanbash; ashtahuan maijanbapash shungucunata ama pandachichu na alita rurachun; ashtahuangari paicunaman tigrai, yachanimi ni canba pandashcacunata imata na alita rurashcangui.

14 Ama mascaichu charijyanacunata nacashpa cai pachapaj yanga cuzascunata; riqui, caicunata canhuan na apai ushangui.

15 Cunan, ñuca churi, ñuca imatachari ningapa munani Cristopaj shamunamanda. Riqui, ñuca nini, paimi can pi ciertopacha shamunga cai pachapaj juchacunata anchuchingapa; ari, pai shamunga villangapa paipaj llactapuracunaman quishpiringapaj mushuj cushijunacunata.

16 Cunan, ñuca churi, cai carca achil yachachina imapa can cayashca carcangui, villachun cai mushuj cushijunacunata cai llactapuracunaman, paicunapaj yuyaicunata preparachun; nacashpa quishpirina paicunaman cushca cachun, paicuna preparachun paicunapaj huahuacunapaj yuyaicunata achil shimita uyachun pai shamuna punllapi.

17 Cunan canba yuyaita ashata tranquilizasha caimanda. Riqui, can manllaringui cai cuzascunamanda imashpata ñaupashpa rurashca cana. Riqui, ñuca nini, nachu shuj alma Diospaca cai punlla shuj juyailla can shinallata shuj alma canga paipaj shamuna punllapi?

18 Nachu minishtirishca can jatun causachinapaj planda yachaj chayachishca cana cai llactapuracunaman shinallata paicunapaj huahuacunamanbash?

19 Nachu ushanalla can Apunchijpaj cai punlla paipaj ángelta ñucanchiman cachamuna cai mushuj cushijunacunata villachun shinallata ñucanchi huahuacunamanbash, nacashpa paipaj shamushca punlla jipapash?