Nefipaj llactapuracunapaj tandachishpa quilcashca, paicunapaj macanajuicuna, ninanda fiñarishpa rimarinacunapash, Helamánpaj punllacunapi, Helamánpaj tandachishca quilcashcacunamanda shina, imata pai alichirca paipaj punllacunapi.
45 capítulomanda 62 capítulocaman charin.
45 Capítulo
Helamán Almapaj shimicunata crin—Alma achil villan Nefitacunapaj tucuchinata—Pai achilyachin, llaquichinbash alpata—Alma Espírituhuan apai tucunbash, Moiséstashna—Ninanda fiñarishpa rimarinacuna miran Iglesiapi. Nara 73 C.Ñ.
1 Riqui, cunan yalishca jipa Nefipaj llactapuracuna ninandapacha cushijushca carca, Apunchij cutin paicunata napacha ricunayachijcunapaj maquicunamanda cacharichishcamanda; chaimanda paicuna pagui nirca Apunchij paicunapaj Diosta; ari, paicuna ashtacata ayunarca, ashtacata achil mañarca, Diosta adorarca jatun ninanbacha cushijuihuan.
2 Yalishca jipa ricushpa chasquichijcunapaj reinadopaj chunga iscun huatapi Nefipaj llactapuracunapaj jahuapi, Alma paipaj churi Helamánpaman shamurca nircapash: Cringuichu shimicunata imata ñuca quiquinman parlashcani cai tandachishca quilcashcacunamanda imata alichishcani?
3 Helamán nirca: Ari, ñuca crini.
4 Alma cutin nirca: Cringuichu Jesucristopi, pimi shamunga?
5 Pai nirca: Ari, ñuca crini tucui shimicunata imata parlashcangui.
6 Alma paita cutin nirca: Alichinguicha ñuca rurachunbacha saquishcacunata?
7 Pai nirca: Ari, ñuca alichisha quiquin rurachunbacha saquishcacunata tucui ñuca shunguhuan.
8 Shina Alma paiman nirca: Achilyachishca cangui; Apunchij ali mirachichun quiquinda cai alpapi.
9 Ashtahuangari riqui, ñuca charini imatachari quiquinman achil villanata; ashtahuangari imata ñuca achil villani na yachaj chayashca cangachu; ari, imaura achil villachishca pactashca cangacaman; chaimanda quilcai shimicunata imata ñuca nisha.
10 Caicuna can shimicuna: Riqui, ñuca yashpa ricuipi cai llactapurallata, Nefitacuna, achil ricuchinapaj espíritumanda imami ñucapi can, chuscu patsaj huatacunapi imaura Jesucristo paicunaman ricuchirishca punllamanda, na crishpa asha asha chingaringa.
11 Ari, shina paicuna ricunga macanajuicunata, unguicunata, ari, ninan yarjaicunata, yahuar jichaicunatapash, imaura Nefipaj llactapuracuna tucuchi tucungacaman—
12 Ari, caica paicuna na crishpa asha asha chingarimanda urmangapash yanallapaj ruranacunapi, lasciviapash, tucui laya na ali ruraicuna; ari, ñuca canman nini, paicuna jucha ruraimanda shina jatun michapaj yachajushcapapash contra, ari, canman nini, chai punllamanda, na tucuilla chuscu miraicuna na huañungachu cai jatun na ali rurai shamungacaman.
13 Imaura cai jatun punlla shamujpica, riqui, punllaca ña shamun maijanguna cunan cajcuna, nacashpa cati aillucuna picuna cunan yupai tucushcacuna can Nefipaj llactapuracunahuan, ñana ashtahuan yupai tucushca canga Nefipaj llactapuracunahuan.
14 Ashtahuangari maijanbash puchushpa, na tucuchishca cajpi chai jatun manllanayai punllapi, yupai tucushca canga Lamanitacunahuan, paicunashnalla tigranga, tucui, ashtahuangari ashalla canga Apunchijpaj discípulo shutichishcacuna; paicunata Lamanitacuna na ricunayachishpa catinga paicunata tucuchingacaman. Cunan, na ali ruraicunamanda, cai achil villashca pactashca canga.
15 Cunan yalishca jipa Alma Helamánman cai cuzascunata nishca jipa, paita achilyachirca, paipaj cutishuj churicunatapash; pai alpatapash achilyachirca alicunapa ali cachun.
16 Pai nirca: Apunchij Diosca shina nin—Llaquichishca alpa canga, ari, cai alpa, tucui jatun llactaman, reinoman, shimi rimaiman, llactapuracunamanbash, tucuchinaman, pimi na alita rurajpi, imaura paicuna na alita ruraipi yapata mirashca cajpi; imashna ñuca nishcani shina cai canga; cai can Diospaj llaquichina, achil yachitapash cai alpa jahuapi, imashpa Apunchijca na ricunayachinllu juchata ashallatapash rurailla nishpaca.
17 Cunan, imaura Alma cai shimicunata nishpa pai achilyachirca iglesiata, ari, tucui maijanguna fepi shinlli cajcuna chai punllamanda ñaupaman.
18 Imaura Alma caita rurashpa pai Zarahemla alpamanda llujshirca, Melek alpaman imashna rijunshna. Yalishca jipa ashtahuangari paimanda nimata na uyashca carca; paipaj huañuimanda nacashpa paipaj pambaimanda ñucanchi na yachanchichu.
19 Riqui, caita ñucanchi yachanchi, pai shuj ali runa carca; nishca tucuiman iglesiapi paica Espírituhuan apai tucushca carca, nacashpa pambashca Apunchijpaj maquihuan, Moiséstashna. Ashtahuangari riqui, achil quilcashcacuna nin Apunchijca paipaman Moisésta chasquirca; ñucanchipash yanchimi pai chasquircapash Almata paipaman, espíritupi; chaimanda, caimanda ñucanchi nimata na yachanchi paipaj huañuimanda, pambaimandapash.
20 Cunan yalishca jipa ricushpa chasquichijcunapaj reinadopaj chunga iscun huata callaripi Nefipaj llactapuracunapaj jahuapi, Helamán llactapuracunapaman rirca paicunaman achil shimita villangapa.
21 Riqui, paicunapaj macanajuicunamanda Lamanitacunahuan tauca uchilla ninanda fiñarishpa rimarinacumanda, plituricunapash imacuna llactapuracunahuan cashca, cai minishtirishca tigrarca paicunaman Diospaj achil shimita villana, ari, shuj regulacióndapash rurana carca tucui iglesiapi.
22 Chaimanda, Helamán, paipaj huauquicunapash llujshirca cutin shayachingapa tucui alpacunapi, ari, tucui llactapi tucui alpapi maipi Nefipaj llactapuracuna causanajujpi. Yalishca jipa paicuna ajllarca sacerdotecunata, yachachijcunata tucui alpacunapi, tucui iglesiacunapi.
23 Cunan yalishca jipa Helamán paipaj huauquicunapash ajllashca cajpi sacerdotecunata, yachachijcunatapash iglesiacunapi, ninanda fiñarishpa rimarinacuna mirarca, paicuna na uyangapa munarca Helamánpaj shimicunata, pai huauquicunapapash;
24 Ashtahuangari jariyai mirarca, paicunapaj shungucunapi vichai alsarishca cai, paicunapaj ninan jatun charijyaicunamanda; chaimanda paicuna charijyarca paicunapaj propio ñavicunapi, na uyangapa munarca paicunapaj shimicunata, derecho puringapa Diospaj ñaupapi.