1 Riqui, cunan yalishca jipa Ammónpaj llactapuracuna Jersón alpapi tiarishca jipa, ari, Lamanitacunapash chai alpamanda llujchishca jipapash, paicunapaj huañushcacuna pambashca carca chai alpamanda llactapuracunahuan—

2 Cunan paicunapaj huañushcacuna na yupashca carca taucapacha caimanda; Nefitacunapaj huañushcacunapash na yupashca carca—ashtahuangari yalishca jipa paicunapaj huañushcacunata pambashca carca, ayuno, quijari, achil mañai punllacuna jipapash (cai carca chunga sujta ricushpa chasquichijcunapaj reinado huatapi Nefipaj llactapuracunapa jahuapi), catilla sumaj causai tiai callarirca tucui alpacunapi.

3 Ari, llactapuracuna pactachingapa atirirca Apunchijpaj rurachunbacha saquishcacunata; paicuna rurajpachacuna carca Diospaj ordenanzacunata, Moiséspaj catichunbacha saquishcacunahuan; yachachitucushca carca Moiséspaj catichunbacha saquishcacunata alichichun imaura cai pactashca cangacaman.

4 Shina llactapuracuna fiñanajuicunata na charirca tucui chunga sujta ricushpa chasquichijcunapaj reinadopaj huatapi Nefipaj llactapuracunapa jahuapi.

5 Yalishca jipa chunga canchis ricushpa chasquichijcunapaj reinadopaj huata callaripi, catilla sumaj causai tiarca.

6 Ashtahuangari yalishca jipa chunga canchis huata tucurinapi, shuj runa Zarahemla alpaman shamurca pai carca Anti-Cristo, imashpa llactapuracunaman pai yachachi callarirca achil villachishcacunapaj contra imata achil villachijcuna parlashca carca, Cristo shamunamanda.

7 Cunan, na tiarca catichunbacha saquishcacuna, shuj runapaj crina contra; imashpa cai carca Diospaj rurachunbacha saquishcacunapaj contrapacha tianata shuj catichunbacha saquishcacuna imata runacunata na pactallapi shayachina.

8 Imashpa shina nin achil quilcashcacuna: Cai punlla ajllai pita sirvinata.

9 Cunan shuj runa Diosta sirvingapa munajpi, paipa ali can; nacashpa, Diospi pai crishpaca paita sirvina ali can; ashtahuangari Diospi na crijpica paita castigangapa catichunbacha saquishcacuna na tiarca.

10 Ashtahuangari pai huañuchijpica huañuihuan castigashca carca; shuhuajpipash castigashca carca; shujpata japijpipash castigashca carca; adulteriota rurajpipash castigashca carca; ari, tucui cai na ali ruraicunamanda castigashca carca.

11 Tiarca shuj catichunbacha saquishcacuna runacuna paicunapaj na ali ruraicunamanda ricushpa chasquichishca cachun. Shina cajpipash, na tiarca catichunbacha saquishcacuna shuj runa crinapaj contra; chaimanda, shuj runa castigashca carca na ali ruraita pai rurashcamandalla; chaimanda tucui runacuna pactallapi shayachishca carca.

12 Cai Anti-Cristo, paipaj shuti carca Korihor, (catichunbacha saquishcacuna na paita controlaita usharca) llactapuracunata yachachi callarirca nima Cristo na tiagrijta. Cashna laya pai yachachirca, nishpa:

13 Oh canguna ali charirishca canguichi juizu illa yanga shuyaipi, imashpata cangunallata ali chariringuichi shina juizu illa cuzascunapi? Imashpata Cristota shuyanguichi? Nimaijan runa na yachai ushanllu ima shamunamanda.

14 Riqui, cai cuzascuna imata canguna shutichinguichi achil villachicuna, imata canguna ninguichi achil villachijcunamanda cumushcacuna caj, riqui, cangunapaj taitacunapaj juizu illa punda ruraicuna can.

15 Imashnata yachanguichi ciertopacha cajta? Riqui, canguna na yachai ushanguichi cuzascunamanda imacunata canguna na ricushcata; chaimanda canguna na yachai ushanguichi Cristo tianata.

16 Canguna jipa punllata ricushpa ninguichi cangunapaj juchacunata anchuchina tian. Ashtahuangari riqui, cai can maitapash yuyaimandalla shamuj; cangunapaj caita chaita yuyaicunamanda shamun cangunapaj taitacunapaj punda ruraicunamanda, picunami cangunata manapash tiana cuzascunapi crinaman aparca.

17 Tauca ashtahuan shina cuzascuna paicunaman nirca, villashpa shujpa juchamanda huañui nimata na rurai ushana runacunapaj juchacunamanda, ashtahuangari tucui runacuna cai causaipi alita na alita cashpapash charinga pai imata rurai ushashcamanda; chaimanda tucui runacuna ali miran paicunapaj yachaimanda, tucui runacunapash mishan paipaj shinlli caimanda; imatapash shuj runa rurashpa nima na ali ruraipash na carcachu.

18 Shina pai yachachirca, taucacunapaj shungucunata pandachishpa, paicunapaj umacunata na ali ruraicunapi vichai alsachichishpa, ari, pandachishpa tauca huarmicunata, jaricunatapash, fornicacióncunata rurachun—nishpa imaura shuj runa huañujpi, chaipi tucurin.

19 Cunan cai runa Jersón alpamanbash rirca, cai cuzascunata Ammónpaj llactapuracunaman yachachingapa, maijanguna shuj viaje Lamanitacunapaj llactapuracuna carca.

20 Ashtahuangari riqui paicuna ashtahuan yachajcuna carca tauca Nefitacunata yali; paita japirca, huatarca, Ammónpaj ñaupaman aparca, pimi carca chai llactapuracunapaj sumo sacerdote.

21 Yalishca jipa chai alpamanda calpachi tucurca. Gedeón alpaman chayarca, paicunamanbash yachachi callarirca; caipi na charirca ashtaca éxitota, imashpa japi tucurca, huatai tucurca, sumo sacerdotepaj ñaupaman apai tucurcapash, chai alpata ricushpa chasquichijcunata yalishpa mandajpamanbash.

22 Yalishca jipa sumo sacerdote paita nirca: Imashpata rijungui cai llactapuracunata Apunchijpaj ñangunata huaglichishpa? Imashpata cai llactapuracunaman yachachingui Cristo na tianata, paicunapaj cushijuicunata jarcangapa? Imashpata tucui achil villachijcuna achil villashcacunapaj contra parlangui?

23 Cunan sumo sacerdotepaj shuti carca Giddona. Korihor paita nirca: Imashpa ñuca na yachachimanda cangunapaj taitacunapaj yanga punda ruraicunata, imashpa ñuca na yachachimanda cai llactapuracunaman ali charirishca cachun juizu illa ordenanzacunapi, ruraicunapipash imapi punda punda sacerdotecuna shayachishcacuna can, paicunapaj jahuapi ushaita, autoridadtapash millaita quichungapa, paicunata na yachaipi charingapa, paicunapaj umacunata ama vichai alsai ushachun, ashtahuangari humillarichun quiquingunapaj shimicunamanda.

24 Ninguichi cai llactapuracuna libre can. Riqui, ñuca nini paicuna huatai tucushcashnapi can. Ninguichi chai punda punda achil villachijcuna ciertopachacuna can. Riqui, ñuca nini canguna na yachanguichichu ciertopacha cajta.

25 Ninguichi cai llactapuracuna culpable can, urmashca llactapuracunapash, taitacunapaj na ali ruraimanda. Riqui, ñuca nini shuj huahua na culpable can paipaj taitacunamanda.

26 Ninguichipash Cristo shamunga. Ashtahuangari riqui, ñuca nini canguna na yachanguichi Cristo tianata. Ninguichipash pai huañuchishca canga cai pachapaj juchacunamanda—

27 Shina canguna pushanguichi cai llactapuracunata cangunapaj taitacunapaj punda yanga ruraicunaman, cangunapaj propio munaicunahuan; paicunata huatai tucushcashnapi charinguichi, paicunapaj maquicuna trabajashcacunahuan ninan charijyashca causangapa, chaimanda paicuna manllan ñavi ñavi ricungapa manllai illa, manllanbash cushijungapa paicunapaj derechocunata, privilegiocunatapash.

28 Ari, paicuna manllan paicunapaj cajcunata japingapa ama paicunapaj sacerdotecunata ofendengapa, picuna paicunata ali charin paicunapaj munashcapi, crichishcapipash, paicunapaj punda ruraicunamanda, muscuicunapash, paicunapaj yanga munaicuna achil ricuicunapash, paicunapaj manapash tiaj na villashcacunapash, paicunapaj shimi nishcataca na rurashpaca, ofendenga na yachashca causajta, pitami paicuna Dios can nin—shuj causajta pitami nimaurapash na ricushca nacashpaca na rijsishca, pimi nimaurapash carca nimaurapash na canga.

29 Cunan imaura sumo sacerdote ricushpa chasquichijcunapaj yali mandaj ricurca paipaj shungu shinlliyashcata, ari, imaura ricurca pai Diostapash plitujta, paipaj shimicunata na tigrachingapa munarca; ashtahuangari pai saquirca huatachun; paita oficialcunapaj maquicunapi saquirca, Zarahemla alpaman cacharca, Almapaj ñaupaman apai tucuchun, ricushpa chasquichijcunata yalishpa mandajpamanbash pimi carca tucui alpacunapaj mandaj.

30 Yalishca jipa imaura pai Almapaj, ricushpa chasquichijcunapaj yalishca mandajpaj ñaupaman apai tucushca carca, pai shinallata catirca Gedeón alpapishnallata; ari, na alicachishpa rimashpa catirca.

31 Pai jatun shinlli shimicunahuan caparirca Almapaj ñaupapi, sacerdotecunata, yachachijcunatapash pliturca, paicunata juchachishpa llactapuracunata pandachijta, paicunapaj punda taitacunapaj juizu illa yachachishcacunata catishpa, shina ninanda charijyangapa llactapuracunapaj trabajashcacunahuan.

32 Cunan Alma paita nirca: Quiquin yachangui ñucanchi na ninanda charijyanchichu cai llactapuracunapaj trabajashcacunahuan; riqui ñuca trabajashcani ricushpa chasquichijcunapaj reinado callarishcamanda cunangaman, ñuca propio maquicunahuan ñuca causangapa minishtishcacunapaj, masqui ñuca ashtaca purishpapash muyundi alpacunapi ñuca llactapuracunaman Diospaj achil shimita villachingapa.

33 Masqui ashtaca trabajota iglesiapi ruranata charishpapash, ñuca nimaurapash na chasquircani ni shuj seninetallapash ñuca trabajomanda; nimaijan ñuca huauquicunapash, ricushpa chasquichina jatun tiarinapi cashpalla; shina ñucanchi chasquishcanchi catichunbacha saquishcamanda ñucanchi tiempomanda.

34 Cunan, ñucanchi nimata na chasquishpa ñucanchi iglesiapi trabajashcamanda, imata ñucanchipaj ali can iglesiapi trabajai, ciertopachata villachinalla, ñucanchi cushijuita charingapa ñucanchi huauquicunapaj cushijuipi?

35 Shina imashpata ningui ñucanchi yachachinchi cai llactapuracunaman charijyangapalla, cunan quiquin, quiquinmandallata yachangui ñucanchi na culquita chasquijta? Cunan cringuichu, cai llactapuracunata ñucanchi umachinajujta, chaimanda shina cushijun paicunapaj shungucunapi?

36 Korihor tigrachirca, Ari.

37 Shina Alma nirca: Cringuichu shuj Dios tiajta?

38 Pai tigrachirca, Na.

39 Cunan Alma nirca: Cutin neganguichu Dios tiajta, Cristotapash neganguichu? Riqui, canman nini, ñuca yachani shuj Dios tian, Cristopash shamunga.

40 Cunan imatapash charinguichu Dios na tianamanda, nacashpa Cristo na shamunamanda? Ñuca nini imapash na tian, canbaj shimilla tian.

41 Ashtahuangari, riqui, ñuca tucui cuzascunata charini shuj testimonio cachun cai cuzascuna ciertopacha can; canbash charingui tucui cuzascunata testimonio cachun caicuna ciertopacha can; caicunata neganguichu? Cringuichu cai cuzascuna ciertopacha cajta?

42 Riqui, ñuca yachani cringuimi, ashtahuangari quiquinda charishca cangui aya espírituta, llujchishcangui Diospaj Espírituta chaimanda canbi shuj pushtuta na chari ushan; ashtahuangari aya ushaita canbi charin, canda caiman chaiman apanbash, na alita rurachishpa pai tucuchingapa Diospaj huahuacunata.

43 Cunan Korihor Almaman nirca: Ñucaman shuj señal ricuchijpica, ñuca cri ushasha Dios tiajta, ari, ricuchihuai pai ushaita charijta, shina crishami quiquinba shimicuna ciertopacha cajta.

44 Ashtahuangari Alma nirca: Mashnapash señalcunata charingui; quiquinba Diosta tentangapa munanguichu? Nigringuichu, shuj señalta ricuchihuai, tucui cai quiquinba huauquicunapaj testimoniota charishpata, tucui achil villachijcunapapash? Achil quilcashcacunapash quiquinba ñaupapi can, ari, tucui cuzascuna ricuchin shuj Dios tiajta; ari, cai alpallata tucui cuzascuna cai alpa jahuapi tiajcuna, ari, caipaj muyujuicuna, ari, tucui planetacuna paicunapaj rijsishca ordenpi muyuicuna testifican Supremo Ruraj tiajta.

45 Caicuna tiajpipashchu, cai llactapuracunapaj shungucunata pandachijungui, paicunaman testificashpa Dios na tiajta? Neganguichu tucui cai testigocunapaj contra? Pai nirca: Ari, ñuca negani, imashpapash shuj señalta ricuchijpilla.

46 Cunan yalishca jipa Alma nirca: Riqui, ñuca llaquirini canbaj shungu shinlliyashcamanda, ari, ciertopachapaj espírituta jarcanguira, quiquinba alma tucuchishca cangapa.

47 Ashtahuangari riqui, ashtahuan ali can quiquinba alma chingajpi ama cangui pimi apangui tauca almacunata tucuchingapa, quiquinba llullahuan, quiquinba uyanayai shimicunahuan; chaimanda cutin negajpica, riqui Dios quiquinda chugrichinga, upaman tigrangui, nimaura quiquinba shimita ashtahuan na pascangui, cai llactapuracunata ashtahuan ñana pandachingui.

48 Cunan Korihor nirca: Ñuca na neganichu shuj Dios tiajta, ashtahuangari ñuca na crini shuj Dios tiajta; ninipash, canguna na yachanguichichu shuj Dios tiajta; shuj señalta na ricuchijpica, ñuca na crishachu.

49 Cunan Alma nirca: Caita cusha señalcachun, upaman saquiringui ñuca shimi nishcamanda; ñuca nini, Diospaj shutipi, upaman tigrangui, ashtahuan na parlai ushangui.

50 Cunan imaura Alma cai shimicunata nijpica, Korihor upaman tigrarca, pai ashtahuan na parlai usharca, Almapaj shimicuna nishcashna.

51 Cunan imaura ricushpa chasquichijcunata yali mandaj cai ricurca, paipaj maquita chutashpa Korihorman quilcarca, nishpa: Diospaj ushaimanda cringuichu? maijanbi Alma shuj señalta ricuchichun munarcangui? Cutishujcunata llaquichichun munarcangui shuj señalta quiquinman ricuchichun? Riqui, pai canman shuj señalta ricuchishca; cunan ashtahuan tapunguirachu?

52 Korihor paipaj maquita chutashpa quilcarcapash, nishpa: Ñuca yachani upami cani, chai na parlai ushani; ñuca yachanipash nimapash ashtahuangari Diospaj ushaillami cai ñuca jahuaman apamui ushan; ari, ñuca punllan punllan yacharcani shuj Dios tiajta.

53 Ashtahuangari riqui, aya umachihuarca; pai ricurihuarca shuj ángel layapi, nihuarcapash: Ri, tigrachimuipash cai llactapuracunata, imashpa tucuillacuna chingashcacuna rinajun shuj na rijsishca Diosta catishpa. Pai nihuarca: Dios na tianllu; ari, pai yachachihuarca imata ñuca ninatapash. Ñuca yachachishcani paipaj shimicunata; paicunaman yachachircani caicuna alicachishcacuna carca aicha yuyaipa; paicunaman yachachircani, imaura ashtaca éxitota charingacaman, shinashpa ñuca ciertopacha crircani caicuna ciertopacha can yarcani; caimanda ciertopachata yarcani, imaura cai jatun llaquita ñuca jahuaman apamungacaman.

54 Cunan imaura pai caita nijpi, pai ninanda mañarca Alma Diosta achil mañachun, llaqui anchuchishca cachun paipamanda.

55 Ashtahuangari Alma nirca: Cai llaqui anchuchishca cajpica cutinbash pandachinguiman llactapuracunapaj shungucunata; chaimanda, quiquinhuan imatapash rurashca cachun Apunchijpaj munashcahuan.

56 Yalishca jipa Korihorpaj llaqui na anchuchishca carca; ashtahuangari pai shitashca carca, purircapash huasin huasin micunata mañashpa.

57 Cunan Korihor ima tucushcata yachaicuna ñapash villashca carca tucui alpacunaman; ari, proclamaciónda cacharca ricushpa chasquichijcunapaj yali mandajmanda tucui cai alpacunapi llactapuracunaman, villashpa caicunata maijangunaman Korihorpaj shimicunata crishcacunaman paicuna utsialla arrepentirina cajta, ama paicunamanbash shinallata castigocuna shamuchun.

58 Yalishca jipa paicuna tucuilla crirca Korihorpaj na ali ruraicunamanda; chaimanda paicuna tucuilla cutin Apunchijpaj crijman tigrarca; caimi tucuchi curca na alicunata imami Korihor layapi carca. Korihor rirca huasin huasin, pai causai ushangapa micunata mañashpa.

59 Yalishca jipa llactapuracunapaman rijujpi, ari, shuj llactapura picuna paipuracuna Nefitacunamanda chaupirishca carca paicunamanda shutichirirca Zoramitacuna, pushai tucushca caimanda shuj runahuan pipaj shutica Zoram carca—paicunahuan rijujpi, riqui, pai llapi tucushca carca sarui tucushcapash, pai huañungacaman.

60 Shina ñucanchi ricunchi paipaj tucurita pimi Apunchijpaj ñangunata huaglichin; shina ñucanchi ricunchi ayaca na ricuriangachu paipaj huahuacunata chai tucuri punllapi, ashtahuangari, ñapash urai aisan ucu pachaman.