Omnipaj Quilcashca

1 Cunan, yalishca jipa ñuca, Omni, ñuca taita, Jarom mandaimanda, ñuca quilcachun imatallapash cai jirru fangacunapi, ñucanchi genealogíata alchishpa charingapa—

2 Chaimanda, ñuca punllacunapi, yachachun munani, ñuca ashtacata macanajurcani espadahuan ñuca llactapuracuna, Nefitacunata alchishpa charingapa, Lamanitacuna, ñucanchita na ricunayachijcunapaj maquipi ama urmachun. Ashtahuangari riqui, Ñuca cani na alita ruraj runa, Apunchijpaj ricuchunbacha, rurachunbacha saquishcacunata na alichishca canichu imashina rurashca cana carcani.

3 Yalishca jipa ishcai patsaj canchis chunga sujta huatacuna yalishca carca, tauca sumaj causai punllacunata charircanchi; tauca shinlli macanajui yahuarta jichai punllacunatapash charircanchi. Ari, tucuripipash, ishcai patsaj pusaj chunga ishcai huatacuna yalishca carca, ñuca cai jirru fangacunata alichishca carcani ñuca taitacuna rurachunbacha saquishcacuna caimanda; ñuca churi Amarónman cuni. Ñuca tucuchini.

4 Cunan ñuca, Amarón, quilcana shimicunata quilcani, ashalla can, ñuca taitapaj quilcashcapica.

5 Riqui, yalishca jipa quimsa patsaj ishcai chunga huatacuna yalishca carca, Nefitacunapaj ninan na alita rurajcuna tucuchishca carca.

6 Apunchijca na saquinllu, Jerusalénpaj alpamanda llujchishpa apamushca alichishcapash, alchishpa charishcapash na ricunayachijcunapaj maquicunapi urmanamanda, ari, pai na munan shimicuna na pactashca cachun, maijan ñucanchi taitacunaman parlashcarca, nishpa: Ñuca rurachunbacha saquishcacunata na alichishpaca cai pambapi na ali miranguichu.

7 Chaimanda, Apunchij paicunata ricugrirca jatun ricushpa chasquichinacunapi; shina cajpipash, ali rurajcunata huacaichirca paicuna ama huañuchun, ashtahuangari na ricunayachijpa maquicunamanda quishpichirca.

8 Yalishca jipa cai jirru fangacunata ñuca huauqui Quemisman curcani.

9 Cunan ñuca, Quemis, quilcani huaquin cuzascunata, ñuca huauquihuan chai quilcashcapillata; riqui, ñuca ricurcani tucuri quilcashcata, pai quilcashcata paipaj maquihuanllata; pai quilcarca caita ñucaman cushca punllallata. Cashna laya ñucanchi alichinchi tandachishca quilcashcacunata, ñucanchi taitacuna rurachunbacha saquishcacuna caimanda. Ñuca tucuchini.

10 Riqui ñuca, Abinadom, ñuca churi cani Quemispaj. Riqui, yalishca jipa ñuca ashtaca macanajuicunata, randimanda plituricunata ricurcani, ñucanchi llactapuracunapi, Nefitacuna, Lamanitacunapash; ñuca, ñucapalla espadahuan tauca Lamanitacunapaj causaita quichurcani ñuca huauquicunata huacaichinamanda.

11 Riqui, cai llactapuracunapaj tandachishca quilcashca cai jirru fangacunapi quilcashca caita jatun mandajcuna charishca can, miraicunamanda; ñuca na yachanichu achil ricuchita, cai quilcashcatalla, achil villachitapash na yachanichu; chaimanda, cai quilcashcalla ali can. Ñuca tucuchini.

12 Riqui, ñuca Amalekí, Abinadompaj churi. Riqui, ñuca parlasha ashtahuan Mosíahmanda, pimi Zarahemla alpapaj jatun mandaj tucurca; riqui, Apunchij nirca Nefipaj llactaman pacajushpa richun, mashnacuna Apunchijpaj shimita uyangapa munajcunapash richun, jichushca pambaman—

13 Yalishca jipa pai rurarca imashna Apunchij mandashcata. Jichushca pambaman llujshishpa rirca, mashna Apunchijpaj shimita uyangapa munajcuna; paicuna pushai tucurca tauca yachajuicunahuan achil villaicunahuanbash. Catilla tacuri tucushcacuna carca Diospaj shimihuan; paipaj achil rigrapaj ushaihuan pusharca, jichushca pambata Zarahemla shuti pambaman chayangacaman.

14 Paicuna yachaj chayarca llactapuracunata, picuna Zarahemla nishpa shutichishca carca. Cunan, jatun cushijui tiarca Zarahemla llactapuracunahuan; Zarahemlapash ninanda cushijurca, Mosíahpaj llactapuracunata Apunchij cachamushca caimanda bronce jirru fangacunahuan maijan Judíocunamanda tandachishpa quilcashcata charin.

15 Riqui, yalishca jipa Mosíah yachaj chayarca Zarahemla llactapuracunaca Jerusalénmanda shamushca cajta Zedequíaspaj punllacunapi, Judápaj jatun mandaj, Babiloniaman huatai tucushcashna apashca carca.

16 Jichushca pambacunapi purirca, Apunchijpaj maquihuan pushamurca jatun yacucunata chimbashpa, pambaman maipi Mosíah paicunata yachaj chayarca; chaipi causashca carca chai punllacunamanda.

17 Punlla imaura Mosíah yachaj chayarca, paicuna ninan mirashcapacha carca. Shina cashpapash, paicuna tauca macanajuicunata, ninan fiñanajuicunatapash charishca carca, huaquinbi huaquinbi espadahuan urmashca carca; paicunapaj shimirimaicuna huagliman tigrashca carca; paicuna na aparcachu tandachishca quilcashcacunata paicunapaj causaicunamanda; paicuna na nishca carca paicunapaj Ruraj causajta; Mosíah, nacashpaca Mosíahpaj llactapuracuna, paicuna ima nijta na yacharca.

18 Yalishca jipa Mosíah paipaj shimirimaipi yachachichun shinarca. Yalishca jipa Mosíahpaj shimirimaipi yachachishca cajpi, Zarahemla curca paicunapaj taitacunapaj shuj genealogíata, paipaj yuyaimanda, caicuna quilcashca can, ashtahuangari na cai jirru fangacunapi.

19 Yalishca jipa Zarahemla llactapuracuna, Mosíahpajcunahuan shujllapi tandanajurca; Mosíah paicunapaj jatun mandaj cachun cayai tucurca.

20 Yalishca jipa Mosíahpaj punllacunapi, paiman apamurca shuj jatun quilcashca rumita; Diospaj ushaihuan carashcahuanbash quilcashcacunata shuj shimi rimaicunaman pai yalichirca.

21 Paicuna curca shuj tandachishpa quilcashca shuj Coriántumrmanda, paipaj llactapuracunapaj huañuchicunatapash. Coriántumr yachaj chayai tucurca Zarahemla llactapuracunahuan; pai causarca iscun lunacunata.

22 Paipaj taitacunamanda huaquin shimicunata parlajurca. Paipaj callari taitacuna torremanda shamushcapash, imaura Apunchij pandachirca llactapuracunapaj shimirimaita; Apunchijpaj ruranapacha paicunapaman urmarca ricushpa chasquichinacunahuan, maijan ali can; paicunapaj tullucunapash caiman chaiman shitashca can vichai lado pambacunapi.

23 Riqui, ñuca, Amalekí, Mosíahpaj punllacunapi nacishca cani; causashcani paipaj huañuita ricungacaman; Benjamín, paipaj churi, reinan paipaj pushtupi.

24 Riqui, ricushcani, jatun mandaj Benjamínpaj punllacunapi, ninan macanajuita ashtaca yahuar jichaita Nefitacunahuan Lamanitacunahuan. Ashtahuangari riqui, Nefitacuna ashtacata misharca; ari, cashna jatun mandaj Benjamín Lamanitacunata Zarahemla alpamanda llujchishpa cacharca.

25 Yalishca jipa ñuca rucuyai callarircani; cati aillucunata na charishpa, jatun mandaj Benjamín Apunchijpaj ñaupapi ali runa cajta yachaimandapash, chaimanda, cai jirru fangacunata paiman cugrini, cutin yarichishpa tucui runacuna Diospaman shamuchun, Israelpaj Achil, crichun achil villaicunapi, achil ricuicunapipash, ángelcunapaj achil yachachijcunapipash, shimirimaicunapi parlana donpipash, shimirimaicunaman yalichina donpi, tucui cuzascunapi alicuna cajpi; nimapash na tianllu, ali caj, Apunchijpamanda na shamuj, na alica ayamanda shamun.

26 Cunan, ñuca juyashca huauquicuna, Cristoman shamushcanguichiman, pimi Israelpaj Achil, quishpirita japishcanguichiman, paipaj jatun causachina ushaimandapash. Ari, paipaman shamuichi, tucui almacunata cuichi shuj ofrendatashna, ayunashpa, achil mañashpapash catichi, tucuricaman catiriaichi; imashna Apunchij causan quishpiringuichimi.

27 Cunan ashtahuan parlangapa munani shuj tandanajushcacuna picunami rirca jichushca pambaman Nefipaj pambaman tigrangapa; tiarcami shuj tandanajushcacuna picuna paicunapaj chasquina alpata charingapa munashca carca.

28 Chaimanda, paicuna jichushca pambaman rirca. Paicunapaj pushajca carca shuj racu shinllipash runa, na cazuj runa, chaimanda pai randimanda plituchirca paipuracunata; tucuilla huañurca, pichachungalla saquirirca, jichushca pambapi, paicuna Zarahemla alpaman tigramurca.

29 Yalishca jipa shujcunata taucallacunata paicunahuan pusharca, ñacutin ri callarirca jichushca pambapi.

30 Ñuca, Amalekí, shuj huauquita charircani, paipash paicunahuan rirca; chaimandapacha na yachashcanichu paicunamanda. Ñuca ñalla urai risha ñuca pambarina pushtuman; cai jirru fangacuna junda can. Ñuca parlaicunata tucuchini.