Achil quilcashcacuna
Alma 59


59 Capítulo

Moroni Pahoránda mañan Helamánpaj macanajujcunata shinllichichun—Lamanitacuna Nefíah llactata japin—Moroni fiñashca can gobiernohuan. Nara 62 C.Ñ.

1 Cunan yalishca jipa ricushpa chasquichijcunapaj reinado quimsa chunga huatapi Nefipaj llactapuracunapaj jahuapi, Moroni Helamánpaj cartata chasquishca, liishca jipa, ninanda cushijurca paicunapaj alicanamanda, ari, Helamán ninan mishaicunata charishcamanda, quichushca alpacunata chasquishcamanda.

2 Ari, caita tucui paipaj llactapuracunaman yachaj chayachirca, muyundi tucui alpacunapi maipi pai carca, paicunapash cushijuchun.

3 Yalishca jipa ñapash Pahoránman shuj cartata cacharca, mañashpa runacunata tandachichun Helamánda shinllichichun, nacashpa Helamánpaj macanajuj runacunata, shinashpa pai fangalla ricui ushachun chai alpa pushtuta imata cutin japishca carca juyailla ruraita ricuchi laya.

4 Yalishca jipa Moroni cai cartata cachashpa Zarahemlapaj alpaman, pai cutin callarirca shuj planda rurangapa chasqui ushangapa chai puchushca charishcacunata, llactacunata imata Lamanitacuna paicunapamanda quichushca carca.

5 Yalishca jipa shina Moroni prepararijujpi Lamanitacunapaj contra macanajungapa ringapa, riqui, Nefíahpaj llactapuracuna, maijanguna tandanajushca carca Moroni llactamanda, Lehi llactamandapash, Moriantón llactamandapash, Lamanitacunahuan macanajui callarirca.

6 Ari, picuna Manti llactamanda calpachi tucushcacunapash, muyundi alpacunamandapash, shamushpa Lamanitacunahuan tandanajurca cai alpa pushtupi.

7 Shina ninan taucapacha cashpa, ari, shinllichita punllan punllan chasquishpa, Ammorónpaj mandohuan paicuna Nefíahpaj llactapuracunapaj contra shamurca, huañuchi callarirca ninan jatun huañuchihuan.

8 Paicunapaj macanajuj runacuna shina taucapacha carca, Nefíahpaj puchushca llactapuracuna paicunapaj ñaupamanda calpanapacha carca; paicuna shamurca Moronipaj macanajuj runacunahuan tandanajurcapash.

9 Cunan imashna Moroni yuyashca carca runacuna Nefíah llactaman cachashca tianga, llactapuracunata ayudangapa chai llactata charishpa catingapa, yachashpa cai fangalla carca huacaichingapa llactata Lamanitacunapaj maquicunapi urmanamanda paicunapamanda cutin japina randi, pai yuyarca chai llactata fangalla huacaichinata.

10 Chaimanda pai jarcarca tucui paipaj macanajujcunata chai pushtucunapi maipi pai cutin misharca.

11 Cunan, Moroni ricushpa Nefíahpaj llacta chingashcata pai ninadapacha llaquirirca, dudai callarirca, llactapuracunapaj na ali ruraicunamanda, paicuna huauquicunapaj maquicunapi urmarcapashchari.

12 Cunan cai laya carca tucui paipaj capitángunapaj yali mandajcunahuan. Paicuna dudashca, manllarishcapash llactapuracunapaj na ali ruraicunamanda, cai Lamanitacuna paicunapaj jahuapi mishashcamanda.

13 Yalishca jipa Moroni fiñashca carca gobiernohuan, shuj laya caimanda paicunapaj llactapaj libertadmanda.