1 Yalishca jipa ricushpa chasquichijcunapaj reinado quimsa chunga sujta huata callaripi Nefipaj llactapuracunapa jahuapi, Shiblón chai achil cuzascunata japirca imata Alma Helamánman cushca carca.

2 Pai alita ruraj runa carca, Diospaj ñaupapi derecho purirca; alita rurangapa munarca punllan punllan, Apunchij paipaj Diospaj rurachunbacha saquishcacunata alichirca; paipaj huauquipash rurarca.

3 Yalishca jipa Moronipash huañurca. Shina ricushpa chasquichijpaj reinado quimsa chunga sujta huata tucurirca.

4 Yalishca jipa ricushpa chasquichijcunapaj reinado quimsa chunga canchis huatapi, taucapacha tandanajushca runacuna tiarca, yupashpa picha huaranga chuscu patsaj runacuna, paicunapaj huarmicunahuan, paicunapaj huahuacunahuan, Zarahemla llactamanda llujshimurca vichai alpacunaman.

5 Yalishca jipa Hagot, pai cashpa ninanda yachangapa munaj runa, chaimanda rirca, rurarcapash ninan jatun barcota, Ashtacapacha Tiaj alpa manñacunapi, Imapash Illaj alpa ladopi, caita shitarca jatun mama cochaman indi huashajuj ladoman, asha quichiji alpata maijan pusharca vichai alpaman.

6 Riqui, tauca Nefitacuna caiman yaicurca yacuta rircapash ashtaca minishtirishcacunahuan, tauca huarmicunapash, huahuacunapash; vichai ñanda japirca. Shina tucurin quimsa chunga canchis huata.

7 Quimsa chunga pusaj huatapi, cai runa cutishuj barcocunata rurarca. Callari barcopash tigramurca, tauca ashtahuan llactapuracuna caiman yaicurca; paicunapash ashtaca minishtirishcacunata japirca, cutin vichai alpaman rirca.

8 Yalishca jipa cutinga ashtahuan paicunamanda na uyarircachu. Ñucanchi yanchimi jatun mama cochahuan langai tucushca canga. Yalishca jipa cutishuj barcopash yacuta rirca; maiman rishcata na yachanchichu.

9 Yalishca jipa cai huatapi tauca llactapuracuna vichai alpaman rirca. Shina tucurirca quimsa chunga pusaj huata.

10 Yalishca jipa ricushpa chasquichijcunapaj reinado quimsa chunga iscun huatapi, Shiblónpash huañurca, Coriantónpash barcopi vichai alpaman rirca, apashpa minishtirishcacunata llactapuracunaman maijanguna chai alpaman rishca carca.

11 Chaimanda cai minishtirishca tucurca Shiblón nara huañushpallata chai achil cuzascunata cuchun, Helamánpaj churiman, paipaj shuti carca Helamán, paipaj taitamanda shina shutichishca carca.

12 Cunan riqui, tucui chai quilcashcacuna imacuna carca Helamánpaj maquipi quilcashca carca, cachashcapash carca runacunapaj huahuacunaman tucui alpacunaman, maiman Alma ama cachaichu mandashca pushtucunamanlla na.

13 Shina cajpipash, cai cuzascuna achil alichishca cana carca, shuj cati aillumanda cutishujman maquin maquin yalichina; chaimanda, cai huatapi, caicuna Helamánman cushca carca, Shiblón nara huañujllapita.

14 Yalishca jipa cai huatapi tauca chaupirijcuna tiarca picuna Lamanitacunapaman rishca carca; paicuna cutin tangachirca fiñachun Nefitacunapaj contra.

15 Cai huatallata paicuna shamurca taucapacha macanajuj runacunahuan Moroníahpaj llactapuracunapaj contra macanajungapa, nacashpa Moroníahpaj macanajuj runacunapaj contra, maipi mishai tucurca cutin calpachi tucushca paicunapaj propio alpacunaman, jatun chingachicunata llaquirishpa.

16 Shina ricushpa chasquichijcunapaj reinado quimsa chunga iscun huata tucurirca Nefipaj llactapuracunapa jahuapi.

17 Shina tucurin Almapaj tandachishpa quilcashcacuna, Helamán paipaj churipash, Shiblónpash, pimi paipaj churi carca.