Achil quilcashcacuna
Alma 23


23 Capítulo

Libertad religiosa tucuiman villashca can—Lamanitacuna canchis alpacunapi llactacunapipash tigrarin—Paicunallata shutichirin Anti-Nefi-Lehitacuna llaquimanda librarinbash—Amalekitacuna, Amulonitacuna ciertopachata na chasquin. Nara 90–77 C.Ñ.

1 Riqui, cunan yalishca jipa Lamanitacunapaj jatun mandaj tucui paipaj llactapuracunaman shuj proclamaciónda cacharca, paicunapaj maquicunata ama churachun Ammónpaj, Aarón, Omner, Himni paicunapaj huauquicunapaj jahuacunanapi maijanguna Diospaj shimita yachachishpa purijcunata, maipipash maijan pushtupi cajpipash, paicunapaj alpapi cajpipash.

2 Ari, paicunaman shuj mandaita cacharca, ama japichun huatangapa cárcelman churangapapash; paicunata ama tʼucachun, ama huajtachun, tandanajuna huasicunamanda ama calpachichun, ama llaquichichun; rumicunahuan ama pigachun, ashtahuangari huasicunaman libre yaicuchun, achil huasicunamanbash, achil pushtucunamanbash.

3 Shina paicuna ri ushan achil shimita yachachishpa paicunapaj munaimanda, jatun mandaj Apunchijpaman tigrashca caimanda, tucui paipaj huasi ucucunapash; chaimanda paipaj llactapuracunaman shuj proclamaciónda cacharca, Diospaj shimica na jarcaringachu, ashtahuangari ringa tucui alpacunaman, paipaj llactapuracuna paicunapaj punda taitacunapaj na ali yachachishcacunamanda crichun, crichumbash tucuilla huauquicuna cajta, na huañuchina, na shujpata japina, na shuhuana, na adulteriota rurana, tucui laya na ali ruraicunata na rurana.

4 Cunan yalishca jipa imaura jatun mandaj cai proclamaciónda cachajpi, Aarón paipaj huauquicunapash rirca llactan llactan, shuj adorana huasimanda cutishujman, iglesiacunata shayachishpa, sacerdotecunata consagrashpa, yachachijcunatapash Lamanitacunapaj alpacunapi, villashpa yachachishpapash paicunaman Diospaj shimita; shina paicuna ninanda mirai callarirca.

5 Huarangacunata Apunchijta rijsinaman apamushca carca, ari, huarangacuna Nefitacunapaj punda ruraicunapi crirca; paicunaman yachachishca carca tandachishpa quilcashcacunata achil villachishcacunatapash maijan cunan punllacaman yalichimushca carca.

6 Ciertopacha imashna Apunchij causan, ciertopacha imashna taucacuna crirca, imashna taucacuna ciertopachapaj yachanaman apamushca carca, Ammónpaj yachachishcacunamanda, achil ricuchinapaj espírituhuan achil villachinapapash, Diospaj ushai paicunapi juyailla ruraita ricuchinacunata rurashpa—Ari, cangunaman nini, imashna Apunchij causan, imashna tauca Lamanitacuna paicunapaj yachachicunapi crishca, Apunchijman tigrarishcapash, nimaura na pandarirca.

7 Paicuna ali ruraj llactapuracunaman tigrarca; paicunapaj na cazuna macanajunacunata shitarca, ashtahuan na Diosta fiñarca, paicunapaj huauquicunahuanbash na.

8 Cunan, caicuna can maijanguna Apunchijpaman tigrashca:

9 Lamanitacunapaj llactapuracuna Ismaelpaj alpapi cajcuna carca;

10 Lamanitacunapaj llactapuracuna maijanguna Middonipaj alpapi carca;

11 Lamanitacunapaj llactapuracunapash maijanguna Nefipaj llactapi carca;

12 Lamanitacunapaj llactapuracunapash maijanguna Shilompaj alpapi carca, maijanguna Shemlónpaj alpapi carcapash, Lemuelpaj llactapipash, Shimnilompaj llactapipash.

13 Caicuna can Lamanitacunapaj llactacunapaj shuticuna maijanguna Apunchijpaman tigrashca carca; caicuna carca paicunapaj na cazuna macanajunacunata shitashcacuna, ari, tucui paicunapaj macanajunacunata; paicuna tucuilla Lamanitacuna carca.

14 Amalekitacuna na tigrarishca carca, ashtahuangari shujlla; Amulonitacunapash nimaijan; ashtahuangari paicunapaj shungucunata shinlliyachirca, Lamanitacunapaj shungucunatapash paicuna maipipash causan pushtucunapi, ari, tucui paicunapaj uchilla llactacunapi tucui paicunapaj llactacunapipash.

15 Chaimanda, ñucanchi shutichishcanchi tucui Lamanitacunapaj llactacunata maipi paicuna arrepentirirca ciertopachapaj yachanaman shamurcapash, tigrarishca carcapash.

16 Yalishca jipa jatun mandaj maijanguna tigrashcacunapash munarca paicuna shuj shutita charingapa, caihuan paicunapaj huauquicunamanda shican rijsi tucungapa; chaimanda jatun mandaj tapurca Aarónda tauca paicunapaj sacerdotecunatapash, ima shutita charinamanda, paicuna shican ricui tucushca cangapa.

17 Yalishca jipa paicunapaj shuticuna carca Anti-Nefi-Lehitacuna; cai shutihuan rijsishca carca ñana Lamanitacuna ashtahuan rijsishca carcachu.

18 Paicuna ninan trabajaj llactapuracuna cangapa callarirca; ari, Nefitacunahuan ali rijsicuna; chaimanda, paicunahuan alirijsicuna tucurca, Diospaj llaquichina paicunahuan ashtahuan ñana catirca.