Achil quilcashcacuna
Alma 56


56 Capítulo

Helamán shuj cartata Moroniman cachan, Lamanitacunahuan macanajuicuna imashna cajta villashpa—Antipus, Helamán Lamanitacunapaj jahuapi jatun mishaita charin—Ishcai huaranga Helamánpaj viñaj churicuna macanajun juyaillapacha ushaihuan, paicunamanda pipash na huañushca can. 1 versículopi, nara 62 C.Ñ.; 2–19 versículocunapi, nara 66 C.Ñ.; 20–57 versículocunapi, nara 65–64 C.Ñ.

1 Cunan yalishca jipa ricushpa chasquichijcunapaj reinado quimsa chunga huata callaripi, ishcai punllapi, callari quillapi, Moroni shuj cartata chasquirca Helamánbamanda, nishpa llactapuracunapaj ruraicunata cai alpa pushtupi.

2 Caicuna can shimicuna imata pai quilcarca, nishpa: Ñuca juyashca huauqui, Moroni, imashna Apunchijpi canchi shinallata macanajuipi ñucanchi llaquiricunapi; riqui, ñuca juyashca huauqui, ñuca charini imatachari ninata ñucanchi macanajuimanda cai alpa pushtupi.

3 Riqui, ishcai huaranga chai runacunapaj churicuna maijangunata Ammón Nefipaj alpaman urai apamurca—cunan yachashca cangui caicuna carca Lamánpaj cati aillucuna, pimi ñucanchi taita Lehipaj rucu churi carca;

4 Cunan na cutin nita minishtini paicunapaj punda ruraicunamanda nacashpa paicunapaj na crinacunamanda, imashpa quiquin yachangui tucui cai cuzascunamanda—

5 Chaimanda ñucapaj cailla can ñuca nini ishcai huaranga cai viñaj huambracuna japishca paicunapaj macanajunacunata, paicuna mañarca ñuca paicunapaj pushaj cachun; ñucanchi llujshishcanchipash ñucanchi llactata huacaichingapa.

6 Cunan yachanguipash pactachinamanda imata paicunapaj taitacuna rurarca, paicuna ama japingapa macanajunacunata paicunapaj huauquicunapaj contra macanajugringapa yahuarta jichangapa.

7 Ashtahuangari ishcai chunga sujta huatapi, imaura paicuna ricurca ñucanchi llaquicunata, paicunamanda ñucanchipa ninan llaquicunata, paicuna ñalla pactachinata faquirca imata paicuna rurashca carca japishpa macanajunacunata ñucanchita huacaichingapa.

8 Ashtahuangari paicunata na saquircani cai pactachinata faquichun imata paicuna rurashca carca, Dios ñucanchita shinllichinga yashpa, shinashpa ñucanchi ashtahuan na llaqui yalishun juramentota pactachimanda imata paicuna rurashca carca.

9 Ashtahuangari riqui, caipi can shuj cuzas imapi ñucanchi jatun cushijuita charinchi. Riqui, ishcai chunga sujta huatapi, ñuca, Helamán, rircani ishcai huaranga viñaj huambracunapaj ñaupapi Judea llactaman, Antipusta ayudangapa, pimi quiquin ajllashca carcangui pushaj cachun llactapuracunapaj jahuapi chai alpa pushtupi.

10 Ñuca ishcai huaranga churicunata tandachircani, (imashpa paicuna fielcuna carca shutichishca cangapa churicuna) Antipuspaj macanajuj runacunapaman, cai fuerzapi Antipus ninanda cushijurca; riqui, paipaj macanajuj runacuna ashallayachishca carca Lamanitacunahuan paicunapaj runacuna ashtacapacha ñucanchipaj macanajujcunata huañuchishca caimanda, imamandami llaquiyanata charinchi.

11 Shina cajpipash, ñucanchimanda cushijurinchi caipi, paicuna huañun paicunapaj llacta yuyaicunamanda, paicunapaj Diosmanda, ari, paicuna cushijushca can.

12 Lamanitacunapash tauca prezucunata japishca carca, tucui maijanguna capitángunapaj yali mandajcunata, ashtahuan shujcunata na causa saquishca carca. Ñucanchi yanchi paicuna can cunan punlla Nefipaj alpapi; cai can paicuna na huañushca cashpaca.

13 Cunan caicuna can llactacuna imata Lamanitacuna japishca charinajun yahuarta jichaimanda shina tauca ñucanchipaj millai runacunapaj:

14 Manti alpa, nacashpa Manti llacta, Zeezrom llactapash, Cumeni llactapash, Antipara llactapash.

15 Cai carca llactacuna imata paicuna charinajurca ñuca Judea llactaman chayajpi; ñuca Antipusta tuparcani paipaj runacuna trabajanajurca paicunapaj ushaihuan llactata shinlliyachingapa.

16 Ari, paicuna shaijushca carca cuerpopipash shinallata espíritupipash, paicuna millaitapacha macanajushca carca punllapi trabajashcapash tutapi paicunapaj llactacunata charishpa catingapa; shina paicuna llaqui yalishca jatun tucui laya llaquiricunahuan.

17 Cunan paicuna carca cai pushtuta mishangapapacha nacashpa huañuna; chaimanda quiquin ali yuyai ushangui cai asha macanajujcuna imata ñucahuan apamurcani, ari, cai ñuca churicuna, paicunaman jatun shuyaita, ashtaca cushijuitapash curca.

18 Cunan yalishca jipa Lamanitacuna ricushpa Antipus ashtaca shinllichita chasquishca cajta paipaj macanajuj runacunapa, paicuna munai na munai churashca carca Ammorónpaj mandaihuan Judea llactapaj contra ama shamuchun, nacashpa ñucanchipaj contra, macanajungapa.

19 Shina Apunchijhuan achilyachishcacuna carcanchi; ñucanchi jahuaman shamushpaca cai ñucanchi irquicaipi paicuna ñucanchi ashalla macanajuj runacunata tucuchi ushanmanbash carca; ashtahuangari shina ñucanchi alchishpa charishca carcanchi.

20 Paicuna mandai tucushca carca Ammorónhuan charishpa catingapa chai llactacunata imata paicuna japishca carca. Shina ishcai chunga sujta huata tucurirca. Ishcai chunga canchis huata callaripi ñucanchi llactata preparashca carcanchi, ñucanchimandallata huacaichiringapa.

21 Cunan ñucanchi munashca carcanchi Lamanitacuna ñucanchipaman shamuchun; ñucanchi na munaimanda paicunata macanajui mascangapa paicunapaj shinlli jarcashcacunapi.

22 Yalishca jipa ñucanchi pacalla ricujcunata muyundi churarcanchi, Lamanitacunapaj tucui cuyurishcacunata ricuchun, paicuna ama yali ushachun tuta cashpa punlla cashpapash macanajuita mascangapa ñucanchi cutishuj llactacunata maijancuna vichaiman carca.

23 Ñucanchi yacharcanchi chai llactacunapi na ali shinllicuna carca paicunata tuparingapa; chaimanda ñucanchi munashca carcanchi, imashpapash ñucanchipa ladota yalijpica, paicunapaj huashapi urmangapa, shina quichijingapa ñaupashca cajpi chai horasllata paicuna ñaupata tuparimunajujpi. Ñucanchi yarcanchi paicunata mishangapa; ashtahuangari, ñucanchi na pactachi usharcanchi cai ñucanchi munaita.

24 Manllarca yalingapa ñucanchi ladota paicunapaj tucui macanajuj runacunahuan, manllarcapash paicunapaj huaquinhuanbash, paicuna na alipacha shinlli caipapash, urmaipapash.

25 Manllarcapash urai ringapa Zarahemla llactapaj contra; manllarcapash Sidón umata yalingapapash, Nefíah llacta jahuatapash.

26 Shina, paicunapaj macanajujcunahuan, paicuna charishpa catinapacha carca chai llactacunata imata paicuna japishca carca.

27 Cunan yalishca jipa cai huatapaj cati quilla, ñucanchiman apamushca carca ashtaca micunacunata ñuca ishcai huaranga churicunapaj taitacunapamanda.

28 Cachamushcapash carca ñucanchipaman ishcai huaranga runacunata Zarahemla alpamanda. Shina ñucanchi prepararishca carcanchi chunga huaranga runacunahuan, paicunapaj micunacunahuanbash, paicunapaj huarmicunapapash, paicunapaj huahuacunapapash.

29 Lamanitacuna, shina ñucanchi macanajujcunata punllan punllan mirajta ricuimanda, ñucanchita shinllichingapa micunacuna chayamujtapash, paicuna manllai callarirca, llujshi callarirca, ushashpaca ñucanchi micunacunata, shinllichinatapash chasquinata tucuchingapa.

30 Cunan ñucanchi ricushpa Lamanitacuna cai laya cuyuri callarijta, ñucanchi shuj umachinata paicunaman rurangapa munarcanchi; chaimanda Antipus mandarca ñuca richun huaquin churicunahuan ladolla llactaman, micunacunata apanajuj laya chai ladolla llactaman.

31 Ñucanchi yalina carcanchi Antipara llacta ladota, ashtahuan caru llactaman rinajun laya, jatun mama cocha pata manñacunata.

32 Yalishca jipa ñucanchi llujshircanchi, ñucanchi micunacunahuan laya, chai llactaman ringapa.

33 Yalishca jipa Antipus llujshirca paipaj asha macanajuj runacunahuan, puchucunata saquishpa llactata huacaichichun. Ashtahuangari pai na llujshircachu imaura ñuca llujshishpa ringacaman ñuca asha macanajuj runacunahuan, Antipara llacta ladoman shamurca.

34 Cunan, Antipara llactapi churashca carca shinlli Lamanitacunapaj macanajuj runacunata; ari, ashtacapacha.

35 Yalishca jipa imaura paicunaman villajpi pacalla ricujcuna, paicuna llujshimurca paicunapaj macanajuj runacunahuan ñucanchipaman shamurcapash.

36 Yalishca jipa ñucanchi calparcanchi paicunata ñaupashpa, vichaiman. Shina ñucanchi aparcanchi ashtacapacha ushai charij Lamanitacunapaj macanajuj runacunata;

37 Ari, carullatapacha, shinashpa paicuna ricushpa Antipuspaj macanajuj runacuna paicunata catimunajujta, paicunapaj ushaihuan, paicuna na tigrarca ali ladoman, lluqui ladomanbash, ashtahuangari catirca paicunapaj purishpa rinata derecho ñanda ñucanchita catishpa; imashna ñucanchi yarcanchi, cai carca paicuna munai ñucanchita huañuchina Antipus paicunata nara japijllapita, cai ama ñucanchi runacunahuan chaupipi churai tucungapa.

38 Cunan Antipus, ñucanchi na alipi cajta ricushpa, ñapash paipaj macanajuj runacunahuan rirca. Ashtahuangari riqui, tuta carca; chaimanda paicuna na ñucanchi jahuaman shamurca, Antipuspash paicunata na japirca; chaimanda tutapi facha huasicunata shayachircanchi.

39 Yalishca jipa nara ali punllayajpi, riqui, Lamanitacuna ñucanchita catinajurca. Cunan ñucanchi na ali shinllicuna na carcanchi paicunahuan macanajungapa; ari, ñuca na saqui usharcani ñuca uchilla churicuna paicunapaj maquicunapi urmachun; chaimanda ñucanchi catircanchi ñucanchi purihuan, rircanchipash jichushca pambaman.

40 Cunan paicuna manllarca ali ladoman, lluqui ladoman tigranatapash paicuna chaupipi churai tucunamanda; ñucapash ali ladoman, lluqui ladoman tigrangapa na munarcani japingapa shamunata manllaimanda, paicunapaj contra shayarita na ushanamanda, ashtahuangari paicuna huañuchishpa, pacajungapash; shina ñucanchi tucuilla calparcanchi chai punlla jichushca pambaman, imaura tutayangacaman.

41 Yalishca jipa cutin, tutamanda micha shamujpi ñucanchi ricurcanchi Lamanitacunata ñucanchi jahuapi, paicunata ñaupashpa calparcanchi.

42 Yalishca jipa ñucanchita nara caruta catishpa shayarirca; cai carca tutamandapi canchis quillapaj quimsa punlla.

43 Cunan, Antipusta japigrishca na japigrishcata na yacharcanchichu, ashtahuangari ñuca runacunata nircani: Riqui, ñucanchi na yachanchichu imata munashpa jarcarishcata chaichu paicunapaj contra ñucanchi richun, paicuna ñucanchita japingapa paicunapaj umachinapi;

44 Chaimanda cangunamanda imata ninguichi, ñuca churicuna, rishunchichu paicunahuan macanajungapa?

45 Cunan cangunaman nini, ñuca juyashca huauqui Moroni, imaura ñuca na ricushcanchichu shina jatun na manllaita, na tucui Nefitacunapipash.

46 Imashna paicunata ñuca churicuna nishcani (paicuna tucuilla chaira chaira viñaj huambracuna carca) paicunapash nihuarca: Taita, riqui ñucanchi Dios ñucanchihuan can, pai na saquin ñucanchi urmachun; shina rishunchi; ñucanchi huauquicunata na huañuchinchimanllu paicuna ñucanchita casi saquijpica; chaimanda jacuchi, imashpapash Antipuspaj macanajuj runacunata mishaipapash.

47 Cunan paicuna nimaura na macanajushca carca, shinapash huañunata na manllarca; paicuna ashtahuan yuyarca paicunapaj taitacunapaj libertadta paicuna causaipa randi; ari, paicuna yachachishca carca paicunapaj mamacunamanda, paicuna na dudajpica, Dios paicunata huacaichinga.

48 Paicuna tigrashpa paicunapaj mamacunapaj shimicunata cutin nihuarca, nishpa: Ñucanchi na dudanchi ñucanchipaj mamacuna caita yachashcata.

49 Yalishca jipa ñuca tigrarcani ñuca ishcai huarangacunahuan cai Lamanitacunapaj contra picuna ñucanchita catinajurca. Cunan riqui, Antipuspaj macanajuj runacuna paicunata japigrishcarca, shuj manllanayai macanajui callarishcarca.

50 Antipuspaj macanajuj runacuna shayajushcacuna carca, caruta purishcamanda cai asha tiempopi, ñalla Lamanitacunapaj maquicunapi urmagrinajurca; ñuca ishcai huarangacunahuan na tigrajpica paicunapaj munaita pactachinman carca.

51 Antipus espadahuan urmashca carca, tauca paicunapaj pushajcunapash, paicunapaj shaijuimanda, paicuna ñapash purimanda—chaimanda Antipuspaj runacuna, pandashca caimanda paicunapaj pushajcuna urmaimanda, Lamanitacunapaj ñaupamanda ñanda cui callarirca.

52 Yalishca jipa Lamanitacuna na manllarca, paicunata cati callarirca; shina Lamanitacuna cati callarirca jatun millaihuan imaura Helamán paicunapaj huashata shamurca paipaj ishcai huarangacunahuan, paicunata ninandapacha huañuchi callarirca, shinashpa tucuilla Lamanitacunapaj macanajuj runacuna shayarirca Helamánpaman tigrarca.

53 Cunan imaura Antipuspaj llactapuracuna ricurca Lamanitacuna paicunapaman tigrajta, paicuna tandachirca paicunapaj runacunata cutin shamurcapash Lamanitacunapaj huashata.

54 Cunan yalishca jipa ñucanchi, Nefipaj llactapuracuna, Antipuspaj llactapuracuna, ñucapash ñuca ishcai huarangacunahuan, Lamanitacunata chaupipi churarcanchi, huañuchircanchipash; ari, shinashpa paicuna munai na munai ricurishca carca paicunapaj macanajunacunata cuchun paicunapash macanajui prezu laya.

55 Cunan yalishca jipa imaura paicunallata saquirijpi, riqui, ñuca yuparcani chai viñaj huambracunata maijanguna ñucahuan macanajurca, manllashpa tauca huañushcanga yashpa.

56 Ashtahuangari riqui, ñuca jatun cushijuipa, ni shuj almapash alpaman na urmashca carca; ari, paicuna macanajushca carca Diospaj shinllicaihuan; ari, nimaura runacuna na yachashca carca shina juyaillapacha ushaihuan macanajujta; shina ushaihuan paicuna Lamanitacunapaj jahuapi urmarca, paicunata manllachirca; caimanda Lamanitacuna macanajui prezu laya curirca.

57 Ñucanchipaj prezucunapa pushtuta na charircanchi, ricui ushangapa Lamanitacunapaj macanajuj runacunamanda huacaichingapa, chaimanda ñucanchi paicunata cacharcanchi Zarahemla alpaman, paicunahuan huaquin Antipuspaj runacunata maijan na huañushcacuna, puchushcacunata japircani tandachircani ñuca Ammonita viñaj huambracunahuan, Judea llactaman tigrai purishpa rircanchi.