1 Ñuca churi, uyai ñuca shimicunata; canman jurani, imashna can Diospaj rurachunbacha saquishcacunata alichinguichi cai pambapi ali miranguichi.

2 Ñuca munaiman canguna rurachun imashna ñuca rurashcani, ñucanchi taitacunapaj huatai tucushcashnata yarishpa; paicuna esclavitudpi carca, paicunata pipash na cacharichi usharca, caita usharca Abrahampaj Dios, Isaacpaj Dios, Jacobpaj Dioslla; pai ciertopacha cacharichirca paicunapaj llaquicunata.

3 Cunan, Oh ñuca churi Helamán, riqui, quiquin viñaj huambra canapi cangui, quiquinda mañani ñuca shimicunata uyai ñucamanda yachajui; imashpa ñuca yachani maijanbash Diospi confianzata churajpi shinllichi tucushca canga paicunapaj shinlli llaquicunapi, jatun llaquicunapipash, paicunapaj shinlli llaquicunapipash, vichai alsashca canga chai tucuri punllapi.

4 Ñuca na munanichu canguna, ñucamandallata yachashca yachun—na temporal ashtahuangari espiritualmanda, na aichapaj yuyaihuan ashtahuangari Diospaj yuyaihuan.

5 Cunan, riqui, cangunaman nini, Diospaj ñuca na nacirishca cashpaca cai cuzascunata na yachaimanllu; ashtahuangari paipaj achil ángelpaj shimimanda, cai cuzascunata Dios yachachihuarca, na ñucamanda nima dignidadmanda;

6 Ñuca rircani Mosíahpaj churicunahuan, mascashpa Diospaj iglesiata tucuchingapa; ashtahuangari riqui, Dios cachamurca paipaj achil ángelta ñanbi jarcangapa.

7 Riqui, pai ñucanchiman parlarca, imashna culun nin shimishna, chaqui ucuman tucui alpacuna chujchurca; ñucanchipash tucuilla alpaman urmarcanchi, Apunchijpaj manllaica ñucanchipaman shamurca.

8 Ashtahuangari riqui, shimi ñucaman nirca: Jatari. Ñuca jatarircani shayarircanipash, ángelta ricurcani.

9 Pai nihuarca: Imashpapash quiquinmandallata tucuchiringapa munashpalla, Diospaj iglesiata ama ashtahuan tucuchingapa mascaichu.

10 Yalishca jipa ñuca alpaman urmarcani; quimsa punllacuna quimsa tutacuna carca ñuca shimita na pascai usharcani, nima ñuca cuerpota na cuyuchi usharcanipash.

11 Ángelca ashtahuan cuzascunata parlahuarca, imata ñuca huauquicuna uyashca carca, ashtahuangari ñuca chaicunata na uyarcani; imaura ñuca uyarcani shimicunata—Quiquinmandallata tucuchiringapa munashpalla, Diospaj iglesiata ama ashtahuan tucuchingapa mascaichu—chugrishcashna carcani shina jatun manllaihuan, manllarihuan tucuchishcapash casha yashpa, alpaman urmarcani ashtahuan ñana uyarcani.

12 Ashtahuangari ñuca ashtaca llaquichishca carcani mana tucurina llaquihuan, ñuca alma llaqui apashca carca jatunbacha ashtaca llaquichishca tucui ñuca juchacunahuan.

13 Ari, ñuca yarircani tucui ñuca juchacunata na ali ruraicunatapash, chaicunamanda ñuca llaquichishca carcani ucu pachapaj llaquiricunahuan; ari, ñuca ricurcani na cazushca carcani ñuca Diosta, paipaj achil rurachunbacha saquishcacunatapash na alichircani.

14 Ari, tauca paipaj huahuacunata huañuchishcarcani, nacashpa ashtahuanbacha paicunata tucuchinaman pushashpa; ari, tucuripipash cashna jatun carca ñuca na ali ruraicuna, tucuri yuyai ñuca Diospaj ñaupaman yaicuna ñuca almata ashtaca llaquichirca imashna na nita ushai manllaihuan.

15 Oh, yuyarcani ñuca, caruman calpachishca cashcaiman, ñana causashcaiman almapi, cuerpopipash, ama apamui tucungapa ñuca Diospaj ñaupapi shayaringapa, ñuca rurashcacunamanda ricushpa chasquichishca cangapa.

16 Cunan, quimsa punllacunata quimsa tutacunata ashtaca llaquichishca carcani, shuj llaquichi tucushca almapaj llaquiricunahuanbash.

17 Yalishca jipa imashna ñuca shina ashtaca llaquichishca carcani llaquicunahuan, imaura ñuca llaqui apashca carcani ñucapaj tauca juchacunata yuyaihuan, riqui, ñuca yarircanipash uyashcata ñuca taitapaj achil villachishcata llactapuracunaman shuj Jesucristopaj shamunamanda, Diospaj Churi, cai pachapaj juchacunamanda huañungapa.

18 Cunan, imashna ñuca yuyaipi cai yuyaita charijushpa, ñuca shungu ucupilla mañarcani: Oh Jesús, Diospaj Churi, shungumanda llaquihuai, ninan llaquipaj jayapi cani, pillushca cani huañuipaj huatanacunahuan.

19 Cunan, riqui, imaura caita yarijujpi, ñuca ñana usharcani yarita ashtahuan llaquicunata; ari, ñucata saquihuarca llaqui apachita ñuca juchacunapaj ashtahuan yarinata.

20 Oh, imashna cushijui, imashna juyailla micha ñuca ricurcani; ari, ñuca alma cushijuihuan jundashca carca imashna ninan llaquiri carca shinallata!

21 Ari, canman nini, ñuca churi, nimapash na tiangachu cashna ninan cashna jayapash imashna ñuca llaquiricuna carca. Ari, cutin canman nini, ñuca churi, shuj ladoman, nimapash na tiangachu cashna ninan mishqui imashna carca ñuca cushijui.

22 Ari, ricushcashna yuyarcani, imashna ñucanchi taita Lehi ricushcashna, Dios paipaj jatun tiarinapi tiajujta, muyushca na yupanalla tandanajushca ángelcunahuan, paicunapaj Diosman cantanajuj adoranajuj layapi; ari, ñuca alma chaipi cangapa munarca.

23 Ashtahuangari riqui, ñuca cuerpo paipaj shinlli caita cutin chasquirca, shayarircani ñuca chaquicunahuan, shina llactapuracunaman ricuchircani ñuca Diospaj nacirishca cajta.

24 Ari, chai punllamanda cunangaman, na shaijushpa trabajashcani, almacunata arrepentimientoman apamushpa; paicunata apamushpa malichun ninan cushijuita imata ñuca malircani; paicunapash Diospaj nacirichun, Espíritu Santohuan jundashca cachun.

25 Ari, cunan riqui, Oh ñuca churi, Apunchijca cuhuarca ninanbacha jatun cushijuita ñuca trabajashcacunamanda fucushcapi.

26 Achil shimimanda imata pai ñucaman carahuarca, riqui, taucacuna Diospaj nacirirca, malirca imashna ñuca malircani, ñavi ñavi ricurcapash imashna ñuca ricurcani; chaimanda paicuna yacharca cai cuzascunata imamanda ñuca parlashcani, imashna ñuca yachani; yachajuita imata ñuca charini Diospaj can.

27 Shinllichi tucushca cani shinlli llaquicunapi, tucui laya jatun llaquicunapipash, ari, tucui laya llaquicunapipash; ari, Dios cárcelmandapash cacharichihuashca, huatashcacunamandapash, huañuimandapash; ari, paipi ñuca confianzata churashcani, pai ñucata cacharichingarami.

28 Ñuca yachani pai cutin causachihuanga chai tucuri punllapi, paihuan punchapambapi causangapa; ari, paita adorasha mana tucurinacaman, pai apamushca ñucanchi taitacunata Egiptomanda, pai Egipciocunata Puca Jatun Mama Cochahuan langachirca; paipaj ushaihuan cushapacha nishca alpaman apamurca; ari, paicunata cacharichirca esclavitudmanda, huatai tucushcashnamandapash huaquinbi huaquinbi.

29 Ari, pai apamushcapash ñucanchi taitacunata Jerusalénpaj alpamanda; paipaj mana tucurina ushaihuanbash, paicunata cacharichishca esclavitudmanda, huatai tucushcashnamandapash, huaquinbi huaquinbi cunan punllacamanbash; ñuca punllan punllan ñuca yuyaipi charishcani paicunapaj huatai tucushcashnata; ari, canbash charina cangui yuyaipi, imashna ñuca rurashcani, paicunapaj huatai tucushcashnata.

30 Ashtahuangari riqui, ñuca churi, cai na tucuillachu; yachanapash cangui imashna ñuca yachani, can shinapacha alichijpi Diospaj rurachunbacha saquishcacunata can pambapi ali mirangui; yachanapash cangui, can shinapacha na alichijpi Diospaj rurachunbacha saquishcacunata paipaj ñaupamanda anchuchi tucungui. Cunan cai can paipaj shimimanda.