1 Riqui, cunan yalishca jipa ñucanchipaj cati munai carca Manti llactata japina; ashtahuangari riqui, imashnapash na tiarca paicunata llactamanda calpachina ñucanchi ashalla macanajujcunahuan. Riqui, paicuna yarirca chairalla imata rurashcata; chaimanda ñucanchi na umachi usharcanchi paicunapaj shinlli jarcashcacunamanda.

2 Ñucanchipaj macanajuj runacunata yali paicuna ashtacapacha carca manllarcanchi ringapa macanajuita mascangapa paicunapaj shinlli jarcashcacunapi.

3 Ari, cai minishtirishca tigrarca ñucanchi runacunata chai alpa pushtucunapi churana huacaichichun maijanguna cutin misharcanchi ñucanchi alpacunata; chaimanda cai minishtirishca tigrarca shuyana, ashtahuan shinlliyachinata chasquingacaman Zarahemla alpamanda mushuj minishtirishca micunatapash.

4 Yalishca jipa shina cacharcani villajta ñucanchipaj alpa mandajpaman, paiman villangapa ñucanchi llactapuracunapaj ruraicunamanda. Yalishca jipa shuyarcanchi chasquinata minishtirishca micunacunata, shinlliyanatapash Zarahemla alpamanda.

5 Ashtahuangari riqui, cai ashagutalla ali carca; Lamanitacuna chasquinajurcapash jatun shinlliyachinata punllan punllan, tauca minishtirishcacunatapash; shina carca ñucanchi yalinajuj punllacuna.

6 Lamanitacuna ñucanchipaj contra llujshimurca huaquinbi huaquinbi, ñucanchita umachinahuan tucuchingapa; shina cashpapash ñucanchi paicunahuan macanajungapa na shamurcanchi, paicunapaj pacajuna pushtucunamanda, shinlli jarcashcacunamandapash.

7 Yalishca jipa shuyarcanchi cai na ali caicunapi tauca quillacunata, imaura ñalla tucuringacaman micunata munaimanda.

8 Ashtahuangari yalishca jipa micunata chasquircanchi, imata ishcai huaranga runacuna ñucanchiman alichishca carca ayudangapa; cai carca tucui ayuda imata chasquircanchi, ñucanchipura huacaichiringapa, ñucanchi llactata ñucanchita napacha ricunayachijcunapaj maquicunamanda, ari, macanajungapa na ricunayachijcunahuan picuna ashtacapacha carca.

9 Cunan cai ñucanchi na rurai ushanallacunamanda, nacashpa ñucanchiman imashpa na ashtahuan shinllichinacunata na cachamujta, na yachanchichu; chaimanda llaquiyashca carcanchi, manllai jundapash, imashpapash Diospaj ricushpa chasquichinacuna ñucanchi alpaman shamuipapash, ñucanchipaj urmaipa, tucuilla tucuchingapapash.

10 Chaimanda ñucanchipaj almacunata jicharcanchi Diosta achil mañaipi, pai ñucanchita shinllichichun, ñucanchipaj napacha ricunayachijcunapaj maquicunamanda cacharichichun, ari, shinlliyaita cuchunbash, ari, ñucanchi llactacunata charishpa catingapa, ñucanchi alpacunatapash, ñucanchi charishcacunatapash, ñucanchi llactapuracunaman micuchingapa.

11 Ari, yalishca jipa Apunchij ñucanchi Dios ricurimurca cacharichinapacha yuyaita; ari, shinashpa ñucanchi almacunaman sumaj caita parlarca, ñucanchiman curca jatun feta, paipi churachirca shuyaita ñucanchita cacharichichun.

12 Na manllaita japircanchi ñucanchi ashalla runacunahuan imata chasquishca carcanchi, yuyashcapacha carcanchi ñucanchipaj napacha ricunayachijcunata mishana, ñucanchipaj alpacunata charishpa catina, ñucanchipaj charishcacunata, ñucanchipaj huarmicunata, ñucanchipaj huahuacunata, ñucanchipaj libertadmandapash.

13 Shina ñucanchi rircanchi tucui ushaihuan Lamanitacunapaj contra, picuna carca Manti llactapi; ñucanchi facha huasicunata shayachircanchi jichushca pamba manñaman, cai llacta ladoman carca.

14 Yalishca jipa cati punlla, Lamanitacuna ricushpa ñucanchi jichushca pambapaj manñacunapi cajta maijan llacta ladoman carca, paicunapaj pacalla ricujcunata cachamurca ñucanchipaj muyundi, macanajuj runacuna mashna cajta, shinllicajta yachachun.

15 Yalishca jipa paicuna na shinllicuna cajta ricushpa, huaquinllacunamanda, manllashpa paicunata minishtirishcacuna illa saquingamanda imashpapash paicuna shamushpalla ñucanchi contra macanajungapa, huañuchishpapash, ñucanchita tucuchinapash na ushanalla canga yashpa paicunapaj taucapacha macanajuj runacunahuan, chaimanda paicuna callarirca prepararishpa ñucanchihuan macanajungapa shamungapa.

16 Imaura ñucanchi ricushpa paicuna prepararinajujta ñucanchipaj contra shamungapa, riqui, ñuca shinarcani Gid, shuj huaquinlla runacunahuan, jichushca pambapi pacajugrichun, Teómner, shuj huaquinlla runacunahuanbash paicunapash jichushca pambapi pacajuchun.

17 Cunan Gid, paipaj runacuna carca ali ladoman, cutishujcuna lluqui ladomanbash; shina pacajushca cajpi, riqui, ñuca ñucapaj puchushca macanajuj runacunahuan, chai pushtupillata maipi callari ñucanchi facha huasicunata shayachishca carcanchi ima punlla Lamanitacuna llujshingacaman macanajungapa.

18 Yalishca jipa Lamanitacuna llujshimurca ñucanchi jahuaman ashtaca macananuj runacunahuan ñucanchipaj contra. Imaura paicuna llujshimurca espadahuan ña urmagrinajujpi, ñuca ñucapaj runacunata, picuna ñucahuan carca, jichushca pambaman tigrachircani.

19 Yalishca jipa Lamanitacuna ñucanchita ñapash catirca, imashpa paicuna ninanda munashca carca ñucanchita japishpa huañuchingapa; chaimanda jichushca pambacaman ñucachita catirca; yalircanchi Gidpaj, Teómnerpaj chaupita, shinashpa na tupai tucurcanchi Lamanitacunahuan.

20 Yalishca jipa Lamanitacuna yalishpa, nacashpa macanajuj runacuna yalishpa, Gid, Teómnerpash llujshimurca paicunapaj pacajushca pushtucunamanda, Lamanitacunapaj pacalla ricujcunata jarcarca llactaman ama tigrachun.

21 Yalishca jipa paicunata jarcashpa, llactaman calparca ricuj runacunapa jahuaman urmamurca picuna carca llactata huacaichingapa shaquishcacuna, shinashpa tucuchirca, llactatapash japirca.

22 Cunan caita rurashca carca imashpa Lamanitacuna saquirca tucuilla macanajuj runacuna, huaquinlla ricuj runacunalla na, saquichun jichushca pambaman apachun.

23 Yalishca jipa Gid, Teómnerpash cai laya chasquishca carca paicunapaj shinlli jarcashcacunata. Yalishca jipa jichushca pambapi ashtacata purishca jipa ñucanchi ñanda rircanchi Zarahemla alpaman.

24 Lamanitacuna ricushpa Zarahemla alpaman rinajujta, ninanda manllarishcacuna carca, paicunata tucuchingapa rurai cangamanda; chaimanda paicuna tigrai callarirca cutin jichushca pambaman, ari, huashaman chai ñandallata maita shamushcata.

25 Riqui, tutayarca, paicunapaj facha huasicunata shayachirca, Lamanitacunapaj capitángunapaj yali mandaj yarca Nefitacuna shaijushca canga paicunapaj purishcacunamanda; tucuilla macanajuj runacunata catishcanchi yashpa chaimanda yaitapash na yarca Manti llactata.

26 Cunan yalishca jipa tutayajpi, ñuca runacunata ama puñuchun mandarcani, ashtahuangari paicuna richun shuj ñanda Manti alpaman.

27 Ñucanchipaj cai tuta purimanda, riqui, cati punlla Lamanitacunamanda carupi carcanchi, shinashpa ñucanchi chayarcanchi paicunata ñaupashpa Manti llactaman.

28 Shina yalishca jipa, cai umachihuan ñucanchi Manti llactata japircanchi yahuarta na jichashpa.

29 Yalishca jipa Lamanitacunapaj macanajuj runacuna llacta ladoman chayamurca, ricurcapash paicunata tuparingapa prepararishca carcanchita, paicuna ninandapacha manllarirca, jatun manllaipash shamurca, shinashpa jichushca pambaman calparca.

30 Ari, yalishca jipa Lamanitacunapaj macanajuj runacuna tucui chai alpa pushtucunamanda calparca. Ashtahuangari riqui, paicunahuan apashpa rirca tauca huarmicunata, huahuacunatapash alpamanda.

31 Chai llactacuna maijan Lamanitacuna japishpa charinajushcacuna, tucuilla cai punllacunacaman ñucanchi charinajunchi; ñucanchi taitacuna, ñucanchi huarmicuna, ñucanchi huahuacunapash paicunapaj huasicunaman tigramunajun, tucui maijan prezucuna apai tucushcacuna, Lamanitacunahuan apai tucushcacunapash na tigramunajun.

32 Ashtahuangari riqui, ñucanchi macanajuj runacuna huaquinlla can jarcangapa shina jatun llactacunata, shina jatun charishcacunatapash.

33 Ashtahuangari riqui, ñucanchi Diospi confianchi pimi ñucanchiman cushca chai alpa jahuapi mishachun, shinashpa chai llactacunata chasquishcanchi, chai alpacunatapash, imacuna ñucanchipaj propio carca.

34 Cunan na yachanchichu imashpa mandajcuna ashtahuan runacunata na ñucanchiman cushca; chai runacuna picuna ñucanchipaman shamurca paicunapash na yachan imashpa ashtaca runacunata na chasquishcata.

35 Riqui, ñucanchi na yachanchichu ashtahuangari fracasarircanguichu imacha, chai alpa pushtucunaman macanajujcunata cacharcanguichichu imacha; shina cajpica, ñucanchipa munaica na canllu huasha rimangapa.

36 Na shina cajpica, riqui, gobiernopi chaupiricuna tianata manllanchi, chaimanda paicuna na ashtahuan runacunata cachamun ñucanchita ayudangapa; imashpa ñucanchi yachanchi paicuna ashtacapacha can ñucanchipaman cachamushcata yali.

37 Ashtahuangari, riqui, na imapash canllu—ñucanchi Diospi confianchi cacharichichun, masqui ñucanchi macanajuj runacuna na shinllicuna cajpipash, ari, ñucanchita cacharichinga ñucanchita napacha ricunayachijcunapaj maquicunamanda.

38 Riqui, cai can ishcai chunga iscun huata, ña tucurinapi, ñucanchi alpacunata charinajunchi; Lamanitacunapash Nefi alpaman calpashca.

39 Chai Ammón llactapuracunapaj churicuna, picunamanda shina alita parlashcani, ñucahuan can Manti llactapi; Apunchij paicunata shinllichishca, ari, huacaichishcapash espadahuan urmanamanda, shinashpa shuj almallapash na huañushcachu.

40 Ashtahuangari riqui, paicuna chasquishca tauca chugricunata; shinapash paicuna shinllicuna can chai libertadpi imahuan Dios ñucanchita librecunata rurashca; Apunchij paicunapaj Diosta punllan punllan yarinbacha; ari, paicuna pactachingapa atirin paipaj catichunbacha saquishcacunata, paipaj ricushpa chasquichinacunatapash, paipaj rurachunbacha saquishcacunatapash punllan punllan; paicunapaj fe shinlli can achil villashcacunapi ima shamunacunamanda.

41 Cunan, ñuca juyashca huauqui, Moroni, mañani Apunchij ñucanchi Dios, pimi ñucanchita jatun causachishca, librecunatapash rurashca, quiquinda paipaj ñaupapi punllan punllan huacaichichun; ari, mañani cai llactapurata shinllichichun, mishangacaman tucui charishcacunata chasquingacaman imata Lamanitacuna ñucanchita quichushca, imami carca ñucanchi minishtirishcapa. Cunan, riqui, ñucapa cartata tucuchini. Ñuca cani Helamán, Almapaj churi.