1 Cunan yalishca jipa ñuca Ammorón, jatun mandajpamanda shuj cartata chasquircani, nishpa ñuca macanajuipaj prezucunata maijangunata ñucanchi japishcacunata cujpica pai ñucanchiman Antipara llactata cunga.

2 Ashtahuangari ñuca jatun mandajman shuj cartata cacharcani, ñucanchi seguro cashcata ñucanchi macanajujcunahuan ali cajta Antipara llactata japingapa ñucanchi ushaihuan; prezucunata chai llactamanda cushpaca juizu illa cashun yanchi, ñucanchipaj prezucunata cushunmi ñucanchimanbash cujpi.

3 Ammorón ñuca cartata na nirca, pai prezucunata cungapa na munarca; chaimanda preparari callarircanchi Antipara llactapaj contra ringapa.

4 Ashtahuangari Antiparapaj llactapuracuna llactata saquirca, cutishuj llactacunaman calparca, imata japishca charinajurca, paicunata shinlliyachingapa; shina Antipara llacta ñucanchi maquicunapi urmarca.

5 Shina ricushpa chasquichijcunapaj reinado ishcai chunga pusaj huata tucurirca.

6 Yalishca jipa ishcai chunga iscun huata callaripi, chasquircanchi minishtirishca micunacunata, mirachinatapash ñucanchi macanajuj runacunapa, Zarahemla alpamanda, muyundi alpacunamandapash, sujta huaranga runacunata, ashtahuan sujta chunga Ammonitacunapaj churicunapash maijanguna shamurca paicunapaj huauquicunahuan tandanajungapa, ñucapaj ashalla tandanajushca ishcai chunga huarangacuna. Cunan riqui, ñucanchi shinllicuna carcanchi, ari, ñucanchiman apamushca minishtirishca micunacuna junda carcanchi.

7 Yalishca jipa cai carca ñucanchipa munai macanajuna Cumeni llactata huacaichichun churashca macanajuj runacunahuan.

8 Cunan riqui, ñuca ricuchisha canda ñucanchi minishtirishca munaicunata ñapash pactachircanchi; ari, ñucanchi shinlli macanajujcunahuan, nacashpa huaquin shinlli macanajujcunahuan, tuta muyurcanchi, Cumeni llactata, nara ñucanchi ashtaca micunacunata chasquishpallata.

9 Yalishca jipa ñucanchi llactata muyushpa tauca tutacunata causanajurcanchi; ashtahuangari ñucanchi espada jahuacunapi puñurcanchi, ricuj runacuna huacaichircapash, Lamanitacuna ama ñucanchi jahuaman shamui ushachun tutapi, ñucanchita huañuchingapa, caita tauca viaje munarca; ashtahuangari imashna tauca viaje paicuna munarca shinallata paicunapaj yahuar jichashca carca.

10 Shinapash paicunapaj micunacuna chayamurca, paicuna ña llactaman tuta yaicunajujpi. Ñucanchi Nefitacuna carcanchi, Lamanitacunapaj randi; chaimanda, paicunata japircanchi paicunapaj micunacunatapash.

11 Masqui Lamanitacuna cashna laya micunacunamanda jarcashca cashpapash, llactata charishpa catingapapacha munarca; chaimanda cai minishtirirca ñucanchi chai japishca micunacunata, Judeaman cachana, shinallata Zarahemla alpaman ñucanchi prezucunata.

12 Yalishca jipa na tauca punllacuna yalishca carca Lamanitacuna ayudamanda tucui shuyaita chingachi callarirca; chaimanda llactata ñucanchi maquicunapi saquirca; shina ñucanchi munashcacunata pactachircanchi Cumeni llactata chasquinapi.

13 Ashtahuangari yalishca jipa ñucanchi prezucuna ashtacapacha carca, masqui yupanapi taucapacha carca, munai na munai churashca carcanchi tucui ñucanchipaj macanajujcunata trabajachina huacaichingapa, nacashpa paicunata huañuipi churangapa.

14 Riqui, paicuna macanajungapa shayarijcuna taucapacha carca, macanajurca rumicunahuan, llasha caspicunahuan, imapash paicunapaj maquicunahuan japishcacunahuan, shinashpa ñucanchi huañuchircanchi ishcai huaranga yalita macanajuipaj prezucuna paicuna cushca jipa.

15 Chaimanda ñucanchipa cai minishtirishca tigrarca, paicunapaj causaicunata tucuchina, nacashpa paicunata ricuna, espada maqui, urai Zarahemla alpacaman; ñucanchi micunacunapash ñana yapalla carca ñucanchipaj propio llactapuracunapa, masqui Lamanitacunapata japishca cashpapash.

16 Cunan, cai shinlli caicunapi, cai tigrarca shinllipacha cuzas cai macanajuipaj prezucunata imata ruranata yachana; shina cajpipash, paicunata urai Zarahemla llactaman cachashun nircanchi; chaimanda ñucanchi ajllarcanchi huaquin ñucanchipaj runacunata, ñucanchipaj prezucunata ricuchun mandarcanchi Zarahemla llactaman uraiman richun.

17 Ashtahuangari yalishca jipa caya punlla paicuna tigramurca. Cunan riqui, prezucunamanda na tapurcanchi; riqui, Lamanitacuna ñucanchi jahuapi carca, chai horaspacha tigramurca ñucanchita huacaichingapa paicunapaj maquicunapi urmanamanda. Riqui, Ammorón cachamushcarca paicunata shinllichingapa mushuj minishtirishca micunacunata, ashtacapacha macanajuj runacunatapash.

18 Yalishca jipa chai runacuna picunata ñucanchi cacharcanchi prezucunahuan chai horaspacha chayamurca paicunata saquichingapa, ña ñucanchita mishagrinajujpi.

19 Ashtahuangari riqui, ñuca ashalla tandanajushca ishcai huaranga sujta chunga usharishcata macanajurca; ari, shinllicuna carca Lamanitacunapaj ñaupapi, huañuchishpa tucui maijanguna paicunata chimbapurajcunata.

20 Ñucanchipaj puchushca macanajuj runacuna Lamanitacunapaj ñaupapi ña yalichun saquigrinajurca, riqui, chai ishcai huaranga sujta chungacuna shinllicuna, na shaijujcunapash carca.

21 Ari, paicuna cazurca, ricurcapash rurangapa tucui mandashca shimicunata shinapacha tucuita; ari, paicunapaj femanda cai cashna paicunapa rurashca carca; Yarircani shimicunata imata paicuna nihuarca paicunapaj mamacuna yachachishcata.

22 Cunan riqui, caicuna ñuca churicuna carca, chai runacuna picunata ajllashca carca prezucunata ricuchun, picunamanda cai jatun mishaita charircanchi; paicunami Lamanitacunata misharca; chaimanda Manti llactacaman tigrachirca.

23 Ñucanchi Cumeni llactata charishpa catircanchi, na tucuilla tucuchishca carca espadahuan; shina cajpipash, ñucanchi jatun chingachicunata charircanchi.

24 Yalishca jipa Lamanitacuna calpashca jipa, ñapash mandarcani ñuca runacuna picuna chugrishcacunata japichun huañushcacunamanda, paicunapaj chugrishcacunata huatachishca cachun.

25 Yalishca jipa tiarca ishcai patsaj, ñuca ishcai huaranga sujta chungamanda, picuna huañushcashna carca yahuarta chingachimanda; shina cajpipash, Diospaj alicaimanda, ñucanchi jatun manllaripa, tucui macanajuj runacunapaj cushijuipapash, ni shuj alma na huañurca; ari, ni shuj almapash paicunapamanda tauca chugrinacunata na chasquishca carca.

26 Cunan, paicunapaj alchishpa charishcacuna tucui ñucanchipaj macanajuj runacunapa manllarij carca, ari, paicuna quishpirishca caimanda ñucanchipaj huauquicunapi huaranga huañushcacuna tiashpapash. Ñucanchi cunchipacha caita Diospaj juyaillapacha ushaiman, paicunapaj ninan femanda imapi crichun yachishca carca—tiajta shuj ali Dios, nipipash na dudajpi, paicuna alchishpa charishcacuna canga paipaj juyaillapacha ushaihuan.

27 Cunan cai carca fe picunamanda ñuca parlashcani; paicuna viñaj huambracuna can, paicunapaj yuyaicuna shinllicuna can, paicunapaj confianzata Diospi churan punllan punllan.

28 Cunan yalishca jipa ñucanchipaj chugrishca runacunata cuidashca jipa, ñucanchipaj huañushcacunata, Lamanitacunapaj huañushcacunatapash pambashcapash, caicuna tauca carca, riqui, Gidta tapuchircanchi prezucunamanda picunahuan urai ri callarishca carca Zarahemla alpaman.

29 Cunan Gid capitángunapaj yali mandaj carca cai tandanajushca macanajujcunapa pimi ajllai tucushca carca ricuchun urai alpacaman.

30 Cunan, caicuna can Gidpaj shimicuna imata nihuarca: Riqui, ñucanchi urai ri callarircanchi Zarahemla alpaman ñucanchi prezucunahuan. Yalishca jipa ñucanchi macanajuj runacunapaj tuparcanchi pacalla ricujcunata, maijanguna cachamushca carca Lamanitacunapaj causana pambata ricuchun.

31 Paicuna ñucanchita caparirca, nishpa—Riqui, Lamanitacunapaj macanajuj runacuna Cumeni llactaman rinajun; riqui, paicunapaj jahuapi urmagrin, ari, ñucanchi llactapuracunata tucuchinga.

32 Yalishca jipa ñucanchi prezucuna paicunapaj caparicunata uyarca, cai paicunata na manllaita japichirca; ñucanchita na cazuij callarirca.

33 Yalishca jipa paicunapaj na cazuimanda ñucanchipaj espadacunata paicunapaj jahuaman shamuchircanchi. Yalishca jipa paicuna ñucanchipaj espada jahuaman ñapash shamurca, imamanda, paicunamanda taucapacha huañushca carca; paicunamanda puchucuna ñanda pascashpa ñucachipamanda calparca.

34 Riqui, imaura paicuna calpajpi paicunata na japi usharcanchi, ñapash ri callarircanchi Cumeni llactaman; riqui, na jipayashpa chayarcanchi ñucanchi huauquicunata ayudangapa llactata alchishpa charingapa.

35 Riqui, cutin cacharichishca canchi ñucanchita napacha ricunayachijcunapaj maquicunamanda. Achilyachishca can ñucanchi Diospaj shuti; riqui, paimi ñucanchita cacharichishca; ari, cai jatun cuzasta ñucanchimanda rurashca.

36 Cunan yalishca jipa imaura ñuca, Helamán, Gidpaj cai shimicunata uyashca cashpa, ninan cushijui junda carcani Diospaj alicaimanda ñucanchita alchishpa charijpi, ama tucuilla tucuringapa; ari, confiani almacuna maijan huañushcacuna paicunapaj Diospi samangapa yaicushca cachun.