1 Nao, taem we Amon i bin stap gohed olsem ia nao blong tijim ol pipol blong Lamonae, bae yumi gobak long histri blong Eron mo ol brata blong hem; from afta we hem i aot long graon blong Midonae, Spirit i bin ^alidim hem i go long graon blong Nifae, i go kasem haos blong king, we i rulum evri graon ^bbe graon blong Ismael nomo hem i no rul long hem; mo hem, hem i papa blong Lamonae.

2 Mo i bin hapen se hem i go luk hem insaed long haos blong king, wetem ol brata blong hem, mo hem i bodaon long fes blong king, mo i talem long hem: “Luk, O king, mifala i ol brata blong Amon, we yu yu mekem mifala i ^akamaot long kalabus.

3 Mo nao, O king, sapos yu save lego mifala i laef, bae mifala i kam ol wokman blong yu.” Mo king i talem long olgeta se: “Girap, from bae mi lego yufala i stap laef, mo bae mi no letem se yufala i kam wokman blong mi; be bae mi askem strong se bae yufala i givhan long mi; from tingting blong mi i wari lelebet, from bigfala open hat blong brata blong yufala mo ol bigfala toktok blong brata blong yufala, Amon; mo mi wantem blong save stamba tingting from wanem hem i no kamaot long Midonae mo kam antap wetem yufala.”

4 Mo Eron i talem long king: “Luk, Spirit blong Lod i singaotem hem i go long narafala rod; hem i go long graon blong Ismael; blong tijim ol pipol blong Lamonae.”

5 Nao king i talem long olgeta se: “?Wanem nao samting ia we yufala i bin talem long saed blong Spirit blong Lod? Luk, hemia i samting we i stap mekem se mi wari.

6 Mo tu, ?wanem i samting ia we Amon i bin talem?—‘^aSapos yu sakem sin, bae Lod i sevem yu, mo sapos yu no sakem sin, bae Lod i sakemaot yu long las dei.’”

7 Mo Eron i ansa long hem mo i talem long hem: “?Yu biliv se i gat wan God?” Mo king i talem: “Mi save se Ol Man blong Amalekae oli talem se i gat wan God, mo mi letem olgeta blong bildim ol ples blong wosip, blong oli save kam tugeta blong wosipim hem. Mo nao sapos yu talem se i gat wan God, luk bae mi ^abiliv.”

8 Mo nao taem we Eron i harem samting ia, hat blong hem i stat blong gat glad, mo hem i talem: “Luk, i tru tumas se semmak olsem we yu stap laef, O king, i gat wan God i stap.”

9 Mo king i talem: “?I tru se God i ^aBigfala Spirit ia we i bin tekemaot ol papa blong yumi oli aot long graon blong Jerusalem?”

10 Mo Eron i talem long hem: “Yes, hem i Bigfala Spirit ia nao, mo hem i ^amekem evri samting, tugeta long heven mo long wol. ?Yu biliv long samting ia?”

11 Mo hem i talem: “Yes, mi biliv se Bigfala Spirit i bin mekem evri samting, mo mi wantem tumas blong yu talem long mi long saed blong evri samting ia, mo bae mi ^abiliv long ol toktok blong yu.”

12 Mo i bin hapen se taem we Eron i luk se king bae i save bilivim ol toktok blong hem, hem i ^aridim ol skripja long king, stat long taem we God i bin mekem Adam—olsem wanem God i bin mekem man folem pikja blong hem, mo we God ia i bin givim long hem ol komanmen, mo from fasin blong brekem loa, man i bin foldaon.

13 Mo Eron i bin eksplenem long hem ol skripja stat long taem blong ^amekem Adam, i eksplenem long hem taem man i bin foldaon, mo laef blong olgeta blong wol we oli stap long hem, mo tu, ^bplan blong fasin blong pemaot man, we God i bin mekem rere ^dstat long taem we wol i bin stat, tru long Kraes, blong eni man we bae oli biliv long nem blong hem.

14 Mo from we man i bin ^afoldaon, hem i no ^binaf blong kasem eni samting long hemwan; be ol safaring mo ded blong Kraes i bin ^dpem praes blong ol sin blong olgeta, tru long fet mo fasin blong sakem sin, mo i gat sam moa; mo we hem i brekem ol rop blong ded, blong mekem se ^egref bae i no save win, mo mekem se hop blong glori i winim harem nogud blong ded; mo Eron i bin eksplenem ol samting ia long king.

15 Mo i bin hapen se afta we Eron i eksplenem ol samting ia long hem, king i talem: “?^aWanem nao bae mi mekem blong mi save kasem laef ia we i no save finis we yu bin tokbaot? Yes, ?wanem nao bae mi mekem blong mi save ^bbon long God, mo mekem rabis spirit ia i nomo gat rus long jes blong mi, mo i kasem Spirit blong hem, blong mi save fulap long glad, blong hem i no save sakemaot mi long las dei?” Hem i talem: “Luk, bae mi lego ^devri samting we mi gat, yes, bae mi givim kingdom blong mi, blong mekem se mi save kasem bigfala glad ia.”

16 Be Eron i talem long hem: “Sapos yu ^awantem samting ia, sapos yu bodaon long fored blong God, yes, sapos yu sakem evri sin blong yu, mo yu bodaon long fored blong God, mo singaotem nem blong hem wetem fet, we yu bilivim strong se bae yu kasem, ale bae yu kasem ^bhop we yu wantem.”

17 Mo i bin hapen se taem we Eron i talem ol toktok ia, king i ^abodaon long fored blong Lod, long ol ni blong hem; yes, i go kasem we hem i foldaon i slip flat long graon mo i ^bsingaot laod, i talem:

18 “O God, Eron i bin talem long mi se i gat wan God; mo sapos i gat wan God, mo sapos yu yu God, plis soemaot yu long mi, mo bae mi sakem evri sin blong mi blong save yu, mo blong mekem se mi save girap long ded, mo yu sevem mi long las dei.” Mo nao taem we king i bin talem ol toktok ia, paoa blong God i bin nokem hem olsem se hem i ded.

19 Mo i bin hapen se ol wokman blong hem oli ron mo talem long kwin evri samting we i hapen long king. Mo hem i kam long king; mo taem we hem i luk hem i stap slip olsem se hem i ded, mo tu, Eron mo ol brata blong hem i stap stanap olsem se olgeta nao i mekem king i foldaon, nao hem i kros long olgeta, mo i talem long ol wokman blong hem, o ol wokman blong king, blong tekem olgeta mo kilim olgeta oli ded.

20 Nao ol wokman oli bin luk olsem wanem nao king i foldaon, from samting ia oli fraet blong putum han blong olgeta long Eron mo ol brata blong hem; mo oli bin askem long kwin, oli se: “?From wanem yu talem long mifala blong mifala i mas kilim ol man ia oli ded, taem luk, wan long olgeta i ^amoa strong bitim mifala evriwan? Ale, bae mifala i foldaon long fored blong olgeta.”

21 Nao taem we kwin i luk fraet blong ol wokman, hem tu i bin stat blong fraet tumas se bae samfala rabis samting i kam long hem. Mo hem i bin talem long ol wokman blong hem blong go singaotem ol pipol, blong oli save kilim Eron mo ol brata blong hem oli ded.

22 Nao taem we Eron i luk se kwin i stil gohed blong gat strongfala tingting blong kilim olgeta i ded, hem tu, i save se ol pipol oli gat wan hat we i strong, hem i fraet se bae wan grup blong pipol i kam tugeta, mo bae i gat wan bigfala rao, mo wan noes long medel blong ol pipol; from hemia hem i stretem han blong hem mo i mekem king i girap long graon, mo i talem long hem: “Stanap.” Mo hem i stanap long leg blong hem, we hem i kasembak paoa blong hem.

23 Nao oli bin mekem samting ia long fes blong kwin mo plante long ol wokman. Mo taem we oli luk samting ia, oli sapraes plante, mo oli stat blong fraet. Mo king i stanap fored, mo i stat blong ^atijim olgeta. Mo hem i tijim olgeta gogo, mekem se evriwan insaed long haos blong hem i ^bjenisim laef blong olgeta long Lod.

24 Nao i bin gat wan bigfala grup blong pipol we oli kam tugeta from oda blong kwin, mo oli stat blong gat bigfala komplen long medel blong olgeta bakegen from Eron mo ol brata blong hem.

25 Be king i stanap fored long olgeta mo i tijim olgeta. Mo i mekem olgeta oli nomo kros long Eron mo long olgeta we oli bin stap wetem hem.

26 Mo i bin hapen se taem we king i luk se ol pipol oli nomo kros, hem i mekem Eron mo ol brata blong hem oli stanap fored long medel blong grup blong pipol, mo mekem se oli save prijim trutok long olgeta.

27 Mo i bin hapen se king i sendem wan ^aofisol toktok i go long pablik long evri ples long graon, long evri pipol blong hem we oli stap long evri graon blong hem, we oli stap long evri eria raonabaot, we boda blong olgeta i go kasem solwota, long Is mo long Wes, mo we wan smolfala graon blong waelples i seraotem olgeta aot long graon blong ^bSarahemla, we i ron stat long solwota blong Is i go long solwota blong Wes, mo raonabaot long ol boda blong so blong solwota, mo ol boda blong waelples, we i bin stap long Not kolosap long graon blong Sarahemla, tru long ol boda blong Mantae, kolosap long hed blong reva blong Saedon, we i ron stat long Is i go long Wes—mo olsem ia nao Ol Man blong Leman mo Ol Man blong Nifae oli bin seraot.

28 Nao, pat blong Ol Man blong Leman we oli ^ales moa, oli stap long waelples, mo oli stap long ol tenet; mo oli stap olbaot long waelples long Wes saed long graon blong Nifae; yes, mo tu, long Wes saed blong graon blong Sarahemla, long ol boda kolosap long so blong solwota, mo long Wes long graon blong Nifae, long ples blong ol graon we i kam long ol fasfala papa blong olgeta, mo olsem ia nao boda i folem solwota, kolosap long so blong solwota.

29 Mo tu, i bin gat plante Man blong Leman long Is kolosap long so blong solwota, long ples we Ol Man blong Nifae oli pusum olgeta i go long hem. Mo olsem ia nao Ol Man blong Leman i kolosap raonem Ol Man blong Nifae; be Ol Man blong Nifae oli holemtaet evri pat blong Not blong graon we boda i stap long waelples, long ae blong reva blong Saedon, stat long Is kasem Wes, raonabaot long saed blong waelples; long Not, go kasem taem we oli kam long graon we oli singaotem ^aPlante.

30 Mo boda blong hem i bin stap long graon we oli singaotem ^aEmti, from hem i longwe tumas long Not mekem se i kam insaed long graon we ol pipol i bin stap long hem mo oli bin ded, we yumi bin tokbaot ol ^bbun blong olgeta, we ol pipol blong Sarahemla oli bin faenem, from hem i ^dfasfala ples we oli bin stap long hem.

31 Mo oli bin kamaot long ples ia i go antap long Saot blong waelples. Olsem ia nao oli bin singaotem graon we i stap long Not se ^aEmti, mo graon we i stap long Saot oli singaotem Plante, from ples ia we i wan waelples we i fulap long wael animol blong evri kaen, mo wan pat blong olgeta we oli bin stap long graon long Not oli kam blong faenem kaekae.

32 Mo nao, hem i ^alongwe olsem wan mo haf dei nomo blong wan Man blong Nifae blong wokbaot long boda blong Plante mo graon blong Emti, stat long Is i go long solwota blong Wes; mo olsem ia nao graon blong Nifae mo graon blong Sarahemla, kolosap wota i raonem tufala, i gat wan smol ^bpat blong graon we i stap bitwin graon blong Not mo graon blong Saot.

33 Mo i bin hapen se Ol Man blong Nifae oli stap long graon Plante, stat long solwota blong Is i go long solwota blong Wes, mo olsem ia nao Ol Man blong Nifae, long ol waes tingting blong olgeta, wetem ol gad blong olgeta mo ol ami blong olgeta, oli bin blokem Ol Man blong Leman oli stap long Saot, blong mekem se oli nomo save stap long graon long Not, blong mekem se oli no save rulum ol graon we oli stap long Not.

34 From hemia, Ol Man blong Leman oli nomo save holemtaet sam moa graon, be graon blong Nifae nomo, mo waelples raonabaot. Nao samting ia i bin waes tingting blong Ol Man blong Nifae—from Ol Man blong Leman i wan enemi long olgeta, oli no wantem se oli givim hadtaem long olgeta long evri saed, mo tu, oli mekem olsem blong oli save gat wan kantri we oli save ronwe i go long hem, sapos oli wantem.

35 Mo nao mi, afta we mi talem samting ia, mi gobak long histri blong Amon mo Eron, mo Omna mo Himnae, mo ol brata blong olgeta.