1 Mo nao i bin hapen se, ol boe blong Alma oli go aot long medel blong ol pipol, blong talemaot trutok long olgeta. Mo Alma tu, hemwan, i no save spel, mo tu, hem i go aot.

2 Nao bae mi nomo tokbaot ol prijing blong olgeta, be nomo se oli bin prijim toktok blong God, mo trutok, folem spirit blong profesi mo revelesen; mo oli prij folem ^atabu oda blong God we tru long hem nao God i singaotem olgeta.

3 Mo nao mi gobak long wan histri blong ol wo bitwin Ol Man blong Nifae mo Ol Man blong Leman, long namba-eitin yia blong rul blong ol jaj.

4 From luk, i bin hapen se, Ol ^aMan blong Soram oli kam Ol Man blong Leman; from hemia long stat blong namba-eitin yia blong ol pipol blong Ol Man blong Nifae, oli bin luk Ol Man blong Leman oli stap kam agensem olgeta; from hemia, oli mekem olgeta oli rere blong faet; yes, oli mekem ol ami blong olgeta oli kam tugeta long graon blong Jerson.

5 Mo i bin hapen se, Ol Man blong Leman oli kam wetem ol taosen blong olgeta; mo oli kam insaed long graon blong Antionam, we i graon blong Ol Man blong Soram; mo wan man we nem blong hem i Serahemna i lida blong olgeta.

6 Mo nao, from we Ol Man blong Amalekae oli moa nogud mo oli gat fasin, insaed long olgeta, blong save kilimded man i bitim Ol Man blong Leman, nao Serahemna i bin jusum ol jif kapten blong lidim Ol Man blong Leman, mo olgeta evriwan ia oli Ol Man blong Amalekae mo Ol Man blong Soram.

7 Nao hem i mekem samting ia blong holemtaet tingting blong no laekem Ol Man blong Nifae, blong hem i save putum olgeta blong mekem ol plan blong hem.

8 From luk, ol plan blong hem oli blong mekem Ol Man blong Leman oli kros long Ol Man blong Nifae; hem i mekem samting ia blong stilim bigfala paoa ova long olgeta, mo tu, blong hem i save kasem paoa ova long Ol Man blong Nifae blong mekem olgeta oli kam slef.

9 Mo nao plan blong Ol Man blong Nifae i blong sapotem ol graon blong olgeta, mo ol haos blong olgeta, mo ol ^awaef blong olgeta, mo ol pikinini blong olgeta, blong mekem se olgeta ia mo olgeta samting ia oli no save foldaon long ol han blong ol enemi blong olgeta; mo tu, blong oli save holemtaet ol raet blong olgeta mo ol spesel janis blong olgeta, yes, mo tu, ol ^bfridom blong olgeta, blong oli save wosipim God folem wanem oli wantem.

10 From oli bin save se sapos oli foldaon long ol han blong Ol Man blong Leman, bae eniwan we i ^awosipim God long ^bspirit mo tru fasin, tru God ia we i stap laef, bae Ol Man blong Leman oli kilimded olgeta.

11 Yes, mo tu, oli save strong fasin blong Ol Man blong Leman blong no laekem nating ol ^abrata blong olgeta, we oli ol pipol blong Antae-Nifae-Lihae, we oli singaotem olgeta ol pipol blong Amon—mo oli no wantem yusum ol tul blong faet, yes, oli bin mekem kavenan mo oli no wantem brekem—from hemia, sapos oli foldaon long ol han blong Ol Man blong Leman, bae oli kilim olgeta oli ded.

12 Mo Ol Man blong Nifae bae oli no letem se oli kilimded olgeta; from hemia, oli bin givim ol graon long olgeta blong oli yusum blong givim long laen blong olgeta.

13 Mo ol pipol blong Amon oli givim long Ol Man blong Nifae wan bigfala pat blong ol samting we oli gat blong sapotem ol ami blong olgeta; mekem se Ol Man blong Nifae oli mas faet agensem Ol Man blong Leman olgetawan bakegen, we oli bin wan grup blong Leman mo Lemyul, mo ol boe blong Ismael, mo ol pipol we oli bin lego Ol Man blong Nifae we oli blong Ol Man blong Amalekae, mo Ol Man blong Soram, mo ol ^alaen blong ol pris blong Noa.

14 Mo ol laen ia, oli plante, kolosap semmak, olsem Ol Man blong Nifae; mo olsem ia nao Ol Man blong Nifae oli mas faet agensem ol brata blong olgeta, go kasem taem we blad i ron.

15 Mo i bin hapen se, taem we ol ami blong Ol Man blong Leman oli kam tugeta long graon blong Antionam, luk, ol ami blong Ol Man blong Nifae oli bin rere blong mitim olgeta long graon blong Jerson.

16 Nao lida blong Ol Man blong Nifae, o man we oli bin jusum blong kam jif kapten long Ol Man blong Nifae—nao jif kapten i lidim evri ami blong Ol Man blong Nifae—mo nem blong hem i Moronae;

17 Mo Moronae i tekem lid long evri samting, mo i lukaotem wok blong lidim ol faet blong olgeta. Mo hem i gat twante mo faef yia nomo taem we oli jusum hem olsem jif kapten blong ol ami blong Ol Man blong Nifae.

18 Mo i bin hapen se, hem i mitim Ol Man blong Leman long ol boda blong Jerson, mo ol pipol blong hem oli holem ol naef blong faet, mo ol huknaef, mo evri kaen tul blong faet.

19 Mo taem we ol ami blong Ol Man blong Leman oli luk we ol pipol blong Nifae, o we Moronae, i mekem ol man blong hem oli rere wetem ol jesplet, mo ol hansil, yes, mo tu, ol sil blong blokem hed blong olgeta, mo tu, oli putum ol tik klos—

20 Nao ami blong Serahemna i no rere wetem eni samting olsem; oli gat ol naef blong faet mo ol huknaef blong olgeta nomo, ol bonara blong olgeta mo ol ara blong olgeta, mo ol ston blong olgeta mo ol sling blong olgeta; mo oli ^aneked be oli fasem skin blong animol raon long wes blong olgeta; yes, evriwan i neked, be Ol Man blong Soram mo Ol Man blong Amalekae oli no neked;

21 Be oli no gat ol jesplet, o ol sil—from hemia oli fraet tumas long ol ami blong Ol Man blong Nifae from ol klos blong faet blong olgeta, nomata we namba blong olgeta i moa bigwan bitim namba blong Ol Man blong Nifae.

22 Luk, nao i bin hapen, se oli fraet blong go agensem Ol Man blong Nifae long ol boda blong graon blong Jerson; from hemia, oli aot long graon blong Antionam oli go long waelples, mo oli tekem rod blong olgeta i go raonraon long waelples, longwe kolosap long ae blong reva blong Saedon, blong oli save kam insaed long graon blong Mantae mo tekem kontrol blong graon ia; from we oli no ting se ol ami blong Moronae bae oli save weaples oli go long hem.

23 Be i bin hapen se, taem we oli aot i go long waelples, Moronae i sendem ol spae long waelples blong oli wajem kamp blong olgeta; mo Moronae, tu, we i bin save long ol profesi blong Alma, i sendem sam man long Alma, blong hem i askem Lod ^aweaples ol ami blong Ol Man blong Nifae oli mas go blong difendem olgeta agensem Ol Man blong Leman.

24 Mo i bin hapen se toktok blong Lod i kam long Alma, mo Alma i talem long ol mesenja blong Moronae, se ol ami blong Ol Man blong Leman oli stap maj raonraon long waelples, blong oli save go long graon blong Mantae, blong oli save statem wan atak long ol pipol we oli no strong. Mo ol mesenja ia oli go mo givim mesej ia long Moronae.

25 Nao Moronae, we i livim wan pat blong ami blong hem long graon blong Jerson, from hem i fraet se wan pat blong Ol Man blong Leman bae oli kam long graon ia mo tekem kontrol long bigtaon ia, nao i tekem narafala pat blong ami blong hem mo maj i go insaed long graon blong Mantae.

26 Mo hem i mekem se evri pipol long eria blong graon ia bae oli kam tugeta blong faet agensem Ol Man blong Leman, blong ^adifendem ol graon blong olgeta, mo kantri blong olgeta, ol raet blong olgeta, mo ol fridom blong olgeta; from hemia, oli bin rere from taem we bae Ol Man blong Leman oli kam.

27 Mo i bin hapen se Moronae i mekem ol ami blong hem oli haed long vale we i stap kolosap long saed blong reva Saedon, we i stap long Wes blong reva Saedon long waelples.

28 Mo Moronae i putum ol spae raonabaot, blong mekem se hem i save wanem taem ol grup blong Ol Man blong Leman bae oli kam.

29 Mo nao, from we Moronae i save tingting blong Ol Man blong Leman, we oli tingting blong prapa spolem gud ol brata blong olgeta, o blong mekem olgeta oli kam slef blong oli save stanemap wan kingdom blong olgeta ova long evri graon;

30 Mo tu, from we hem i save se tingting blong Ol Man blong Nifae i blong holemtaet ol graon blong olgeta, mo ^afridom blong olgeta, mo jos blong olgeta nomo, nao hem i ting se i no wan sin blong hem i difendem olgeta wetem wan plan blong faet; from hemia, hem i faenemaot tru long ol spae blong hem wanem rod Ol Man blong Leman bae oli tekem.

31 From hemia, hem i seraotem ami blong hem mo hem i tekem wan grup i go long vale, mo hem i haedem olgeta long Is, mo long Saot blong hil Ripla;

32 Mo ol narafala, hem i haedem olgeta long vale long Wes, long Wes blong reva Saedon, mo hem i gohed blong tekem olgeta i go kasem ol boda blong graon blong Mantae.

33 Mo olsem ia nao, from hem i bin putum ami blong hem folem tingting blong hem, hem i rere blong mitim olgeta.

34 Mo i bin hapen se Ol Man blong Leman oli kam antap long Not saed blong hil, we wan grup blong ami blong Moronae i haed long hem.

35 Mo taem we Ol Man blong Leman oli go bitim hil Ripla, mo kam insaed long vale mo stat blong krosem reva Saedon, ami we i bin haed long Saot blong hil, we wan man we nem blong hem ^aLihae i lidim, mo hem i lidim ami blong hem i go aot mo oli raonem Ol Man blong Leman long Is biaen long olgeta.

36 Mo i bin hapen se Ol Man blong Leman, taem we oli luk Ol Man blong Nifae oli stap kam biaen long olgeta, oli tanem raon mo oli stat blong faet agensem ami blong Lihae.

37 Mo wok blong ded i stat long tufala saed tugeta, be i moa nogud long saed blong Ol Man blong Leman, from ol ^aneked bodi blong olgeta i open long ol hevi atak blong Ol Man blong Nifae wetem ol naef blong faet blong olgeta mo ol huknaef blong olgeta, we i givim ded kolosap long evri taem we oli sakem han.

38 Long semtaem, long narasaed, i gat wanwan man blong Ol Man blong Nifae, we i foldaon, tru long ol naef blong faet blong Ol Man blong Leman mo tru long blad we oli lusum, from oli blokem ol moa impoten pat blong bodi blong olgeta, o ol moa impoten pat blong bodi oli bin blokem long ol atak blong Ol Man blong Leman, wetem ol ^ajesplet blong olgeta, mo ol hansil, mo ol hat blong faet blong olgeta, mo olsem ia nao Ol Man blong Nifae oli wokem wok blong kilimded man long medel blong Ol Man blong Leman.

39 Mo i bin hapen se Ol Man blong Leman oli stat blong fraet, from bigfala fasin blong prapa spolem gud man long medel blong olgeta, go kasem taem we oli stat blong ronwe i go long reva Saedon.

40 Mo Lihae mo ol man blong hem oli folem olgeta; mo Lihae i ronem olgeta oli go daon long ol wota blong Saedon, mo oli krosem ol wota blong Saedon. Mo Lihae i holemtaet ol ami blong hem long saed blong reva Saedon blong oli no krosem.

41 Mo i bin hapen se Moronae mo ami blong hem i mitim Ol Man blong Leman long vale, long narafala saed blong reva Saedon, mo hem i stat blong foldaon long olgeta mo kilim olgeta oli ded.

42 Mo Ol Man blong Leman oli stat blong ronwe long fored blong olgeta, i go long graon blong Mantae; mo oli mitim bakegen ol ami blong Moronae.

43 Mo long taem ia Ol Man blong Leman oli faet moa strong; yes, oli neva save se Ol Man blong Leman oli save faet wetem bigfala strong paoa, mo wetem strong paoa long tingting olsem, no, oli no bin ting nating long hemia stat long stat.

44 Mo Ol ^aMan blong Soram mo Ol Man blong Amalekae oli olsem stamba tingting biaen long olgeta, we oli ol jif kapten mo ol lida blong olgeta, mo tru long Serahemna, we i jif kapten blong olgeta, o jif lida blong olgeta mo bos blong ami; yes, oli faet olsem ol dragon, mo han blong olgeta i kilimded plante long Ol Man blong Nifae, yes, from oli katem long tu plante long ol hat blong faet blong olgeta, mo oli bin sperem plante long ol jesplet blong olgeta, mo oli bin katemaot plante long ol han blong olgeta; mo olsem ia nao, Ol Man blong Leman oli bin prapa spolem gud olgeta wetem bigfala kros blong olgeta.

45 Be, Ol Man blong Nifae oli gat insperesen we i kam long wan wok we i moa gud, from oli no bin ^afaet blong kam king o from paoa, be oli stap faet from ol haos blong olgeta, mo ol ^bfridom blong olgeta, ol waef blong olgeta mo ol pikinini blong olgeta, mo evri samting blong olgeta, yes, from ol fasin blong wosip blong olgeta mo jos blong olgeta.

46 Mo oli mekem wanem we oli bin filim se hem i ^adiuti blong olgeta we oli nidim blong mekem long God blong olgeta; from we Lod i bin talem long olgeta, mo tu, long ol papa blong olgeta se: “^bFolem hamas we yufala i no rong from ^dfasfala atak, mo long nambatu taem, bae yufala i no letem han blong ol enemi blong yufala blong kilim yufala i ded.”

47 Mo bakegen, Lod i bin talem: “Bae yufala i ^adifendem ol famli blong yufala go kasem blad i ron.” From hemia, from stamba tingting ia Ol Man blong Nifae oli stap faet agensem Ol Man blong Leman, blong difendem olgeta bakegen, mo ol famli blong olgeta, mo ol graon blong olgeta, kantri blong olgeta, mo ol raet blong olgeta, mo relijin blong olgeta.

48 Mo i bin hapen se taem we ol man blong Moronae oli bin luk ol strong fasin blong no laekem olgeta nating, mo kros blong Ol Man blong Leman, kolosap bae oli muvbak mo ronwe long olgeta. Mo Moronae i luksave tingting blong olgeta, nao i sendem mo i leftemap hat blong olgeta wetem ol tingting ia—yes, ol tingting blong ol graon blong olgeta, fridom blong olgeta, yes, fridom blong oli aot long fasin blong stap slef.

49 Mo i bin hapen se, oli go agensem Ol Man blong Leman, mo oli ^aaskem wetem wan voes long Lod, God blong olgeta, from fridom blong olgeta mo fasin blong kam fri aot long slef.

50 Mo oli stat blong stanap agensem Ol Man blong Leman wetem paoa; mo long semfala aoa ia we oli bin askem long Lod from fridom blong olgeta, Ol Man blong Leman oli stat blong ronwe long olgeta; mo oli ronwe i go kasem ol wota blong Saedon.

51 Nao Ol Man blong Leman oli moa plante, yes, namba blong olgeta i moa bitim dabol long namba blong Ol Man blong Nifae; be, Ol Man blong Nifae oli ronemaot olgeta inaf blong mekem olgeta oli go long wan grup long vale, long saed kolosap long reva Saedon.

52 From hemia, ol ami blong Moronae oli raonem olgeta, yes, long tufala saed blong reva, from luk, long Is saed i gat Ol Man blong Lihae.

53 From hemia, taem we Serahemna i luk Ol Man blong Lihae long Is saed blong reva Saedon, mo ol ami blong Moronae long Wes saed blong reva Saedon, mekem se Ol Man blong Nifae oli raonem olgeta, nao oli fraet bigwan.

54 Nao Moronae, taem we hem i luk bigfala fraet blong olgeta, i givim oda long ol man blong hem se oli mas stop blong mekem blad blong olgeta i ron.