1 Mo i bin hapen se, taem we Amalekaea i tekem kingdom, hem i stat blong lidim hat blong Ol Man blong Leman i go agensem Ol Man blong Nifae; yes, hem i bin jusum ol man, we oli stap long ol taoa blong olgeta, mo toktok long Ol Man blong Leman blong oli agensem Ol Man blong Nifae.

2 Mo olsem ia nao hem i bin lidim hat blong olgeta agensem Ol Man blong Nifae, inaf blong mekem se long en blong nambanaentin yia blong rul blong ol jaj, hem i mekem ol plan blong hem oli kamtru kasem taem ia, yes, from we hem i kam king ova long Ol Man blong Leman, mo tu, hem i wantem rul ova long evri graon, yes, mo evri pipol we oli stap long graon, Ol Man blong Nifae wetem Ol Man blong Leman.

3 From hemia, hem i mekem plan blong hem i hapen, from hem i mekem hat blong Ol Man blong Leman i kam strong mo mekem ol tingting blong olgeta oli kam blaen, mo i tanem tingting blong olgeta blong oli kros, inaf blong mekem se hem i tekem i kam tugeta wan bigfala namba blong ami blong go faet agensem Ol Man blong Nifae.

4 From hem i gat wan strongfala tingting, from we namba blong ol pipol blong hem i bigwan tumas, blong winim Ol Man blong Nifae mo mekem olgeta oli kam slef.

5 Mo olsem ia nao hem i jusum ol ^ajif kapten blong Ol Man blong Soram, from we olgeta ia oli save gud moa long saed blong paoa blong Ol Man blong Nifae, mo ol ples blong haed blong olgeta, mo ol pat blong ol bigtaon blong olgeta we oli moa slak; from hemia, hem i jusum olgeta blong kam ol jif kapten ova long ol ami blong hem.

6 Mo i bin hapen se, oli tekem kamp blong olgeta, mo oli muv i go long graon blong Sarahemla long waelples.

7 Nao i bin hapen se taem we Amalekaea i mekem olsem ia nao, blong kasem paoa folem trik mo giaman, Moronae, long narasaed, i stap ^amekem rere ol tingting blong ol man blong stap fetful long Lod, God blong olgeta.

8 Yes, hem i mekem ol ami blong Ol Man blong Nifae oli kam strong moa, mo wokem ol smol haos blong ami, o ol ples blong haed; hem i wokem ol wol long graon mo i raonem olgeta blong putum ol ami blong hem insaed, mo tu, hem i wokem ol wol blong ston blong raonem olgeta, raonem ol bigtaon blong olgeta mo ol boda blong ol graon blong olgeta; yes, we i raonabaot long graon.

9 Mo long ol wol blong olgeta we oli moa slak, hem i putum wan moa bigfala namba blong ol man blong hem; mo olsem ia nao hem i bin sapotem mo mekem i kam strong moa ol graon we Ol Man blong Nifae oli stap long hem.

10 Mo olsem ia nao hem i stap rere blong ^asapotem fridom blong olgeta, ol graon blong olgeta, ol waef blong olgeta, mo ol pikinini blong olgeta, mo pis blong olgeta, mo blong mekem se oli save laef blong leftemap nem blong Lod, God blong olgeta, mo blong oli save holemtaet wanem we ol enemi blong olgeta i bin singaotem, stamba tingting blong Ol Kristin man.

11 Mo Moronae i wan strong man mo wan man we i gat paoa; hem i wan man we i save ^aandastanem samting i stret evriwan; yes, hem i wan man we i no glad blong mekem blad i ron; wan man we sol blong hem i glad blong luk kantri blong hem, mo ol brata blong hem oli stap fri mo gat fridom, mo oli no stap long kalabus o no stap slef;

12 Yes, hem i wan man we hat blong hem i solap long ol tangkyu long God blong hem, from ol plante janis mo ol blesing we God i bin givim long ol pipol blong hem; wan man we i bin wok tumas from ^agudlaef mo from sefti blong ol pipol blong hem.

13 Yes, mo hem i wan man we i stanap strong long fet long Kraes, mo hem i bin ^apromes wetem wan strong promes blong difendem ol pipol blong hem, ol raet blong hem, mo kantri blong hem, mo relijin blong hem, iven sapos hem i mas lusum blad blong hem.

14 Nao ol lida mo ol tija blong jos blong Ol Man blong Nifae oli bin tijim Ol Man blong Nifae blong difendem olgeta agensem ol enemi blong olgeta, mo tu, blong mekem blad i ron, sapos i gat nid; yes, mo tu, oli bin lanem blong ^aneva traem wan man, yes, mo blong neva leftemap naef blong faet be sapos nomo hem i agensem wan enemi, sapos nomo i blong sevem laef blong olgeta.

15 Mo hem i fet blong olgeta se taem we oli mekem olsem, God bae i mekem olgeta oli kam antap gud long graon, o long ol narafala toktok, sapos oli fetful blong stap obei ol komanmen blong God bae hem i mekem olgeta oli kam antap gud long graon; yes, wonem olgeta blong ronwe, o blong mekem rere blong faet, folem denja blong olgeta;

16 Mo tu, se God bae i talemaot long olgeta weaples oli mas go blong difendem olgeta agensem ol enemi blong olgeta, mo taem we oli mekem olsem, Lod bae i mekem olgeta oli kam fri; mo hemia fet blong Moronae, mo hat blong hem i glad long hemia; ^ai no long blad i ron be blong mekem gud fasin, blong lukaotem gud ol pipol blong hem, yes, blong obei ol komanmen blong God, yes, mo stap agensem nogud fasin.

17 Yes, i tru, i tru mi talem long yufala, sapos evri man oli bin stap, mo oli stap, mo bae oli save kam, olsem Moronae, luk, ol paoa blong hel bae oli go lus blong oltaem; yes, bambae ^adevel i neva gat paoa ova long hat blong ol pikinini blong ol man.

18 Luk, hem i wan man olsem Amon, boe blong Mosaea, yes, mo tu, ol narafala boe blong Mosaea, yes, mo tu, Alma mo ol boe blong hem, from olgeta evriwan ia, oli bin ol man blong God.

19 Nao luk, Hileman mo ol brata blong hem oli ol man blong wok blong ol pipol semmak olsem Moronae; from we oli bin prijim toktok blong God, mo oli bin baptaesem evri man we i sakem sin, eni man we bae i mekem folem ol toktok blong olgeta.

20 Mo olsem ia nao oli go aot, mo ol pipol oli ^aputum tingting blong olgeta i stap daon from ol toktok blong olgeta, inaf blong mekem se Lod i ^blaekem olgeta bigwan, mo olsem ia nao oli fri long ol faet mo ol rao long medel blong olgeta bakegen, yes, blong wan taem blong fo yia.

21 Be, olsem we mi bin talem, long en blong naentin yia, yes, i nomata long pis blong olgeta long medel blong olgeta bakegen, oli mas rao wetem ol brata blong olgeta, Ol Man blong Leman.

22 Yes, mo blong endem, ol faet blong olgeta oli neva stop, blong spes blong plante yia, wetem Ol Man blong Leman, i nomata we oli no wantem nating.

23 Nao, oli bin ^asore blong tekem ol tul blong faet agensem Ol Man blong Leman, from we oli no laekem blong mekem blad i ron; yes, mo i no hemia nomo—oli bin sore se olgeta nao oli bin mekem se plante long ol brata blong olgeta oli bin aot long wol ia i go long wan wol we i no save finis, mo oli no rere blong mitim God blong olgeta.

24 Be, oli no bin save letem olgeta oli ded, from se, ol ^awaef blong olgeta mo ol pikinini blong olgeta, bae Ol Man blong Leman bae oli kilimded olgeta, tru long wael fasin blong no kea blong olgeta we, wantaem, oli bin stap olsem ol brata blong olgeta, yes, mo oli bin ^bpulaot long jos blong olgeta, mo oli livim olgeta, mo oli go blong prapa spolem gud olgeta taem we oli joenem Ol Man blong Leman.

25 Yes, oli no save tekem se ol brata blong olgeta bae oli glad long blad blong Ol Man blong Nifae, sapos i gat sam we oli stap obei ol komanmen blong God, from promes blong Lod i bin olsem, se sapos oli obei ol komanmen blong hem bae oli kam antap long graon.