1 Mo nao i bin hapen long stat blong teti yia blong rul blong ol jaj, long nambatu dei long fas manis, Moronae i kasem wan leta long Hileman, we i tokbaot ol samting blong ol pipol long pat ia blong graon.

2 Mo hemia ol toktok we hem i bin raetem, i talem se: “Gudfala brata blong mi we mi lavem tumas, Moronae, long Lod mo long taem blong ol trabol blong faet blong yumi; luk, brata blong mi we mi lavem tumas, mi gat samting blong talem long yu long saed blong faet blong mifala long pat blong graon ia.

3 Luk, ^atu taosen long ol boe blong ol man we Amon i bin tekemaot long graon blong Nifae—nao yu save se olgeta ia oli ol laen blong Leman, we hem i fas bon blong papa blong yumi Lihae;

4 Nao mi no nidim blong talemaot long yu long saed blong ol kastom o fasin blong no gat bilif blong olgeta, from yu save long saed blong evri samting ia—

5 From hemia, hem i inaf long mi blong mi talem long yu se tu taosen long ol yang man ia oli bin tekem ol tul blong faet blong olgeta, mo oli bin wantem se mi stap olsem lida blong olgeta; mo mifala i kam blong difendem kantri blong mifala.

6 Mo nao yu save tu long saed blong ^akavenan we ol papa blong olgeta oli bin mekem, se bae oli no tekem ol tul blong faet blong olgeta agensem ol brata blong olgeta blong mekem blad i ron.

7 Be long twante mo sikis yia, taem we oli bin luk ol hadtaem blong yumi mo ol trabol blong yumi from olgeta, oli bin kam kolosap blong ^abrekem kavenan ia we oli bin mekem mo tekem ol tul blong faet blong olgeta blong lukaotem gud yumi.

8 Be mi no wantem letem olgeta blong bae oli brekem kavenan ia we oli bin mekem, from mi ting se God bae i mekem mifala i kam strong, inaf blong mekem se mifala i no mas safa moa, from we oli holem strong promes we oli bin mekem.

9 Be luk, hemia wan samting we yumi save gat bigfala glad long hem. From luk, long twante mo sikis yia, mi, Hileman, mi maj long fored blong ol tu taosen yang man ia i go long bigtaon blong Judia, blong helpem Antipas, man ia we yu bin jusum hem olsem wan lida ova long ol pipol long pat blong graon.

10 Mo mi joenem ol tu taosen boe blong mi, (from we oli inaf blong singaotem olgeta ol boe blong mi) blong go long ami blong Antipas, long paoa ia Antipas i bin glad tumas long hem; from luk, Ol Man blong Leman i bin katem namba blong ami blong hem i go daon, from ol ami blong olgeta oli kilimded wan big namba blong ol man blong yumi, we i mekem se mifala i mas krae sore.

11 Be, yumi save harem gud long poen ia, se oli bin ded from stamba tingting blong kantri blong olgeta mo blong God blong olgeta, yes, mo oli ^aglad.

12 Mo Ol Man blong Leman oli bin holemtaet plante prisena, olgeta ia evriwan oli ol jif kapten, from we oli no bin letem eni narafala man blong laef. Mo mifala i ting se oli stap naoia long taem ia long graon blong Nifae; hemia i olsem sapos oli no kilimded olgeta.

13 Mo nao hemia ol bigtaon we Ol Man blong Leman oli bin tekem folem fasin blong mekem blad blong plante long ol strong man blong yumi i ron:

14 Graon blong Mantae, o bigtaon blong Mantae, mo bigtaon blong Siesrom, mo bigtaon blong Kumenae, mo bigtaon blong Antipara.

15 Mo hemia ol bigtaon we oli bin tekem taem we mi kasem bigtaon blong Judia; mo mi faenem Antipas mo ol man blong hem oli wok wetem paoa blong olgeta blong mekem bigtaon ia i kam strong.

16 Yes, mo oli taed long bodi tugeta, mo tu, long saed blong spirit, from we oli bin faet strong long dei mo oli bin wok long naet blong holemtaet ol bigtaon blong olgeta; mo olsem ia nao oli safa long ol bigfala hadtaem blong evri kaen.

17 Mo nao oli tingting strong blong win long ples ia o blong ded; from hemia, yu save gat gudfala tingting se smol ami ia we mi tekem wetem mi, yes, olgeta boe ia blong mi, i givim olgeta bigfala hop mo plante glad.

18 Mo nao i bin hapen se taem we Ol Man blong Leman oli luk se Antipas i kasem wan bigfala paoa long ami blong hem, Amoron i fosem olgeta tru ol oda blong hem blong no kam agensem bigtaon blong Judia, o agensem mifala, blong faet.

19 Mo olsem ia nao Lod i bin givhan long mifala; from sapos oli kam agensem mifala long taem we mifala i no gat paoa nating, maet bae oli save smasem gud smol ami blong mifala; be olsem ia nao Lod i bin sevem mifala.

20 Amoron i givim oda long olgeta blong holemtaet ol bigtaon ia we oli bin tekem. Mo olsem ia nao twante mo sikis yia i bin en. Mo long stat blong twante mo seven yia mifala i mekem rere bigtaon blong mifala mo mifalawan blong lukaotem gud mifala.

21 Nao mifala i wantem se Ol Man blong Leman bae oli kam agensem mifala; from mifala i no wantem blong mekem wan atak agensem olgeta long ol ples blong olgeta we oli strong long hem.

22 Mo i bin hapen se mifala i kipim ol spae raonabaot, blong lukluk ol muv blong Ol Man blong Leman, blong mekem se bae oli no kam long mifala long naet o long dei blong mekem wan atak agensem ol narafala bigtaon blong yumi we oli stap long Not.

23 From mifala i save se insaed long olgeta bigtaon ia, oli no gat inaf paoa blong mitim olgeta; from hemia, mifala i wantem, sapos oli save pas kolosap long mifala, blong mifala i save atakem olgeta long biaen blong olgeta, mo olsem ia nao blong wokem olgeta long biaen long semtaem ol narafala man blong Nifae oli mitim olgeta long fored. Mifala i ting se mifala i save winim olgeta; be luk, mifala i harem nogud long wanem we mifala i wantem.

24 Olgeta i bin fraet blong pas kolosap long mifala wetem evri ami blong olgeta, o oli fraet blong mekem olsem wetem samfala nomo long ol ami blong olgeta, from we oli fraet se oli no strong inaf mo bae oli foldaon.

25 O oli no wantem blong maj i go daon agensem bigtaon blong Sarahemla; o oli no wantem blong krosem stamba blong Saedon, ova long bigtaon blong Nifaeha.

26 Mo olsem ia nao, wetem ol fos blong olgeta, oli bin tingting strong blong holemtaet ol bigtaon ia we oli bin tekem.

27 Mo nao i bin hapen long seken manis blong yia ia, ol papa blong ol tu taosen boe blong mi oli karem plante kaekae i kam long mifala.

28 Mo tu, oli sendem tu taosen man long Sarahemla oli kam long mifala. Mo olsem ia nao mitufala i bin rere wetem ten taosen man, mo ol kaekae blong olgeta, mo tu, blong ol waef blong olgeta mo blong ol pikinini blong olgeta.

29 Mo Ol Man blong Leman, olsem ia nao, taem oli luk ol ami blong mifala i kam bigwan evri dei, mo ol kaekae oli stap kam blong sapotem mifala, oli stat blong fraet, mo oli stat blong hariap, sapos hem i save hapen blong putum wan en blong wok blong mifala blong kasem ol kaekae mo paoa.

30 Nao taem we mitufala i luk se Ol Man blong Leman oli stat blong harem nogud long fasin ia, mitufala i wantem blong mekem wan plan we bae i wokaot long olgeta; from hemia, Antipas i givim oda se mi mas maj i go wetem ol smol boe blong mi i go long wan bigtaon we i stap kolosap, olsem se mifala i stap karem ol kaekae i go long wan bigtaon kolosap.

31 Mo blong mifala i maj kolosap long bigtaon blong Antipara, olsem se mifala i stap go long bigtaon we i bitim bigtaon ia, long ol boda kolosap long so blong solwota.

32 Mo i bin hapen se mifala i maj i go, olsem se mifala i karem ol kaekae blong mifala, blong go long bigtaon ia.

33 Mo i bin hapen se Antipas i maj i go wetem wan pat long ami blong hem, mo livim ol narafala we oli stap blong lukaot gud long bigtaon. Be hem i no bin maj i go kasem taem we mi mi go wetem smol ami blong mi, mo kam kolosap long bigtaon Antipara.

34 Mo nao, long bigtaon Antipara, ami blong Ol Man blong Leman we i strong olgeta i bin stap; yes, namba blong ami ia i bitim ol narawan.

35 Mo i bin hapen se taem we ol spae blong olgeta oli talemaot long olgeta, oli kam wetem ami blong olgeta mo maj agensem mifala.

36 Mo i bin hapen se mifala i ronwe long olgeta i go long Not. Mo olsem ia nao mifala i bin lidim i gowe ami blong Ol Man blong Leman we i strong olgeta;

37 Yes, i go longwe lelebet, inaf blong mekem se taem oli luk ami blong Antipas oli stap folem olgeta biaen wetem paoa blong olgeta, oli no tanem i go long raet o long lef, be oli gohed wetem maj blong olgeta long wan stret rod folem mifala; mo, olsem we mifala i tingting long hem, hem i tingting blong olgeta blong kilimded mifala bifo Antipas bae i kasem olgeta, mo hemia blong mekem se bae ol man blong mifala i no raonem olgeta.

38 Mo nao Antipas, i bin luk denja blong mifala, hem i spidim maj blong ami blong hem. Be luk, hem i naet; from hemia, oli no kasem mifala, o Antipas i no bin kasem olgeta; from hemia, mifala i kam blong pasem naet.

39 Mo i bin hapen se bifo deilaet i brok, luk, Ol Man blong Leman i stap ronem mifala. Nao mifala i no strong inaf blong faet agensem olgeta; yes, mi no save letem se ol smol boe blong mi oli foldaon long ol han blong olgeta, from hemia, mifala i gohed long maj blong mifala, mo mifala i tekem maj blong mifala i go long waelples.

40 Nao oli bin fraet blong tanem i go long raet o long lef, from oli fraet se bae mifala raonem olgeta; mo mi tu, mi no wantem blong tanem mi go long raet o lef from mi fraet se bae oli kasem mi, mo mifala i no save stanap agensem olgeta, be bae oli kilimded mifala, mo bae oli save ronwe; mo olsem ia nao mifala i ronwe long ful dei ia i go long waelples, go kasem taem we hem i tudak.

41 Mo i bin hapen se bakegen, taem we laet blong moning i kam, mifala i luk Ol Man blong Leman i stap kam long mifala, mo mifala i ronwe long olgeta.

42 Be i bin hapen se oli no ronem mifala longwe bifo oli stop; mo hem i long moning blong nambatri dei blong nambaseven manis.

43 Mo nao, sapos Antipas i bin kasem olgeta mifala i no save, be mi talem long ol man blong mi: ‘Luk, yumi i no save gud be maet oli stop long stamba tingting se bae yumi kam agensem olgeta, blong maet oli save kasem yumi long trik blong olgeta.

44 From hemia, wanem nao yufala i talem, ol boe blong mi, ?bae yufala i go agensem olgeta blong faet?’

45 Mo nao mi talem long yu, brata blong mi Moronae we mi lavem tumas, se neva mi luk ^afasin blong gat strong paoa long tingting we i bigwan olsem, no, i no gat long medel blong Ol Man blong Nifae.

46 From olsem we mi bin singaotem olgeta ol boe blong mi (from olgeta evriwan oli yang tumas) olsem ia oli bin talem long mi: ‘Papa, luk God blong yumi i stap wetem yumi, mo hem bae i no letem se bae yumi foldaon; ale, yumi go; bae yumi no kilimded ol brata blong yumi sapos oli livim yumi nomo i stap; from hemia, letem mifala i go, blong mekem se oli no save winim ami blong Antipas.’

47 Nao oli neva bin faet, be oli no fraet long ded; mo oli tingting moa long ^afridom blong ol papa blong olgeta bitim laef blong olgeta; yes, ol ^bmama blong olgeta oli bin tijim olgeta, se sapos oli no gat tu tingting, oli strong fulwan, nao God bae i sevem olgeta.

48 Mo oli talemaot long mi ol toktok blong ol mama blong olgeta, oli talem: ‘Mifala i no gat tu tingting, mifala i save fulwan se ol mama blong mifala oli bin save.’

49 Mo i bin hapen se mi gobak wetem ol tu taosen blong mi agensem Ol Man blong Leman ia we oli bin ronem mifala. Mo nao luk, ol ami blong Antipas oli kasem olgeta, mo wan rabis faet i stat.

50 Ami blong Antipas i bin taed, from longfala maj blong olgeta long sotfala spes blong taem, kolosap bae oli foldaon long ol han blong Ol Man blong Leman; mo sapos mi no bin gobak wetem tu taosen blong mi, bae oli save kasem plan blong olgeta.

51 From we Antipas i bin ded wetem naef blong faet, mo plante long ol lida blong hem, from taed blong olgeta, folem spid blong maj blong olgeta—from hemia, ol man blong Antipas, from we oli gat tingting we i fasfas from ded blong ol lida blong olgeta, oli bin stat blong ronwe long Ol Man blong Leman.

52 Mo i bin hapen se Ol Man blong Leman oli putum strong paoa long tingting blong olgeta, mo stat blong ronem olgeta; mo olsem ia nao Ol Man blong Leman oli stap ronem olgeta wetem bigfala paoa taem Hileman i kam long biaen blong olgeta wetem tu taosen blong hem, mo stat blong kilimded olgeta bigwan, inaf blong mekem se ful ami blong Ol Man blong Leman i stop mo tanem raon agensem Hileman.

53 Nao taem we ol pipol blong Antipas oli luk se Ol Man blong Leman oli tanem raon, oli mekem ol man blong olgeta oli kam tugeta mo oli kam bakegen long biaen blong Ol Man blong Leman.

54 Mo nao i bin hapen se, mifala, ol pipol blong Nifae, ol pipol blong Antipas, mo mi wetem ol tu taosen blong mi, i raonem Ol Man blong Leman, mo mifala i kilimded olgeta; yes, inaf blong mekem se oli fosem olgeta blong givim aot ol tul blong faet blong olgeta mo tu olgeta bakegen olsem ol prisena blong faet.

55 Mo nao i bin hapen se taem we oli givim olgetawan long mifala, luk, mi bin kaontem ol yang man ia we oli bin faet wetem mi, from mi fraet se plante long olgeta oli kilimded olgeta.

56 Be luk, long bigfala glad blong mi, i ^ano gat wan sol blong olgeta we i bin foldaon long graon; yes, mo oli faet olsem se i wetem paoa blong God; yes, i neva bin gat ol man we oli save bifo we oli faet wetem paoa blong merikel; mo wetem strong paoa olsem, oli bin atakem Ol Man blong Leman, mekem se oli mekem Ol Man blong Leman oli fraet; mo from samting ia Ol Man blong Leman oli givim olgetawan bakegen olsem ol prisena blong faet.

57 Mo from we mifala i no bin gat ples blong ol prisena blong mifala, blong mifala i save gad long olgeta blong holemtaet olgeta from ol ami blong Ol Man blong Leman, from hemia, mifala i sendem olgeta i go long graon blong Sarahemla, wetem wan pat long Ol Man blong Antipas we oli no bin kilimded olgeta wetem olgeta; mo ol narafala, mi tekem olgeta mo joenem olgeta wetem ol yang ^aMan blong Amon, we oli blong mi, mo mifala i bin tekem maj blong mifala i gobak long bigtaon blong Judia.