Buk blong Alma
Boe blong Alma

1 Nao i bin hapen se, long fas yia blong rul blong ol jaj ova long ol pipol blong Nifae, stat long tetaem ia i go, king Mosaea i ^afolem rod ia blong evri pipol blong wol, i bin faet long wan gudfala faet, i bin wokbaot long stret laef long fored blong God, i no bin livim wan man blong tekem ples blong hem, be hem i bin stanemap ol ^bloa mo ol pipol oli agri long ol loa ia. From hemia, oli mas folem ol loa we hem i bin mekem.

2 Mo i bin hapen se, long fas yia we Alma i stap rul long jea blong jajmen, oli tekem wan ^aman i kam long fored blong hem blong hem i jajem, wan man we i bigfala, mo oli save gud hem from bigfala paoa blong hem.

3 Mo hem i go olbaot long medel long ol pipol blong prij long olgeta samting ia we hem i ^asingaotem toktok blong God, we i go ^bagensem jos; i stap talemaot long ol pipol se evri pris mo evri tija oli sapos blong man i ^dsave gud olgeta mo oli ^eno mas wok wetem ol han blong olgeta be ol pipol oli mas lukaot long olgeta.

4 Mo hem i talemaot long ol pipol se evri kaen man bae Lod i sevem olgeta long las dei mo oli no nid blong fraet o seksek. Be blong oli save leftemap hed blong olgeta mo stap hapi from Lod i bin mekem evri man, mo i bin pemaot man tu. Mo long en, bae evri man i mas kasem laef we i no save finis.

5 Mo i bin hapen se, hem i tijim ol samting ia plante taem mekem se plante oli bilivim ol toktok blong hem, we i plante tumas, mekem se oli stat blong sapotem hem mo givim mane long hem.

6 Mo hem i stat blong kam antap long fasin blong gat hae tingting long hat blong hem mo blong werem ol klos we oli sas tumas, yes, mo tu, hem i statem blong stanemap wan ^ajos folem ol fasin blong ol prijing blong hem.

7 Mo i bin hapen se, taem hem i stap go blong prij long olgeta we oli bilivim toktok blong hem, hem i mitim wan man we i blong jos ia blong God, yes, we i wan tija blong olgeta. Mo hem i stat blong rao wetem hem wetem ol strongfala toktok, blong man ia i save lidim ol man blong jos oli go lus; be man ia i stanap strong agensem hem, hem i toktok strong long hem wetem ol ^atoktok blong God.

8 Nao, nem blong man i ^aGidion; mo hem nao i bin wan tul long ol han blong God blong mekem ol pipol blong Limhae oli kamaot long fasin blong stap slef.

9 Nao, from Gidion i stanap strong agensem hem wetem ol toktok blong God, hem i kros long Gidion mo i pulumaot naef blong faet blong hem mo i stat blong faetem hem. Nao, Gidion i olfala we i gat plante yia, from hemia, Gidion i no save stanap agensem ol atak blong man ia, nao, man ia i kilim Gidion ^ai ded wetem naef blong faet.

10 Mo ol man blong jos oli tekem man we i kilim Gidion i ded i go long fored blong Alma, blong Alma i ^ajajem hem folem ol loa we hem i bin brekem.

11 Mo i bin hapen se, hem i stanap long fored blong Alma mo hem i toktok strong blong sevem laef blong hemwan.

12 Be Alma i talem long hem: “Luk hemia fas taem we fasin blong ^agiaman pris i bin stat long medel blong olgeta pipol ia. Mo luk, yu no rong nomo long fasin blong giaman pris, be yu bin fosem samting ia wetem naef blong faet. Mo sapos oli fosem fasin blong giaman pris long medel blong olgeta pipol ia bae Lod i prapa spolem gud evri pipol.

13 Mo yu bin mekem blad blong wan stret mo gud man i ron, yes, wan man we i bin mekem plante gudfala samting long medel blong olgeta pipol ia. Mo sapos mifala i sevem laef blong yu bae blad blong hem i kam agensem mifala blong ^apembak wanem we i bin hapen long hem.

14 From hemia, mifala i ^ajajem yu blong yu mas ded folem loa we Mosaea, we i las king blong mifala, i bin givim long mifala; mo ol pipol ia oli luksave loa ia. From hemia, ol pipol ia oli mas folem loa.”

15 Mo i bin hapen se, oli tekem hem, mo nem blong hem i ^aNehor, mo oli tekem hem i go antap long hil Mantae. Mo long ples ia, oli mekem hem, o hem i talem, bitwin long medel blong heven mo wol, se wanem we hem i bin talemaot long olgeta pipol i go agensem toktok blong God; mo long ples ia hem i bin gotru long wan ^bded blong bigfala sem.

16 Be, samting ia i no bin stopem fasin blong giaman pris blong i go olbaot long olgeta ples long graon. From i gat plante we oli laekem olgeta samting nating blong wol, mo oli go prijim ol giaman doktrin. Mo oli mekem samting ia from oli wantem kasem olgeta ^arij samting mo respek blong man.

17 Be, oli fraet blong ^agiaman, sapos ol pipol oli save, from oli fraet long loa from olgeta we oli stap giaman bae oli panisim olgeta. From hemia, oli stap mekem i olsem se oli stap prij folem bilif blong olgeta be loa i no save gat paoa long bilif blong ^beni man.

18 Mo oli no stap tingting blong ^astil from oli fraet long loa, from oli stap panisim ol man we oli mekem olsem; mo oli fraet blong stil o kilimded wan man from man we i ^bkilimded wan man, oli panisim hem blong hem tu i ^dded.

19 Be i bin hapen se olgeta evriwan we i no blong jos ia blong God, oli stat blong givim hadtaem long olgeta we oli blong jos ia blong God, mo we oli bin tekem long olgeta nem blong Kraes.

20 Yes, oli givim hadtaem long olgeta, mo mekem tumas trabol long olgeta wetem evri kaen toktok, mo hemia from fasin blong olgeta blong gat tingting i stap daon, from ol tingting blong olgeta i no hae tumas long ae blong olgeta, mo from oli bin talemaot toktok blong God, wan wetem narawan, we i no gat ^amane mo we i no gat praes.

21 Naoia i gat wan loa we i strong tumas we i stap long medel blong ol man blong jos se, bae i no save gat wan man blong jos, we hem i girap mo ^agivim hadtaem long ol man we oli no blong jos, mo se bae i no save gat fasin blong givim hadtaem long medel blong olgeta bakegen.

22 Be, i gat plante long olgeta we oli bin stat blong gat fasin blong gat hae tingting, mo oli stat blong gat rao we i strong tumas wetem ol enemi blong olgeta go kasem we oli sakem han. Yes, oli stap faet wetem wanwan long olgeta wetem han blong olgeta.

23 Naoia, samting ia i tekem ples long nambatu yia we Alma i stap rul, mo samting ia i mekem plante hadtaem long jos; yes, samting ia i stamba blong plante tes wetem jos.

24 From hat blong fulap man oli kam strong, mo oli ^atekemaot nem blong olgeta, mekem se oli nomo tingbaot olgeta long medel blong ol pipol blong God. Mo tu, i bin gat plante we oli bin ^bkamaot long medel blong olgeta.

25 Naoia samting ia i wan bigfala tes long olgeta we oli stanap strong long fet; be, oli stanap strong mo oli no muvmuv, oli gohed blong obei ol komanmen blong God, mo wetem ^afasin blong save wet longtaem, oli gotru long hadtaem ia we i bin hip antap long olgeta.

26 Mo taem ol pris oli lego ^awok blong olgeta blong go prijim toktok blong God long ol pipol, ol pipol tu oli lego wok blong olgeta blong go harem toktok blong God. Mo taem pris i prijim toktok blong God long olgeta, olgeta evriwan oli gobak blong wok strong wetem strong tingting long ol wok blong olgeta; mo pris i no tekem se hem i moa hae long olgeta we oli kam lisin long hem, from man we i prij i no moa gud bitim man we i lisin. Mo tija i no moa gud bitim man we i stap lan; mo, olsem ia nao yumi luk se olgeta evriwan oli semmak, mo olgeta evriwan oli wok, evri man ^bfolem paoa blong hem.

27 Mo oli ^aserem wanem we oli gat, evriwan i serem folem hamas hem i gat, i go long olgeta we oli ^bpua, olgeta we oli gat nid, mo olgeta we oli sik, mo olgeta we oli gat hadtaem; mo oli no werem ol klos we oli sas tumas, be oli stil klin mo oli luk gud tumas.

28 Mo olsem ia nao oli stanemap ol wok blong jos; mo olsem ia nao oli stat bakegen blong gat pis, i nomata long ol hadtaem blong olgeta.

29 Mo nao, from jos i stanap strong, oli stat blong kam ^arij plante we i plante, oli gat evri mo eni kaen samting we oli nidim—oli gat plante grup blong animol mo ol buluk, mo evri kaen animol we oli fatfat gud, mo plante sid tu, mo plante gol, mo plante silva, mo plante gudgudfala samting, mo plante ^bsilik, mo kaliko we i tintin mo naes, mo evri kaen klos we i no flas.

30 Mo long fasin ia nao, long taem we oli stap ^akam antap gud, oli no sendembak olgeta we oli ^bneked, o olgeta we oli hanggri, o olgeta we oli tosta, o olgeta we oli sik, o olgeta we oli no fidim olgeta; mo oli no putum hat blong olgeta long ol rij samting; from hemia, oli glad blong givim samting long evriwan, ol olfala mo ol yangfala, olgeta long kalabus mo olgeta we oli fri, ol man mo ol woman, i nomata sapos oli blong jos o oli no blong jos. Oli mekem semmak long eni kaen man, ^dnomata huia i stap long nid.

31 Mo olsem ia nao oli bin kam antap gud mo oli kam rij plante, i bitim olgeta we oli no blong jos blong olgeta.

32 From olgeta ia we oli no blong jos blong olgeta, oli bin yusum fulap fasin blong mekem blak majik, mo fasin ia blong ^awosip long ol aedol o ^bfasin blong stap les, mo ^dfasin blong yusum toktok we oli krangke, mo ^efasin ia blong wantem samting blong narafala man mo rao; oli werem ol klos we oli sas tumas; oli ^fputum olgeta antap wetem hae tingting long olgeta bakegen; oli givim hadtaem, oli giaman, oli stil, oli yusum fos blong stil, oli stap tekem man blong slip wetem, mo oli kilim man i ded, mo mekem evri kaen fasin nogud; be, ol jaj oli yusum loa long olgeta evriwan we oli bin brekem loa, olsem we i bin posibol blong mekem.

33 Mo i bin hapen se, tru long fasin ia blong yusum loa long olgeta, evri man i kasem panismen folem samting we hem i bin mekem. Oli kam moa kwaet mo oli no traem blong mekem eni fasin nogud from oli fraet se man bae i save; from hemia, i bin gat plante pis long medel blong ol pipol blong Nifae kasem nambafaef yia blong rul blong ol jaj.