1 Mo i bin hapen se afta we hem i finis blong toktok long ol pipol, plante long olgeta oli bin biliv long ol toktok blong hem, mo oli stat blong sakem sin, mo blong stadi gud long ol ^askripja.

2 Be moa bigfala namba blong olgeta i wantem blong oli save kilim Alma mo Amulek i ded; from oli kros long Alma, from hem i ^atok stret mo klia long Siesrom; mo tu, oli talem se Amulek i ^bgiaman long olgeta, mo hem i toktok nogud agensem loa blong olgeta, mo tu, agensem ol loya mo ol jaj blong olgeta.

3 Mo tu, oli kros long Alma mo Amulek; mo from oli toktok long wan stret mo klia fasin agensem ol fasin nogud blong olgeta, nao oli lukaotem wan wei blong kilimded tufala long sikret.

4 Be i bin hapen se oli no mekem olsem; be oli tekem tufala mo fasem tufala wetem ol strong rop, mo oli tekem tufala i go stanap long fored blong jif jaj blong kantri.

5 Mo ol pipol oli bin go aot mo oli witnes agensem tufala—oli testifae se tufala i toktok nogud agensem loa, mo ol loya blong olgeta mo ol jaj blong kantri, mo tu, agensem evri pipol we oli stap long graon; mo tu, se Alma mo Amulek i bin testifae se i gat wan God nomo, mo se bae hem i sendem Pikinini blong hem i kam long medel blong ol pipol, be bae hem i no sevem olgeta; mo plante samting olsem ia nao, ol pipol oli bin testifae agensem Alma mo Amulek. Nao oli mekem samting ia long fored blong jif jaj blong kantri.

6 Mo i bin hapen se Siesrom i sapraes long ol toktok we oli bin talemaot; mo tu, hem i bin save long saed blong ol maen we oli blaen, we hem i bin mekem long ol pipol tru long ol giaman toktok blong hem; mo sol blong hem i stat blong ^aharem nogud tumas from hem i kam blong ^bluksave rong blong hem; yes, ol soa blong hel oli stat blong raonem hem.

7 Mo i bin hapen se hem i stat blong singaot long ol pipol, i talem: “Luk, mi mi ^arong, mo ol man ia oli no gat mak long fes blong God.” Mo hem i stat blong toktok strong from tufala stat long taem ia i go; be oli bin toktok agensem hem, oli talem se: “?Devel i stap long yu tu?” Mo oli bin spet long hem, mo oli ^bsendem hem aot long medel blong olgeta, mo tu, wetem olgeta evriwan we oli biliv long ol toktok we Alma mo Amulek i bin talemaot; mo oli sendemaot olgeta, mo oli sendem ol man blong sakem ston long olgeta.

8 Mo oli karem ol waef mo ol pikinini blong olgeta oli kam tugeta, mo olgeta evriwan we oli biliv o oli tijim olgeta blong biliv long toktok blong God, oli mekem se oli sakem olgeta i go long faea; mo tu, oli karem i kam ol histri blong olgeta we i gat ol tabu skripja, mo sakem olgeta i go long faea tu blong oli save bon, mo faea i prapa spolem i bonem gud olgeta.

9 Mo i bin hapen se oli tekem Alma mo Amulek, mo oli tekem tufala i go long ples blong kilim man i ded, blong oli save witnesem ded blong olgeta we faea i bonem olgeta.

10 Mo taem we Amulek i luk ol soa blong ol woman mo ol pikinini we faea i stap bonem olgeta, hem tu i harem i soa, mo hem i talem long Alma: “?Olsem wanem nao yumitu save witnesem rabis samting ia? Ale, bae yumitu stretem han blong yumitu, mo yusum ^apaoa blong God we i stap long yumitu, mo sevem olgeta long ol flem.”

11 Be Alma i talem long hem: “Spirit i holem mi i talem blong mi no mas stretem han blong mi; from luk, Lod i tekem olgeta long hem bakegen, long ^aglori; mo hem i letem se oli save mekem samting ia, o blong ol pipol oli save mekem samting ia long olgeta, folem strong hat blong olgeta, nao ol ^bjajmen we bae hem i yusum long olgeta long kros blong hem oli save stret; mo ^dblad blong ^eolgeta we oli no gat rong bae i stanap olsem wan witnes agensem olgeta, yes, mo blong i toktok strong agensem olgeta long las dei.”

12 Nao Amulek i talem long Alma: “Luk, maet bae oli bonem yumitu.”

13 Mo Alma i talem: “Letem i hapen folem tingting blong Lod. Be, luk, wok blong yumitu i no finis yet; from hemia bae oli no bonem yumitu.”

14 Nao i bin hapen se taem we ol bodi blong olgeta we oli sakem olgeta i go long faea i bin bon evriwan, mo tu, wetem ol histri we oli sakem long faea wetem olgeta, jif jaj blong kantri i bin kam mo i stanap long fored blong Alma mo Amulek, taem we oli fasem tufala i stap; mo hem i slapem tufala wetem han blong hem long fes blong tufala, mo i talem long tufala: “Afta wanem we yutufala i bin luk, ?bae yutufala i prij bakegen long ol pipol ia, se bae Lod i sakem olgeta i go long wan ^alek blong faea mo salfa?

15 Luk, yutufala i luk se yutufala i no gat paoa blong sevem olgeta ia we oli bin sakem olgeta i go long faea; mo tu, God i no bin sevem olgeta from oli blong fet blong yutufala.” Mo jaj i slapem tufala bakegen long fes blong tufala, mo i askem: “?Yutufala i gat wanem blong talem blong sapotem yutufala?”

16 Nao jaj ia i folem oda mo fet blong ^aNehor we i bin kilimded Gidion.

17 Mo i bin hapen se Alma mo Amulek tufala i no ansa long hem, mo hem i slapem tufala bakegen, mo i givim tufala i go long ol ofisa blong sakem tufala i go long kalabus.

18 Mo afta we oli sakem tufala i go long kalabus tri dei, plante ^aloya mo jaj, mo pris, mo tija, we bilif blong olgeta oli olsem Nehor, oli kam; mo oli kam insaed long kalabus blong luk tufala, mo oli askem ol kwestin long tufala long saed blong plante toktok; be tufala i no ansa nating long olgeta.

19 Mo i bin hapen se jaj i stanap long fored blong tufala, mo i talem: “?From wanem yutufala i no ansa long ol toktok blong ol pipol ia? ?Yutufala i no save se mi gat paoa blong sakem yutufala i go long ol flem?” Mo hem i bin givim oda long tufala blong toktok; be tufala i no ansa nating.

20 Mo i bin hapen se oli aot mo oli go long wanwan rod blong olgeta, be oli kambak bakegen long nekis dei; mo jaj tu i slapem tufala bakegen long fes blong tufala. Mo plante oli kam tu, mo oli slapem tufala, oli talem se: “?Bae yutufala i stanap bakegen mo jajem pipol ia, mo toktok agensem loa blong mifala? ?Sapos yutufala i gat wan bigfala paoa, from wanem yutufala i no mekem yutufala i ^akam fri?”

21 Mo oli bin talem plante samting olsem ia long tufala, oli kakae tut blong olgeta from tufala, mo oli spet long tufala, mo oli talem se: “?Bae mifala i luk olsem wanem taem bae devel i stap kontrolem mifala?”

22 Mo plante samting olsem, yes, oli bin talem evri kaen samting olsem long tufala; mo olsem ia nao oli jikim tufala blong plante dei. Mo oli holembak kaekae long tufala blong tufala i save hanggri, mo wota blong mekem se tufala i save tosta; mo tu, oli tekemaot ol klos blong tufala, mekem se tufala i neked; mo olsem ia nao oli fasem tufala wetem ol strong rop mo oli lokem tufala long kalabus.

23 Mo i bin hapen se afta we oli harem nogud olsem blong plante dei, (mo hem i long nambatwelef dei long nambaten manis, long nambaten yia blong rul blong ol jaj ova long ol pipol blong Nifae) we jif jaj we i rulum graon blong Amonaeha mo plante long ol tija blong olgeta mo ol loya blong olgeta, oli go long kalabus ia we oli fasem Alma mo Amulek wetem ol rop.

24 Mo jif jaj i stanap long fored blong tufala mo i slapem tufala bakegen, mo i talem long tufala: “Sapos yutufala i gat paoa blong God, mekem yutufala i go fri long ol rop ia, mo afta, bae mifala i biliv se Lod bae i kilimded ol pipol ia, hemia folem ol toktok blong yutufala.”

25 Mo i bin hapen se olgeta evriwan oli go mo slapem tufala, mo oli talem ol semfala toktok, gogo kasem laswan; mo taem we laswan i toktok long tufala, ^apaoa blong God i kam long Alma mo Amulek, mo tufala i girap mo stanap long leg blong tufala.

26 Mo Alma i bin prea strong, i talem se: “?Hamas taem moa bae mitufala i harem nogud long ol bigfala ^ahadtaem ia, O Lod? O Lod givim paoa long mitufala folem fet blong mitufala we i stap long Kraes, blong mitufala i go fri.” Mo tufala i brekem ol rop we oli bin fasem tufala wetem; mo taem we ol pipol oli luk samting ia, oli stat blong ronwe, from fraet blong ded i kasem olgeta.

27 Mo i bin hapen se fraet blong olgeta i bigwan tumas, mekem nao oli foldaon long graon, mo oli no kasem doa ia we i blong kamaot long ^akalabus; mo graon i seksek bigwan tumas, mo ol wol blong kalabus oli brokbrok long tu, mekem se oli foldaon long graon; mo jif jaj, mo ol loya, mo ol pris, mo ol tija, we oli bin slapem Alma mo Amulek, oli bin ded taem we ol wol blong kalabus oli foldaon.

28 Mo Alma mo Amulek i kamaot long kalabus, mo oli no kasem wan kil; from Lod i bin givim paoa long tufala, folem fet blong tufala we i stap long Kraes. Mo tufala i kamaot kwiktaem nomo long kalabus; mo ol rop oli ^akamaot long tufala; mo kalabus i foldaon long graon, wetem evri sol we i bin stap insaed long ol wol blong kalabus oli ded, be Alma mo Amulek nomo tufala i laef; mo tufala i kamaot kwiktaem nomo long bigtaon.

29 Nao taem we ol pipol oli bin harem wan bigfala noes oli ron i kam tugeta, long ol bigfala grup, blong save wanem i mekem samting ia; mo taem we oli luk Alma mo Amlulek i kamaot long kalabus, mo ol wol blong kalabus oli foldaon long graon, wan bigfala fraet i kasem olgeta, mo oli ronwe long Alma mo Amulek, olsem wan nanigot wetem yangfala blong hem we i ronwe long tu laeon; mo olsem ia nao oli bin ronwe long Alma mo Amulek.