1 Mo nao i bin hapen long twante mo naen yia blong ol jaj, se ^aAmoron i sendem wan mesenja long Moronae mo hem i wantem se hem i jenjenisim ol prisena.

2 Mo i bin hapen se Moronae i harem i glad tumas long tingting ia, from we hem i wantem ol kaekae we oli stap givim blong sapotem ol prisena we oli Ol Man blong Leman blong sapotem ol pipol blong hem nomo; mo tu, hem i wantem ol pipol blong hem blong mekem ami blong hem i kam strong moa.

3 Nao Ol Man blong Leman oli bin tekem plante woman mo ol pikinini, mo i no bin gat wan woman mo wan pikinini long olgeta prisena blong Moronae, o ol prisena we Moronae i bin tekem; from hemia, Moronae i bin putum wan plan blong karembak Ol Man blong Nifae prisena aot long Ol Man blong Leman we oli save karem.

4 From hemia, hem i raetem wan leta, mo i sendem leta ia wetem wokman blong Amoron, semfala wokman we i bin karem wan leta i go long Moronae. Nao hemia nao ol toktok we hem i raetem i go long Amoron, i talem:

5 “Luk, Amoron, mi raet long yufala smol long saed blong faet ia we yufala i lidim agensem ol man blong mi, o we ^abrata blong yu i lidim agensem olgeta, mo we yufala i wantem yet blong gohed wetem afta long ded blong hem.

6 Luk, bae mi talem long yufala long saed blong ^ajastis blong God, mo naef blong kros blong hem we i strong olgeta, we i stap hang antap long yufala sapos yufala i no sakem sin, mo karemaot ol ami blong yufala oli gobak long ol graon blong yufala, o graon we yufala i holemtaet, we hem i graon blong Nifae.

7 Yes, bae mi talem ol samting ia long yu sapos yu save harem mo mekem olgeta; yes, bae mi talem long yu long saed blong nogud ^ahel we i stap wet blong tekem ol ^bman blong kilim man i ded olsem we yu mo brata blong yu i stap mekem, sapos yufala i no sakem sin mo karemaot ol plan blong yufala blong kilim man i ded, mo gobak wetem ol ami blong yufala long ol graon blong yufala.

8 Be olsem we yufala i bin sakemaot ol samting ia bifo, mo yufala i faet agensem ol pipol blong Lod, hem i tru we mi save se bae yufala i mekem bakegen.

9 Mo nao luk, mifala i rere blong mitim yufala; yes, mo sapos yufala i no karemaot ol plan blong yufala, luk, bae yufala i pulum daon bigfala nogud kros blong God ia we yufala i bin sakemaot long yufala, go kasem we bae i prapa spolem gud yufala evriwan.

10 Be, olsem we Lod i stap laef, ol ami blong mifala bae oli kam agensem yufala sapos yufala i no kamaot, mo bae ded i kam visitim yufala i no longtaem, from we bae mifala i holemtaet ol bigtaon blong mifala mo ol graon blong mifala; yes, mo bae mifala i holemtaet relijin blong mifala mo stamba wok blong God blong mifala.

11 Be luk, mi ting se mi stap toktok long yu long saed blong ol samting ia blong nating nomo; o mi ting se yu yu wan ^apikinini blong hel; from hemia, bae mi finisim leta blong mi blong talem long yu se bae mi no jenjenisim ol prisena, be mi save mekem nomo sapos yufala i givim long mi wan man mo waef blong hem mo ol pikinini blong hem, blong mi givim wan prisena; sapos hemia ia i wanem bae yufala i mekem, bae mi jenjenisim ol prisena.

12 Mo luk, sapos yufala i no mekem samting ia, bae mi kam agensem yufala wetem ol ami blong mi; yes, bae mi mekem ol woman blong mi mo ol pikinini blong mi oli karem ol tul blong faet, mo bae mi kam agensem yufala, mo bae mi folem yufala i go insaed long graon blong yufala, we i fasfala graon blong ol bubu ^ablong mifala; yes, mo bae hem i blad from blad, yes, laef from laef; mo bae mi faet agensem yufala kasem taem we mi prapa spolem gud yufala we yufala i lus long fes blong wol.

13 Luk, mi stap long kros blong mi, mo tu, ol pipol blong mi; yufala i stap lukaotem blong kilimded mifala, mo mifala i stap lukaotem blong difendem mifala nomo. Be luk, sapos yufala i stap lukaotem blong prapa spolem gud mifala bakegen bae mifala i lukaotem blong prapa spolem gud yufala; yes, mo bae mifala i kam from graon blong mifala, fasfala graon blong ol bubu blong mifala.

14 Nao mi finisim leta blong mi. Mi mi Moronae; mi mi wan lida blong ol pipol blong Ol Man blong Nifae.”

15 Nao i bin hapen se, Amoron, taem hem i kasem leta ia, hem i kros; mo hem i raetem wan narafala leta i go long Moronae, mo hemia ol toktok we hem i raetem, hem i talem olsem:

16 “Mi mi Amoron, king blong Ol Man blong Leman; mi mi brata blong Amalekaea we yu bin ^akilim hem i ded. Luk, bae mi atakem yufala from blad blong hem, yes, bae mi kam agensem yufala wetem ol ami blong mi from we mi no fraet long ol woning blong yu.

17 From luk, ol papa blong yufala oli bin mekem rong long ol brata blong olgeta, inaf we i mekem se oli stilim olgeta long ^araet blong olgeta blong kasem gavman taem we raet ia i bin blong olgeta stret.

18 Mo nao luk, sapos bae yufala i putumdaon ol tul blong faet blong yufala, mo letem se olgeta we gavman i blong olgeta stret oli rulum yufala, afta bae mi mekem ol pipol blong mi oli putumdaon ol tul blong olgeta mo bae oli no faet bakegen.

19 Luk, yu bin talemaot plante woning agensem mi mo ol pipol blong mi; be luk, mifala i no fraet long ol woning blong yu.

20 Be, bae mi letem blong jenjenisim ol prisena folem olsem wanem we yu bin askem, wetem glad hat, blong mi save sevem kaekae blong mi blong ol man blong mi blong faet; mo bae mifala i mekem wan faet we bae i no save finis, kasem taem we Ol Man blong Nifae oli stap andanit long atoriti blong mifala o kasem taem we oli nomo gat nating long fes blong wol blong taem we i no save finis.

21 Mo long saed blong God ia we yu talem se mifala i bin sakemaot, luk, mifala i no save wan man olsem; mo tu, yufala i no save; be sapos we i gat wan man olsem, mifala i no luk se from wanem bae hem i no mekem mifala mo yufala tu.

22 Mo sapos we i gat wan devel mo wan hel, luk ?bae hem i no sendem yu blong go stap long ples ia wetem brata blong mi we yu bin kilim hem i ded, we yu talem se hem i bin go long wan ples olsem? Be luk ol samting ia oli nomata.

23 Mi mi Amoron, mo mi kamaot long laen blong ^aSoram, hem ia we ol papa blong yufala i bin fosem hem mo tekem hem i aot long Jerusalem.

24 Mo luk nao, mi mi wan Man blong Leman we mi no fraet; luk, faet ia i gohed blong givimbak ol rong blong olgeta, mo blong holemtaet mo blong kasem ol raet blong olgeta long gavman; mo mi endem leta blong mi we i go long Moronae.”