1 Mo nao i bin hapen se Moronae i no stop blong mekem rere from faet, o blong difendem ol pipol blong hem agensem Ol Man blong Leman; from we hem i mekem se ol ami blong hem oli stat long stat blong nambatwante yia blong rul blong ol jaj, blong bae oli stat digim mo hivimap ol hip blong graon raonaboat ol bigtaon, truaot long evri graon we i blong Ol Man blong Nifae.

2 Mo antap long ol hil blong graon ia, hem i bin mekem se bae i gat ol timba, yes, ol samting we oli wokem long timba we oli hae kasem longfala blong wan man, raonabaot ol bigtaon.

3 Mo hem i mekem se long ol timba ia bae i gat ol wud we i sap long en blong olgeta we oli putum raonem ol timba ia; mo oli strong mo hae.

4 Mo hem i mekem se oli bildim ol taoa, blong oli save lukluk daon ova long ol sap wud ia, mo hem i mekem se i gat ol sefples antap long ol taoa ia, blong mekem se ol ston mo ol ara blong Ol Man blong Leman bae oli givim kil long olgeta.

5 Mo oli mekem rere ol taoa ia blong oli save yusum antap blong hem blong sakem ol ston, folem wanem oli wantem mo folem paoa blong olgeta, mo oli save kilimded eni man we bae i traem blong kam kolosap long ol wol blong bigtaon.

6 Olsem ia nao Moronae i mekem rere ol bigtaon blong kam strong agensem ol enemi blong olgeta we bae oli kam, raonem evri bigtaon long evri graon.

7 Mo i bin hapen se Moronae i mekem se ol ami blong hem oli go long Is blong waelples; yes, mo oli go aot mo oli ronemaot Ol Man blong Leman we oli stap long Is blong waelples i go long ol graon blong olgeta, we oli stap long Saot blong graon blong Sarahemla.

8 Mo graon blong Nifae i stanap long wan stret rod stat long solwota stat long Is kasem Wes.

9 Mo i bin hapen se taem we Moronae i ronemaot Ol Man blong Leman aot long Is blong waelples, we i stap long Not blong ol graon we oli blong Ol Man blong Leman, hem i mekem se ol pipol we oli stap long graon blong Sarahemla mo long graon raonabaot oli mas go long Is long waelples, i go kasem ol boda we oli stap long so blong solwota, mo oli tekem ol graon ia blong olgeta.

10 Mo tu, hem i putum ol ami long Saot, long ol boda blong ol ples we oli blong olgeta, mo hem i mekem olgeta oli wokem ol strong ^awol blong mekem se ol ami mo ol pipol blong olgeta oli stap sef, oli no foldaon long ol han blong ol enemi blong olgeta.

11 Mo olsem ia nao hem i katemaot ol strong ples blong Ol Man blong Leman long Is blong waelples, yes, mo tu, long Wes, hem i mekem laen bitwin Ol Man blong Nifae mo Ol Man blong Leman oli kam strong, hemia bitwin graon blong Sarahemla mo graon blong Nifae, stat long solwota blong Wes, go kasem ae blong reva Saedon—Ol Man blong Nifae oli holem evri graon we oli stap long Not, yes, we oli ol graon we oli stap long Not blong graon blong Plante, folem wanem we oli wantem.

12 Olsem ia nao Moronae, wetem ol ami blong hem, we oli stap kam bigwan evri dei from tras ia se ol samting we hem i mekem bae i protektem olgeta, oli lukaotem blong katemaot paoa mo paoa blong rul blong Ol Man blong Leman long ol graon we oli blong Ol Man blong Nifae, blong mekem se oli no save gat paoa blong rul long ol graon blong Ol Man blong Nifae.

13 Mo i bin hapen se Ol Man blong Nifae oli statem fandesen blong wan bigtaon, mo oli singaotem nem blong bigtaon ia Moronae; mo i stap kolosap long solwota blong Is; mo i stap long Saot kolosap long laen blong ol graon we oli blong Ol Man blong Leman.

14 Mo tu, oli statem wan fandesen blong wan bigtaon bitwin bigtaon blong Moronae mo bigtaon blong Eron, we i joenem ol boda blong Eron mo Moronae; mo oli singaotem nem blong bigtaon ia, o graon ia, Nifaeha.

15 Mo tu, oli bin stat long sem yia ia blong wokem plante bigtaon long Not, wan bigtaon we oli wokem long wan defren fasin we oli singaotem Lihae, we i stap long Not kolosap long ol boda blong so blong solwota.

16 Mo olsem ia nao nambatwante yia i bin finis.

17 Mo long ol sakses ia ol pipol blong Nifae oli stap long stat blong nambatwante mo wan yia blong ol rul blong ol jaj ova long ol pipol blong Nifae.

18 Mo oli bin kam antap tumas, mo oli kam rij tumas; yes, mo oli kam plante mo oli kam strong long graon.

19 Mo olsem ia nao yumi luk we long ol wok blong Lod i gat sore mo oli stret, blong hem i mekem ol toktok blong hem oli hapen long ol pikinini blong ol man; yes, yumi save luk se ol toktok blong hem oli hapen, iven long taem naoia, we hem i talem long Lihae, mo talem:

20 “Yu mo ol pikinini blong yu, yufala i kasem blesing; mo bae oli kasem blesing, mo folem hamas bae oli obei ol komanmen blong mi, bae oli kam antap long graon. Be tingbaot, folem hamas we bae oli no obei ol komanmen blong mi, bae oli ^akatemaot olgeta long fes blong Lod.”

21 Mo yumi luk we ol promes ia, Lod i pruvum se oli tru, long ol pipol blong Nifae; from we ol kros mo ol rao blong olgeta nao, yes, ol fasin blong olgeta blong kilim man i ded, mo ol fasin blong olgeta blong stil long taem blong faet, ol fasin blong olgeta blong wosipim aedol, ol fasin blong olgeta blong stap slip olbaot wetem ol man mo wetem ol woman, mo ol rabis fasin blong olgeta, we i bin stap long medel blong olgeta, we i mekem ol wo oli kam long olgeta mo i mekem we oli prapa lus evriwan.

22 Mo olgeta we oli bin fetful blong stap obei ol komanmen blong Lod, Lod i mekem olgeta oli kam fri long evri taem, mo long narasaed ol taosen long ol nogud brata blong olgeta, Lod i bin mekem olgeta oli stap long fasin blong slef, o oli ded tru long naef blong faet, o oli kam slak from we oli lusum bilif, mo oli miks wetem Ol Man blong Leman.

23 Be luk i neva bin gat wan taem we i gat ^amoa glad long medel blong ol pipol blong Nifae, stat long ol dei blong Nifae, we i bitim glad ia long ol dei blong Moronae, yes, go kasem taem ia, long nambatwante mo wan yia blong rul blong ol jaj.

24 Mo i bin hapen se, taem we nambatwante mo tu yia blong rul blong ol jaj, hem tu, i finis wetem pis; yes, mo tu, nambatwante mo tri ia.

25 Mo i bin hapen se, long stat blong nambatwante mo fo yia blong rul blong ol jaj, bae i gat pis nomo long medel blong ol pipol blong Nifae sapos i no bin gat wan ^arao we i hapen long medel blong olgeta long saed blong graon blong Lihae, mo graon blong Morianton, we i joenem ol boda blong graon blong Lihae; tufala tugeta i stap kolosap long so blong solwota.

26 From luk, ol pipol we i holem graon blong Morianton, oli bin klemem wan pis graon blong Lihae; from hemia, i bin gat wan strong rao bitwin olgeta, inaf blong mekem se ol pipol blong Morianton oli tekem ol tul blong faet blong go agensem ol brata blong olgeta, mo oli tingting strong blong kilimded olgeta wetem naef blong faet.

27 Be luk, ol pipol we oli holem graon blong Lihae, oli ronwe i go long kamp blong Moronae, mo oli askem hem blong helpem olgeta; from luk oli no rong.

28 Mo i bin hapen se taem we ol pipol blong Morianton, we wan man we nem blong hem i Morianton i lidim olgeta, oli faenemaot se ol pipol blong Lihae oli ronwe i go long kamp blong Moronae, oli fraet tumas se ami blong Moronae bae i kam long olgeta mo prapa spolem gud olgeta.

29 From hemia, Morianton i putum long tingting blong olgeta blong oli mas ronwe i go long graon we i stap long Not we i gat ol bigfala wota long hem, mo tekem graon we i stap long Not.

30 Mo luk, plan ia blong olgeta bae oli mekem i hapen, (we bae i wan nogud samting) be luk, from we Morianton i wan man we i gat plante filing, nao hem i kros long wan long olgeta haosgel blong hem, mo hem i atakem mo kilim hem plante.

31 Mo i bin hapen se, woman ia i ronwe, mo i go long kamp blong Moronae, mo hem i talemaot long Moronae evri samting long saed blong samting ia, mo tu, long saed blong ol tingting blong olgeta blong ronwe i go long graon blong Not.

32 Nao luk, ol pipol we oli bin stap long graon blong Plante, o long narafala toktok Moronae, i fraet se bae oli folem ol toktok blong Morianton mo kam wan wetem ol man blong hem, mo olsem ia nao bae hem i tekem ol pat blong graon ia, we bae i kam wan fandesen blong ol samting we oli nogud tumas we bae i hapen long medel blong ol pipol blong Nifae, yes, we ol samting ia bae oli kam blong prapa spolem gud fasin blong ^afridom blong olgeta.

33 From hemia, Moronae i sendem wan ami, wetem kamp blong olgeta, blong go fastaem long ol man blong Morianton, blong stopem olgeta blong oli no go long graon blong Not.

34 Mo i bin hapen se, oli no go bitim olgeta kasem taem we oli kam long ol boda blong graon ^aEmti; mo long ples ia oli kasem olgeta, long smolfala graon we i go long saed blong solwota i go long graon blong Not, yes, long saed blong solwota, long Wes mo long Is.

35 Mo i bin hapen se ami we Moronae i sendem, we wan man we nem blong hem i Tiankum i lidim, oli mitim ol pipol blong Morianton; mo ol pipol blong Morianton oli stronghed tumas, (from we Morianton i bin tijim olgeta wetem ol fasin nogud blong hem mo ol swit toktok blong hem) mekem se wan faet i stat bitwin olgeta, long faet ia Tiankum i kilimded Morianton mo i winim ami blong hem, mo i tekem olgeta oli kam ol prisena, mo oli gobak long kamp blong Moronae. Mo olsem ia nao twante mo fo yia blong rul blong ol jaj ova long ol pipol blong Nifae i bin finis.

36 Mo olsem ia nao ol pipol blong Morianton oli bin kambak. Mo afta we oli mekem kavenan blong olgeta blong kipim pis, oli putumbak olgeta long graon blong Morianton, mo wan seremoni blong oli kam wan i hapen bitwin olgeta mo ol pipol blong Lihae; mo tu, oli putumbak ol pipol blong Lihae long ol graon blong olgeta.

37 Mo i bin hapen se, long sem yia ia pis i stap bakegen long ol pipol blong Nifae, Nifaeha, nambatu jif jaj, i ded, afta we hem i bin tekem jea blong jajmen wetem wan wokbaot we i stret gud evriwan long fored blong God.

38 Be, hem i no letem Alma blong holem ol histri mo ol samting ia we Alma mo ol papa blong hem oli bin tekem olsem samting we i tabu tumas; from hemia, Alma i givim olgeta long boe blong hem Hileman.

39 Luk, i bin hapen se voes blong ol pipol i jusum boe blong Nifaeha blong tekem jea blong jajmen, long ples blong papa blong hem; yes, voes blong ol pipol i jusum hem blong kam jif jaj mo gavna ova long ol pipol, wetem wan strong promes mo tabu odinens blong jaj long stret mo gud fasin, mo blong kipim pis mo fridom blong ol pipol, mo blong letem long olgeta ol tabu raet blong wosipim Lod, God blong olgeta, yes, blong sapotem mo holemtaet stamba tingting blong God long ol dei blong hem, mo tekem ol nogud man oli go long jastis folem nogud fasin blong olgeta.

40 Nao luk, nem blong hem i Pahoran. Mo Pahoran i tekem jea blong papa blong hem, mo hem i statem rul blong hem long en blong twante mo fo yia, ova long ol pipol blong Nifae.