1 Mo i bin hapen se nambateti mo fo yia i bin pas i go, mo tu, nambateti mo faef, mo luk ol disaepol blong Jisas oli bin mekem wan jos ia blong Kraes long evri graon we oli stap raonabaot. Mo olgeta evriwan we oli bin kam long olgeta, mo oli bin tru blong sakem ol sin blong olgeta, oli bin kasem baptaes long nem blong Jisas; mo oli kasem Tabu Spirit tu.

2 Mo i bin hapen long nambateti mo sikis yia, evri pipol oli bin jenisim laef i go long Lod, long ful fes blong graon, Ol Man blong Nifae tugeta wetem Ol Man blong Leman, mo i no bin gat ol faet mo ol rao long medel blong olgeta, mo evri man i gat gudfala fasin, wan wetem narawan.

3 Mo oli bin serem ^aevri samting long medel blong olgeta; from hemia, i no gat ol rijman mo puaman, ol slef mo man we i fri, be oli mekem evriwan oli kam fri, mo oli tekem sam pat blong presen blong heven.

4 Mo i bin hapen se nambateti mo seven yia i pas i go tu, mo pis i gohed blong stap long graon.

5 Mo i bin gat ol bigfala mo gudfala wok we i hapen tru long ol disaepol blong Jisas, inaf blong mekem se oli bin mekem ol sikman oli ^akam oraet bakegen, mo oli mekem ol dedman oli girap bakegen mo oli bin mekem olgeta we oli no save wokbaot blong oli wokbaot, mo olgeta we oli blaen blong save luk, mo olgeta we sora blong olgeta i fas blong save harem samting, mo evri kaen ^bmerikel oli bin mekem long medel blong ol pikinini blong ol man; mo i no gat wan samting we oli mekem ol merikel tru long hem, be tru long nem blong Jisas nomo.

6 Mo olsem ia nao nambateti mo eit yia i bin pas i go, mo tu, nambateti mo naen, mo nambafoti mo wan, mo nambafoti mo tu, yes, go kasem nambafoti mo naen yia i bin pas i go, mo tu, nambafifti mo wan, mo nambafifti mo tu; yes, mo tu, go kasem nambafifti mo naen yia i bin pas i go.

7 Mo Lod i bin mekem olgeta oli kam antap gud tumas long graon; yes, inaf blong mekem se oli bildim ol bigtaon bakegen long ol ples we ol bigtaon oli bin bon long faea.

8 Yes, mo tu, bigfala ^abigtaon ia Sarahemla, oli mekem se oli bildim bakegen.

9 Be i bin gat plante bigtaon we i ^adraon, mo ol wota oli kam antap long ples blong olgeta; from hemia, ol bigtaon ia oli no save mekem gud olgeta.

10 Mo nao, luk, i bin hapen se ol pipol blong Nifae oli kam strong, mo oli kam plante kwiktaem tumas, mo oli kam wan pipol we oli ^anaes tumas mo gudfala.

11 Mo oli bin kasem mared, mo oli letem olgeta blong kasem mared, mo oli kasem blesing folem plante promes we Lod i mekem long olgeta.

12 Mo oli no bin wokbaot bakegen folem ol ^awok mo ol odinens blong ^bloa blong Moses; be oli wokbaot folem ol komanmen we oli bin kasem long Lod blong olgeta mo God blong olgeta, oli gohed blong ^dlivim kakae mo prea, mo blong kam tugeta plante blong prea tugeta mo blong harem toktok blong Lod.

13 Mo i bin hapen se i no gat eni rao long medel blong evri pipol, long ful graon; be i bin gat ol bigfala merikel we i hapen long medel blong ol disaepol blong Jisas.

14 Mo i bin hapen se seventi mo wan yia i pas i go, mo tu, seventi mo tu yia, yes, mo blong endem, go kasem seventi mo naen yia i pas i go; yes, mo tu, wan handred yia i pas i go, mo ol disaepol blong Jisas, we hem i bin jusum, olgeta evriwan oli go long ^aparadaes blong God, be i no ^btrifala ia we bae oli stap nomo; mo i bin gat ol narafala ^ddisaepol we oli ^eodenem olgeta long ples blong olgeta; mo tu, plante long jeneresen ia oli ded.

15 Mo i bin hapen se i ^ano gat eni rao long graon, from lav blong God we i bin stap insaed long hat blong ol pipol.

16 Mo i ^ano bin gat ol tingting blong wantem samting blong narafala man, o ol rao, o ol faet, o ol fasin blong slip olbaot, o ol giaman, o ol fasin blong kilim man i ded, o eni kaen fasin blong gat ^brabis tingting; mo i tru we i no save gat wan pipol we i moa ^dhapi long medel blong evri pipol we han blong God i mekem olgeta.

17 I no bin gat stilman, o ol man blong kilim man i ded, mo tu, i no bin gat Ol Man blong Leman, o eni kaen pipol we oli singaotem Ol Man blong _; be oli stap ^awan; oli ol pikinini blong Kraes, mo oli gat raet long kingdom blong God.

18 !Mo hamas nao oli bin kasem blesing! From Lod i bin blesem olgeta long evri wok blong olgeta; yes, mo tu, Lod i blesem olgeta mo mekem olgeta oli kam antap gud kasem wan handred mo ten yia i pas i go; mo fasfala jeneresen afta Kraes i bin pas i go, mo i no gat eni rao long ful graon.

19 Mo i bin hapen se Nifae, hem we i kipim lasfala histri ia, (mo hem i kipim hemia long ol ^abuk blong Nifae) i ded, mo boe blong hem Amos i kipim hemia long ples blong hem; mo hem i kipim hemia long ol buk blong Nifae tu.

20 Mo hem i bin kipim hemia blong eiti mo fo yia, mo i gat pis i stap yet long graon, be wan smol pat blong ol pipol nomo we oli go agensem jos, mo oli tekem long olgeta nem blong Ol Man blong Leman; from hemia, oli stat blong gat Ol Man blong Leman bakegen long graon.

21 Mo i bin hapen se Amos i ded tu, (mo hemia i wan handred mo naenti mo fo yia afta we Kraes i bin kam) mo boe blong hem Amos i kipim histri ia long ples blong hem; mo hem tu i kipim hemia long ol buk blong Nifae; mo oli bin raetem hemia tu insaed long buk blong Nifae, we i buk ia.

22 Mo i bin hapen se tu handred yia i bin pas i go; mo evriwan long nambatu jeneresen i bin ded be wan smol namba nomo.

23 Mo nao mi, Momon, i wantem se yufala i mas save se ol pipol oli bin kam plante, inaf blong mekem se oli seraot long fes blong ful graon, mo se oli kam rij tumas, from oli kam antap gud tru long Kraes.

24 Mo nao, long tu handred mo wan yia ia, i bin stat blong gat long medel blong olgeta, olgeta we oli leftemap olgeta long ^ahae tingting, olsem we oli stap putum ol klos we oli sas tumas, mo evri kaen naes perel, mo long ol naes samting blong wol ia.

25 Mo stat long tetaem ia i go, oli nomo ^aserem ol samting blong olgeta mo ol kaekae blong olgeta long medel blong olgeta.

26 Mo oli stat blong seraot long ol grup; mo oli stat blong bildimap ol ^ajos blong olgeta bakegen blong ^bkasem mane, mo oli stat blong tanem baksaed long tru jos ia blong Kraes.

27 Mo i bin hapen se taem we tu handred mo ten yia i pas i go, i gat plante jos long graon; yes, i gat plante jos we oli talemaot se oli save Kraes, be stil oli ^atanem baksaed long bigfala pat blong gospel blong hem, inaf blong mekem se oli akseptem evri kaen blong fasin nogud, mo oli bin givim ol samting we oli tabu long olgeta we oli ^bblokem olgeta from we oli no klin inaf.

28 Mo ^ajos ia i bin gro bigwan tumas from nogud fasin, mo from paoa blong Setan we i stap kontrolem hat blong olgeta.

29 Mo bakegen, i bin gat wan narafala jos we i tanem baksaed long Kraes; mo oli ^agivim hadtaem long tru jos ia blong Kraes, from tingting blong olgeta i stap daon mo from bilif blong olgeta long Kraes; mo oli luk daon long olgeta ia from ol plante merikel we oli hapen long medel blong olgeta.

30 From hemia, oli bin yusum paoa mo raet ova long ol disaepol blong Jisas we oli bin stastap wetem olgeta, mo oli sakem olgeta i go long ^akalabus; be tru long paoa blong toktok blong God, we i stap long olgeta, ol kalabus oli brokbrok long tu, mo oli go mo mekem ol bigfala merikel long medel blong olgeta.

31 Be, mo i nomata long evri merikel ia, ol pipol oli mekem hat blong olgeta i kam strong, mo oli lukaotem blong kilim olgeta oli ded, we i semmak olsem we Ol Jiu long Jerusalem oli lukaotem blong kilim Jisas i ded, folem toktok blong hem.

32 Mo oli sakem olgeta insaed long ol ^abigfala oven blong ^bfaea, mo olgeta ia oli kamaot mo oli no kasem wan kil.

33 Mo oli bin sakem olgeta tu long ol ^ahol blong ol wael animol, mo olgeta trifala ia oli pleiplei wetem ol wael animol olsem wan pikinini wetem wan smol sipsip; mo olgeta trifala ia oli kamaot long medel blong olgeta, oli no kasem wan kil.

34 Be, ol pipol oli mekem hat blong olgeta i kam strong, from plante pris mo ol giaman profet oli bin lidim olgeta, blong bildimap plante jos, mo blong mekem evri kaen nogud fasin. Mo oli ^akilim ol pipol blong Jisas; be ol pipol blong Jisas i no kilimbak olgeta bakegen. Mo olsem ia nao oli bin kam slak from we oli lusum bilif mo oli gat fasin nogud, yia afta yia, i go kasem we tu handred mo teti yia i bin pas i go.

35 Mo nao i bin hapen se long yia ia, yes, long tu handred mo teti mo wan yia, i gat wan bigfala seraot long medel blong ol pipol.

36 Mo i bin hapen se long yia ia, wan grup blong pipol i girap, we oli singaotem olgeta Ol Man blong Nifae, mo olgeta oli ol tru man blong biliv long Kraes; mo long medel blong olgeta i gat olgeta we Ol Man blong Leman i bin singaotem olgeta—Ol Man blong Jekob, mo Ol Man blong Josef, mo Ol Man blong Soram;

37 From hemia, ol tru man blong biliv long Kraes, mo ol tru man blong wosip blong Kraes, (long medel blong olgeta i bin gat ^aolgeta tri disaepol blong Jisas we bae oli stastap) oli bin singaotem olgeta Ol Man blong Nifae, mo Ol Man blong Jekob, mo Ol Man blong Josef, mo Ol Man blong Soram.

38 Mo i bin hapen se olgeta we oli sakemaot gospel, oli singaotem olgeta Ol Man blong Leman, mo Ol Man blong Lemyul, mo Ol Man blong Ismael; mo oli no kam slak from oli bin lusum bilif, be from we oli bin wantem ^ago agensem gospel blong Kraes; mo oli tijim ol pikinini blong olgeta se oli no mas biliv, semmak olsem we, stat long stat, ol papa blong olgeta oli bin kam slak.

39 Mo i bin from fasin nogud mo rabis sin blong ol papa blong olgeta, semmak olsem we i bin stap long stat. Mo oli ^atijim olgeta blong no laekem ol pikinini blong God, semmak olsem oli tijim Ol Man blong Leman blong no laekem ol pikinini blong Nifae stat long stat.

40 Mo i bin hapen se tu handred mo foti mo fo yia i bin pas i go, mo ol laef blong ol pipol i bin olsem ia nao. Mo pat ia blong pipol we oli gat moa fasin nogud, oli kam strong, mo oli kam plante moa, i bitim ol pipol blong God we oli bin stap.

41 Mo oli bin gohed yet blong bildimap ol jos long olgeta bakegen, mo flasem olgeta wetem evri kaen gud mo sas samting. Mo olsem ia nao tu handred mo fifti yia i bin pas i go, mo tu, tu handred mo siksti yia.

42 Mo i bin hapen se pat ia blong pipol we oli gat fasin nogud i stat bakegen blong bildimap ol sikret strong promes mo ol ^agrup blong Gadianton.

43 Mo tu, ol pipol we oli bin singaotem olgeta ol pipol blong Nifae oli stat blong gat hae tingting insaed long hat blong olgeta, from ol rij samting blong olgeta we i tumas, mo oli kam blong ting hae semmak olsem ol brata blong olgeta, Ol Man blong Leman.

44 Mo stat long tetaem ia, ol disaepol oli stat blong harem nogud from ol ^asin blong wol.

45 Mo i bin hapen se taem we tri handred yia i pas i go, ol pipol blong Nifae tugeta wetem Ol Man blong Leman oli kam nogud tumas, wan olsem narawan.

46 Mo i bin hapen se ol stilman blong Gadianton oli go olbaot long evri ples long fes blong ful graon; mo i no gat wan we i stret mo gud, be ol disaepol blong Jisas nomo. Mo ol gol mo silva, oli bin hivimap plante i stap, mo oli mekem bisnis long evri kaen bisnis.

47 Mo i bin hapen se afta we tri handred mo faef yia i bin pas i go, (mo ol pipol oli gohed yet blong stap long fasin nogud) Amos i ded; mo brata blong hem, Amaron, i kipim histri long ples blong hem.

48 Mo i bin hapen se taem we tri handred mo twante yia i bin pas i go, Amaron, from Tabu Spirit i lidim hem, i haedem ol ^ahistri we oli tabu—yes, iven evri tabu histri, we oli bin pasem i kam daon long wan jeneresen i go long narafala jeneresen, we oli tabu—go kasem nambatri handred mo twante yia afta we Kraes i bin kam.

49 Mo hem i bin haedem olgeta wetem Lod, blong mekem se oli save ^akam bakegen long smol haf blong laen blong Jekob we oli laef yet, folem ol profesi mo ol promes blong Lod. Mo olsem ia nao i en blong histri blong Amaron.