1 Mo i bin hapen long nambaleven manis blong nambanaentin yia, long nambaten dei blong manis, Ol Man blong Nifae oli luk ol ami blong Ol Man blong Leman oli stap kam long graon blong Amonaeha.

2 Mo luk, oli bin wokem bigtaon ia bakegen, mo Moronae i putum wan ami long ol boda blong bigtaon, mo oli hivimap graon raonabaot blong blokem ol ara mo ol ston blong Ol Man blong Leman; from luk, oli faet wetem ol ston mo ol ara.

3 Luk, mi bin talem se bigtaon blong ^aAmonaeha oli bildim bakegen. Mi talem long yufala, yes, se oli bin bildim pat blong hem nomo bakegen; mo from Ol Man blong Leman oli bin prapa spolem gud long wan taem, from nogud fasin blong ol pipol, oli ting se bae i kam wan isi ples blong oli tekem bakegen.

4 Be luk, harem nogud blong olgeta i bigwan tumas; from luk, Ol Man blong Nifae oli digim wan hip blong graon raonem olgeta, we i hae tumas we Ol Man blong Leman oli no save sakem ol ston blong olgeta mo ol ara blong olgeta long olgeta blong kilim olgeta, mo tu, oli no save kam long olgeta, be tru long get nomo.

5 Nao long taem ia ol jif kapten blong Ol Man blong Leman oli sapraes tumas, from waes tingting blong Ol Man blong Nifae blong mekem rere ol sef ples blong olgeta.

6 Nao ol lida blong Ol Man blong Leman oli ting se, from bigfala namba blong olgeta, yes, oli ting se bae janis blong olgeta blong kam long olgeta olsem we oli bin mekem bifo; yes, mo tu, oli bin mekem olgeta oli rere wetem ol sil, mo wetem ol jesplet blong olgeta; mo tu, oli bin mekem olgeta oli rere wetem ol klos we oli mekem wetem ol skin, yes, ol klos we oli tik bigwan blong blokem neked bodi blong olgeta.

7 Mo from we olsem ia nao oli bin rere, oli ting se bae oli winim olgeta isi nomo mo mekem ol brata blong olgeta i go long yok blong slef, o kilimded mo kilimded olgeta nogud folem wanem oli glad blong mekem.

8 Be luk, long sapraes blong olgeta we i bigwan olgeta, oli bin ^arere long olgeta, long wan fasin we ol pikinini blong Lihae oli neva bin gat save long hem. Nao oli rere from Ol Man blong Leman, blong faet folem ol fasin blong oda blong Moronae.

9 Mo i bin hapen se Ol Man blong Leman, o Ol Man blong Amalekaea, oli sapraes tumas long fasin blong olgeta blong rere blong faet.

10 Nao, sapos king Amalekaea i kam daon long ^agraon blong Nifae, long fored blong ami blong hem, maet bae hem i mekem Ol Man blong Leman oli atakem Ol Man blong Nifae long bigtaon blong Amonaeha; from luk, hem i no wari long blad blong ol pipol blong hem.

11 Be luk, Amalekaea i no kam daon hemwan blong faet. Mo luk, ol jif kapten blong hem oli fraet blong atakem Ol Man blong Nifae long bigtaon blong Amonaeha, from Moronae i jenisim ol fasin blong wok wetem Ol Man blong Nifae, inaf blong mekem se Ol Man blong Leman oli harem nogud from ol ples blong haed blong olgeta mo oli no save go agensem olgeta.

12 From hemia, oli gobak long waelples, mo oli tekem kamp blong olgeta mo maj i go long graon blong Noa, from oli ting se ples ia nao i nekis ples we i gud blong oli go agensem Ol Man blong Nifae.

13 From we oli no bin save se Moronae i mekem ples i kam strong moa, o hem i bildim ol ^astrong haos blong ami blong oli sef long hem, blong evri bigtaon long evri graon raonabaot; from hemia, oli maj i go long graon blong Noa wetem wan strongfala tingting; yes, ol jif kapten blong olgeta oli kam fored mo mekem wan strong promes se bae oli prapa spolem gud ol man blong bigtaon ia.

14 Be luk, long sapraes blong olgeta, bigtaon blong Noa, we bifo i bin wan ples we i no strong, we naoia, folem ol wei blong Moronae, i kam strong, yes, i go bitim paoa blong bigtaon blong Amonaeha.

15 Mo nao luk, hemia i bin waes tingting long Moronae; from hem i ting se bae oli fraet long bigtaon blong Amonaeha; mo olsem we bigtaon blong Noa, long bifo, i bin pat blong graon we i slak, from hemia bae oli maj i go long ples ia blong faet; mo olsem ia nao oli mekem folem ol tingting blong hem.

16 Mo luk, Moronae i jusum Lihae blong kam jif kapten ova long ol man blong bigtaon ia; mo hem i ^asem Lihae ia we i bin faet wetem Ol Man blong Leman long vale long Is blong reva Saedon.

17 Mo nao luk, i bin hapen se, taem we Ol Man blong Leman oli faenemaot se Lihae i gat paoa blong bigtaon ia, oli harem nogud bakegen, from oli fraet tumas long Lihae; be ol jif kapten blong olgeta oli bin promes wetem wan strong promes blong atakem bigtaon ia; from hemia, oli kam wetem ol ami blong olgeta.

18 Nao luk, Ol Man blong Leman oli no save go insaed long ol strong sef haos blong ami, be oli mas go insaed tru long get nomo, from hip graon we oli bin wokem i hae tumas, mo dip blong hol ia we oli bin digim raonem i dip, be long get nomo i no olsem.

19 Mo olsem ia nao Ol Man blong Nifae oli bin rere blong prapa spolem gud olgeta we bae oli traem blong klaem antap blong go insaed long sef haos blong ami long eni narafala rod, long fasin blong sakem ol ston mo ol ara long olgeta.

20 Olsem ia nao oli bin rere, yes, wan grup blong ol man blong olgeta we oli strong olgeta, wetem ol naef blong faet blong olgeta mo ol sling blong olgeta, blong kilim daon olgeta we bae oli traem blong go insaed long sef haos tru long get; mo olsem ia nao oli bin rere blong difendem olgeta agensem Ol Man blong Leman.

21 Mo i bin hapen se ol kapten blong Ol Man blong Leman oli tekem ol ami blong olgeta oli kam long fored blong get, mo oli stat blong faet wetem Ol Man blong Nifae, blong go insaed long sef haos; be luk, oli pusum olgeta i gobak plante taem, mekem se oli kilimded olgeta we namba blong dedman i bigwan tumas.

22 Nao taem we oli faenemaot se oli no save kasem paoa ova long Ol Man blong Nifae long rod blong get, oli stat blong digim ol wol blong graon blong olgeta blong mekem se oli save mekem wan rod blong ol ami blong olgeta oli go, blong oli gat sem janis blong faet; be luk, taem oli stap traem mekem hemia, oli bin smasem gud olgeta wetem ol ston mo ol ara we oli bin sakem long olgeta; mo oli no stap fulumap ol hol blong olgeta wetem graon, be oli bin fulumap kasem wan mak wetem ol ded bodi blong olgeta mo ol bodi blong olgeta we oli kasem kil.

23 Mo olsem ia nao Ol Man blong Nifae oli gat evri paoa ova long ol enemi blong olgeta; mo olsem ia nao Ol Man blong Leman oli traem blong prapa spolem gud evriwan Ol Man blong Nifae kasem taem we oli kilimded evri jif kapten blong olgeta; yes, wetem moa bitim wan taosen long Ol Man blong Leman we oli kilimded; be semtaem, long narasaed, i no bin gat wan sol blong Ol Man blong Nifae we i ded.

24 I gat raonabaot fifti we oli kasem kil, we ol ara blong Ol Man blong Leman i kasem olgeta tru long rod blong get, be oli bin blokem ol bodi blong olgeta wetem ol sil blong olgeta, mo ol jesplet blong olgeta, mo ol hat blong faet blong olgeta, mekem se ol kil blong olgeta i stap long ol leg blong olgeta, plante long ol kil ia oli nogud tumas.

25 Mo i bin hapen se, taem we Ol Man blong Leman oli luk se oli kilimded evri jif kapten blong olgeta, oli ronwe i go long waelples. Mo i hapen se, oli gobak long graon blong Nifae, blong talemaot long king blong olgeta, Amalekaea, we i bin bon olsem wan man blong Nifae, abaot bigfala lus blong olgeta.

26 Mo i bin hapen se hem i kros tumas long ol pipol blong hem, from hem i no kasem tingting blong hem long Ol Man blong Nifae; hem i no putum olgeta andap long yok blong slef.

27 Yes, hem i kros tumas, mo hem i ^asakem wan strong nogud tok agensem God, mo tu, agensem Moronae, hem i mekem wan ^bstrong promes blong dring blad blong hem; mo hemia from we Moronae i stap obei ol komanmen blong God blong mekem rere blong putum ol pipol blong hem oli stap sef.

28 Mo i bin hapen se long narasaed, ol pipol blong Nifae oli talem ^atangkyu long Lod, God blong olgeta, from paoa blong hem we i bigwan tumas blong mekem olgeta oli kam fri long ol enemi blong olgeta.

29 Mo olsem ia nao nambanaentin yia blong rul blong ol jaj ova long ol pipol blong Nifae i bin finis.

30 Yes, mo i bin gat pis oltaem long medel blong olgeta, mo i gat bigfala sakses long jos from fasin we oli gat blong obei mo wok strong blong mekem folem toktok blong God, we oli bin harem long Hileman, mo Siblon, mo Korianton, mo Amon mo ol brata blong hem, yes, mo tru long olgeta evriwan we oli bin odenem olgeta tru long ^atabu oda blong God, we oli bin kasem baptaes afta we oli sakem sin, mo oli sendem olgeta i go blong prij long medel blong ol pipol.