1 Nao i bin hapen se taem we Moronae i kasem leta ia hem i kros moa, from we hem i save se Amoron i gat wan stret save blong ^agiaman blong hem; yes, hem i save se Amoron i save se i no wan stret stamba tingting we i bin mekem hem i lidim wan faet agensem ol pipol blong Nifae.

2 Mo hem i talem se: “Luk, bae mi no jenjenisim ol prisena wetem Amoron sapos hem i no stopem plan blong hem, olsem we mi bin talem long leta blong mi; from bae mi no letem hem se blong hem i gat moa paoa bitim wanem we hem i gat finis.

3 Luk, mi save ples we Ol Man blong Leman oli stap gad long ol man blong mi we oli bin tekem olsem ol prisena; mo from we Amoron i no givim mi wanem we mi bin askem long leta blong mi, luk, bae mi mekem long hem folem ol toktok blong mi; yes, bae mi lukaotem ded blong olgeta kasem taem we bae oli askem pis.”

4 Mo nao i bin hapen se taem we Moronae i talem ol toktok ia, hem i mekem se oli lukaotem long medel blong ol man blong hem, blong bae hem i faenem wan man we hem i wan laen blong Leman long medel blong olgeta.

5 Mo i bin hapen se oli faenem wan, we nem blong hem i Leman; mo hem i ^awan long ol wokman blong king we Amalekaea i bin kilim hem i ded.

6 Nao Moronae i mekem se Leman mo wan smol namba blong ol man blong hem bae oli go long ol gadman we oli stap gad long Ol Man blong Nifae.

7 Nao Ol Man blong Leman oli gad long Ol Man blong Nifae long bigtaon blong Gid; from hemia nao Moronae i bin jusum Leman mo mekem se wan smol namba blong ol man oli go wetem hem.

8 Mo taem we ples i stat blong tudak Leman i go long ol gadman we oli stap gad long Ol Man blong Nifae, mo luk, oli luk hem i stap kam mo oli singaot long hem; be hem i talem long olgeta: “No fraet, luk, mi mi wan laen blong Leman. Luk, mifala i bin ronwe long Ol Man blong Nifae, mo oli stap slip; mo luk mifala i bin tekemaot waen blong olgeta mo karem i kam wetem mifala.”

9 Nao taem we Ol Man blong Leman oli harem ol toktok ia, oli welkamem hem wetem glad; mo oli talem long hem: “Givim waen blong yu long mifala, blong mifala i save dring; mifala i glad se yufala i tekem waen wetem yufala from we mifala i taed.”

10 Be Leman i talem long olgeta: “Bae yumi holemtaet waen blong yumi kasem taem we yumi go agensem Ol Man blong Nifae long faet.” Be toktok ia i mekem olgeta i wantem moa blong dring waen ia.

11 From, oli talem olsem: “Mifala i taed, from hemia, yumi tekem sam waen, mo long smol taem bae yumi kasem waen wetem kaekae blong yumi, we bae i mekem yumi kam strong moa blong go agensem Ol Man blong Nifae.”

12 Mo Leman i talem long olgeta: “Yufala i save mekem olsem we yufala i wantem.”

13 Mo i bin hapen se oli dring waen olsem we oli wantem; mo tes blong hem i gud tumas long olgeta, from hemia, oli tekem moa olsem we oli wantem; mo waen i bin strong, from we Ol Man blong Nifae oli bin mekem se bae i strong.

14 Mo i bin hapen se oli dring mo oli harem gud, mo smol taem afta, olgeta evriwan oli drong.

15 Mo nao taem we Leman mo ol man blong hem oli luk se evriwan oli drong, mo oli stap long wan dip slip, oli gobak long Moronae mo talemaot evri samting we i bin hapen.

16 Mo nao hemia i folem plan blong Moronae. Mo Moronae i mekem rere ol man blong hem wetem ol tul blong faet; mo hem i go long bigtaon Gid, taem we Ol Man blong Leman oli stap long wan dip slip mo oli drong, mo oli givim ol tul blong faet long ol prisena, inaf blong mekem se olgeta evriwan oli holem ol tul blong faet;

17 Yes, long ol woman blong olgeta tu, mo evriwan long ol pikinini blong olgeta, olgeta we oli save yusum wan tul blong faet, taem we Moronae i bin mekem ol prisena ia blong holem ol tul blong faet; mo ol samting ia oli hapen long wan kwaet fasin.

18 Be sapos oli bin wekemap Ol Man blong Leman, luk oli drong mo Ol Man blong Nifae oli save kilimded olgeta nomo.

19 Be luk, hemia i no tingting we Moronae i wantem; hem i no laekem fasin blong kilim man i ded o ^ablad i ron, be hem i glad long wok blong sevem ol pipol blong hem long fasin blong prapa spolem gud olgeta; mo from stamba tingting ia bae hem i no save mekem samting we i no stret blong stap long hem, hem bae i no save foldaon long Ol Man blong Leman mo prapa spolem gud olgeta long taem we oli drong.

20 Be hem i kasem ol tingting blong hem; from we hem i mekem Ol Man blong Nifae we oli ol prisena oli holem ol tul blong faet we oli stap insaed long wol blong bigtaon, mo givim olgeta paoa blong kasem mo holem olgeta pat we oli stap insaed long ol wol.

21 Mo afta hem i mekem se ol man we oli stap wetem hem blong kamaot longwe lelebet long olgeta, mo raonem ol ami blong Ol Man blong Leman.

22 Nao luk hemia i hapen long naet taem, blong mekem se taem we Ol Man blong Leman oli wekap long moning oli luk se Ol Man blong Nifae oli raonem olgeta aotsaed long ol wol, mo we ol prisena blong olgeta oli holem ol tul blong faet insaed long ol wol.

23 Mo olsem ia nao oli luk se Ol Man blong Nifae oli gat paoa ova long olgeta; mo long ol taem ia oli faenem se i no nid blong oli faet wetem Ol Man blong Nifae; from hemia, ol jif kapten blong olgeta oli talem long olgeta blong givim ol tul blong faet blong olgeta, mo oli tekem olgeta i kam mo sakem olgeta long ol leg blong Ol Man blong Nifae, mo oli askem sore long olgeta.

24 Nao luk hemia i tingting we Moronae i wantem. Hem i mekem olgeta oli kam prisena blong faet, mo i tekem bigtaon, mo mekem se evri prisena i mas kam fri, we oli Ol Man blong Nifae; mo oli joenem ami blong Moronae, mo oli givim bigfala paoa long ami blong hem.

25 Mo i bin hapen se hem i mekem Ol Man blong Leman, we hem i mekem oli kam prisena, blong oli mas statem wan ^awok blong mekem ol strong wol oli kam moa strong raon long bigtaon blong Gid.

26 Mo i bin hapen se taem we hem i mekem bigtaon blong Gid oli kam strong, folem ol tingting blong hem, hem i mekem se Ol Man blong Nifae oli tekem ol prisena oli go long bigtaon Plante; mo tu, hem i gad long bigtaon ia wetem wan fos we i strong tumas.

27 Mo i bin hapen se, i nomata long ol plan blong Ol Man blong Leman, oli holemtaet mo lukaot gud long ol prisena we oli bin tekem, mo tu, oli holemtaet evri graon mo janis we oli bin tekem bakegen.

28 Mo i bin hapen se Ol Man blong Nifae oli stat bakegen blong win, mo blong tekem bakegen ol raet mo ol janis blong olgeta.

29 Plante taem Ol Man blong Leman oli bin traem blong raonem olgeta long naet, be taem oli bin traem olsem, oli bin lusum plante prisena.

30 Mo plante taem oli traem blong givim sam long ol waen blong olgeta long Ol Man blong Nifae, blong mekem se oli save prapa spolem gud olgeta wetem posen o wetem drong.

31 Be luk, Ol Man blong Nifae i no slo blong ^atingbaot Lod, God blong olgeta long hadtaem ia blong olgeta. Ol Man blong Leman oli no bin save trikim olgeta; yes, oli no save tekem mo dring waen blong olgeta sapos oli no bin givim sam fastaem long Ol Man blong Leman we oli prisena.

32 Mo olsem ia nao oli bin lukaotgud se i no gat eni man i save givim posen long olgeta; from sapos waen blong olgeta bae i posenem wan man blong Leman bae i posenem wan man blong Nifae tu; mo olsem ia nao oli bin traem evri strongdring blong olgeta.

33 Mo nao i bin hapen se i nid blong Moronae i mekem rere blong atakem bigtaon Morianton; from luk, Ol Man blong Leman, folem ol wok blong olgeta, oli mekem bigtaon ia Morianton i kam strong moa kasem taem we i kam wan ples we i strong tumas.

34 Mo oli gohed blong karem ol niu ami oli kam insaed long bigtaon, mo tu, ol niu saplae blong ol kaekae.

35 Mo olsem ia nao twante mo naen yia blong rul blong ol jaj ova long ol pipol blong Nifae i bin finis.