1 Mo nao i bin hapen se mi kasem wan leta long Amoron, we hem i king, leta ia i talem se sapos mi givim ol prisena ia blong wo we mifala i bin tekem, bae hem i givim bigtaon blong Antipara long mifala.

2 Be mi bin sendem wan leta long king, se mifala i sua se ol soldia blong mifala oli inaf blong tekem bigtaon Antipara wetem paoa blong mifala; mo blong givim ol prisena from bigtaon ia, bae mifala i ting se i no waes long mifala, mo se bae mifala i save givim ol prisena nomo blong jenisim wetem Ol Man blong Nifae prisena.

3 Mo Amoron i no wantem tingting we mi givim long leta blong mi, from we hem i no wantem jenisim ol prisena; from hemia, mifala i stat blong mekem rere blong go faet agensem bigtaon Antipara.

4 Be ol pipol blong Antipara oli bin aot long bigtaon ia, mo oli ronwe i go long ol narafala bigtaon blong olgeta, we oli holemtaet, blong mekem olgeta bigtaon ia oli stap strong; mo olsem ia nao bigtaon blong Antipara i foldaon long han blong mifala.

5 Mo olsem ia nao twante mo eit yia blong rul blong ol jaj i bin en.

6 Mo i bin hapen se long stat blong twante mo naen yia, mifala i kasem wan saplae blong ol kaekae, mo tu, wan namba blong ademap long ami blong mifala, we i kamaot long graon blong Sarahemla, mo long graon raonabaot, kasem namba blong sikis taosen man, hemia antap long siksti blong ol ^aboe blong Ol Man blong Amon we oli bin kam blong joenem ol brata blong olgeta, we i smol grup blong mi blong tu taosen. Mo nao luk, mifala i bin strong, yes, mo tu, mifala i gat plante kaekae i kam long mifala.

7 Mo i bin hapen se hem i tingting blong mifala blong mekem wan faet wetem ami we i stap blong lukaot gud long bigtaon Kumenae.

8 Mo nao luk, bae mi soem long yu se kwiktaem nomo mifala i mekem tingting blong mifala i kamtru; yes, wetem strong ami blong mifala, o wetem wan pat long ol strong ami blong mifala, mifala i bin raonem, long naet, bigtaon ia Kumenae, smol taem bifo oli rere blong kasem wan saplae blong ol kaekae.

9 Mo i bin hapen se mifala i kam raonabaot long bigtaon blong plante naet; be mifala i slip wetem ol naef blong faet blong mifala, mo mifala i putum ol gad blong mekem se Ol Man blong Leman oli no save kam agensem mifala long naet mo kilimded mifala, we oli bin traem plante taem; be hamas taem we oli bin traem, hemia blad blong olgeta i bin ron.

10 Sam taem afta ol kaekae blong olgeta i bin kam, mo oli rere blong kam insaed long bigtaon long naet. Mo mifala, long ples blong Ol Man blong Leman, mifala Ol Man blong Nifae; taswe, mifala i tekem olgeta mo ol kaekae blong olgeta.

11 Mo i nomata we Ol Man blong Leman oli bin katemaot sapot blong olgeta long fasin ia, oli wantem gohed blong holemtaet bigtaon yet; taswe, i gat nid se bae mifala i mas tekem ol kaekae ia mo sendem olgeta i go long Judia, mo long ol prisena blong mifala long graon blong Sarahemla.

12 Mo i bin hapen se i no gat plante dei i pas bifo Ol Man blong Leman oli stat blong lusum ol hop blong win; taswe, oli lego bigtaon i kam long ol han blong mifala; mo olsem ia nao mifala i mekem ol plan blong mifala blong tekem bigtaon Kumenae oli kamtru.

13 Be i bin hapen se ol prisena blong mifala oli plante tumas we, nomata long bigfala namba blong mifala, mifala i nid blong givim wok long evri ami blong mifala blong holemtaet olgeta, o blong kilimded olgeta.

14 From luk, bigfala namba blong olgeta oli stap ronwe, mo oli yusum ol ston blong faet wetem, mo ol nalnal, o eni samting we oli save putum long ol han blong olgeta, inaf blong mekem se mifala i kilimded moa long tu taosen long olgeta, afta we oli bin sarenda long mifala olsem ol prisena blong wo.

15 From hemia, i gat nid se mifala i mas kilimded olgeta, o gad long olgeta, wetem ol naef blong faet blong mifala long han blong mifala, go kasem graon blong Sarahemla; mo tu, ol kaekae blong mifala i nomo plante bitim hemia we inaf blong ol man blong mifala nomo, i nomata long hemia we mifala i bin tekem long Ol Man blong Leman.

16 Mo nao, long ol had situesen ia, i bin kam wan samting we i impoten tumas blong faenemaot wanem nao blong mekem wetem ol prisena ia blong wo; be, mifala i bin disaed blong sendem olgeta i go daon long graon blong Sarahemla; from hemia, mifala i jusum wan grup blong ol man blong mifala, mo givim wok long olgeta blong tekem ol prisena blong mifala blong go daon long graon blong Sarahemla.

17 Be i bin hapen se long tumoro blong hem oli kambak. Mo nao luk, mifala i no askem olgeta long saed blong ol prisena; from luk, Ol Man blong Leman oli stap atakem mifala, mo oli bin kambak long stret taem blong sevem mifala blong mifala i no foldaon i go long ol han blong olgeta. From luk, Amoron i bin sendem, blong sapotem olgeta, wan niu saplae blong ol kaekae, mo tu, wan bigfala namba blong ol man blong ami.

18 Mo i bin hapen se ol man ia we mifala i bin sendem wetem ol prisena oli bin kasem mifala long stret taem blong stopem olgeta, from se kolosap bae oli winim mifala.

19 Be luk, smol grup blong mi blong tu taosen mo siksti man oli bin faet strong tumas; yes, oli stanap strong agensem Ol Man blong Leman, mo oli kilimded olgeta evriwan ia we oli agensem olgeta.

20 Mo taem we kolosap ol narafala ami blong mifala oli stap rere blong ronwe long fored blong Ol Man blong Leman, luk, ol tu taosen mo siksti ia oli bin stanap strong mo oli no fraet nating.

21 Yes, mo oli bin obei mo folem evri toktok we i givim oda mo oli folem stret gud; yes, mo tu, i bin hapen long olgeta folem fet blong olgeta; mo mi tingbaot ol toktok we oli bin talem long mi se ol ^amama blong olgeta oli bin tijim olgeta.

22 Mo nao luk, olgeta ia, ol boe blong mi, mo ol man ia we mifala i bin jusum blong tekem ol prisena i go, hem i long olgeta ia nao we mifala i mas givim bigfala viktri ia long olgeta; from we hem i bin olgeta ia nao we oli winim Ol Man blong Leman; taswe, oli ronemaot Ol Man blong Leman oli go long bigtaon blong Mantae.

23 Mo mifala i holemtaet bigtaon blong mifala Kumenae, mo oli no prapa spolem gud mifala wetem naef blong faet; be, mifala i lusum bigfala namba blong mifala.

24 Mo i bin hapen se afta we Ol Man blong Leman oli ronwe, mi givim ol oda kwiktaem se ol man blong mi we oli bin kasem kil bae oli mas tekemaot olgeta long medel blong ol ded bodi mo mi mekem se oli kavremap gud kil blong olgeta.

25 Mo i bin hapen se i gat tu handred, aot long tu taosen mo siksti blong mi, we ae blong olgeta i dak from we oli lusum blad; be, folem gudfala fasin blong God, mo long bigfala sapraes blong mifala, mo tu, long glad blong ful ami blong mifala, i ^ano bin gat wan sol long olgeta we oli lus; yes, mo tu, i no gat wan sol long olgeta we oli no kasem plante kil.

26 Mo nao, fasin blong sevem blong olgeta i bin sapraesem ful ami blong mifala, yes, we oli no ded long semtaem ia we i gat wan taosen long ol brata blong mifala we oli kilimded olgeta. Mo mifala i luksave tru se hemia i from merikel ^apaoa blong God, from ^bfet blong olgeta we i bigwan tumas long samting ia we ol mama blong olgeta i bin tijim olgeta blong bilif—se i gat wan God we i stret, mo eni man we i no gat tu tingting, God bae i sevem olgeta wetem bigfala paoa blong hem.

27 Nao hemia hem i bin fet blong olgeta we mi tokbaot; oli yang, mo ol tingting blong olgeta i stap strong, mo oli stap putum tras blong olgeta long God oltaem.

28 Mo i bin hapen se afta we mifala i lukaot gud long ol man blong mifala we oli bin kasem kil, mo mifala i berem ol dedman blong mifala, mo tu, ol dedman blong Ol Man blong Leman, we oli plante; luk, mifala i askem long Gid long saed blong ol prisena we oli stat blong go daon wetem olgeta long graon blong Sarahemla.

29 Nao Gid i bin jif kapten ova long grup we oli jusum hem blong gad long olgeta blong go daon long graon.

30 Mo nao, hemia i ol toktok we Gid i talem long mi: ‘Luk, mifala i stat blong go daon long graon blong Sarahemla wetem ol prisena blong yumi. Mo i bin hapen se mifala i mitim ol spae blong ol ami blong yumi we ol lida oli sendem olgeta blong waj ova long kamp blong Ol Man blong Leman.’

31 Mo oli singaot long mifala, oli talem—‘Luk, ol ami blong Ol Man blong Leman oli stap maj i go long bigtaon blong Kumenae; mo luk, bae oli atakem olgeta, yes, mo bae oli prapa spolem gud ol pipol blong yumi.

32 Mo i bin hapen se ol prisena blong yumi oli harem ol singaot blong olgeta, we i mekem olgeta i leftemap tingting blong olgeta; mo oli stat blong girap blong atakem mifala.

33 Mo i bin hapen se from fasin blong olgeta blong atakem mifala, mifala i atakem olgeta wetem ol naef blong faet blong mifala. Mo i bin hapen se oli ron i kam long wan grup, oli ron stretem ol naef blong blong faet blong mifala, mo long taem ia mifala i bin kilimded bigfala namba blong olgeta, mo ol narawan oli kamaot long ol gadman mo oli ronwe long mifala.

34 Mo luk, taem we oli ronwe mo mifala i no save kasem olgeta, mifala i maj kwiktaem i go long bigtaon Kumenae; mo luk, mifala i kasem long stret taem blong mekem se mifala i save helpem ol brata blong mifala blong holemtaet gud bigtaon ia.

35 Mo luk, God i mekem yumi fri bakegen aot long ol han blong ol enemi blong yumi. Mo yumi presem nem blong God blong yumi; from luk hem nao i bin mekem yumi kam fri; yes, we i bin mekem bigfala samting ia blong yumi.’

36 Nao i bin hapen se taem we mi, Hileman, mi harem ol toktok ia blong Gid, hat blong mi i fulap wetem glad we i bigwan tumas from gudfala fasin blong God blong sevem mifala, we i mekem se mifala evriwan i no save lus; yes, mo mi trastem se ol sol blong ol man we oli bin kilimded olgeta, oli ^ago insaed long kingdom blong God blong olgeta.