1 I a sosodé ku Oria a husga riba e tera ku rektitut durante tur su dianan, ku tabata sumamente hopi.

2 I el a engendrá yunan hòmber i muhé; sí, el a engendrá trintiun, di kual bintitres tabata yu hòmber.

3 I a sosodé ku el a engendrá Kib tambe den su behes. I a sosodé ku Kib a goberná na su lugá; i Kib a engendrá Korihor.

4 I ora Korihor tabatin trintidos aña di edat el a rebeldiá kontra su tata, i a bai biba den e tera di Nehor; i el a engendrá yunan hòmber i muhé, i nan a bira sumamente bunita; pues Korihor a atraé hopi hende tras di dje.

5 I ora ku el a trese huntu un ehersito el a subi na e tera di Moron kaminda e rei tabata biba, i a hib’é den koutiverio, kual a kumpli ku e palabranan di e ruman di Yared ku nan lo wòrdu hibá den koutiverio.

6 Awor e tera di Moron, kaminda e rei tabata biba, tabata serka di e tera kual e nefitanan tabata yama Desolashon.

7 I a sosodé ku Kib a biba den koutiverio, i su pueblo bou di Korihor su yu, te ora ku el a bira sumamente bieu; sinembargo Kib a engendrá Shule den su edat grandi, miéntras ku ainda e tabata den koutiverio.

8 I a sosodé ku Shule tabata rabiá ku su ruman; i Shule a bira fuerte, i a bira poderoso segun e forsa di hòmber; i tambe e tabata poderoso den huisio.

9 Pues, el a bai na e seru di Efraim, i el a saka mineral for di e seru, i traha spadanan di heru pa esnan ku el a bai kuné; i despues ku el a arma nan ku spada el a regresá na e siudat di Nehor, i a bai batayá kontra su ruman Korihor; den kual el a optené e reino i restituí esaki na su tata Kib.

10 I awor pa motibu di e kos aki kual Shule a hasi, su tata a konferí riba dje e reino; p’esei el a kuminsá goberná na lugá di su tata.

11 I a sosodé ku el a husga den rektitut; i el a ekstendé su reino riba henter e tera, pasobra e pueblo a bira sumamente numeroso.

12 I a sosodé ku Shule tambe a engendrá hopi yu hòmber i muhé.

13 I Korihor a arepentí di e hopi maldatnan kual el a kometé; pues Shule a dun’é poder den su reino.

14 I a sosodé ku Korihor tabatin hopi yu hòmber i muhé. I entre e yunan hòmber di Korihor tabatin unu ku su nòmber tabata Noe.

15 I a sosodé ku Noe a rebeldiá kontra Shule, e rei, i tambe su tata Korihor, i a bai ku su ruman Kohor, i tambe tur su rumannan i hopi di e pueblo.

16 I el a batayá kontra di Shule, e rei, den kual el a optené e tera di nan promé herensia; i el a bira un rei riba e parti ei di e tera.

17 I a sosodé ku el a batayá atrobe kontra Shule, e rei; i a tuma Shule, e rei, i a hib’é den koutiverio na Moron.

18 I a sosodé ku miéntras e tabata serka di kita su bida, e yunan di Shule a lastra drenta den e kas di Noe anochi i a mat’é, i basha e porta di e prizòn abou i saka nan tata, i poné riba su trono den su propio reino.

19 Pues, e yu di Noe a edifiká su reino na su lugá; sinembargo nan no a gana mas poder riba Shule e rei, i e pueblo ku tabata bou di e reinado di Shule e rei, a prosperá ekstremadamente i a bira fuerte.

20 I e pais tabata dividí; i tabatin dos reino, e reino di Shule, i e reino di Kohor, e yu di Noe.

21 I Kohor, e yu di Noe, a laga pa su pueblo bai batayá kontra di Shule, den kual Shule a derot’é i a mata Kohor.

22 I awor Kohor tabatin un yu yamá Nimrod; i Nimrod a entregá e reino di Kohor na Shule, i el a haña grasia den bista di Shule; pues Shule a dun’é fabornan grandi, i el a hasi den e reino di Shule di akuerdo ku su deseonan.

23 I tambe den e reino di Shule a bin profetanan entre e pueblo, ku a wòrdu mandá pa Señor, profetisando ku e maldat i idolatria di e pueblo tabata tresiendo un maldishon riba e tera, i nan lo wòrdu destruí si nan no arepentí.

24 I a sosodé ku e pueblo a insultá e profetanan, i a hasi bofon di nan. I a sosodé ku rei Shule a someté na huisio tur esnan ku tabata insultá e profetanan.

25 I el a proklamá un lei riba henter e tera, kual tabata duna poder na e profetanan pa bai unda ku nan kièr; i di e manera aki a logra pa e pueblo arepentí.

26 I pa motibu ku e pueblo a arepentí di nan piká i idolatrianan, Señor a pordoná nan, i nan a kuminsá ta prosperá atrobe den e tera. I a sosodé ku Shule a engendrá yunan hòmber i muhé den su behes.

27 I no tabatin mas guera den e dianan di Shule; i el a kòrda e kosnan grandi ku Señor a hasi pa su tatanan tresiendo nan for di e otro banda di e laman grandi na e tera primintí; pues el a ehekutá huisio den rektitut tur su dianan.