Papitaiso kei na iSolisoli ni Yalo Tabu

“Na papitaiso ena wai, ke yali kina na papitaiso ena bukawaqa ka sega ni tiko kina na Yalo Tabu, e sega na betena; erau yaga vakalevu sara ka dredre me tawasei na kedrau isema.”

Na Bula nei Josefa Simici

Ena gauna i Josefa Simici, e drodro vakalevu sara na Uciwai na Susquehanna, tatakelokelo ena loma ni veikau loa kei na paini, wavokita na veidelana kei na loga ni veivunikau vakasorena. Na uciwai vakaitamera duadua e Pennsylvania, e tiko e lomadonu ni vanua wavokiti Harmony, Pennsylvania. Me vaka ni volekata tiko na nona vale na uciwai ka vanua vakadirorogo, ka tu duadua, e vakavuqa na nona dau lesu ki kea na Parofita me laki vakasama ka masumasu.

Sa ikoya na bati ni uciwai ko ya ena ika 15 ni Me, 1829, erau a lako kina na Parofita kei Oliver Cowdery, me rau laki masumasu me baleta na bibi ni papitaiso. Me isau ni nodrau masumasu, e a rairai kivei rau o Joni na Dauveipapitaiso, solia kina vei rau na Matabete i Eroni ka vakaroti rau me rau dui papitaisotaki rau ga vakairau. Na veivakalougatataki erau a vakasaqara tiko e sa na rawa ena gauna oqo me vakayacori ena kena ivalavala dodonu vata kei na kaukauwa kei na lewa ni Kalou. Na lako sobu ki na loma ni uciwai, erau dui papitaisotaki rau ga vakairau, o Josefa e a papitaisotaki Oliver taumada, me vaka na veidusimaki nei Joni. E a qai taqara na ligana o Josefa ena ului Oliver ka tabaki koya ki na matabete i Eroni, ka cakava o Oliver na ka vata ga o ya me baleti Josefa. E a vakananuma lesu na Parofita:

“Eda sotava na veivakalougatataki cecere ka lagilagi mai vua na Tamada Vakalomalagi. E a sega ni dede na noqu papitaisotaki Oliver Cowdery, ka sa curumi koya na Yalo Tabu, e a qai tucake ka parofisaitaka e vuqa na ka e dodonu me yaco ena dua ga na gauna lekaleka. Vakadua tale, ni oti ga vakalailai na nona papitaisotaki au, e yacovi au talega na yalo ni parofisai, ena gauna, au tucake tu kina, au a parofisaitaka me baleta na kena tubu cake na Lotu oqo, kei na vuqa tale na ka e veisemati vata kei na Lotu, kei ira na luve ni tamata ena itabagauna oqo. Eda sa vakasinaiti ena Yalo Tabu, ka rekitaka na Kalou ena noda vakabulai” (Josefa Simici—Ai Tukutuku 1:73).

Na veivakalougatataki ni papitaiso era sa tete yani kivei ira eso tale na vakabauta. Ni voleka ni mai cava na vula o Me, o Samuel na tacina gonetagane na Parofita e a mai sikovi rau o Josefa kei Oliver e Harmony. “Keirau … cikevi koya vakaukauwa me baleta na Kosipeli i Jisu Karisito, ka sa vakarau tiko me vakatakilai ena gauna oqo na kena taucoko,” e a kaya na Parofita. Ni ciqoma o Samuel e dua na ivakadinadina ni cakacaka, ka a papitaisotaki Samuel o Oliver Cowdery, “e a qai lesu tale ki na vale nei tamana, vakalagilagia vakalevu sara ka vakacerecerea na Kalou, vakasinaiti tu ena Yalo Tabu.”¹ Ena June, e a papitaisotaki Hyrum na tuakana na Parofita, ka a tudei tu ga na nona vakabauta na itukutuku ni Parofita. “Mai na gauna oqo ka lako yani era lewe vuqa sara era sa vakabauta,” e volaitukutukutaka o Josefa, “ka ra sa papitaiso sara eso ena neitou tomana tiko na kena dusimaki ka veiuqeti.”²

E a vakavinavinaka sara ga vakalevu na Parofita ena nona raica ni sa papitaiso o Joseph Smith Levu (Sr), na tamana. E dau lomani tamana sara vakatitobu na Parofita, ni o koya e a kena imatai me vakabauta na nona itukutuku ni oti na imatai ni nona sikovi mai vei Moronai. E a papitaiso o Joseph Smith Levu ena ika 6 ni Epereli, 1830, na siga e a tauyavutaki kina na Lotu. O Lucy Mack Smith, na tina ni Parofita, e nanuma lesu: “E a tucake tu e baravi o Josefa ena gauna e sa cabe kina mai wai o tamana, e a taura na ligana ka tagicaka mai, ‘… Au bula tiko meu raici tamaqu ni papitaiso ena lotu dina i Jisu Karisito,’ e a qai ubia na matana e lomasere itamana ka tagi vakadomoilevu ena reki me vaka e a cakava o Josefa ena gauna makawa ena nona raici tamana ni sa lako cake mai ena vanua vaka-Ijipita.”³

Ena siga e a tauyavutaki kina na Lotu, era lewe vuqa na Yalododonu ka ra a papitaiso e liu era a ciqoma na isolisoli ni Yalo Tabu ena kaukauwa ni Matabete i Melikiseteki. O Parofita Josefa Simici e a vakatavulica vagumatua na kedrau yaga na papitaiso kei na veitabaki ni liga me baleta na isolisoli ni Yalo Tabu. “Na papitaiso ena wai, ke yali kina na papitaiso ena bukawaqa ka sega ni tiko kina na Yalo Tabu, e sega na betena,” e vakatusa. “Erau yaga vakalevu sara ka dredre me tawasei na kedrau isema. Na tamata yadua e dodonu me sucu ena wai kei na yalotabu me rawa kina ni curu ena matanitu ni Kalou.”⁴

iVakavuvuli nei Josefa Simici

Na cakacaka tabu vakalotu ni papitaiso e yaga me baleta na bula vakalou.

“E sa vakarautaka tu na Kalou e vuqa na ivakatakilakila e vuravura, e vakatalega kina mai lomalagi; e dua na kena ivakaraitaki, na oki ni veikau, na vuanikau, na co ni lomanibai—era vakaraitaka taucoko e dua na ivakatakilakila ni vuanikau e a tei e kea; baleta ni sa ikoya e dua na ivakaro ni Turaga ni veivunikau yadua, itei, kei na vunikau vakasorena e dodonu me kauta ga mai na kena mataqali, ka sega ni rawa me lako mai ni oti e dua tale na lawa se ivakavuvuli.

“Ena ivakavuvuli vata ga au tukuna kina ni papitaiso sa ikoya e dua na ivakatakilakila e lesi mai vua na Kalou, me baleti koya e vakabauta na Karisito me ciqoma vakaikoya me rawa me curu rawa kina ena matanitu ni Kalou, ‘baleta kevaka sa sega ni sucu e dua ena wai kei na Yalotabu ena sega ni curu rawa ki na matanitu ni Kalou,’ e kaya na iVakabula [raica Joni 3:5]. E sa ikoya e dua na ivakatakilakila ka dua na ivakaro ka a vakarautaka na Kalou me baleta na tamata me curu ki na Nona matanitu. O ira era vakasaqara me ra curu ena dua tani tale na kena sala era na sega ni kunea rawa; baleta ni na sega ni ciqomi ira na Kalou, ena sega talega ni ra vakaraitaka na agilosi ena kena sa ciqomi na nodra cakacaka, e baleta ni ra sega ni talairawarawa ki na cakacaka tabu vakalotu, e sega talega ni ra tiko ena ivakatakilakila ka a lesia na Kalou me baleta na vakabulai ni tamata, me vakavakarautaki koya, me soli vua e dua na yaca, ena dua na lagilagi vakasilesitieli me baleta; e sa vakarota na Kalou ni o ira kece era talaidredre ki na Nona vosa era na sega ni dro bula mai na veivakacudrui nei eli. Na cava na veivakacudrui nei eli? Me lako vata kei ira na ilawalawa oqori o ira era talaidredre ki na Nona ivakaro.

“Na papitaiso sa ikoya e dua na ivakatakilakila ni Kalou, kivei ira na agilosi, vakakina ki lomalagi ni da vakayacora na loma ni Kalou, ka sega ni dua tale na kena sala ena rukui lomalagi me rawa kina vua na Kalou me lesia na tamata me ra lako mai Vua ka vakabulai, ka curu ena matanitu ni Kalou, vakavo ga na vakabauti Jisu Karisito, veivutuni, kei na papitaiso ena bokoci ni ivalavala ca, kei na so tale na kena sala era na sega ni kunei rawa; ena qai yalataki vei iko na isolisoli ni Yalo Tabu.”⁵

“Ena noda vakaraica tiko na veitabana tabu ni iVolatabu, vakasaqarai ira tiko na veiparofita kei na nodra vosa na iapositolo, eda sega ni kunea rawa na iulutaga era veisemati vata kei na vakabulai, me vaka na papitaiso. … E dodonu me da kila ni vosa na papitaiso sa ikoya e vu mai na vosa vaka-Kiriki baptiso, ka kena ibalebale na tabadromuci. …

“… Ena rairai sega beka ni cala me vakamacalataki taumada na mataveivaqaqai kei na veivakaro i Jisu vakaikoya me baleta na iulutaga.—E a kaya kivei iratou na lewe tinikarua, se e dodonu beka me tinikadua ena gauna o ya: ‘O koya mo dou qai lako, ka vakalotutaki ira na lewe ni veivanua kecega, ka papitaisotaki ira ena yaca ni Tamamudou, kei na Luvena, kei na Yalo Tabu; vakavulici ira me ra vakabauta na ka kece kau a vosa kina vei kemudou’: E a volaitukutukutaka o Maciu na kena oqo [Maciu 28:19–20]. Ena Marika era tu kina na veivosa bibi oqo: ‘Dou lako yani ki vuravura taucoko, ka vunautaka na itukutuku vinaka kivei ira na tamata kecega. O koya sa vakabauta ka papitaisotaki ena bula, ia ena cudruvi ga ko koya sa sega ni vakabauta’ [Marika 16:15–16]. …

“… ‘O Nikotimo, e dua na nodra turaga na kai Jutia, … sa lako mai ko koya oqo vei Jisu ena bogi, ka kaya vua, Vakavuvuli, keitou sa kila ni kemuni sa lako mai vua na Kalou me ivakavuvuli: ni sa sega ni dua na tamata e cakava rawa na veika mana oqo ko ni sa cakava, kevaka erau sa sega ni tiko kaya na Kalou. Sa vosa ko Jisu, ka kaya vua, E dina, e dina, au sa kaya vei iko, kevaka sa sega ni sucu tale na tamata ena sega ni raica rawa na matanitu ni Kalou. Sa kaya vua ko Nikotimo, Sa sucu rawa vakaevei na tamata ni sa qase mai ko koya? Sa curu rawa vakarua kina ketei tinana, me sucu mai?—Sa kaya ko Jisu, E dina, e dina, au sa kaya vei iko, Kevaka sa sega ni sucu e dua ena wai kei na Yalo Tabu, ena sega ni curu rawa ki na matanitu ni Kalou’ [Joni 3:1–5].

“Na kena kaukauwa kei na dina ni isau ni taro i Jisu, me baleta na papitaiso ena wai, e vakadeitaka na taro: Kevaka me tautauvata tikoga na Kalou e nanoa, nikua, ka tawamudu; e sa rauta me sa dina sara ena ivunau cecere: ‘O koya sa vakabauta ka papitaisotaki ena bula: ia ena cudruvi ga ko koya sa sega ni vakabauta!’ [Marika 16:16.] E a sega tale ni dua na yaca e soli mai ena rukui lomalagi, ka sega talega ni vakadonui e dua tale na cakacaka tabu vakalotu, me rawa ni ra vakabulai kina na tamata: Sa rauta me kaya na iApositolo, ‘ni dou bulu vata kaya ena papitaiso,’ o koya sa vakaturi koya cake tale mai na mate! [Kolosa 2:12.] Sa rauta me tucake o Paula ka papitaisotaki me bokoci kina na nona ivalavala ca [raica Cakacaka 9:17–18].”⁶

Ena veitabagauna taucoko, o ira na Yalododonu era papitaiso ena yaca i Jisu Karisito.

“O ira na itabatamata ena gauna e liu era a tama ni lotu ena duidui ni nodra yabaki, ena gauna e sa robota yani kina e vuravura na lotu, … era a vakacurumi ki na matanitu mai na papitaiso, baleta ni sa ivakadinadina vakaikoya ena ivolanikalou—e sega ni veisau na Kalou. Na iApositolo e kaya ni kosipeli sa ikoya na kaukauwa ni Kalou ka vakabulai ira era vakabauta; ka tukuna talega vei keda ni bula kei na tawa mate rawa erau a kau mai me vakararamataka na kosipeli [raica Roma 1:16; 2 Timoci 1:10]. …

“Eda vakadeitaka ni veivolanikalou era kaya na veika e kena ibalebale, kei na kena ibalebale na veika era kaya, e tu vei keda na veivakadeitaki e veirauti me da toso tikoga ka vakadinadinataka mai na iVolatabu ni kosipeli e tautauvata tu ga ena veigauna; na cakacaka tabu vakalotu me vakayacori kina na ka e veiganiti kaya, e tautauvata; kei na vakailesilesi me ra vakaitavi kina, e tautauvata; kei na veivakatakilakila kei na vuanikau ka vu mai na veiyalayalati, e tautauvata: o koya gona, me vakataki Noa e a dua na dauvunautaka na bula savasava e a rairai papitaiso beka ka lesi ki na matabete mai na veitabaki ni liga, kei na so tale. A sa sega e dua sa taura vakaikoya na cakacaka vakarokoroko oqo, o koya ga sa lesi koya na Kalou me vakataki Eroni [raica Iperiu 5:4]. …

“… Ena qai laurai ka vakadinadinataki na tu ni ivalavala ca vei ira na tamata, na yaga ni veivutuni e a tautauvata vinaka ena dua na gauna se yabaki ni vuravura kei na dua tale—kei na yavu tale o ya e sega ni rawa me vakadavora e dua na tamata mai na kena a sa vakadavori oti, sa ikoya o Jisu Karisito. O koya gona, kevaka sa yaco o Epeli me dua na tamata yalo savasava sa yaco vakakina ni sa maroroya na ivakaro; kevaka me a bula savasava vakarauta o Inoke me lako ka tu ena mata ni Kalou, ka rau salavata, e rairai e a yaco me vakakina mai na nona maroroya na nona ivakaro, ka ni tautauvata na dina e yaco ki na tamata vakayadua e bula savasava, kevaka me o Noa, e dua na dauvunautaka na bula savasava; o Eparaama, na tamadra na vakabauta; o Jekope, na italai ni Kalou; o Mosese, na tamata e a volai Karisito, ka kauta mai na lawa ena ivakaro, me vaka e dua na ivakavuvuli me tuberi keda vei Karisito; se o Jisu Karisito vakaikoya, ka a sega ni yaga me veivutuni, ni a sega ni ivalavala ca; me vaka na nona itukutuku bibi kivei Joni:—papitaisotaki au ena gauna oqo: ena sega ni rawa vua e dua na tamata me curu ki na matanitu kevaka e sega ni talairawarawa ki na cakacaka tabu vakalotu oqo: ni sa kilikili kei keda me da vakabauta vakaoqo na ivalavala dodonu kecega [raica iVakadewa nei Josefa Simici, Maciu 3:43]. E dina, kevaka e veiganiti me vaka kina o Joni kei Jisu Karisito, na iVakabula, me rau bulataka na bula savasava me rau papitaiso—sa dina sara, e sa na qai veiganiti me vakakina kivei ira vakayadua na tamata ka ra vakasaqara na matanitu vakalomalagi me ra lako kina ka vakayacora talega vakakina; ni sa ikoya na katuba, kevaka e dua sa kaba cake ena tikina tani, sa ikoya oqo na daubutako ka daukovekove! [Raica Joni 10:1–2.]

“Ena veigauna taumada ni vuravura, ni bera nona lako mai vakayago na iVakabula, o ira “na yalododonu” era a papitaiso ena yaca i Jisu Karisito ni bera na noda tadu mai, baleta ni a sega tale ni dua na yaca me rawa ni ra vakabulai kina na tamata; ka ni oti na nona a lako mai vakayago e a lauvako ena kauveilatai, ni oti o ya era a qai papitaiso na yalododonu ena yaca iJisu Karisito, lauvako ena kauveilatai, tucake tale mai na mate ka cabe cake ki lomalagi, de rawa ni ra bulu ena papitaiso me vakataki koya, ka tucake tale ena lagilagi me vakataki koya, ni sa duabau ga na Turaga, sa duabau ga na vakabauta, sa duabau ga na veipapitaisotaki, sa duabau ga na Kalou na tamada kecega [raica Efeso 4:5–6], e dina ni sa vaka kina ia sa duabau ga na gaunisala ki na vale ni reki vakalomalagi.”⁷

Na gonelalai e mate ni bera na yabaki ni vauci me ra savasava e sega ni yaga me ra papitaiso; era sa vakabulai mai na Veisorovaki nei Jisu Karisito.

“Na papitaiso sa ikoya na bokoci ni ivalavala ca. E sega na nodra ivalavala ca na gonelalai. E a vakalougatataki ira o Jisu ka kaya, ‘Dou cakava na veika o dou raica niu cakava.’ O ira na gonelalai era sa bula vei Karisito, kei ira era sa qase cake mai na vakabauta kei na veivutuni.”⁸

“Na ivunau me ra papitaisotaki na gonelalai, se me ra vakamiraki ena wai, se dodonu me ra vakararawataki mai eli, sa ikoya e dua na ivunau lasu, e sega ni tokoni ena iVolanikalou, ka rau veicalati vata kei na ivakarau va-Kalou. O ira taucoko na gonelalai era sa vakabulai mai na dra iJisu Karisito, ena gauna era sa biuta kina na gonelalai na vuravura oqo, era sa kau ki na lomasere i Eparaama.”⁹

E a vakamacalataka na Parofita o Josefa Simici na veika oqo me vaka e tiki ni dua na raivotu e a ciqoma ena ika 21 ni Janueri, 1836, e qai volaitukutukutaki e muri ena Vunau kei na Veiyalayalati 137:1, 10: “A sa tadola vei keitou ko lomalagi; au sa raica na matanitu vakasilesitieli ni Kalou kei na kena lagilagi kecega. … Au sa raica talega ni ra sa rawata na matanitu vakalomalagi ko ira na gonelalai era a mate, ni ra sa bera ni yacova na yabaki ni vauci me ra savasava.”¹⁰

Ni oti na papitaiso ena wai, eda qai ciqoma na isolisoli ni Yalo Tabu mai na veitabaki ni liga.

“Na kosipeli e gadreva na papitaiso mai na tabadromuci ena wai me baleta na bokoci ni ivalavala ca, sa ikoya na ibalebale ni vosa ena ivosavosa taumada—vakatokai, me bulu se tabadromuci. … E tosoya na noqu vakabauta na isolisoli ni Yalo Tabu mai na veitabaki ni liga, [me vaka e vakadinadinataki] mai na ivunau nei Pita ena siga ni Penitiko, Cakacaka 2:38. Ena vaka mo na papitaisotaka tiko e dua na taga nuku me vaka e dua na tamata, kevaka e sega ni caka me baleta na bokoci ni ivalavala ca ka ciqomi na Yalo Tabu. Na papitaiso ena wai sa ikoya ia e veimama ga ni dua na papitaiso, ka sega na betena ni yali na kena veimama kadua—sa ikoya, na papitaisotaki ena Yalo Tabu. E kaya na iVakabula, ‘Kevaka sa sega ni sucu e dua ena wai kei na Yalo Tabu, ena sega ni curu rawa ena matanitu ni Kalou.’ [Joni 3:5.]”¹¹

E a vakananuma lesu o Daniel Tyler e dua na vunau nona na Parofita e Springfield, Pennsylvania, ena 1833: Ena nona tiko lekaleka e a vunau kina ena itikotiko nei tamaqu, e dua na vale kau makawa. A wilika kina ko koya na Joni wase 3. … Vakamacalataka na ika 5 ni tikina, ka kaya. ‘Na sucu ena wai kei na Yalotabu’ [kena ibalebale] me tabadromuci ena wai me bokoci na ivalavala ca ka ciqomi na isolisoli ni Yalo Tabu ni oti o ya. Oqo e a soli mai na veitabaki ni liga mai vei koya e dua ka tu vua na kaukauwa e solia vua na Kalou.“¹²

“Na sucu vou tale, e lako mai na Yalo ni Kalou ena veicakacaka tabu vakalotu.”¹³

“Na papitaiso sa ikoya e dua na vakavakarau ni cakacaka tabu vakalotu lagilagi ena kena ciqomi ni Yalo Tabu; e sa ikoya na sala kei na idola me na veiqaravi kina na Yalo Tabu. Na iSolisoli ni Yalo Tabu ena veitabaki ni liga, e sega ni rawa me ciqomi mai na veimama ni dua tani tale na ivakavuvuli o koya ga na ivakavuvuli ni bula savasava.”¹⁴

“E vakacava kevaka eda tovolea me da rawata na isolisoli ni Yalo Tabu mai na dua tani tale na sala ka sega ni ivakatakilakila se gaunisala e a lesia na Kalou—e rawa beka me da na rawata? E sega vakaidina; ena sega ni rawa ki na veivurevure kece tale eso. E kaya na Turaga mo cakava na veika au tukuna vei iko, kau na qai vakalougatataki iko.

“Era tu eso na vosa bibi kei na ivakatakilakila vaka-Matabete ka dodonu me rokovi me rawa kina ni da rawata na veivakalougatataki. Na ivakatakilakila [e vakatavulica o] Pita sa ikoya na veivutuni ka papitaiso me bokoci kina na ivalavala ca, vata kei na yalayala ni isolisoli ni Yalo Tabu; ka sega tale ni dua na kena sala sa ikoya me rawati kina na isolisoli ni Yalo Tabu [raica Cakacaka 2:38].

“E tiko na kedrau duidui na Yalo Tabu kei na isolisoli ni Yalo Tabu. E a ciqoma o Konilio na Yalo Tabu ni bera na nona papitaiso, ka sai koya na kaukauwa ni veivakauqeti ni Kalou kivei koya me baleta na dina ni Kosipeli, ia e a sega ni rawa me ciqoma na isolisoli ni Yalo Tabu me yacova sara ni sa papitaiso. Kevaka beka me a sega ni taura vei koya na ivakatakilakila oqo se cakacaka tabu vakalotu, na Yalo Tabu ka a vakauqeti koya me baleta na dina ni Kalou, e rawa me a biuti koya. [Raica Cakacaka 10:1–48.] Me yacova sara na gauna e vakamuria kina na veicakacaka tabu vakalotu oqo ka ciqoma na isolisoli ni Yalo Tabu, mai na veitabaki ni liga, me vaka na lewa ni Kalou, ke a sega ni rawa me vakabula na tauvimate se vakarota na yalo ca me lako tani mai vua e dua na tamata, ka talairawarawa vua; e baleta ni yalo e rawa me ra kaya vua, me vaka era a cakava kivei ira na luvei Siva gonetagane: ‘Ko Paula keimami sa kila kei Jisu keimami sa kila, ia ko cei koi kemudou?’ [Raica Cakacaka 19:13–15.]”¹⁵

Ena Tiseba ni 1839, ena nodrau a tiko voli e Washington, D.C., me vakasaqarai na kena vakadodonutaki na cala ka a vakayacori kivei ira na Yalododonu e Missouri, erau a vola o Josefa Simici kei Elias Higbee na veika oqo kivei Hyrum Smith: “Ena neitou veitalanoa vata kei na Peresitedi [kei Amerika], e a vaqaqai keirau ena kena duidui na neirau vakabauta vakalotu mai na veivakabauta vakalotu tale eso ena gauna oqo. E kaya o Baraca Josefa eda duidui ena ivakarau ni papitaiso, kei na isolisoli ni Yalo Tabu mai na veitabaki ni liga. Keitou nanuma ni veivakasama kece tale eso era rawati mai na isolisoli ni Yalo Tabu.”¹⁶

Na isolisoli ni Yalo Tabu e kauta mai na vakacegu, reki, veidusimaki vakalou, kei na veisolisoli tale eso ki na noda bula.

“Keimami vakabauta na isolisoli ni Yalo Tabu e sa rekitaki tiko ena gauna oqo, ena kena levu me vaka na veigauna ni iApositolo; keimami vakabauta ni sa ikoya [na isolisoli ni Yalo Tabu] e yaga sara ena kena caka kei na kena vakarautaki na Matabete, ni sega ni rawa me lesi e dua na tamata me tawana e dua ga na itutu ni veiqaravi ke sega na ka oqo; keimami vakabauta talega na isolisoli ni vosataka na vosa tani eso, na parofisai, na ivakatakila, na raivotu, na veivakabulai; kei na veika oqori era sega ni marautaki kevaka e yali na isolisoli ni Yalo Tabu. Keimami vakabauta ena gauna e liu sa vosa ga na tamata yalosavasava ni Kalou me vaka sa vakauqeti ira na Yalo Tabu, kei na gauna oqo era sa vosa ga na tamata yalosavasava mai na ivakavuvuli vata ga; keimami vakabauta na Yalo Tabu me dua na dauveivakacegui ka dua e dau colata na ivakadinadina, ena vakavulici kemudou ena veika kecega kau a vosataka, liutaki keda ena veika kecega e dina, ka vakatakila vei keda na veika e sa bera ni yaco; keimami vakabauta ni ‘sa sega ni dua na tamata me kila ni o Jisu na Karisito, ia mai na Yalo Tabu ga.’ [Raica 1 Korinica 12:3.] Keimami vakabauta ni vakakina [oqo na isolisoli ni Yalo Tabu] ena kena taucoko, kei na kaukauwa, kei na cecere, kei na lagilagi.”¹⁷

Ena Feperueri ni 1847, voleka ni oti e tolu na yabaki na nona a vakamatei o Parofita Josefa Simici, e a rairai vei Peresitedi Brigham Young ka solia vua na itukutuku oqo: “Tukuna vei ira na tamata me ra yalomalumalumu ka yalodina ka qarauna me ra maroroya na Yalo ni Turaga ni na liutaki ira vakadodonu. Me ra qarauna ka kakua ni vuki tani mai na domo malumu lailai; ena vakatavulici [iko ena veika] mo cakava kei na vanua mo lako kina; ena vuataka na vua ni matanitu. Tukuna vei ira na veitacini me ra dolava tu na lomadra ki na veivakauqeti baleta ni gauna e lako mai kina kivei ira na Yalo Tabu, e sa na vakarau tu na lomadra me ciqoma. E rawa me ra kila na duidui ni Yalo ni Turaga mai na veiyalo kece tale eso. Ena vakasolokakanataka na vakacegu kei na reki ki na yalodra, ka na kauta laivi na yaloca, veicati, kocokoco, veisaqasaqa, kei na ivalavala ca taucoko mai yalodra; kei na nodra gagadre taucoko me ra na cakava na veika vinaka, kauta mai na yalo savasava, ka tara cake na matanitu ni Kalou. Tukuna vei ira na veitacini kevaka era na vakamuria na Yalo ni Turaga era na lako vakadodonu.”¹⁸

Vakatutu ni Vuli kei na Veivakavulici

Taurivaka veivakasama oqo ni ko vulica na iwase ni ivola oqo se ni ko vakavakarau mo veivakavulici., Raica na tabana vii–xii me ikuri ni veivuke.

Raica lesu na tabana e 99–101 ena nona vakaraitaka kina na Parofita o Josefa Simici na veika e vakila ena gauna erau papitaiso kina vata kei Oliver Cowdery kei na gauna e a papitaiso kina o tamana. Na cava soti e tu ena nomu vakanananu ena nomu a papitaiso se ena nodra a papitaiso na lewe ni nomu matavuvale se itokani? Vakasamataka mo volaitukutukutaka na veivakanananu oqo ena nomu ivolaniveisiga se itukutuku makawa ni bula.
Na veitukutuku ena tabana e 101–05 era a kau mai na itukutuku nei Josefa Simici kivei ira na tamata era a sa papitaiso oti. Na cava na vuna o nanuma kina ni o ira na lewe ni Lotu era sa papitaiso oti e gadrevi me dau tukuni tale vei ira na veidina oqo? Na rai e loma vovou cava soti o sa bau rawata ena nomu vulica na veivakavuvuli oqo?
Na cava e rawa mo kaya kivua e dua na itokani e vakabauta ni papitaiso e sega ni yaga? Na cava e rawa mo kaya kivua e dua na itokani e vakabauta ni gone dramidrami e gadrevi me papitaiso? (Eso na kena ivakaraitaki, raica na tabana e 105–06
Wilika na ikarua ni parakaravu taucoko ena tabana e 105. Na cava na vuna “e sega kina na betena” na papitaiso ke yali na isolisoli ni Yalo Tabu? E kaya o Josefa Simici, “E tiko na kedrau duidui na Yalo Tabu kei na isolisoli ni Yalo Tabu” (tabana e 106). Mai na veika o sotava, na veivakalougatataki cava soti e rawa me ra lako mai ena noda bula ena gauna e tu kina vei keda na isolisoli ni Yalo Tabu?
Raica lesu na ikarua ni parakaravu ena tabana e 106. Na cava na vuna e duidui sara kina vakalevu na ivalavala ni papitaiso ena kedrau maliwa na Lotu vakalesui mai kei na veimatalotu tale eso? Na cava na vuna e dua kina na duidui levu na isolisoli ni Yalo Tabu? Ena veigaunisala cava “era tiko kece kina ena isolisoli ni Yalo Tabu… na veivakasama kece tale eso”?
Vulica na iotioti ni parakaravu ena iwase (tabana e 109). Vakasamataka e rawa vakacava mo bula kilikili mo ciqoma kina ka kidava na veivakauqeti ni Yalo Tabu.

iVolanikalou Veisemati: Joni 15:26; Roma 6:3–6; 2 Nifai 31:13; 3 Nifai 11:18–41; Moronai 8:1–23